MALƖKÖÖ 'BƆGƲ 3
3
Zezwi yɛ nɩkpɛ -bhlʋ göpö
1'N Zezwi ji-e -ma -Lagɔbudu'u nimï mö. Nɩkpɛ -bhlʋ -wʋ la-a -ma, ɔ kɔtɩkpa -yɛ a 'yɛɔ la -bha. 2Ɔ pla-a -ma, -wa bhuo-o su la-a -ma wa -wʋɔ 'ji 'namanɩ 'le, 'n ɔ -yɛ nɩkpɛ la'a -gwlɛnɩzlɩ göpöö jie yɛ, wa 'kɔ gbasanyɔ la, wa 'kɔ -zijle tunʋɔ yɛ. 3Nɩkpɛ -ɔɔ kɔtɩkpa 'yɛɔ la-a, 'n Zezwi jio-a wɔzɩ. Ɔ nɛ naa: “-Sɔ 'wʋ, 'nɩgbö -la wa 'bhuoo nyɩdɩ yɛ.” 4'N ɔ jua-a ngli 'jɩbha naa: “Sa -aa gbö gba-a -a nʋ -gwlɛnɩzlɩ 'nɩ? -A nʋ -lie -li-a 'nɩɩ -a nʋ 'jinyloli-a? -A pua -aa linɩkpɛ 'nɩɩ -a lɩbhɔ-a? -Ɩ la'a 'sɔɔ gla'a, -mɩ -aa gbö nʋ-a -a nʋ 'nɩ?” Zezwi 'jɩbhʋa-a sa'a ngli-e, wa 'bhuo ngu wa zʋ-a yɛ. 5'N ɔ jua-a yʋlʋswɩ'ɩ -gömö yɩlɩ. Wa dlɩa 'mötunʋ yɛ ɔ dlɩ-ɛ 'yɛ jili 'le, ɔ nɛ -bha nɩkpɛɛ de naa: “Plu -na kɔtɩkpa 'mö.” 'N ɔ jia-a 'mö plu, 'n a ji-a 'pʋ. 6-Bha -gaganɩlɩ'ɩ, 'n falizɩɛ -wa -wʋ la-a -bha ji-a 'pɩ 'wlʋ, 'n wa ji-a -zakpa wa la-a Elodɩɛ -zakpa -ma ghlɩ, sa wa 'yɛ-a 'mö zʋzʋnʋ wa 'yɛ Zezwi 'lɩbha, 'n wa -nyʋa 'sɔ ji-a ɩ ylɩ pɛ.
Zezwi yɛ nɩkpaa -bɛ göpö
7Zezwi -yɛ ɔ 'wʋbhlinɩngwa 'sɔ 'bhö-ö -bha, 'n wa ji-e -ma Galilee gïnyie 'pɩa 'bɩ mönɩ. Nɩkpaa -zakpö -ganʋa, 'n wa ji-a mö. 8-Mʋmʋa 'bhönɩ Galile -yɛ Zwide 'sɔɔ -gwlɩ yawʋ, -mʋmʋa 'bhönɩ Zelwizalɛmö, -mʋmʋa 'bhönɩ Idumee -gwlɩ -yɛ Zludɛɛ 'nyi -gömöö -gwlɩ 'sɔɔ -gömö, 'bhugugwlɩ wa la-a Tilɩ -yɛ Sidɔ 'sɔ, -mʋmʋa 'bhönɩ -ma ɩ yawʋɔ -gwlɩ -gömö. Nɩkpaa -zakpö la'a -sɩbha, -ɩ la'a 'bhuo Zezwi -wʋ-a nʋ 'le, ɩ 'dɩ wa 'nʋ -bha, 'n wa ji-e -bha ɔ yawʋ ji. 9Nɩkpaa -zunʋ yɛ Zezwi nɛ -bha ɔ 'wʋbhlinɩngwaa de naa: “A la'a 'gɔlʋ -bhlʋ, n 'kʋ 'mö -gbla nɩkpa ji'i-e 'mö nyɔnʋ.” 10-Wʋʋ yɛ ɔ gba-a -sɩbha, nɩkpaa -bɛ ɔ göpö-aa yɛ, -mʋa la'a gwi -wʋ-ɔ -bhla 'lɩbha 'le, wa 'kɔ cɛ zʋɔ yɛ 'wʋ wa 'suluo -bha. 11Nɩkpa -wa ka-a 'jinylozuzuku -gömö wa -kɔɔ yɩlɩ -bha ɔ dlɩ'ɩ wa pa-a -kokomunigbö glu, 'n wa nʋ-a: “-Lagɔɔ Gu -n glɩnɩ -bha.” 12Wa -yɛ -sɩbha gba-a, 'n Zezwi 'nyɛnɩ-a yʋlʋ 'mö 'jinylozuzuku 'dɩ naa, ɩ 'na-a bia ɔ 'dɩ yɛ -nɩ.
Zezwi yɛ ɔ tiatiangwa kugbïa 'sɔ -bha -sa
13-Mɩ la'a 'plɩ-a 'bhë, 'n Zezwi ji-e -ma -gɔgɔgbʋ -bhlʋ 'klʋ -gbla. Nɩkpa -wa ɔ 'jɩbha-a ɔ wɔzʋa-a, 'n wa jio-o -ma ghlɩ. 14-Ma wa gla'a 'n ɔ ji-e -ma nɩkpa kugbïa 'sɔ -sa ɔ -nyʋa 'sɔ 'yɛ 'kɔmʋʋ 'wʋ -bhlinɩɛ yɛ, 15ɔ 'kʋa tia, wa 'yɛ -Lagɔɔ 'tɩtɩɛ -tɩtɩ kwa, wa 'yɛ 'yɛ ɔ 'gba -gömö -ka wa 'yɛ 'jinylozuzuku kpëti. 16Nɩkpa la'a kugbïa 'sɔ ɔ -sa-a -sɩbha -bha wa nglɩ-ɛ la'a: Simo, -ɔ Zezwi 'pa-a Piɛlɩ. 17Zebedee 'gwie 'sɔ, Zakö -yɛ Za 'sɔ, -wa ɔ 'pa-a Bʋanɛzɛzɩ, 'mɩ 'nglɩɛ zɔmö-ö -yɛ-a -dɛɛ gwie. 18Adle-e, Filipö-ö, Batlemi-e, Matie-e, Toma-a, nɩkpɛ -bhlʋ wa la-a Alɩfee 'gu Zakö-ö, Tade-e, Simo -ɔ -wʋ la-a -ma 'bhugwiee ghayɩpangwa gla'a, 19'bhë Zwida Isɩkaliɔtɩ, -ɔ ji-a Zezwi -ma ɔ tʋngwa cɛ'ɛ 'pɛlʋ 'paa wa 'kɔ 'lɩbhaa yɛ.
Zezwie -lowlengwa nɛ ɔ 'wlu 'mö yɛ 'ji nyimonʋ 'bhë
20Zezwi -sa-a -bha ɔ 'wʋbhlinɩngwa kugbïa 'sɔ -kpɔ, 'n ɔ -nyʋa ji-a 'ligbë'ë nimï mö. 'N nɩkpa -bebe ji-e -bha 'sɔdo'o ɔ yawʋ 'wlu 'titanɩ. Ngo wa yeo-aa yɛ, Zezwi -yɛ ɔ 'wʋbhlinɩngwa 'sɔ 'nɩ la-a 'mö bhɛlɩ wa 'yɛ lie 'bhëë 'fʋ. 21Ɩ -wʋ-ɔ -sɩbha 'plɩ 'le, Zezwie -kosu 'jie nɩkpa 'nʋɩ-a, wa -sɔ-a 'wʋ, 'n wa jio-a ye mö. -Wʋʋ yɛ-a, wa nɛ: “Ɔ 'wlu mö-ö nyimonʋ-a 'ji.”
Zezwi yɛ -Lagɔɔ gböö nglipangwaa wɛlɩ -gömö -sa
22-Lagɔɔ gböö nglipangwa -wa 'bhönɩ-ɛ -ma Zelwizalɛmö, -wa -wʋ la-a -bha, wa nɛ naa: “Zezwi 'jinylozuzukuo 'bhitɩbha Bɛlɩzebulɩ ɔ ka-a -gömö, mɔ-ɔ 'nyɔ-a 'gba wʋ yɛ ɔ -wʋ-a nɩkpa 'jinylozuzuku -gömö kpëti 'le.” 23Zezwi wɔzʋa-a, 'n ɔ jua-a 'nine 'panɩ, ɔ nɛ naa: “Samɩ Sata bhɛlɩ-a a 'yɛ a lisata 'mö kpëtikpëtinɩ 'nɩ? 24Dʋdʋ -bhlʋ -gömöö nɩkpaa 'bhïë 'nyize -yɛ 'mö donʋ, wa -yɛ tʋ gwɩ, 'mʋ dʋdʋ sɛ ʋ yɩla -bha. 25-Kosu -bhlʋ 'jie nɩkpaa 'nyize -yɛ 'yɛ 'mö donʋ, wa -yɛ tʋ gwɩ, sɛ 'mʋ -kosu yɩla -bha. 26Ɩ yɛ Sata -yɛ ajɩ 'mö 'bhɩlɔnʋ, ajɩ a tɩ-a 'wlumö, sɛ a ji-a yɩla. 27Nɩkpɛ 'nɩ bhɛlɩ ɔ 'yɛ -ma kalɩkalɩnyɔɔ -budu'u pla ɔ 'yɛ -maa -li 'wʋ 'libhï, 'n ɔ nɩɔ -lɛ gwa 'bhë. Ɔ -kɔɔ gwa-a, -bhaa do'o, ɔ ji ɩ 'bhuo 'wʋ 'libhï. 28Sa'a n gba 'mö-ö sa'a a de naa: 'Jinyloli la'a 'bhuo nɩkpa nʋ-a, 'jinylɔwɛlɩɛ -gɔpö 'bhuo wa gba-a, -Lagɔ ji ɩ gbʋ 'ji 'tatinɩ. 29'N nɩkpɛ -yɛ Zuzu 'Wlawla ngli nyimanɩ, 'mɩ ɔ -nɩ 'jinyloli la'a, -Lagɔ 'na ɩ gbʋ 'ji 'tatinɩ 'lɩlɩlɩ, 'kɔgwlɛswɩ'ɩ ɩ gbʋ jio-a -gömö -wʋɔ.” 30Wa nɛ 'jinylozuzuko Zezwi ka la-a -gömöö yɛ ɔ gba-a -sɩbha wa de.
-Wa glɩnɩ-a Zezwie nyʋaa -nyʋa
31Zezwi-e -bhla wɛlɩ la'a gba 'le, 'n ɔ -da -yɛ ɔ -dagwie 'sɔ ji-a ji. Wa 'nɩgbö -ma 'pɩ, 'n wa jio-a nɩkpɛ 'wʋ tia naa, ɔ wɔzɩɔ. 32Nɩkpaa -bebe glɩ -bha ɔ yawʋ, 'n -ɔ wa tio la-a 'wʋ jio-a 'dɩ -sanɩ kwla'a ji naa: “-Na -da -yɛ -na -dagwie 'sɔ 'nɩgbö -ma 'pɩ, wa -wʋmö wɔzɩ 'le.” 33Zezwi nɛ naa: “-Mɔ -yɛ-a na -da -yɛ na -dagwie sɔ 'nɩ?” 34Ɔ yɩlɩ-a nɩkpa -wa binɩɔ la-a 'wʋ -gömö, ɔ nɛ naa: “A yie! Na -da -yɛ na -dagwie 'sɔ mʋa-a la'a. 35-Wʋʋ yɛ-a, -ɩ na -Tɩbha -Lagɔ 'jɩbha-a -ɔ nʋɩ-a, mɔ-ɔ -yɛ-a na -da, mɔ-ɔ -yɛ-a na -dagu.”
Currently Selected:
MALƖKÖÖ 'BƆGƲ 3: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
MALƖKÖÖ 'BƆGƲ 3
3
Zezwi yɛ nɩkpɛ -bhlʋ göpö
1'N Zezwi ji-e -ma -Lagɔbudu'u nimï mö. Nɩkpɛ -bhlʋ -wʋ la-a -ma, ɔ kɔtɩkpa -yɛ a 'yɛɔ la -bha. 2Ɔ pla-a -ma, -wa bhuo-o su la-a -ma wa -wʋɔ 'ji 'namanɩ 'le, 'n ɔ -yɛ nɩkpɛ la'a -gwlɛnɩzlɩ göpöö jie yɛ, wa 'kɔ gbasanyɔ la, wa 'kɔ -zijle tunʋɔ yɛ. 3Nɩkpɛ -ɔɔ kɔtɩkpa 'yɛɔ la-a, 'n Zezwi jio-a wɔzɩ. Ɔ nɛ naa: “-Sɔ 'wʋ, 'nɩgbö -la wa 'bhuoo nyɩdɩ yɛ.” 4'N ɔ jua-a ngli 'jɩbha naa: “Sa -aa gbö gba-a -a nʋ -gwlɛnɩzlɩ 'nɩ? -A nʋ -lie -li-a 'nɩɩ -a nʋ 'jinyloli-a? -A pua -aa linɩkpɛ 'nɩɩ -a lɩbhɔ-a? -Ɩ la'a 'sɔɔ gla'a, -mɩ -aa gbö nʋ-a -a nʋ 'nɩ?” Zezwi 'jɩbhʋa-a sa'a ngli-e, wa 'bhuo ngu wa zʋ-a yɛ. 5'N ɔ jua-a yʋlʋswɩ'ɩ -gömö yɩlɩ. Wa dlɩa 'mötunʋ yɛ ɔ dlɩ-ɛ 'yɛ jili 'le, ɔ nɛ -bha nɩkpɛɛ de naa: “Plu -na kɔtɩkpa 'mö.” 'N ɔ jia-a 'mö plu, 'n a ji-a 'pʋ. 6-Bha -gaganɩlɩ'ɩ, 'n falizɩɛ -wa -wʋ la-a -bha ji-a 'pɩ 'wlʋ, 'n wa ji-a -zakpa wa la-a Elodɩɛ -zakpa -ma ghlɩ, sa wa 'yɛ-a 'mö zʋzʋnʋ wa 'yɛ Zezwi 'lɩbha, 'n wa -nyʋa 'sɔ ji-a ɩ ylɩ pɛ.
Zezwi yɛ nɩkpaa -bɛ göpö
7Zezwi -yɛ ɔ 'wʋbhlinɩngwa 'sɔ 'bhö-ö -bha, 'n wa ji-e -ma Galilee gïnyie 'pɩa 'bɩ mönɩ. Nɩkpaa -zakpö -ganʋa, 'n wa ji-a mö. 8-Mʋmʋa 'bhönɩ Galile -yɛ Zwide 'sɔɔ -gwlɩ yawʋ, -mʋmʋa 'bhönɩ Zelwizalɛmö, -mʋmʋa 'bhönɩ Idumee -gwlɩ -yɛ Zludɛɛ 'nyi -gömöö -gwlɩ 'sɔɔ -gömö, 'bhugugwlɩ wa la-a Tilɩ -yɛ Sidɔ 'sɔ, -mʋmʋa 'bhönɩ -ma ɩ yawʋɔ -gwlɩ -gömö. Nɩkpaa -zakpö la'a -sɩbha, -ɩ la'a 'bhuo Zezwi -wʋ-a nʋ 'le, ɩ 'dɩ wa 'nʋ -bha, 'n wa ji-e -bha ɔ yawʋ ji. 9Nɩkpaa -zunʋ yɛ Zezwi nɛ -bha ɔ 'wʋbhlinɩngwaa de naa: “A la'a 'gɔlʋ -bhlʋ, n 'kʋ 'mö -gbla nɩkpa ji'i-e 'mö nyɔnʋ.” 10-Wʋʋ yɛ ɔ gba-a -sɩbha, nɩkpaa -bɛ ɔ göpö-aa yɛ, -mʋa la'a gwi -wʋ-ɔ -bhla 'lɩbha 'le, wa 'kɔ cɛ zʋɔ yɛ 'wʋ wa 'suluo -bha. 11Nɩkpa -wa ka-a 'jinylozuzuku -gömö wa -kɔɔ yɩlɩ -bha ɔ dlɩ'ɩ wa pa-a -kokomunigbö glu, 'n wa nʋ-a: “-Lagɔɔ Gu -n glɩnɩ -bha.” 12Wa -yɛ -sɩbha gba-a, 'n Zezwi 'nyɛnɩ-a yʋlʋ 'mö 'jinylozuzuku 'dɩ naa, ɩ 'na-a bia ɔ 'dɩ yɛ -nɩ.
Zezwi yɛ ɔ tiatiangwa kugbïa 'sɔ -bha -sa
13-Mɩ la'a 'plɩ-a 'bhë, 'n Zezwi ji-e -ma -gɔgɔgbʋ -bhlʋ 'klʋ -gbla. Nɩkpa -wa ɔ 'jɩbha-a ɔ wɔzʋa-a, 'n wa jio-o -ma ghlɩ. 14-Ma wa gla'a 'n ɔ ji-e -ma nɩkpa kugbïa 'sɔ -sa ɔ -nyʋa 'sɔ 'yɛ 'kɔmʋʋ 'wʋ -bhlinɩɛ yɛ, 15ɔ 'kʋa tia, wa 'yɛ -Lagɔɔ 'tɩtɩɛ -tɩtɩ kwa, wa 'yɛ 'yɛ ɔ 'gba -gömö -ka wa 'yɛ 'jinylozuzuku kpëti. 16Nɩkpa la'a kugbïa 'sɔ ɔ -sa-a -sɩbha -bha wa nglɩ-ɛ la'a: Simo, -ɔ Zezwi 'pa-a Piɛlɩ. 17Zebedee 'gwie 'sɔ, Zakö -yɛ Za 'sɔ, -wa ɔ 'pa-a Bʋanɛzɛzɩ, 'mɩ 'nglɩɛ zɔmö-ö -yɛ-a -dɛɛ gwie. 18Adle-e, Filipö-ö, Batlemi-e, Matie-e, Toma-a, nɩkpɛ -bhlʋ wa la-a Alɩfee 'gu Zakö-ö, Tade-e, Simo -ɔ -wʋ la-a -ma 'bhugwiee ghayɩpangwa gla'a, 19'bhë Zwida Isɩkaliɔtɩ, -ɔ ji-a Zezwi -ma ɔ tʋngwa cɛ'ɛ 'pɛlʋ 'paa wa 'kɔ 'lɩbhaa yɛ.
Zezwie -lowlengwa nɛ ɔ 'wlu 'mö yɛ 'ji nyimonʋ 'bhë
20Zezwi -sa-a -bha ɔ 'wʋbhlinɩngwa kugbïa 'sɔ -kpɔ, 'n ɔ -nyʋa ji-a 'ligbë'ë nimï mö. 'N nɩkpa -bebe ji-e -bha 'sɔdo'o ɔ yawʋ 'wlu 'titanɩ. Ngo wa yeo-aa yɛ, Zezwi -yɛ ɔ 'wʋbhlinɩngwa 'sɔ 'nɩ la-a 'mö bhɛlɩ wa 'yɛ lie 'bhëë 'fʋ. 21Ɩ -wʋ-ɔ -sɩbha 'plɩ 'le, Zezwie -kosu 'jie nɩkpa 'nʋɩ-a, wa -sɔ-a 'wʋ, 'n wa jio-a ye mö. -Wʋʋ yɛ-a, wa nɛ: “Ɔ 'wlu mö-ö nyimonʋ-a 'ji.”
Zezwi yɛ -Lagɔɔ gböö nglipangwaa wɛlɩ -gömö -sa
22-Lagɔɔ gböö nglipangwa -wa 'bhönɩ-ɛ -ma Zelwizalɛmö, -wa -wʋ la-a -bha, wa nɛ naa: “Zezwi 'jinylozuzukuo 'bhitɩbha Bɛlɩzebulɩ ɔ ka-a -gömö, mɔ-ɔ 'nyɔ-a 'gba wʋ yɛ ɔ -wʋ-a nɩkpa 'jinylozuzuku -gömö kpëti 'le.” 23Zezwi wɔzʋa-a, 'n ɔ jua-a 'nine 'panɩ, ɔ nɛ naa: “Samɩ Sata bhɛlɩ-a a 'yɛ a lisata 'mö kpëtikpëtinɩ 'nɩ? 24Dʋdʋ -bhlʋ -gömöö nɩkpaa 'bhïë 'nyize -yɛ 'mö donʋ, wa -yɛ tʋ gwɩ, 'mʋ dʋdʋ sɛ ʋ yɩla -bha. 25-Kosu -bhlʋ 'jie nɩkpaa 'nyize -yɛ 'yɛ 'mö donʋ, wa -yɛ tʋ gwɩ, sɛ 'mʋ -kosu yɩla -bha. 26Ɩ yɛ Sata -yɛ ajɩ 'mö 'bhɩlɔnʋ, ajɩ a tɩ-a 'wlumö, sɛ a ji-a yɩla. 27Nɩkpɛ 'nɩ bhɛlɩ ɔ 'yɛ -ma kalɩkalɩnyɔɔ -budu'u pla ɔ 'yɛ -maa -li 'wʋ 'libhï, 'n ɔ nɩɔ -lɛ gwa 'bhë. Ɔ -kɔɔ gwa-a, -bhaa do'o, ɔ ji ɩ 'bhuo 'wʋ 'libhï. 28Sa'a n gba 'mö-ö sa'a a de naa: 'Jinyloli la'a 'bhuo nɩkpa nʋ-a, 'jinylɔwɛlɩɛ -gɔpö 'bhuo wa gba-a, -Lagɔ ji ɩ gbʋ 'ji 'tatinɩ. 29'N nɩkpɛ -yɛ Zuzu 'Wlawla ngli nyimanɩ, 'mɩ ɔ -nɩ 'jinyloli la'a, -Lagɔ 'na ɩ gbʋ 'ji 'tatinɩ 'lɩlɩlɩ, 'kɔgwlɛswɩ'ɩ ɩ gbʋ jio-a -gömö -wʋɔ.” 30Wa nɛ 'jinylozuzuko Zezwi ka la-a -gömöö yɛ ɔ gba-a -sɩbha wa de.
-Wa glɩnɩ-a Zezwie nyʋaa -nyʋa
31Zezwi-e -bhla wɛlɩ la'a gba 'le, 'n ɔ -da -yɛ ɔ -dagwie 'sɔ ji-a ji. Wa 'nɩgbö -ma 'pɩ, 'n wa jio-a nɩkpɛ 'wʋ tia naa, ɔ wɔzɩɔ. 32Nɩkpaa -bebe glɩ -bha ɔ yawʋ, 'n -ɔ wa tio la-a 'wʋ jio-a 'dɩ -sanɩ kwla'a ji naa: “-Na -da -yɛ -na -dagwie 'sɔ 'nɩgbö -ma 'pɩ, wa -wʋmö wɔzɩ 'le.” 33Zezwi nɛ naa: “-Mɔ -yɛ-a na -da -yɛ na -dagwie sɔ 'nɩ?” 34Ɔ yɩlɩ-a nɩkpa -wa binɩɔ la-a 'wʋ -gömö, ɔ nɛ naa: “A yie! Na -da -yɛ na -dagwie 'sɔ mʋa-a la'a. 35-Wʋʋ yɛ-a, -ɩ na -Tɩbha -Lagɔ 'jɩbha-a -ɔ nʋɩ-a, mɔ-ɔ -yɛ-a na -da, mɔ-ɔ -yɛ-a na -dagu.”
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996