MATIEE 'BƆGƲ 24
24
'Pɩ -yɛ sɛ yɩla jie yʋlɔyʋlʋ -ʋ ji-a jie Zezwi yɛ ʋ gbʋ gba
1Zezwi 'wlʋ-ɔ -ma -Lagɔbudu 'kadʋ 'mö, ɔ-ɔ mö 'le 'n ɔ 'wʋbhlinɩngwa jio-a yawʋ nyini wa 'kɔ -Lagɔbuduo 'jinanɔ 'ji tuluanɩɛ yɛ. 2Ɔ nɛ -bha wa de naa: “-Lagɔbudu a jɩnɩ-ɛ -la 'wʋ, wla-a wa jiʋ -bha. Ʋ kpiyi -bhlʋ 'tɩɛ 'bhë 'na glu tʋ-ʋ.” 3Zezwi gba-a -sɩbha 'bhë, 'n ɔ ji-e -ma Olivieswie -gɔgɔgbʋ 'klʋ sɛ -glɩɛ mö. Ɔ 'wʋbhlinɩngwaa 'nyize nyinio-a yawʋ 'n wa jio-a ngli 'jɩbha naa: “-Ɩɩ gbʋ -n gba-a -la, -zlɩmɩ ɩ ji-a 'wʋ 'wlenɩɛ 'nɩ? -Na nyininyinie 'kadɛ -yɛ 'pɩɛ sɛyɩlade 'sɔ -yɛ nyinie ji-e, sa -a jiɩ-a 'mö jɩblɩjɩblɩnɩɛ 'nɩ?”
4Ɔ nɛ naa: “A möna 'mö nɩkpa jiya-a yʋlʋ nʋ. 5-Wʋʋ yɛ-a, nɩkpaa -bɛ ji-a jie, wa 'yɛ-a na 'nglɩ -su, wa 'yɛ-a nʋ naa: Puanyɔ -ɔ -Lagɔ -sa-a -bha 'mɔ wa glɩnɩ-a nʋ. 'N wa 'yɛ-a nɩkpaa -bɛ yʋlʋ nʋ. 6-Bhaa do'o tʋɩ wa -wʋ-a gwɩ 'le -yɛ -mɩ wa ji-a gwɩ 'sɔɔ wɛlɩ a ji-a 'nʋɔ. A -kɩɩ -sɩbha 'nʋ, dlɩ 'na-a wlɔnʋya 'mö -nɩ. -Wʋʋ yɛ-a, 'mɩ -ɩ la'a mɩ-ɩ ji-a 'yu -gaa tɛnyɩ 'bhë, ɛ 'na -bha -gaganɩlɩ'ɩ 'pɩɛ sɛyɩlade glɩnɩ. 7Nɩkpa tʋ wa ji-a gwɩɛ, dʋdʋ -mʋmʋ -gömöö nɩkpa -yɛ -mʋmʋ -gömöö nɩkpa 'sɔ 'yɛ-a 'ji gögönɩ wa 'yɛ-a tʋ gwɩ. -Ma dʋdʋɩɛ -bɛ -gömö ngɔmʋ-ʋ ji-e -ma jie, -ma -mɩmɩɛ -gömö dʋdʋkpata 'yɛ-a tɛlɩ. 8'Mɩ -ɩ la'a 'bhuo, yʋlɔyʋlʋ 'kadʋ -ʋ ji-a jie, ʋ tɛnɩde -bha.
9-Bhaa do'o, abha na -lʋa, -ma nɩkpa cɛ'ɛ wa jiya-a zʋɔ, wa 'kaya 'zwɩ zia, wa 'kaya 'lɩbha, na -lʋaa glɩnɩ yɛ nɩkpa bhuo-o jiya-a 'jɛbhɛlɩɛ. 10Ɩ yɛ a gla'aa -mʋmʋa -bɛ na gbʋ ji-a dlɩ'ɩ 'bhönɩɛ, wa 'yɛ-a 'jɛbhɛlɩjɛbhɛlɩnɩ, wa 'yɛ-a 'pɛlʋ 'papanɩ -ma na tʋngwa cɛ'ɛ. 11Nɩkpa -Lagɔ 'nɩ-a tia 'bhë -wa la-a wajɩ -Lagɔɔ 'mögbanɩngwa, wa -bɛ ji-a jie, wa 'yɛ-a nɩkpaa -bɛ yʋlʋ nʋ. 12'Jinylolie zumanɩ yɛ nɩkpa -mʋmʋaa -bɛ, wa linɩkpaa 'jɩbhajɩbhʋ ji-a dlɩ zɔmö bhɩa. 13-Ma yʋlɔyʋlʋɛ la'aa 'mö, -ɔ -yɛ -ma dlɩ nyʋnanɩ 'bhlonʋde -yɛ nyini, mɔ-ɔ ji-a 'pʋɔ. 14-Lagɔɔ nyininyinipɩ 'wʋɔ 'tɩtɩɛ -tɩtɩ la'a, dʋdʋkpataa këti 'bhuo -gömö wa jiɩ-a gbanɩɛ -gwlɩ 'bhuo 'yɛ ɩ bhle'e -ji 'bhë 'bhlonʋde 'yɛ nyini.
Zelwizalɛmöö yʋlɔyʋlʋ 'kadʋ
15Nɩkpɛ -ɔɔ gbʋ -Lagɔɔ 'mögbanɩnyɔ Daniɛlɩ gba la-a, -ɔ glɩnɩ-a zagblɩkanyɔ, -ɔ nyimanɩ-a -li 'bhuo 'ji mɔ-ɔ ji-a jie, bhle -a glɩnɩ-a -Lagɔɔ 'nyizee -la ɔ 'ka-a 'mö pla. Wɛlɩ la'a, zɔmö ɩ ka -bha. Ɩ yɛ -ɔ -kɩɩ zɛlɩ 'le -wʋ ɔ möna 'mö ɔ 'kɩ 'mö 'nʋ. 16-Bhaa do'o -wa -yɛ -ma Zwidee dʋdʋ -gömö -wʋ, wa fito, wa 'yɛ -ma -gɔgɔgbɩ 'klʋ -gunʋ. 17-Ɔ -yɛ -bha 'ligbë'ë glɩ, -bha -yɛ nyini ɔ 'na-a pla -ma ɔ -budu'u ɔ 'na-a 'libhï ɔ -li 'wʋ -nɩ, ɔ fito 'gamö. 18-Ɔ -yɛ 'yɛ -ma 'lagblɛ'ɛ -wʋ, -bha -yɛ nyini, ɔ 'na-a mö -ma glɔ'ɔ ɔ lokwi 'wʋ -libhï kwla'a -nɩ. Ɔ fito 'gamö.
19-Bhaa zlɩa la'a 'mö, nɩkplagangwlɩ -yɛ 'gwiee cɛɛkangwlɩ 'sɔɔ -li ngazɩ'ɩ ɩ ji-a -bhïë tenyi. 20A 'pa -Lagɔ -bɛlɩ a -gugue ji-e wotlokojido'o -yɛ -gwlɛnɩzlɩ 'sɔ glɩnɩ. 21-Wʋʋ yɛ-a, -bhaa zlɩa la'a 'mö, zwɩ 'kadɛ -ɛ ji-a nɩkpa zie 'na 'wʋpalɩleyi -ka. -Lagɔ -yɛ la 'pɩ sɛ -la, -sɩbhaa 'zwɩ 'nɩ-ɛ -bhla nɩkpa zi. 'Mɛ zwɩ la'a -yɛ 'plɩ-ɛ, ɛ 'wlʋnʋleyi 'na ji. 22-Lagɔ 'nɩ-ɛ 'jɩbha nɩkpa 'bhuo 'yɛ sɛ yɩlaa yɛ ʋ ji-a 'mɩ 'zwɩzizlɩa la'a 'wʋ -sanɩɛ. Nɩkpa ʋ -sa-a -bhaa yɛ ʋ jiɩ-e -sɩbha 'wʋ -sanɩɛ, 'n ɛ nɩ la -sɩbha glɩnɩ, nɩkpa 'bhuo sɛ wa ji la-a yɩla. 23-Bhaa do'o nɩkpɛ -yɛ nʋ naa: Puanyɔ -ɔ -Lagɔ -sa-a -bha mɔ-ɔ la'a, -mʋmɔ -yɛ 'yɛ nʋ naa mɔ -wʋ-ɔ ma'a nʋ-ɔ, a 'na-a lɩ 'dɩ -nɩ. 24-Wʋʋ yɛ-a, nɩkpa ji-a jie, wa 'yɛ-a nʋ naa: Puanyɔ -ɔ -Lagɔ -sa-a -bha 'mɔ wa glɩnɩ-a nʋ, -mɩlado'o -Lagɔ 'nʋa-a -bha -sa. -Mʋmʋa 'yɛ-a nʋ naa: -Lagɔɔ 'mögbanɩngwa wa glɩnɩ -bha nʋ, -mɩlado'o -Lagɔ 'nʋa-a tia. Bhatɩɛ -bɛ wa ji-a nɛ nʋɔ, 'n wa 'yɛ-a nɩkpaa -bɛ yʋlʋ nʋ. -Lie -bɛ wa ji-a 'mö jɩla wa 'yɛ -Lagɔɔ -lʋa 'bhï yʋlʋ nʋɔ yɛ. 25Wʋ yɛ n kaya 'dɩ -sanɩ 'gamö 'bhë.
26Ɩ yɛ nɩkpɛ kaya 'dɩ 'nyɛ naa: Puanyɔ -ɔ -Lagɔ -sa-a -bha -ma 'mïse 'klʋ ɔ -wʋ-a nʋ-ɔ, a'a mö -ma -nɩ. Wa -yɛ 'yɛ nʋ, ɔ 'zuzɔ-ɔ de -mɩmɩ nʋ-ɔ, a'a -kɩɩ dlɩ 'wʋ -nɩ. 27-Wʋʋ yɛ-a, sa -dɛyɩkö 'nɩ-ɛ la'a nglagatapɛ 'bhuo 'wʋ ngöna, Nɩkpɛɛ 'Guo jijizlɩ -yɛ nyini-e, -sɩbha ɔ ji-a -wʋɔ nɩkpa 'bhuo 'kɔ-a yɩlɩ. 28A jɩblɩnɩ sɛ naa, la nɩmɛɛ -gazɛ pö-a, -bha köka 'titanɩ-a 'wlu.
Zezwi yɛ ɔ nyininyinie 'kadɛɛ gbʋ gba
29-Ma ɩ 'mö, 'mɩ 'zwɩzizlɩa la'a -yɛ 'plɩ 'bhë, 'ylʋzalʋ ji-a 'ji julumanɩɛ, 'cʋ 'na-a 'mö lɩ 'sɔ. -zɛlɩ 'yɛ-a -ma ghayɩ 'bhö-ö, ɩ 'yɛ-a bhli, 'n -ma -Lagɔtapɛ 'wʋɔ -li 'yɛ-a bidibidi 'mö gbʋgbɔ. 30-Mɩ la'a 'bhuo -yɛ 'plɩ 'bhë, -ma -Lagɔtapɛ'ɛ Nɩkpɛɛ 'Guo jɩblɩna 'yɛ-ɛ -ma ghlanɩ, 'n -ma dʋdʋkpata -gömöö -gwlɩ 'bhuo 'yɛ-a kplenɩ, wa 'yɛ-a 'köklɩa cɛ 'pa, 'n wa 'yɛ-a -ma -Lagɔtapɛ'ɛ Nɩkpɛɛ 'Gu yɩlɩ, ɔ glɩ gbiluko -gömö, 'n ɔ 'yɛ-a ji, ɔ -su ɔ 'mötɛnɔ 'kadʋ -yɛ ɔ 'ghlinɔ 'kadʋ 'sɔ, nganɔ 'kʋa-a 'lɩbha, wa 'yɛ-a ngazɩli nʋ. 31Ɔ -su ɔ -Lagɔzuzuku, lɛglɛ 'kadɛ-ɛ gba 'le 'n ɔ 'kɩ-a -ma dʋdʋkpataa këti 'bhuo -gömö tia, 'n ɩ 'yɛ-a ɔ -lʋa 'bhuo ye mö ɩ 'kʋa-a de -bhlʋ 'wlu 'titanɩ.
Zezwi yɛ figösuo 'ji palɩ
32-Ɩ la'a figösuo wɛlɩ slʋnʋya-a, a 'nʋɩ 'jinanɩswɩ'ɩ 'mö. 'Mʋ su -yɛ tɔpɔ 'le -wʋ-ɔ, a -ji sɛ naa gude -wʋ-a nyini 'le. 33-Sɩbha na wɛlɩ -wʋ-a 'gamö. A -yɛ 'mɩ -li la'a 'bhuoo 'wʋwlenɩde yɩlɩ 'le -wʋ-ɔ, a jɩblɩnɩ sɛ naa, Nɩkpɛɛ 'Guo jijide -wʋ-a nyini 'le. 34'Dɩɛ -dɩ n nyɛya -bha naa: -Zɩnɩ'ɩɛ nɩkpa -wa -bhlɩ-ɛ la'a 'na tlɩ, 'n wa nɩ -lɛ -ɩ la'a 'bhuo yɩlɩ 'bhë. 35-Lagɔtapɛ -yɛ dʋdʋkpata 'sɔ sɛ ɩ ji-a yɩla, na nglie wɛlɩ 'na -nɩ sɛ yɩla 'lɩlɩlɩ.
36Zlɩɛ -mɛɛ 'mö ɩ ji jinɩɛ -bɛ 'nɩɛ -ji, -Lagɔzuzukuo 'bhï 'nɩɛ -ji, -Lagɔɔ 'Guo 'bhë 'nɩɛ -ji, na -Tɩbha -Lagɔ -bhlʋ tɩ-ɩ -jie -bha.
A pö a jɩ 'wʋ
37Nɩkpɛɛ 'Gu -yɛ jie ji-e, -ɩ la'a -ɩ 'plɩ la-a -benyido'o Nowee do'o mɩ-ɩ ji-a 'plɩɛ. 38Laa do'o -Lagɔ nʋ-a -zɛbhlɛ ʋ ji-a zɔmö 'paa, 'n ʋ ji-a Nowe 'dɩ 'nyɛ naa: Ɔ nʋ bato nɛ. -Bhaa do'o nɩkpaa gbʋ 'nɩ -ma -wʋ, wa li, wa nɩma nʋɩ, wa kwa 'ngwlɩ, 'ngwlɩ mö ghlɩa, -mʋmʋa zʋ wa 'gwie ghlɩa, -mʋmʋa tɩmö wa 'gwiee 'ngwlɩ. Wa-a -sɩbha nʋ 'le, Nowe bhɩa-a bato 'ji, 'n ɔ ji-e -ma ʋ 'mö pla. 39Wa'a-a -luo sɛ jɩblɩnɩ 'n -zɛbhlɛ jua-a 'mö bhuluo, 'n ɛ jua-a sɛ -sa. -Sɩbha Nɩkpɛɛ 'Guo jijie ji-a nɩkpa 'mö bhuluoo. 40-Bhaa do'o, nɩkpa 'sɔ -yɛ -ma 'lagblɛ'ɛ libho nʋ 'le -wʋ-ɔ, -bhlʋ ji-a 'wʋ 'libhïo, -mɔbha 'yɛ -bha tʋ-ʋ. 41'Ngwlɩ 'sɔ -yɛ -digbë -bhlʋ 'mö libhïnɩ 'le -wʋ-ɔ, -bhlʋ ji-a 'wʋ 'libhïo, -mɔbha 'yɛ -bha tʋ-ʋ. 42Ɩ yɛ a'a ngɔmö -nɩ, -wʋʋ yɛ-a, zlɩ -ɛɛ 'mö a 'Bhitɩbha ji jie a 'nɩɛ -ji. 43A 'nʋ -ɩ la'a 'mö 'jinanɩswɩ'ɩ, 'ligbëlowli -yɛ la 'winyɔɔ jinɩde -ji-e, ɔ ji la -ga, ɔ 'na 'winyɔ cɛ yawʋ -sa ɔ 'yɛ -ma ɔ -budu'u pla. 44Ɩ yɛ a pö 'yɛ -sɩbha -nɩ ajɩ 'wʋ, -wʋʋ yɛ-a, la a'a-a 'wʋ pönɩ -bha Nɩkpɛɛ 'Gu ji-a jinɩɛ.
A nʋ 'jinanɩswɩ'ɩ -Lagɔlibho
45Nɩkpɛ -yɛ nyɩgbajʋlʋɩɛ -bɛ -ka, ɔ -yɛ lowlu'u möö ji-e, nyɩgbajʋlʋ ɔ 'tɛnɩ-ɛ -ma wa gla'a dlɩ -ɔ ka-a 'nagö, -ɔ nʋ-a 'jinanɩswɩ'ɩ libho, 'mɔ ɔ tɩ-a -mʋabha yawʋ, lilide -yɛ nyini, ɔ 'kʋa lili cɛ dlinɩɛ yɛ. 46Ɔ 'bhitɩbha -yɛ lowlu'u 'bhö-ö ɔ -kɔɔ -sɩbhaa nʋnʋlɩ'ɩ ghlɩ-ɛ, 'mɔ nyɩgbajʋlʋ la'a 'mʋna 'lɩbhɔ. 47'Dɩɛ -dɩ n nyɛya-a sa'a naa, ɔ -li 'bhuo ɔ jio-a 'ye 'nyɛɛ ɔ 'kɩ nyini. 48'N 'mɔ nyɩgbajʋlʋ la'a -yɛ nɩkpɛ -zoko glɩnɩ, ɔ -yɛ -ma ɔ dlɩ zɔmö nʋ naa, -ma na 'bhitɩbha -wʋ-a gwlɛ 'le nʋ-ɔ, 49ɔ -yɛ ɔ linyɩgbajʋlʋɩ 'wʋ gblo ɔ -kʋa bhɔtɔ, ɔ -yɛ nʋnɩmangwa 'sɔ -yɛ go 'panɩ, wa -yɛ lililibho -yɛ nʋnɩmalibho 'sɔ -ka, 50zlɩ -ɛ nyɩgbajʋlʋ la'a 'nɩ la-a 'wʋ pö ɛ 'mö ɔ 'bhitɩbha ji-a jinɩɛ. 51Ɔ -yɛ ji-e, gbʋ 'kadʋ ji-a nyɩgbajʋlʋ la'a ghlɩɛ, ɔ 'kɔ-a 'kwlɩsɔkangwaa yʋlɔyʋlʋɛ 'mö kʋa, -ma ɔ ji-a winɩɛ ɔ 'yɛ-a gla 'mö li.
Currently Selected:
MATIEE 'BƆGƲ 24: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
