MALƖKÖÖ 'BƆGƲ 4
4
Zezwi yɛ glʋglʋnyɔɔ 'nine 'pa
1Ylɩ -mɩmɛ -bhlʋ 'mö, 'n Zezwi ji-e -ma Galilee gïnyi yawʋ nimï mö, 'n ɔ ji-a nɩkpa -Lagɔwɛlɩ ngli 'pa. Nɩkpa -wa 'titanɩ-ɛ -bha ɔ yawʋ 'wlu -zu -wa -zu-a tenyie yɛ, -ma 'gɔlʋ 'mö ɔ -gbla -bha. Ɔ glɩ -ma ʋ 'mö -bha 'nyi 'klʋ, nɩkpa 'bhuo glɩ -bha 'nyi ngo'o. 2'N ɔ jua-a 'nini 'mö -lie -bɛ ngli 'panɩ, ɔ nɛ naa: 3“A pönɩ 'yukwli, glʋglʋnyɔ -bhlʋ mɔ-ɔ mö-ö -ma ɔ 'lagblɛ'ɛ lilie 'jʋ 'mlɩ kwla'a. 4Ɔ -wʋʋ 'mlɩ 'le, 'n jʋ -mʋmʋ-ʋ ji-e -bha 'yuogblʋɔ -kʋkʋngoyawʋ bhli, 'zɩ ji-a 'n ɩ jiʋ-a li. 5'N jʋ -mʋmʋ-ʋ ji-e -bha pʋpʋ 'klʋ bhli, -bhaa dʋdʋkpata 'nɩ 'mö 'tuo yɛ, 'n ʋ ji-a bhleemö mi. 6'Ylʋzalʋ 'pʋ-a, 'n ʋ ji-a 'wʋ si, ʋ'ʋ -kpuli glu -kaa yɛ, 'n ʋ ji-a yɛ. 7'N -mʋmʋ-ʋ ji-e -ma gwagwalu nyɩdɩ bhli. Ʋ mi-a, 'n ʋ jiʋ-a gwa. Ʋ'ʋ -lɛ 'pa. 8'N -mʋmʋ-ʋ ji-e -bha dʋdʋkpataa -dʋdʋkpata'a bhli. Ʋ mi-a, 'n ʋ ji-a 'jinanɩswɩ'ɩ 'ghlimanɩ 'n ʋ ji-a zʋ. 'Jeyi -bhlʋ 'wlʋ 'jaa kugbïta 'mö, -mɩmɛ 'wlʋ 'jaa gwlɩ ta 'mö, -mɩmɛ 'wlʋ 'yɛ 'jaa gwlɩ -ngbï 'mö.” 9Zezwi bhɩa-a 'ji, ɔ nɛ naa: “-Ɔ -yɛ 'nʋnʋyukwlie -ka, ɔ 'nʋ.”
-Wʋʋ yɛ Zezwi gbanɩ-a 'nini 'mö
10Zezwi do-a yawʋ-ɔ, 'n ɔ yawʋɔ nɩkpa -yɛ ɔ tiatiangwa kugbïa 'sɔ -kpɔ 'sɔ jio-a 'nini ɔ pa-aa zɔmö ngli 'jɩbhanɩ. 11Ɔ nɛ naa: “Abhaa -nɩ-ɛ, -Lagɔ slʋnʋya-a ʋ nyininyinipɩɛ wɛlɩ, -ɩ nɩkpa 'nɩ-a bhɛlɩ wa 'yɛ 'mö 'nʋ, a 'kɩ 'mö 'nʋ. -Mʋabhaa -nɩ-ɛ, 'nini 'möö 'nyize ɩ -wʋnʋ-a wa de, wa 'na 'kɩ 'mö 'nʋ. 12Wa -yɛ jɩla 'le -wʋ 'bhë wa ji-e -lu 'wʋ jɩnɩ. Wa 'yɛ -nganɩ 'bhë wa ji-e -lu 'mö 'nʋ. Wa ji-e -Lagɔ jɩblɩnɩ, ʋ ji-e wa 'jinylolie gbʋ 'ji 'tatinɩɛ yɛ.”
Zezwi yɛ glʋglʋnyɔɔ 'nine zɔmö -sa
13'N Zezwi jua 'mö-a ngli 'jɩbha, ɔ nɛ: “A'a nine la'aa zɔmö -ji-i? A nɩ-a 'mö -a la'aa zɔmö -ji-e, sa a ji-e 'mö-a nini -mɩbhaa zɔmö 'mö -jijinɩɛ 'nɩ? 14-Lagɔwɛlɩɛ gbagbanyɔ mɔ-ɔ -yɛ-a glʋglʋnyɔ. 15'Yuogblʋɔ -kʋkʋngoyawʋ la lilie 'jʋ bhli-a, nɩkpa -mʋmʋa -yɛ -bha 'wlʋnʋ -bha. Wa -yɛ -Lagɔwɛlɩ 'nʋ tɔngʋ, 'n Sata ji-a, 'n a sʋa-a dlɩ zɔmö. 16-Mʋmʋa -yɛ pʋpʋ 'sɔ 'wlʋnʋ -bha. Wa -yɛ -Lagɔwɛlɩ 'nʋ, 'mʋnadlɩ nya wa libhïnɩɩ-a 'wʋ. 17'Bhë wa'a zʋɩ-a 'mö 'jinanɩswɩ'ɩ -ma dlɩ zɔmö yɛ. -Titi -ɩɩ -kpuli 'nɩ-a glu 'nyʋnanɩɔɔ swɩ'ɩ wa -wʋ -bha. Wa kɩ 'ylɩ ja 'mö dlɩ 'wʋ, yʋlɔyʋlʋɛ -kʋa 'mɩ -Lagɔwɛlɩɛ yɛ ghlɩ tɔngʋ, 'n wa sɩ-a cɛ 'mö. 18Dʋdʋkpata -a ka-a gwagwalu 'wʋ, -mʋmʋa -nyaa 'sɔ 'wlʋnʋ -bha. Wa -yɛ -Lagɔwɛlɩ 'nʋ 'bhë-ë, 19ma'a 'pɩ 'wʋɔ dlɩpapɩɛ yʋlʋaa -bha, 'n wʋlʋwʋlʋɛ -yɛ -li 'bhuo 'sɔɔ 'tʋ lɩbhʋa -bha. Ɩ gbʋ-ʋ plʋa-a tenyie yɛ, wa'a zʋ -bha -Lagɔwɛlɩ wa 'pɩ yɛ 'jinanɩswɩ'ɩ 'mö 'bhɩlɔ. 20Nɩkpa -mʋmʋa -wʋ-ɔ -bha, wa -yɛ -Lagɔwɛlɩ 'nʋ, 'jinanɩswɩ'ɩ wa pönɩɩ-a 'yukwli, 'n wa zʋnʋɩ-a dlɩ zɔmö yɛ. Dʋdʋkpataa -dʋdʋkpata -aa 'wʋ lilie 'jʋ bhli-a, ʋ mi-a, 'n ʋ ji-a 'jinanɩswɩ'ɩ 'ghlimanɩ, ʋ zʋ-a, 'n 'jeyi -bhlʋ ji-a 'jaa kugbïta 'mö 'wlʋ, 'n -mɩmɛ ji-a 'jaa gwlɩ ta 'mö 'wlʋ, 'n -mɩmɛ ji-a 'jaa gwlɩ -ngbï 'mö 'wlʋ-ɔ, -sɩbhaa nɩkpa la'a mʋa -yɛ 'ma dʋdʋkpata la'a 'sɔ 'wlʋnʋ -bha.”
'Napɛɛ 'nine
21Ɔ nɛ 'yɛ -bha wa de naa: “Nɩkpɛ -yɛ 'napɛ 'ji -dɩ-ɛ, -solu zɔmö ɔ zʋɛ-a yɛ 'nɩɩ, bhlɩ'ɩ -gbatʋ zɔmö ɔ zizɛ-a? N -tɔnʋ la ɛ 'yɛ-a nɩkpa 'bhuo 'wʋ ngönanɩ -bha ɔ zʋɛ la yɛ? 22Sa'a n gba-a sa'a naa, -ɩ la'a 'bhuo -ɩ 'zuzo-a, 'pɩ ɩ ji-a 'ylɩ -bhlʋ 'wlʋɔ. -Ɩ la'a 'bhuo nɩkpa ziza-a -ma wa dlɩa zɔmö, -glodu'u ɩ ji-a 'ylɩ -bhlʋ pönɩɛ. 23Ɩ yɛ -ɔ -yɛ 'nʋnʋyukwlie -ka, ɔ 'nʋ.”
24'N ɔ ji 'yɛ-a -bha wa de gba naa: “A möna -ɩ a -wʋ-ɔ la'a 'nʋ 'lee de 'mö. -Wʋʋ yɛ-a, -lu a 'libhï-a 'wʋ 'n a ji-a wɔkɔ, 'mʋ wa ji-a a -li wɔkɔnʋɔ, 'n wa 'yɛ-a a -li -gömö 'pa. 25-Ma ɩ 'mö, -ɔ ka-a -bebe 'mɔ wa ji-a 'nyɛɛ ɔ -li 'yɛ zumanɩ. -Ɔ 'nɩ-a -lu -ka, 'kikie 'bhë ɔ 'tɛnɩ la-a dlɩ, 'mɩ wa jio-a cɛ'ɛ -saa.”
Sa -Lagɔɔ libho tɛtɛnɩ-a 'mö 'bhë, 'n ʋ zumanɩ-a
26Zezwi nɛ 'yɛ -bha wa de naa: “-Lagɔɔ nyininyinipɩɛ wɛlɩ, sa nɩkpɛ 'nɩ-ɛ la'a 'sɩkajʋ glʋ -sɩbha ɩ -wʋ -bha. 27Ɔ -kʋʋ glʋ-ɔ, ɔ ji ngɔmö 'le -wʋ, ɔ ji -ga, zlɩa oo zlɩa, sɩka la'a -yɛ mi-e, sa a zʋzʋnʋ 'mö 'n a wlʋ ɔ 'nɩɩ -ji. 28-Bɛ 'nɩ mia, a 'bhëë 'nyize wlʋ -bha. A -yɛ 'wʋ 'bhʋamanɩ, 'n a fɩtɩ -bha, 'n a zʋ -bha. 29A -yɛ-a 'mö zalɩ-ɛ, a -dɩdɩde nyini -bhaa yɛ, -gblɛ ɔ faa-a 'mö.”
Su wa la-a mutadɩ, Zezwi yɛ ʋ 'jeyie 'nine 'pa
30Ɔ nɛ 'yɛ naa: “'Manɩ -a bhɛlɩ-a -a 'yɛ -Lagɔɔ nyininyinipɩ 'wʋ palɩ 'nɩ? Sa ɛ -wʋnʋ-a 'mö, nine -ma bhɛlɩ-a a 'kɩ zɔmö -sa 'nɩ? 31Su -bhlʋ wa la-a mutadɩ, wa -yɛ ʋ 'jeyilɛ glʋ, -ʋ ɛ ghlanɩ-a 'mö, 'mɩ -Lagɔɔ nyininyinipɩ -nyɩɩ 'sɔ 'wlʋnʋ -bha. 'Mɛ suo 'jeyilɛ la'a, ma'a dʋdʋkpata -gömöö -lie 'jʋ 'bhuo gla'a mɛ-ɛ -yɛ-a 'kikeyi. 32Nɩkpɛ -kɛɛ -ma ɔ 'lagblɛ'ɛ glʋ-ɔ, ɛ su -yɛ mi, ʋ -yɛ 'ghlimanɩ, ʋ zi -ma 'lagblɛ'ɛɛ glʋglʋli 'bhuo 'wʋ. 'N ʋ pa-a klia 'kadɩ, 'n ɩ loluo-a 'mö, 'n 'zɩ 'sɩbhanʋ-a 'wlu.”
33-Sɩbhaa 'ninie -bɛ 'mö Zezwi 'plɩnɩ la-a, 'n ɔ pa-a nɩkpa -Lagɔwɛlɩ ngli. Wɛlɩ la'a wa bhɛlɩ-a wa 'yɛ 'mö 'nʋ, 'mɩ ɔ pʋa-a ngli. 34Ɔ -kʋa 'kɔmʋʋ -Lagɔwɛlɩ ngli 'paa ji-e, 'ninie 'nyize 'mö ɔ 'panʋa-a ngli. Ɔ -yɛ ɔ 'wʋbhlinɩngwa 'sɔ -yɛ yawʋ do 'bhë, 'n ɔ slʋnʋʋa-a ɩ 'bhuoo zɔmö.
Zezwi yɛ -podie 'nɩgbanɩ
35'Mɛ zlɩ la'a -bhlʋɔ -dudo'o, Zezwi nɛ -bha ɔ 'wʋbhlinɩngwaa de naa: “A-a -dɩ 'nyi 'mö, -a 'yɛ -ma kïkë -mabhaa -gömö mö.” 36Wa -yɛ nɩkpaa -zakpa 'sɔ -sɔnʋ-a yawʋ, 'n wa ji-e -ma 'gɔlʋ 'mö -gbla, 'n wa -yɛ gɔlɩ -mɩmɩ 'sɔ ji-a de -bhlʋ mönɩ. 37Wa-a -bha 'nyi 'klʋ, 'n -podie 'kadɛ ji-a ji, 'n 'nyugbɔkɔlɩ ji-e -ma 'gɔlʋ 'mö bhlinɩ, -bha tʋ-ʋ 'wʋ -sɛ ʋ 'yɛ ye. 38Zezwi pö la -nɩ -ma 'gɔlʋɔ nimï, ɔ 'palɩɔ -sumu 'wlu, ɔ-ɔ ngɔmö 'le. 'N wa jio-a gala, wa nɛ: “-Abhitɩbha! -Abha tlɩ -bha! -Aa gbʋ -nɩmö pla 'le -wʋ-ʋ?” 39Zezwi galɔ-a, 'n ɔ ji-a -podie -yɛ 'nyi 'sɔ 'wliyawʋ 'kpönɩ, 'n ɔ jiɩ-a 'wʋ köbha, ɔ nɛ: “A 'nɩgbö!” Ɔ gba-a -sɩbha tɔngʋ, 'n -podie ji-a 'nɩgbö, 'n de 'bhuo ji-a blenyi zʋ. 40Ɔ gö-a ɔ 'wʋbhlinɩngwa 'ji-e, ɔ nɛ naa: “'Manɩɛ yɛ a -wʋ bhe -sa nganɩ 'le nɩ? A'aa cɛ -bhla -Lagɔ dlɩ 'wʋ -ka 'nɩ-ɩ?” 41'N -kakö ji-a wa 'bhuo köbha, 'n wa 'jɩbhajɩbhanɩ-a ngli naa: “'Wuë! Nɩkpɛɛ -mɔ yɩ 'nɩ? -Ɔ nyɛ-ɛ -sa -podie -yɛ gïnyi 'sɔ 'dɩ, 'n ɩ zʋ-ɔ -bha ɔ wɛlɩ 'nɩ?”
Currently Selected:
MALƖKÖÖ 'BƆGƲ 4: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
