रोमि 4

अबराहम रआ बिसवास

1अबुन चिलिकाः गाम्‍माबुन, जे होड़मो रआ रुप रिई, अबुन रिई पुरखा आपु अबराहम के चिलिकाः नाम्‍मेना? 2जदि अबराहम अपन कामि एते धरमी ठहराव लेन रेदोय उनी के घमंड कराव रआ ठांव होयुःआ होनांङ, मुदा परमेसर रआ हेनात घमंड कराव काय दड़िवाःआ। 3#एटे 15:6; गला 3:6 पबितर पोथी चिलिकाः गाम कनाय? “नुवां चि अबराहम ता परमेसर रे बिसवास एताय अरो उना बिसवास उनी कथिर धरमिकता लेखा एना।” 4कामि कराव वनकु के बोनी एएम दान बङ कानाः, मुदा हक हेनाःआं। 5नियम रआ कामि कराव रे बङा मुदा अधारमी के धरमी बबाय वनीः परमेसर रे बिसवास कनाकु, उनकु रआ बिसवास उनकु के धरमी बाय कुकानाय। 6इनका गी जे के परमेसर बिन कामि रिगी धरमी ठहराव कुकानाय, उनकु के दाऊद हों धेनया मेता कुकानाय।

7 # सिरिञ 32:1,2 “धेनया उनकु हेकेकु,

जेकर अधरम छमावेना अरो जेकर पाप हरुप कताय।

8धेनया हेनाकुवा उनकु मनवां जेकर पाप रआ लेखा परभु काय दोहो।”

9दो नुवां धेनया गागाम, चिलि खतना वनकु जहुदिकु कथिर गी हेनाःआं चि बिन खतना वन गइर-जहुदी होरकु कथिर हों? चिलिमेनचि आले नुवां गाम कनाले, अबराहम कथिर उनी रआ बिसवास चलते धरमिकता लेखा एनाय। 10दो उनी चिमिस लेखा एनाय? खतना रआ पहिल चि खतना रआ तयोम? खतना रआ तयोम रे बङा मुदा खतना रआ पहिल रे। 11#एटे 17:10 बेखतना रे तहीः समेय अबराहम के बिसवास दोवासते धरमी ठहरावेनाय, उनी रआ धरमिकता सबुद कथिर खतना रआ चिनहा नम्‍मेताय। ताकि अबराहम उनकु सुबिन रेन आपु बयुःकाय, जे बिन खतना एते बिसवास कनाकु। ताकि उनकु धरमी लेखाःकाकु। 12अबराहम उनकु खतना वनकु रिई हों आपु हेकेय, मुदा इनागी होरकु कथिर जे जेलेका अबराहम खतना रआ पहिल बिसवास कराव लाःआय, इनका गी बिसवास कनाकु।

बिसवास अरो परमेसर रआ वादा

13 # एटे 17:4–6; 22:17,18; गला 3:29 परमेसर ता अबराहम अरो उनी रेन बोंस एते वादा एताय चि उनकु दुनिया रेन हकदार होयुःआकु। नुवां वादा इनाते का होय चि अबराहम ता नियम रआ पालन एताय, मुदा बिसवास एते मिलाव वनाः धरमिकता रआ चलते। 14#गला 3:18जदि नियम रआ अधिन रे तहीः इकु गी हकदार बयुः कनाकु, रेदो बिसवास बेओरोथ हेके अरो वादा बेकार कोःकाना। 15नियम का पालन एते परमेसर रआ खिंस उपनेजोः काना, मुदा जे ठिनुः नियम बनुःआं ओन्डो नियम टलाव हों बनुःआं।

16 # गला 3:7 निया चलते परमेसर रआ वादा बिसवास रआ फोल हेके, ताकि नुवां दया रआ अधारित होयुःका अरो अबराहम रेन सुबिन बोंस कथिर जमजुगूत होयुःका। न सिरीफ उनकु कथिर जे नियम ता मनाव कनाकु, मुदा उनकु सुबिन कथिर हों जे अबराहम लेका बिसवास दोहोय कनाकु। चिलिमेनचि अबराहम अबुन सुबिन रिई आपु हेकेय। 17#एटे 17:5 जे लेका पबितर पोथी रे ओल्‍लेकाना, “इञ ता आम के बेचोट जाइतकु रिई आपु बाय एकाःमिञ।” उनी परमेसर रआ लहा जेकर रे उनी ता बिसवास एताय अरो जे गोच वनकु के जुवेत कुकानाय अरो जे जिनिस हेयेगी बनुःआं, उना सिरजाव कनाय। 18#एटे 15:5 अबराहम के उमिद का तहिकेना ओन्डो आसरा लोः बिसवास एताय, उनी बेचोट जाइतकु रिई आपु बय्येनाय। इनाते उना परतिगेया रआ मोताबिक जे पबितर पोथी रे ओल्‍लेकाना, “आमरेन बोंस इपिल लेका अनगिनित होयुःआकु।” 19#एटे 17:17 अरो उनी जे मीः साव बरीस रिई तहिकेनाय, अपन गोच लेकन होड़मो अरो सारा रआ भारी होड़मोः वनाः ता गोच लेका सोमझाव केते हों बिसवास रे काय कोमजोर केनाय। 20अरो अबिसवास केते परमेसर रआ वादा रे काय संका लाःआय। मुदा बिसवास ता अरोगी बेरयार कराव वते परमेसर रआ महिमा एताय। 21उनी के पुरा भोरोसा तहिकेना चि परमेसर उनी के जे वादा एम एकावादेयाय, उना पुरा कराव रे उनी पुरापुरी कराव दड़िवाःआय। 22उना बिसवास रआ चलते परमेसर उनी के धरमी मनाव एदेयाय। 23अबराहम कथिर धरमिकता मनावेना, नुवां सबद सिरीफ अबराहम कथिर भोइर का ओल केना। 24मुदा अबुन कथिर हों हेनाःआं। परमेसर अबुन के जे उनी रे बिसवास कनाबुन, धरमी बाय बुनाय। परमेसर ता अबुन रिई परभु ईसु के गोनोच एते जुवेत एदेयाय। 25#जसा 53:4,5 परमेसर ता ईसु के अबुन रआ गुनाह कथिर सोंपाव एदेयाय अरो परमेसर अबुन के धरमी ठहराव कथिर दोबोरा जुवेत एदेयाय।

Currently Selected:

रोमि 4: BIY

Highlight

Copy

Compare