कुलवानकु.कामि 9
9
साउल रआ हिरदय बदलावेना
(कुलवानकु.कामि 22:6–16; 26:12–18)
1साउल जे निमीः तक परभु रेन चेलाकु के गोगोच कथिर धमकाव कुकनकेनाय, उनी मरंग जाजक ठिनुः तोराया 2साउल ता मरंग जाजक ठिनुः सेन केते दमिसक रआ बिनती ओड़ाः रआ लुतूम एते चिट्ठी कोय्येताय, चि चिलि हेरेल चिलि एरा जे के उनी परभु रआ होरा रे नामकुञ उनकु के तोल केते जरुसलेम अगुकूञ। 3मुदा सेसेन-सेसेन जोब उनी दमिसक रआ हेनात तेबाः एनाय दो एकाएक सिरमा एते उनी रआ चइरो ओइर मरसल चमकावेना, 4अरो उनी ओते रे उयुःएनाय अरो नुवां राव ओनाव एताय, “ए साउल, ए साउल, आम इञ के चिलिमेन सताव वेञकाम?” 5उनी ता कुलिएदेयाय, “ए परभु आम ओकोय हेकेम?” ईसु ता गामवादेयाय, इञ ईसु हेकेञ, जे आम सताव वेञकानाम। 6मुदा निमीः बिरीत केते चट्टी रे सिनुःमी अरो जे आम के कराव हेनाःआं उना आम एते गामुःआं 7जे होर उनी लोः सिनुः केनाकु, उनकु भक तहिकेनाकु, चिलिमेनचि राव दो ओनाव एकेनाकु, मुदा जहय के काकु नेल कुकनकेना। 8तोब ओते एते साउल बिरीतेनाय, मुदा जोब मेत राड़ा एताय दो उनी के जहन्नाः का नेल केना अरो उनकु उनी रआ ती सापकेते दमिसक रे इदी एदेयाकु। 9उनी पेय हिलोः तक काय नेल दड़िवाताय, ना जोम लाःआय ना नु लाःआय।
10दमिसक रे मियाः हनानियस लुतूम मिहोर चेला तहिकेनाय उनी के परभु ता दरसन रे गामवादेयाय “ए हनानियस” उनी ता गामवादेयाय, “हें परभु नोन्डोःइञ।” 11तोब परभु ता उनी के गामवादेयाय, “बिरीत केते उना छेऊर एते सिनुःमी जे सोझ गमुःकाना अरो जहुदा रआ ओड़ाः रे साउल लुतूम मिहोर तरसुस रे तहीः वनीः के कुलिइमी, चिलिमेनचि उनी पराथनाय कनाय। 12अरो उनी ता हनानियस लुतूम मिहोर हेरेल के भीतरी हिजुः अरो आच चेतान ती दोहोते नेलेःदेयाय, ताकि अरो नेनेलाय।” 13हनानियस ता जबाब एमाःदेयाय, “ए परभु इञ ता नोंय होर रआ बबेत रे बेचोट होरकु एते अयुम एकाःइञ नोंय ता जरुसलेम रे आमरेन पबितर होर के बेचोट सताव एकाःकुवाय, 14अरो नोन्डो हों नोंय के मरंग जाजककु रआ सोझ एते हक नाम्मेकाना चि जे होर आम रआ लुतूम अगु केते गोहराव वेकेनाकु, उनकु सुबिन के तोल केकुम” 15मुदा परभु ता उनी एते गामवादेयाय, “आम सेन जोनमी, चिलिमेनचि उनी दो गइर-जहुदिकु के अरो उनकु रेन राजाकु अरो इसराइलिकु रे इञ रआ लुतूम रआ परचार कथिर अरो सेवा-सुसार कथिर सला एकाःमिञ। 16अरो इञ उदुःवामिञ चि इञ रआ लुतूम कथिर उनकु के चिमिनोः दुख उठाव पोड़ावोःओ।” 17हनानियस चइल्लेताय अरो उना ओड़ाः रआ भीतरी तेबाःएनाय अरो साउल रे उनी अपन ती दोहोवेताय अरो गामवादेयाय, “बोयहा साउल, परभु ईसु इञ के कुल एकाःदेञाय, ताकि आम अरो नेनेल दड़िवाःआम अरो पबितर रावा एते भोरपुर नोःओम।” 18अरो एनेनगी उनी रआ मेत एते चोंयाः लेका उयुःएना अरो उनी नेनेल हेलावेनाय अरो बिरीत केते बतिसमा अगुवेताय, 19अरो जोजोम वनाः जोम केते बोल नाम्मेताय। अरो उनी चिमिन हिलोः तक उनकु चेला लोः तहिएनाय जे दमिसक रे तहिकेनाकु।
दमिसक रे साउल रआ परचार
20अरो उनी एनेनगी सुबिन ठिनुः रआ बिनती ओड़ाः रे ईसु रआ परचार कराव हेलावेनाय चि उनी परमेसर रिई होपोन हेकेय। 21सुबिन ओनाव वन चकित केते गागाम हेलावेनाकु, “चिलि नोंय उनी होर बङ हेकेय जे जरुसलेम रे उनकु के जे आम रआ लुतूम अगुइ केनाकु, नठाव कुकनकेनाय, अरो नोन्डो हों इना कथिर गी हेच एकानाय चि उनकु के तोल केते मरंग जाजककु ठिनुः इदी कुवाय?” 22मुदा साउल अरोगी सोमोर्थ रे बेरयार इदी एनाय, अरो नुवां गानाम रआ परमान एम-एम केते चि ईसु मसी नोंय गी हेकेय, दमिसक रेन तहीःइकु जहुदिकु रआ मोचा हपे इरीवेःकुवाय।
23 #
2 कुरु 11:32,33 जोब बेचोट हिलोः बितावेना, दो जहुदिकु ता मीः केते उनी के गोगोच कथिर उपाय सोंचाव एनाकु। 24मुदा उनकु रआ उपाय सोंचाव आनाः साउल सारीएताय। उनकु दो उनी के गोगोच कथिर निदा सिंगी चट्टी रआ हाता दुवेर रे घताव रे लगाव एकानोःकेनाकु। 25मुदा निदा उनी रेन चेलाकु ता उनी के खन्ची रे दुरुप एदेयाकु अरो चट्टी रआ हाता एते अरगु कदेयाकु।
जरुसलेम रे साउल
26जरुसलेम रे तेबाः केते साउल ता चेलाकु लोः मेसा कथिर चहाः केनाय, मुदा सुबिन उनी एते बोरोय केनाकु, चिलिमेनचि उनकु के बिसवास का होयुः केना, चि उनी हों चेला हेकेय। 27मुदा बरनाबस ता उनी के आच लोः कुलवानकु ठिनुः इदिकेते उनकु के उदुःवाःकुवाय चि नोंय ता चिलि रिति एते होरा रे परभु के नेलेःदेयाय, अरो परभु ता साउल एते नधनी एताय चि अरो दमिसक रे नोंय एते चिलका हियाव एते ईसु रआ लुतूम एते परचार एताय 28साउल, कुलवानकु लोः जरुसलेम रे हिजुः-सिनुः चित तहिएनाय, अरो निधाड़क केते परभु रआ लुतूम एते परचार एकेनाय। 29अरो जूनानी भाखा नधनी वन जहुदिकु लोः नधनी-गापम अरो रेनाटेटाः केनाय, मुदा उनकु उनी के गोगोच रआ उपाय एकेनाकु। 30नुवां सारी केते बिसवासी बोयहा-मिसी उनी के कयसरिया इदी एदेयाकु, अरो ओन्डो एते तरसुस कुल कदेयाकु। 31इना लेका सुबिन जहुदिया पोरदेस, अरो गलील दिसुम, अरो समरिया दिसुम रे कलीसिया रेन के मीःजंग सांति नम्मेना, अरो उनकु परभु एते बोरोय वते जीवन बिताव वेकेनाकु, अरो पबितर रावा ता उनकु के दिलासा वेःकुवाय इनाते उनकु बड़हाव इदी एनाकु।
लुदा चट्टी अरो याफा चट्टी रे पतरस
32अरो नुंका होय्येना चि पतरस सुबिन ठांव होनोर बेरा केते, उनकु पबितर होरकु ठिनुः हों तेबाःएनाय जे लुदा चट्टी रे तहीः केनाकु। 33ओन्डो उनी के एनियास लुतूम लकवा रोग रिई होर नम्मेनाय, जे आठ बरीस एते परकोम रे पोड़ाव तहिकेनाय 34पतरस ता उनी के मेताःदेयाय, “ए एनियास! ईसु मसी आम के बुगिन मिकानाय। बिरीतमी, आम रआ डिसना उठावेम।” तोब उनी एनेन गी बिरीत तिंगु एनाय 35तोब लुदा चट्टी अरो साम ठांव रेन सुबिन तहीःइकु उनी के नेल केते परभु रे हेच्चेनाकु, 36याफा चट्टी रे तबीता लुतूम मिहोर बिसवासी मिसी तहीः केनाय। जेकर गिरिक अनुबाद रे दोरकास, उना रआ ओरोथ सराम एंगा, उनी बेचोट एते बुगिन-बुगिन कामि कराव अरो रेंगेच-रबंङकु के देंगा कुकनकेनाय, 37इमिन हिलोः रे उनी हासु केते गोच्चेनाय, अरो उनकु ता उनी के उम केते पटोत रे दोहोकादेयाकु 38इनाते चि लुदा चट्टी याफा चट्टी रआ हेनात तहिकेना, चेलाकु ता नुवां अयुम केते चि पतरस ओन्डो हेनाया, बार होर कुलकेते, उनी के गोहराव एदेयाकिन, “आले ठिनुः हिजुः रे ओलोम देरीया।” 39तोब पतरस बिरीत केते उनकु लोः एनाय, अरो जोब उनी तेबाः एनाय दो उनकु उनी के पटोत रे इदी देयाकु। सुबिन राड़ियाहिकु इयाम वते उनी ठिनुः हेच तिंगु एनाकु, अरो जे सोनोः अरो किचरीः दोरकास ता उनी लोः तही वते बाय लाःआकिन, देखाव हेलावेनाकिन 40तोब पतरस ता सुबिन होरकु के टांड़ी सिनुःपे मेताःकुवाय, अरो उकरुम केते पराथना एताय अरो गोच-होड़मो सोझ नेल केते गाम्मेताय, “ए तबीता, बिरीतमी।” तोब उनी ता आच रआ मेत नेनेलेएताय, अरो पतरस के नेल केते बिरीत दुरुप एनाय, 41पतरस ता ती एते साप केते बिरीत एदेयाय, अरो पबितर होरकु अरो राड़ियाहिकु के होहोकेते उनकु के जुवेत केते देखाव वाःकुवाय। 42नुवां गानाम सुबिन याफा चट्टी रे फयलावेना, अरो बेचोट होर परभु रे बिसवास एताकु। 43अरो पतरस याफा चट्टी रे सिमोन लुतूम चमार ठिनुः बेचोट हिलोः तक तहिकेनाय।
Currently Selected:
कुलवानकु.कामि 9: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
