लूका 23
23
रोमी राजपाल पिलातुस ठिनुः ईसु
(मती 27:1,2,11–14; मरकुस 15:1–5; जोहन 18:28–38)
1तोब सुबिन पंचेत बिरीत तिंगु एनाकु अरो उनकु ईसु के रोमी राजपाल पिलातुस ठिनुः इदी एदेयाकु। 2उनकु नुवां गाम केते ईसु के दोस लगाव हेलावेनाकु, “आले के पता होय्येना चि नोय मनवां आले रेन जाइत के बहकाव कुकानाय, रोम रिई महाराजा कयसर के मालगुजारी एएमते होरकु के रोकाव कुकानाय, अरो अपन के मसी राजा गमुः कनाय।”
3रोमी राजपाल पिलातुस ता ईसु एते कुलिएदेयाय, “चिलि आम जहुदिकु रिई राजा हेकेम?”
ईसु ता जबाब एमाःदेयाय, “आम गी गाम कनाम।”
4तोब रोमी राजपाल पिलातुस ता मुध जाजककु अरो होरकु एते गामवाःकुवाय, “इञ नोय मनवां रे जहन दोस काइञ नामलाःआ।”
5मुदा उनकु अरोगी डिढ़ एते गापाम हेलावेनाकु, “नोय गलील एते लेयकेते नोन्डो तक सुबिन जहुदिया पोरदेस रे उदुः-उदुः एते होरकु के उकसाव कुकानाय।” 6नुवां अयुम केते रोमी राजपाल पिलातुस ता कुलिवेःकुवाय, “चिलि नोय मनवां गलील रे तहीः वनीः हेकेय?” 7अरो नुवां सारीकेते चि नोय हेरोदेस राइज रआ हक इलाका रिई हेकेय, उनी हेरोदेस ठिनुः कुलेःदेयाय चिलिमेनचि इमिन रे उनी हों जरुसलेम रे तहिकेनाय।
हेरोदेस लहा रे ईसु
8हेरोदेस ईसु के नेल केते बेचोट गी खुस एनाय, चिलिमेनचि उनी बेचोट हिलोः एते उनी के नेनेल कथिरोः केनाय, इनाते चि उनी रआ बबेत रे अयुम लाःआय, अरो उनी एते जहन चिनहा नेनेल रआ आसरा दोहोय केनाय। 9उनी एते बेचोट एते गानाम कुली तहिएनाय, मुदा उनी ता उनी के जहन्नाः हों जबाब काय एमाःदेयाय। 10मरंग जाजक अरो धरम पोथी सिखाविकु जबरेय ईसु रे दोस लगाव चित तहिएनाकु। 11तोब हेरोदेस ता आचरेन सिपाहिकु लोः उनी के बेमाइन कराव केते लेचेड़-लेचेड़ वदेयाकु, अरो मंहगा किचरीः होरोः केते उनी के पिलातुस ठिनुः रुवाड़ एदेयाकु। 12उना हिलोः हेरोदेस अरो पिलातुस गाति बायेनाकिन पहिल दो उनकिन बनार रे दुसमानी तहिकेना।
ईसु के गोनोच दंड
(मती 27:15–26; मरकुस 15:6–15; जोहन 18:39—19:16)
13पिलातुस ता मरंग जाजककु अरो नेताकु अरो होरकु के होहो केते उनकु के गामवाःकुवाय, 14“अपे नोय मनवां के होरकु के बहकाव वनीः ठहराव केते इञ ठिनुः अगु एकाःदेयापे अरो नेलपे, इञ ता अपे ठिनुः उनी के जांचव एदेयिञ, मुदा जे गानाम रआ अपे उनी रे दोस लगाव कनापे, उना गानाम रआ बबेत रे इञ ता उनी रे जहन दोस हों काइञ नाम्मेकाःआ, 15न हेरोदेस ता, चिलिमेनचि उनी ता उनी के आले ठिनुः रुवाड़ एकाःदेयाय, अरो नेलपे उनी गोजुः लेकन जहन्नाः काय कामि एकाःआय। 16इनाते इञ उनी के कोड़रा एते रु इरी केते बागी काइञ।” 17हरेक पसका पोरोब रआ समेय रे पिलातुस मिहोर जेहेल रे संजो वनकु रे एते बगी कुकनकेनाय#23:17 ती एते ओल वनाः पहिल रआ मरी पोथी रे नुंका ओल वनाः बनुःआं।
18तोब सुबिन मीः जुट केते कुर्री बिरीत एनाकु, “नोय रआ कामि चबा उतारेम अरो आले कथिर बराबस के आड़ाः कायमी।” 19बराबस सरकार रआ बिरोध चट्टी रे मपाः गोपोच एरिलेःकुवाय इना रआ चलते जेहेल ओड़ाः रे सांजो लेदेयाकु।
20मुदा पिलातुस ता ईसु के बागी रआ मोन एते होरकु के अरो सोमझावेःकुवाय, 21मुदा उनकु ता कुर्री केते गाम्मेताकु, “उनी के कुरुस रे रकापिया कुरुस रे।”
22पिलातुस ता पेय इस्सा उनकु एते गामवाःकुवाय, “चिलिमेन उनी ता चिलिकाः गुनाह एकाःआय? इञ ता गोगोच उतर लेका उनी रे जहन गानाम काइञ नामलाःआ, इनाते इञ ईसु के कोड़रा एते सोड़ेच इरी केते बागी कायकानिञ।”
23मुदा उनकु कुर्री-कुर्री केते उनी रआ तयनोम पोड़ावेनाकु, चि उनी के कुरुस रे रकापिया अरो उनकु रआ ककला गी जीतावेना। 24इनाते पिलातुस ता हुकूम एमाःकुवाय चि उनकु रआ अरजी मोताबिक करावेपे। 25जे सरकार रआ बिरोध रे मपाः कोपोच लेःकुवाय इना रआ चलते जेहेल ओड़ाः रे सांजो लेदेयाकु अरो जे के उनकु कोवेय केनाकु बागी कदेयाय अरो ईसु के उनकु रआ मोन रआ मोताबिक कराव कथिर सोंपावाःकुवाय।
ईसु के कुरुस रे रकाप
(मती 27:32–44; मरकुस 15:21–32; जोहन 19:17–27)
26जोब सिपाही ईसु के इदिइ केनाकु, दो उनकु ता सिमोन लुतूम मिहोर कुरेन चट्टी रिई तहिकेनाय, उनी हातु एते हिजुः केनाय साप केते उनी के कुरुस गोः वदेयाकु चि उनी ईसु रआ तयोम-तयोम इदियाय।
27होरकु रआ मरंग भीड़ उनी रआ तयोम-तयोम सेसेन केनाकु, अरो उना रे बेचोट एते एराकु हों तहिकेनाकु, जे उनी कथिर खोभराव-खोभराव इयाम केनाकु। 28ईसु ता उनकु सोझ नेल रुवाड़ केते गामवाःकुवाय, “जरुसलेम रेन कुरी होपोन! इञ कथिर ओलोपे इयाम्मा। अपे कथिर अरो अपे रेन होपोनकु कथिर इयामपे, 29चिलिमेनचि उना हिलोः हिजुः काना, जोब होर गाम्माकु धेनया हेनापेया उनकु एरा जे बंझी हेनापेया, धेनया हेनाःआं उनकु रआ होड़मो, जेकर होपोन बनुःकुवा, अरो धेनया हेनाकुवा उनकु जे तोवा काकु अनु वाःकुवा। 30#होसे 10:8; दि.बचन 6:16जोब होर बुरु एते गापाम हेलावोःओकु, ‘आले रे उयुः ओःमी’, अरो टोंगरी एते गाम्माले आले के ‘हरुप कलेम’, 31चिलिमेनचि जोब उनकु हेरयार दाड़ु लोः नुंकाय कनाकु, दो रोहोड़ वनकु लोः चिलिकाः काकु कराविया?”
32उनकु ईसु लोः बार होर डाकुत किन केहों गोगोच कथिर इदी किनकेनाकु। 33उनकु खपरोही रआ लुतूम ठांव तेबाःएनाकु। ओन्डो उनकु ता ईसु के अरो उनकिन बनार डाकुत केहों कुरुस रे रकापेःकिनाकु, मिहोर के उनी रआ जोम ती, अरो मिहोर के उनी रआ लेंगा ती। 34#सिरिञ 22:18ईसु ता गाम्मेताय, “ए आबा नोकु के माफ ककुम चिलिमेनचि नोकु काकु सारीइकाना चि चिलिइ कनाले।”
तोब सिपाही ता ईसु रआ किचरीः ता चिमिन ठिनुः हटिञ एताकु, अरो उनी कथिर चिट्ठी उडुङ एताकु। 35#सिरिञ 22:7होर तिंगु केते नुवां सुबिन नेल एकेनाकु, जहुदी नेता नियां गाम केते उनी के लेचेड़-लेचेड़ वयकेनाकु, नोय ता एटाःइकु के बनचाव वेःकुवाय, जदि नोय परमेसर एते सला वनीः उद्धार कराव वनीः मसी हेकेय रेदो अपन एते बनचाव वोःकाय।
36 #
सिरिञ 69:21
सिपाही हों हेनात हेचकेते अरो जोजो अंगुर रास अगु एम केते उनी के लेचेड़-लेचेड़ केते गाम वयकेनाकु। 37“जदि आम जहुदिकु रिई राजा हेकेम, रेदो अपन तिगी बनचावोःमी।”
38अरो उनी रआ चेतान कुरुस रे मियाः पाटी रे दोस ओल केते ठोकाव कताकु “नोय जहुदिकु रिई राजा हेकेय।”
39कुरुस रे रकाप वन डाकुत किन रे मिहोर नियां लेका ईसु रआ निन्दा वेताय, “आम मसी हेकेम बङ? दो अपन के अरो अलिञ केहों बनचाव लिञमी।”
40आर एटाः इनीः ता उनी के डपटाव केते गामवादेयाय, “चिलि आम के परमेसर रआ हों बोरो बनुःआं? आम हों दो इना दन्ड भोगाः कनाम, 41अरो अलांङ दो नेयाय मोताबिक दन्ड नाम कनालंग, चिलिमेनचि अलांङ अपन कामि रआ सच गी फोल नाम कनालंग, मुदा नोय दो जहन्नाः काय गुनाह एकाःआय।” 42तोब एटाः डाकुत ता गामवादेयाय, “ए ईसु जोब आम राजा होय केते हिजुःआम दो, इञ के ओयहर एञमी।”
43ईसु ता उनी के गामवादेयाय, “इञ आम एते सच गी गाम वामकानिञ आम तिहिञ गी इञ लोः सोवाराग रे तहिनोःओम।”
ईसु रआ गोजुः
(मती 27:45–56; मरकुस 15:33–43; जोहन 19:28–30)
44 #
उठ 26:31–33
लगेभगे दुपहरा एते तीन बजे तक सुबिन दिसुम रे लुबाः तहिना। 45अरो सिंगी बोंगा रआ मसकल तोराःआ, अरो मरंग बिनती ओड़ाः रआ परदा ताला एते पाड़ाः एना, 46#सिरिञ 31:5अरो ईसु ता मरंग राव एते होहो केते गाम्मेताय, “ए आबा इञ अपन रावा आम रआ ती रे सोंपाव कनिञ।” अरो नुवां गाम केते जीव आड़ाः एताय।
47साव सिपाही रेन, एगवा जे होयकेना नेलकेते परमेसर रआ बड़ाय एताय अरो गाम्मेताकु, “निचित नोय मनवां धरमी तहिकेनाय।”
48अरो भीड़ जे नुवां नेनेल कथिर मीः ठिनुः केनाकु, नियां घटना ता नेल केते खोभराव-खोभराव इयाम वते रुवाड़ एनाकु। 49#लूका 8:2,3मुदा उनी रेन सुबिन जान-चिनहार अरो जे एराकु गलील एते ईसु लोः हेच केनाकु, संगिञ तिंगु केते नुवां सुबिन नेल एकेनाकु।
ईसु के तोपा एदेयाकु
(मती 27:57–61; मरकुस 15:42–47; जोहन 19:38–42)
50-51ओन्डो अरमतिया चट्टी रिई जुसूफ लुतूम रिई जहुदी मुध पंचेत रिई मिहोर सदस तहिकेनाय, जे बुगिन अरो धरमी हेरेल तहिकेनाय। अरो उनी जहुदी मरंग पंचेत रे ईसु रआ खोनोस कराव वनाः जोजना अरो कामि एते सहमत काय तहिकेनाय। अरो परमेसर रआ राइज रआ आसरा नेनेल वनीः तहिकेनाय। 52उनी ता पिलातुस ठिनुः सेनकेते ईसु रआ गोच-होड़मो कोवेःदेयाय, 53अरो उनी के अरगु केते मलमल कफन किचरीः रे पोतराव एदेयाकु अरो मियाः मरघाटी रे दोहो एदेयाकु, जे चटाइन रे भुलकाः लेका उर केना, अरो उना रे जहय के केहयो काकु दोहो लेःकुवा। 54उना हिलोः सुकूरवार तहिकेना अरो जहुदी रआ जिराः हिलोः एटेच ओःआनाः तहिकेना।
55उनकु एराकु ता जे उनी लोः गलील एते हेच केनाकु, तयोम-तयोम सेनकेते उना मरघाटी ता नेल एताकु अरो नुवां हों चि उनी रआ गोच-होड़मो करा लेका एते दोहो एकाःआकु। 56#उठ 20:10; नियम 5:14तोब उनकु ता रुवाड़ केते बुगिन सोः जिनिस अरो सोः मलाव वनाः मलहम सम्पार एताकु।
अरो जहुदी रआ जिराः हिलोः उनकु ता हुकूम रआ एते जिराव नाकु।
Currently Selected:
लूका 23: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
