रोमि 2
2
परमेसर रआ नेयाय
1 #
मती 7:1; लूका 6:37 ए दोस लगाव वनीः, आम चहे जहय गी हेकेम, आम ठिनुः जहन बहना बनुःआं, चिलिमेनचि जे गानाम कथिर आम एटाः होर के दोसी ठहराव कुकानाम, इना एते आम अपन खुद के हों गुनाहगार सिध ओः कनाम, चिलिमेनचि आम जे गानाम रआ बबेत रे एटाः होर के दोस लगाव कुकानाम, उना खुद गी कराव कनाम। 2आले सारीइ कनाले चि नुंकन-नुंकन कामि कराव वन रे परमेसर सोझ एते सचाय मोताबिक दंड रआ हुकूम नमुःआ 3अरो ए मनवां, आम जे नुंकन-नुंकन कामि कराव वन रे दोस लगाव कुकानाम, आम खुद गी इना कामि गी कराव कनाम, चिलि नुवां सोमझाः कनाम चि आम परमेसर रआ दन्ड एते बनचाव वोःओम? 4चिलि आम उनी रआ माया अरो सहवबोल अरो धीरज रुपीधन ता तुछ कनाम? अरो चिलि नुवां कम सारीइकाना चि परमेसर रआ माया आम के मोन रुवाड़ सोझ इदी मिकानाय? 5मुदा अपन ढिठ अरो हुरमुठ मोन रआ चलते परमेसर रआ कोरोध रआ हिलोः कथिर, जेकर रे परमेसर रआ सचा नेयाय दिसतारोःओ, अपन कथिर खिंस जवराय कनाम। 6#सिरिञ 62:12; बु.बचन 24:12 परमेसर हरेक के उनकु रआ कामि रआ मोताबिक फोल एमाकुकानाय। 7जे लघाइर बुगिन कामि वते मइन, इजात अरो का गोजुः वनाः जीवन रआ दंड़ा रे हेनाकुवा, परमेसर उनकु के का मुडूः जीवन एमाकुवाय। 8मुदा जे सोवारथी हेनाकुवा, सतया ता का मनाव केते अधरम रे सेसेन कनाकु, उनकु रे परमेसर खिंस अरो बेचोट खिंस रे पोड़ाव ओःओ। 9अरो उनकु मनवांकु रे दुख अरो संकट हिजुःआ, जे बुराय रे सेसेन कनाकु। पहिल जहुदी रे अरो गइर-जहुदी रे। 10अरो जहय बुगिन कामिइ कनाकु, उनकु कथिर मइन, इजात अरो सांति नमुःआं। पहिल जहुदी के अरो गइर-जहुदी के। 11#नियम 10:17 चिलिमेनचि परमेसर जहय के चेहरा नेल केते काय नेयाय कुकानाय।
12गइर-जहुदिकु नियम ता का सारी केते पाप एताकु, उनकु मूसा रआ नियम बेगार सारी केते नास वोःओकु अरो जहुदिकु मूसा रआ नियम सारी केते पाप एताकु, उनकु के मूसा रआ नियम मोताबिक दन्ड नमुःआ। 13परमेसर रआ नजेर रे धरमी उनकु बङा, जे नियम ता ओनाव वन हेकेकु, मुदा धरमी उनकु हेकेकु, जे नियम रआ पालन कनाकु। 14जोब गइर-जहुदी जेकर ठिनुः नियम बनुःआं, जदि अपन सोवाभव एते नियम रआ हुकूम मनाः कनाकु दो नियम उनकु ठिनुः का होयुः रेहों उनकु अपन कथिर खुद गी नियम हेकेकु। 15उनकु चइल-चलन एते देखाव कनाकु चि मूसा रआ नियम रआ गानाम अपन हिरदय रे ओल्लेकाना, उनकु रआ भीतरी मोन हों गोवाही एम कनाय अरो उनकु रआ सोंच केहियो दोसी अरो केहियो बिनदोसी ठहराव कुकानाय। 16उना हिलोः जोब परमेसर इञ दोवासते परचार वनाः बुगिन खभेर रआ मोताबिक ईसु मसी दोवासते मनवाकु रआ उकु बिचार रआ नेयायियाय।
जहुदी अरो नियम
17जदि अपे जहुदी गमुःकानापे, मूसा रआ नियम रे भोरोसा दोहोय कनापे अरो परमेसर रआ बबेत रे घमंड कनापे। 18अरो अपे परमेसर रआ हिछा सारीइ कनापे, नियम रआ सिख नामकेते बुगिन-बुगिन गानाम ता सच मनाः कनापे। 19-20गेयान, सतया रआ नमूना, जे नियम रे हेनाःआं, उना अपे ठिनुः मेनाःआं इनाते अपे नुवां मनावोः कनापे चि आले अंधरा रेन एगवा हेकेले, जे लुबाः रे भटकाः कनाकु, उनकु कथिर मसकल हेकेले। निरबुधियाकु रेन सिखाव वन अरो होपोनकु रेन उपदेसक हेकेले। 21दो अपे जे एटाः होर के सिखाव कुकानापे, अपन के चिलिमेन कपे सिखावोःकाना। अपे जे का कुमरु कराव रआ परचार कनापे, खुद अपे कुमरुयापे? 22अपे जे गाम कनापे चि साप-जोटेत का कराव चही, खुद चिलिमेन साप-जोटेत कुकानापे? अपे जे मुरती एते घिनाः कनापे चिलिमेन मंदिर रआ धन रेच कनापे? 23अपे जे नियम रआ बबेत रे घमंड कनापे, चिलिमेन नियम ता तोड़ाव केते परमेसर के लजिम एय कनापे? 24#जसा 52:5 चिलिमेनचि जे लेका पबितर पोथी रे ओल्लेकाना, अपे रआ चलते गइर-जहुदिकु रे परमेसर रआ लुतूम रआ निन्दा होयुः काना।
25जदि अपे मूसा रआ नियम ता पालन कनापे तोब खतना रआ फयदा हेनाःआं, मुदा जदि अपे नियम तोड़ाव कनापे रेदो अपे रआ खतना बिन खतना लेका ठहरावेना। 26जदि गइर-जहुदी रआ का खतना होय एकाना अरो उनकु नियम रआ हुकूम रे सेसेन कनाकु रेदो चिलि परमेसर उनकु के खतना होय लेका काय मनाव कुवाय? 27जदि गइर-जहुदिकु रआ खतना का होय एकाना नियम ता पालन कनाकु, उनकु अपे के नेयाय पेयाकु। चिलिमेनचि अपे जहुदी मूसा रआ नियम अरो खतना होय एकाना रेहों नियम ता तोड़ाव कनापे। 28चिलिमेनचि असली जहुदी उनकु बङकन, जे बहरी भेस रे नेलुःकाना, अरो असली खतना उना बङा, जे होड़मो रे मेनाःआं अरो बहरी भेस एते नेलुः काना। 29#नियम 30:6 असली जहुदी इनकुगी हेकेकु, जे भीतरोवांट एते जहुदी हेकेकु। सचा खतना, रावा अरो मोन रआ खतना हेके, न चि ओनोल नियम रआ। नुंकन होर रआ परसंसा मनवां सोझ एते बङा, मुदा परमेसर सोझ एते होयुः काना।
Currently Selected:
रोमि 2: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
