लूका 17
17
ठोकराव रआ कारन बयुः
(मती 18:6,7,21,22; मरकुस 9:42)
1अरो ईसु ता अपन चेलाकु एते गामवाःकुवाय, “का होय सकाःका चि ठोकोरा ओलो होयुःका, मुदा हाय उनी मनवां जे भटकाव कुकानाय। 2जे नोकु हुडिञकु रे एते जहय मिहोर के ठोकोरा एमायकाय, रेदो उनी होर के नुवां भला होयुःआ होनङ, चि जाता उनी रआ होटोः रे तोल केते अरो उनी के समुदर रे डुबाव काया। 3#मती 18:15इनाते चेम्पोर तहीःपे, जदि आम रिई बोयहा पाप इयाय दो उनी के डपटावेय, जदि उनी मोन रुवाड़ियाय, रेदो उनी के माफ एयमी। 4जदि दिन भोइर रे उनी सात धांव आम रआ पाप इयाय अरो सातो धांव आम ठिनुः हेनात हेचकेते गाम्माय इञ मोन रुवाड़ कनिञ, दो उनी के माफ कायमी।”
बिसवास
5कुलवान चेलाकु ता परभु के गाम वदेयाकु, “आले रआ बिसवास बड़हाव एम।”
6परभु ता गामवाःकुवाय, “जदि अपे के राय रआ दाना रआ बराबोइर हों बिसवास होयुःआ, रेदो अपे नुवां तुंत रआ दाड़ु एते गाम्मापे चि रेहेत एते तुत केते समुदर रे डुबाववोः, दो उना अपे रआ मनाव वोःओ।
मिहोर धंगोर रआ करनी
7“जदि बन्धुवा हार सिई कनाय बङ रेदो, भेड़ी गोरखी कुकानाय, अरो जोब हिजुःआय, दो अपे रे एते नुंका ओकोय हेनाया, मालिक बन्धुवा एते गामवायाय एनेन हेचकेते जोजोम दुरुपमी? 8मुदा नुंका जहय काकु गाम काना। मुदा मालिक गामवायाय इञ रआ जोजोम वनाः तेयारेम, अरो जोब तक इञ जोम नुयिञ तोब तक डांडा तोलकेते इञ के सुसार एञमी, इना तयनोम आम हों जोम-नु केम? 9चिलि मालिक ता उनी बन्धुवा के धेनयाबाद एमाय चि बन्धुवा ता उनी रआ हुकूम ता पालन एकाःआय? 10अपे हों इनका गियापे सुबिन हुकूम रआ पालन कराव रआ तयोम अपे के गागाम चही, आले सिरीफ निकाम्मा बन्धुवा हेकेले, आले अपन जिमेवारी सिरीफ पुराव एकाःआले।”
ईसु दोस कोढ़ रोगिकु के बुगी वेःकुवाय
11नुंका होय्येना चि ईसु जरुसलेम सिनुः वते समरिया अरो गलील रआ ताला एते होयकेते सिनुः केनाय। 12जहन हातु रे बोलोः घरीक ईसु दास कोढ़ रोगी के नमेःकुवाय। उनकु ता संगिञ रे तिंगु केते 13गाम वदेयाकु, “ए ईसु, ए मालिक, आले रे दयायमी!”
14 #
लेवी 14:1–32
ईसु ता उनकु के नेल केते गामवाःकुवाय, “सिनुःपे, अरो अपन-अपन तिगी जाजककु के नेल इरी कुपे।”
अरो होरा सेसेन रिगी उनकु बुगी एनाकु। 15तोब उनकु रे एते मिहोर नुवां नेल केते चि इञ बुगी निञ, जोड़ एते परमेसर रआ बड़ाय कराव वते रुवाड़ एनाय; 16उनी उकरुम अरो डोंडोत केते ईसु के धेनयाबाद एएम हेलावेनाय, अरो उनी समरिया रिई तहिकेनाय। 17ईसु ता गामवादेयाय “चिलिकाः दसो होर काकु बुगी केना? दो उनकु नो होर करेः अकु? 18चिलिकाः नोय पोरदेशी होर के बागी केते अरो जहय काकु उडुङ केना, जे परमेसर रआ बड़ाय इयाकु?” 19तोब ईसु ता उनी के गामवादेयाय “बिरीत केते सेन जोनमी, आम रआ बिसवास गी आम के बुगी वेःमाय।”
परमेसर रआ राइज रआ हिजुः
(मती 24:23–28,37–41)
20जोब फरीसिकु ता ईसु के कुली एदेयाकु चि “परमेसर रआ राइज चिमिस हिजुःआ।” दो उनी ता उनकु के जबाब एमाःकुवाय, “परमेसर रआ राइज दिसतार रुप एते का हिजुःका। 21अरो होर नुवां काकु गाम दड़िवाःआ, ‘नेलपे, नोन्डो हेनाःआं,’ ‘बङ रेदो अंडे हेनाःआं।’ चिलिमेनचि नेलपे, परमेसर रआ राइज अपे रआ ताला रे हेनाःआं।”
22अरो उनी ता चेलाकु एते गामवाःकुवाय, उना समेय हिजुःआ, जे रे अपे मनवा रिई होपोन हेरेल रआ हिलोः रे एते मीः हिलोः ता नेनेल चहाः अपे। अरो कपे नेल दड़िवाःआ। 23होर अपे के गामवापेयाकु नेलेयपे, अंडे हेनाया। बङ रेदो नेलेयपे, नोन्डो हेनाया। मुदा अपे ओलोपे सिनुःआ, अरो ना उनी रआ तयोम कोःपे। 24चिलिमेनचि जेलेका ठेरकाव-मलकाव, सिरमा रआ मीः छोर अतोम एते उडुङ केते, सिरमा रआ एटाः छोर तक चमकाः काना, इनका गी मनवा रिई होपोन हेरेल रआ हों रुवाड़ हिजुः होयुःआ। 25मुदा पहिल सरिगी हेनाःआं चि उनी बेचोट दुख सहावियाय, अरो नुवां जुग रेन होर उनी के इनकार इयाकु। 26#एटे 6:5–8जेलेका नूह रआ हिलोः रे होयकेना, इनका गी मनवा रिई होपोन हेरेल रआ रुवाड़ हिजुः हिलोः होयुःआ। 27#एटे 7:6–24 नूह दाः जहाज रे काय देच केनाय उना हिलोः तक होर जोम-नुय केनाकु अरो उनकु रे बार-बिहा होयुः केना। रे बाइड़ दाः ता हेच केते, उनकु सुबिन होर के नठाव वेःकुवाय। 28#एटे 18:20—19:25 जेलेका लूत रआ हिलोः रे होय केना, चि होर जोम-नु अखरीञ-किरीञ कराव, दाड़ु रोवाय केनाकु, अरो ओड़ाः बाय एकेनाकु; 29मुदा जे हिलोः लूत सोदोम चट्टी एते उडुङ एनाय, उना हिलोः परमेसर ता सिरमा एते सेंगेल अरो गंधक गाम्मेताय, अरो सुबिन के सुबिन नठाव नाकु। 30मनवा रिई होपोन हेरेल रुवाड़ हिजुः हिलोः इनका गी होयुःआ।
31 #
मती 24:17,18; मर 13:15,16 उना हिलोः जे छनमिन रे हेनापेया, अरो उनकु रआ सामान ओड़ाः रे हेनाःआं, उना इदी कथिर लातार ओलोपे अरगुना, अरो जे खेत रे हेनापेया, उनकु हों ओड़ाः ओलोकु रुवाड़का। 32#एटे 19:26लूत रिई एरा तेः के ओयहर एयपे! 33#मती 10:39; 16:25; मर 8:35; लूका 9:24; जोह 12:25जे अपन जीव बनचाव चहाःअय, उनी उना आततियाय, मुदा जे उना आततियाय, उनी उना बनचावियाय। 34इञ अपे एते गाम वपेकानिञ, उना निदा बार होर मियाः परकोम रे गितीच एकानोवोकिन, मिहोर के रिम इदियाय अरो मिहोर के बागी कयाय। 35बार होर कुरी होपोन गाति-गाति जाता रे रित इयाकिन, मिहोर के रिम इदियाय अरो मिहोर के बागी कयाय। 36#17:36 हुडिञगन ती एते ओल अनाः मरी पोथी रे बनुःआं।बार होर खेत रे तहीः अकिन रे, मिहोर के इदियाय अरो मिहोर के बागियाय।
37नुवां रे चेलाकु ता ईसु एते कुलिएदेयाकु, “परभु! नुवां कारे होयुःआ?”
उनी ता जबाब एमाःकुवाय, “जे ठिनुः गोच-होड़मो तहिनोःवोय, ओन्डो गीध हों जामानाकु।”
Currently Selected:
लूका 17: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
