लूका 21

कंगाल रड़ियाही रआ दान

(मरकुस 12:41–44)

1अरो ईसु ता नेलेःकुवाय चि धनगारकु मरंग बिनती ओड़ाः रे अपन-अपन दान भंडार रे संजोय कनाकु। 2ईसु ता मिहोर रेंगेच-रबंङ रड़ियाही केहों उना रे बार दमड़ी जे मीः पोयसा रआ बराबोइर होयुः काना; सन्जो एते नेलेःदेयाय। 3ईसु गामवाःकुवाय “इञ अपे एते नुवां सच गामवापे कनिञ नोय रेंगेच-रबंङ रड़ियाही ता उनकु सुबिन एते ढेर संजो एकाःआय। 4चिलिमेनचि उनकु सुबिन ता अपन-अपन आमदनी बड़हाव रे एते दान रे हुडिञगन संजो एकाःआकु, मुदा उनी ता अपन घटी रे एते आच रआ सुबिन जिनिवेत संजो एकाःआय।”

मरंग बिनती ओड़ाः रआ नठावओः रआ आगमजानी

(मती 24:1,2; मरकुस 13:1,2)

5हुडिञगन होरकु मरंग बिनती ओड़ाः रआ बबेत रे गाम एकेनाकु चि उना चिलकन सुन्दर दिड़ी अरो दान एएम वनाः जिनिस एते संवराव एकाःआकु। दो ईसु ता गामवाःकुवाय, 6“उना हिलोः हिजुःआ, जे रे नुवां सुबिन जे अपे नेल कनापे उना रे एते नोन्डो जहन दिड़ी रे दिड़ी हों काकु बगिया, सुबिन धसावियाकु।”

दुख अरो सताव

(मती 24:3–14; मरकुस 13:3–13)

7उनकु ता ईसु एते कुलिएदेयाकु, गुरु! नुवां चिमिस होयुःआ अरो चिलि चिनहा एते पता सेसेना चि नुवां पुरावोः रआ हेनाःआं?

8ईसु ता जबाब एमाःकुवाय, चेम्पोर तहीःपे, अपे केहों जहय ओलोकु भरमावपेका चिलिमेनचि बेचोट एते होर इञ रआ लुतूम अगु केते हिजुःआकु अरो गाम्‍माकु इञ गी मसी हेकेञ अरो उना समेय हेच एकाना। उनी रआ ओलोपे बिसवासिया। 9जोब अपे लड़ाय अरो मपाः गोपोच रआ हुलमुली ओनावियापे रेहों ओलोपे घबराव वोःओ, चिलिमेनचि नियां रआ पहिल होयुः वनाः सरिगी हेनाःआं, मुदा नियां मुडू बङकाः।

10अरो ईसु ता उनकु एते गामवाःकुवाय, जाइत रआ खोनोस जाइत बिरीत तिंगु नोःओकु, अरो राइज रआ खोनोस राइज, 11मरंग-मरंग भुइडोल होयुःआ, अरो ठांव-ठांव अकाल अरो महामारी होयुःआ अरो सिरमा एते भयभयान घटना घटावोःओ अरो मरंग-मरंग चिनहा दिसतारोःवो। 12मुदा नियां सुबिन गानाम एते पहिल उनकु इञ रआ लुतूम रआ चलते अपे के साप पेयाकु अरो सताव पेयाकु अरो पंचेत ओड़ाः रे सोंपाव पेयाकु अरो जेहेल ओड़ाः रे संजो इरी पेयाकु अरो राजाकु अरो हाकिमकु रआ लहा इदी पेयाकु। 13आर नुवां अपे कथिर बुगिन खभेर गोवाही उदुः रआ मोका होयुःआ। 14#लूका 12:11,12इनाते अपन-अपन मोन रे ठनाव केते दोहोयपे चि अबुन पहिल एते जबाब एएम रआ काबु चिन्ताया। 15चिलिमेनचि इञ अपे के नुंकान नधनी अरो बुधि एमापिञ चि अपे रेन सुबिन खोनोस वन अरो अपे रआ गानाम काकु कटाव दड़िवाःआ अरो अपे रे गलती काकु सबिद दड़िवाःआ। 16अपे रेन एंगा-आपु अरो बोयहा-मिसी अरो कुटुम अरो गाति हों, अपे के सापइरी पेयाकु, नोन्डो तक चि अपे रे एते हुडिञगन के गोच इरी पेयाकु। 17इञ रआ लुतूम रआ चलते सुबिन होर अपे के बाइर पेयाकु। 18मुदा अपे रआ बोहोः रआ मियाः उप हों का बंका नोःओ। 19अपे रआ असतिर तहीः एते अपे अपन रावा ता बनचावियापे।

जरुसलेम रआ नठाव रआ आगमजानी

(मती 24:15–21; मरकुस 13:14–19)

20जोब अपे जरुसलेम ता पलटनकु एते घेराव वते नेल कुवापे, दो सारी केपे चि उना रआ उजड़ावोः हेनात गिया, 21उना समेय जे होर जहुदिया पोरदेस रे हेनापेया उनकु टोंगरी रे निर जोनपे, जे जरुसलेम रे हेनापेया, उनकु टांड़ी उडुङ जोनपे अरो जे हातु रेपेया उनकु जरुसलेम रे ओलोपे सिनुःआं। 22#होसे 9:7चिलिमेनचि नुवां पलटा अगु रआ हिलोः होयुःआ, जे रे ओल वनाः सुबिन गानाम पूराव वोःओ। 23उनकु कथिर दुख, जे उना हिलोः रे भारी होड़मो वनीः अरो तोवा अनु वनीः कथिर का सहाव वनाः हिलोः लेका होयुःआ, चिलिमेनचि दिसुम रे मरंग संकट अरो नोंकु होर रे परकोप होयुःआ। 24होर तलवाइर एते माः गोच पेयाकु। उनकु के कयदी बाय केते सुबिन दिसुम रे इदी कुवाकु, अरो जोब तक गइर-जहुदी रआ समेय ओलो पुरावोःका, तोब तक जरुसलेम गइर-जहुदिकु एते रेंवदाव वोःओ।

मनवां होपोन रआ अरो हिजुः

(मती 24:29–31; मरकुस 13:24–27)

25 # जसा 13:10; हेज 32:7; जोवे 2:31; दि.बचन 6:12,13 सिंगी बोंगा अरो निदा बोंगा अरो इपिलकु रे चिनहा दिसतार वोःओ अरो ओते रे जाइत-जाइत रेन होरकु रे बिपेत हिजुःआ चिलिमेनचि उनकु समुदर रआ गरजाः एते अरो हलका रआ गरेद एते घबराव वोःओकु। 26अरो दुनिया रे हिजुः वनाः घटना ता सोंचाव-सोंचाव होर भोय एते बेहोस वोःओकु चिलिमेनचि सिरमा रआ बोल झकझोरावियाय। 27#दानि 7:13; दि.बचन 1:7तोब मनवा रिई होपोन तेः हेरेल के सोमोर्थ अरो मरंग महिमा रआ लोः लिम्बीर एते हिजुः वते नेलेयापे। 28जोब नुवां गानाम होयुः लगाव ओ:वो दो तिंगु केते चेतान संगिल एपे चिलिमेनचि अपे रआ उद्धार हेनात गिया।

अंजीर दाड़ु रआ कहनी

(मती 24:32–35; मरकुस 13:28–31)

29ईसु ता उनकु के मियाः नुवां कहनी अयुम वाःकुवाय, अंजीर रआ दाड़ु अरो सुबिन दाड़ु ता नेलपे। 30जोब उना रे फुनहुर उडुङ हिजुः काना अपे नेल केते अपन तिगी सारीइ केकानापे चि जेठ मेहना हिजुः काना। 31इना लेका जोब अपे नियां गानाम ता नेल्‍लापे, दो नुवां सारी केपे चि परमेसर रआ राइज हेनात गिया।

32इञ अपे के सच गामवापे कनिञ चि नियां पिड़ही रेन होर रआ जुवेत तहीः रिगी नुवां सुबिन गानाम घटाव वोःओ। 33सिरमा अरो ओते ओचोःओ, मुदा इञ रआ गानाम केहयो का ओचोःओ।

चेहाव तहीःपे

(मती 24:36–46; मरकुस 13:32–37)

34-35“इनाते चेम्पोर तहीःपे, नुंका ओलो होयुःका चि अपे रआ मोन मोज-मसती मतवारी अरो जिनगी रआ फिकिर रआ हम्बल एते तेन जोन अरो उना हिलोः अपे रे फांसी रआ लेका अचाका हिजुःआ। चिलिमेनचि उना सुबिन ओते रेन सुबिन तहीः वनकु रे नियां लेका गी हिजुःआ। 36इनाते चेहाव तहीःपे अरो हार घरीक पराथना चित तहीःपे चि अपे नियां सुबिन हिजुः वनाः घटना एते बनचाः कथिर अरो मनवा रिई होपोन हेरेल रआ लहा तिंगुः रआ लाइख बयुःपे।”

37 # लूका 19:47 उनी रोज सेताः एते अयुप पहार तक मरंग बिनती ओड़ाः रे उदुः वकु केनाय, अरो निदा टांड़ी सेनकेते जायतून लुतूम बुरु रे तहीः केनाय, 38अरो अंगा ता सुबिन होर उनी रआ अयुम कथिर मरंग बिनती ओड़ाः रे उनी ठिनुः हिजुः केनाकु।

Currently Selected:

लूका 21: BIY

Highlight

Copy

Compare