जोहन 9
9
जनम एते गी अंधरा तहिकेनय उनी के बुगी एदेयाय
1होरा रे ईसु ता मिहोर मनवां के नेलेःदेयाय, जे जनम एते अंधरा तहिकेनाय। 2चेला ता ईसु के कुलिएदेयाकु, “गुरु! ओकोय ता पाप लाःआय, चि नोय मनवां जनम एते गी अंधरा गियय, नोय ता चि नोय रेन एंगा-आपु तेः ता?” 3ईसु ता जबाब एमाकुवाय, “ना दो नोय अंधरा ता पाप एकाःआय अरो ना नोय रेन एंगा-आपु तेः नोय इनाते जनम एते अंधराःआय परमेसर रआ कामि नोय रे दिसतार ओःओ। 4जे इञ के कुल एकाःदेञाय, अबु के उना कामि सिंगी बिताव वोः एते पहिल गी पुराव हेनाःआं। निदा हिजुः वनाः हेनाःआं, उना रे जहय हों काकु कामि दड़िवाःआ। 5#मती 5:14; जोह 8:12इञ जोब तक दुनिया रे हेनाञा, तोब तक दुनिया रिई मसकल हेकेञ।” 6ईसु ता नुंका गाम केते ओते रे बेच एताय, बेच दाः एते हसा सुवेत एताय अरो उना हसा ता अंधरा रआ मेत रे ओजोः केते 7उनी अंधरा के मेताःदेयाय, “सिनुःमी, सिलोह रआ डोभा रे अबुंग कोःमी।” (सिलोह रआ ओरोथ हेके “कुल वन”) अरो उनी अंधरा तोराया अरो अबुंग एनाय अरो ओन्डो एते नेनेल वते रुवाड़ एनाय। 8उनी रेन आसे-पासे रेन अरो उनकु होर, जे अंधरा के पहिल भीख कोकोय एते नेलेय केनाकु, गाम्मेताकु, “चिलि नोय उनी अंधरा बङ हेकेय, जे दुरुप केते भीख कोय कुकनकेनाय?” 9थोड़गन होर ता गाम्मेताकु, “हें, नोय इनिगी हेकेय।” थोड़गन ता गाम्मेताकु, “बङा, उनी लेका अरो जहय हेकेय।” अंधरा ता मेताःकुवाय, “इञ इनिगी हेकेञ।” 10नियां रे होर ता उनी के कुलिएदेयाकु, “दो, आम चिलका एते नेनेल हेलावेनाम?” 11उनी ता जबाब एमाकुवाय, “जे मनवां ईसु गामुः कनाय, इनिगी हसा ता सुवेत एताय अरो उना हसा ता इञ रआ मेत रे ओजोः केते मेताःदेञाय, सिलोह रआ बन्धा सिनुःमी अरो अबुंग कोःमी। इञ तोराञा अरो अबुंग इनिञ इना तयोम नेनेल हेलाविनिञ।” 12उनकु ता उनी एते कुलिएदेयाकु, “उनी करेः इचाय?” अरो उनी ता जबाब एमाकुवाय, “इञ काइञ सरिइ काना।”
फरीसिकु रआ जांच पड़ताल
13होर उनी मनवां के, जे पहिल अंधरा तहिकेनय, फरीसिकु ठिनुः इदी एदेयाकु। 14जे हिलोः ईसु हसा ता सुवेत केते उनी रआ मेत बुगिन लाःआय, उना हिलोः, जिराः हिलोः तहिकेना। 15फरीसिकु ता उनी के कुलिएदेयाकु चि आम रआ मेत चिलका एते नेनेल एना। उनी ता उनकु के मेताःकुवय, “ईसु ता इञ रआ मेत रे हसा ता ओजोः एताय, अरो इञ ता मेत अबुंग इनिञ अरो इमिताः गी नेनेल हेलाविनिञ।” 16नियां रे थोड़गन फरीसिकु ता मेनएताकु, “उनी मनवां परमेसर ठिनुः एते काय हेच एकानाय, चिलिमेनचि उनी जिराः हिलोः रआ नियम काय पालन कनाय।” थोड़गन मनवां ता गाम एकेनाकु, “पापी मनवां नुंकन चिनहा-चकरीत कामि चिलका ते देखाव दड़िवाःआय?” इना लेका एते उनकु रे फुट होय्येना। 17उनकु ता अंधरा तके अरो कुलिएदेयाकु, “जे मनवां ता आम रआ मेत बुगिन एकाःआय, उनी रआ बबेत रे आम चिलिकाः मेन कनाम?” उनी ता जबाब एमाकुवाय, “उनी परमेसर सोझ एते नधनी वनीः हेकेय।”
18जहुदिकु काकु बिसवास वोः केना चि उनी अंधरा तहिकेनय अरो नेबरीक नेनेल हेलावेनाय। इनाते उनकु ता उनी रेन एंगा-आपु तेः के होहो कुलेःकुवाकु। 19अरो उनकिन के कुलिवेःकिनाकु, “चिलि नोय अबेन रिई होपोन हेरेल हेकेय, जेकर बबेत रे अबेन नुंका गाम कनाबेन चि नोय जनम एते गी अंधरा तहिकेनाय? दो नेबरीक नोय चिलका ते नेनेल कनाय?” 20उनी रेन एंगा-आपु तेः ता जबाब एमाःकुवाकिन, “अलिञ सारीइ कनालिञ चि नोय अलिञ रिई होपोन हेरेल हेकेय अरो नोय जनम एते गी अंधरा तहिकेनय, 21मुदा नेबरीक चिलका ते नेनेल कनाय, अलिञ नुवां कलिञ सरिइ काना। अलिञ नुवां हों कलिञ सारीइकाना चि ओकोय ता नोय रआ मेत बुगिन एकाःआय। नोय जवान सेयानिचाय, इनी एते गी कुलि केयपे। नुवां गानाम आच गी उदुःवापेयाय।” 22उनी रेन एंगा-आपु तेः ता नुवां गानाम इनाते गाम लाःआकिन चि उनकिन जहुदी नेताकु एते बोरोय केनाकिन। चिलिमेनचि उनकिन नियां रे पहिल गी सहमत केनाकिन चि जदि जहय ईसु के मसी मनावेय रेदोकु उनकु के बिनती ओड़ाः एते उडुङ कुवाकु। 23इनाते उनी रेन एंगा-आपु तेः ता गाम वाःकुवाकिन, “नोय जवान-सेयान हेनाया, इनी एते गी कुलि केयपे।”
24उनकु ता उनी मनवां के, जे पहिल अंधरा तहिकेनाय, अरो मिसा होहो कुलेःकुवाकु अरो उनी के मेताःदेयाकु, “परमेसर रआ मइन एपे चिलिमेनचि आले सारी कनाले चि उनी दो पापी मनवां हेकेय।” 25उनी ता जबाब एमाकुवाय, “उनी पापी हेकेय चि बङा, नोय रआ बबेत रे इञ जहन्नाः काइञ गाम दड़िवाःआ। इञ नियां सारीइ कनिञ चि इञ अंधरा तहिकिनिञ अरो नेबरीक एते नेनेल कनिञ।” 26नियां रे उनकु ता उनी के अरो कुलिएदेयाकु, “उनी ता आम लोः चिली एताय? उनी ता आम रआ मेत चिलका एते रड़ाएताय?” 27उनी ता जबाब एमाकुवाय, “इञ अपे के उदुः चुकाव वाःपिञ, लिकिन अपे उना रे धेयान कपे एम एकाःआ। निमीः अरो चिलिमेन ओनाव चहाः कनापे? चिलि अपे हों उनी रेन चेला बयुः चहाः कनापे?” 28उनकु उनी के कठिक-कठिक गाम वदेयाकु “आम गी उनी रिई चेला हेकेम आले दो मूसा रेन चेला हेकेले। 29आले सारीइ कनाले चि परमेसर मूसा एते नधनी एकाःआय, मुदा उनी मनवां रआ बबेत रे आले काले सारीइकाना चि उनी कारे रिई हेकेय।” 30उनी उनकु के जबाब एमाकुवाय, “नियां गिचो चकरीत कामि रआ गानाम हेके, उनी इञ के मेत एम एकावादेञाय अरो अपे नुवां हों कपे सारीइकाना चि उनी कारे रिई हेकेय। 31आले सारीइ कनाले चि परमेसर पापिकु रआ काय ओनाव कनाय। परमेसर उनकु रआ ओनाव कनाय, जे परमेसर रेन धरमी होर अरो परमेसर रआ हिछा पुराव कनाकु। 32नुवां केहयो का ओनाव एकाना चि जहय ता जनम एते अंधरा के बुगी एकाःदेयाकु? 33जदि नोय मनवां परमेसर सोझ एते काय हेच लेन रेदोय उनी जहन्नाः हों काय कराव दड़िवाःआय होनांङ।” 34उनकु ता उनी के मेताःदेयाकु, “आम दो बिलकुल पाप एते गी जनम अगु एकाःआम, आम आले के सिखाव हेलाव एकानाम।” अरो उनी के टांड़ी उडुङ कदेयाकु।
आत्मिक अंधरा
35ईसु ता ओनावेताय चि फरीसिकु ता उनी के टांड़ी उडुङ कदेयाकु अरो जोब ईसु उनी लोः नपाम्मेनाय रे मेताःदेयाय, “चिलि आम मनवा रिई होपोन हेरेल रे बिसवास कनाम?” 36उनी ता जबाब एमाःदेयय “हुजूर! इञ के उदुःवायञमी उनी ओकोय हेकेय, जेकर एते इञ उनी रे बिसवासिञ।” 37ईसु उनी के मेताःदेयाय, “आम उनी के नेल एकाःदेयाम, जे आम एते नधनी कनाय इनिगी हेकेय।” 38उनी ईसु के डोंडोत एदेयाय अरो मेताःदेयाय, “परभु! इञ बिसवास कनिञ।” 39ईसु ता मेताःकुवय, “इञ नुवां दुनिया रे नेयाय कथिर हेच एकानिञ ताकि जे काकु नेनेल काना उनकु नेनेल अकु, अरो जे नेनेल कनाकु उनकु अंधरा नोःओकु।” 40जे फरीसिकु उनी लोः तहिकेनाकु उनकु नुवां गानाम ओनाव केते ईसु के मेताःदेयाकु, “चिलि आले हों अंधराःआले?” 41ईसु ता उनकु के मेताःकुवय, “जदि अपे अंधरा तहिलेन रेदोपे पापी कपे ठहराव ओःओ होनङ, मुदा निमीः गाम कनापे आले नेनेल कनाले इनाते अपे रआ पाप बाय तहीः काना।”
Currently Selected:
जोहन 9: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
