6
1Sɛ ɛmɔ nu bie ne oliema nya edwirɛ a, nzuati yeɛ ɔfa ye kɔ kɔɔto, wɔ bɛ bɔ bɛndengyɛ ne nyunu, na ɔmva ye ngɔ akrongronfoɛ ne nyunu ɔ? 2Anaa ɛmɔnze kyɛ akrongronfoɛ nemɔ yeɛ bɛkobu wiase ne atɛn ɔ? Na sɛ ɛmɔ yeɛ ɛmɔkobu wiase né atɛn a, edwirɛ mmaa-mmaa hemɔ yeɛ ɛmɔngora ye di ɔ? 3Anaa ɛmɔnze kyɛ, yɛ yeɛ yɛkobu abɔfo atɛn ɔ? Ye de, nzuati yeɛ yɛngora yɛnni asetena nu dwirɛ ɔ? 4Na sɛ ɛmɔnya asetena nu dwirɛ bie a, mmenia bɔ asafo ne mmu bɛ ne, bɛ yeɛ ɛmɔfa bɛkɔ bɛ berɛ kyɛ bɛli ɔ? 5Ɛhe de, meka maa ɛmɔ fɛle. Yeti nyanzaniɛ komapɛ po nne ɛmɔ nu bɔ ɔkɔhora kosiesie aliemaa mɔ afia dwirɛ ɔ? 6Bɔ yeti, aliemaa kora fa oliema kɔ kɔɔto, bɛ bɔ bɛlle gyidie ne nyunu ne!
7Nahorɛ dwirɛ yeɛ ole kyɛ, kɔɔto bɔ ɛmɔfa ɛmɔ nwo bɛkɔ ne kyire kyɛ ɛmɔ ali nguguo. Ye de, nzuati yeɛ ɛmɔmma bɛnyɛ ɛmɔ bɔne ɔ? Na nzuati yeɛ ɛmɔmma bɛnzisi ɛmɔ mmom ɔ? 8Ɛmɔ mmom yeɛ ɛmɔyɛ mmenia bɔne, na ɛmɔ sisi bɛ ɔ; ná ɛmɔmva bɛnyɛ ebiala kyɛ ɛmɔ aliemaa mɔ.
9Anaa ɛmɔnze kyɛ abɔnefoɛ nngɔhɔ Nyameɛ Ahennie nanu? Nnɛmɔ maa bɛlaka-laka ɛmɔ: adwamammɔfoɛ, bɛ bɔ bɛsõ bosoen, bɛ bɔ bɛsɛkye agyaa, mmrienzua bɔ bɛmaa mmrienzua ne bɛ da, mmrienzua bɔ bɛne mmrienzua da, 10awiefoɛ, bɛ bɔ bɛ nye boro nikye,#6:10 Anaa “Bɛ bɔ bɛkuro adufudeɛ.” akɔwenzafoɛ, bɛ bɔ bɛbɔ amanvoɛ alapaa, ɔne bɛ bɔ bɛbɔ apoo nngɔhɔ Nyameɛ Ahennie nanu. 11Sɔ yeɛ né ɛmɔ nu biemɔ te ɔ, nakoso banwunzi#6:11 Anaa “Babia ɛmɔ.” ɛmɔ nwo kama, bate ɛmɔ nwo, na babu ɛmɔ kyɛ ɛmɔte teneneefoɛ wɔ y'Awurade Yesu Kristo dumaa nu, ɔne yɛ Nyameɛ honhom nu.
12Nne ye nwo atee kyɛ meyɛ nikye biala, nakoso, nná ye mukoraati yeɛ mvasoɛ wɔ so ɔ. Nne ye nwo atee kyɛ meyɛ nikye biala, nakoso mengɔma nikye fee ngɔfa me nngɔyɛ akoaa. 13Koɛ ti yeɛ aleɛ wɔ berɛ ɔ, na aleɛ ti yeɛ koɛ wɔ berɛ ɔ, nakoso Nyameɛ kɔsɛkye ye munyɔ namu. Nná adwaman ti yeɛ nipadua ne wɔ berɛ ɔ, mmom nipadua ne wɔ berɛ ma Awurade, na Awurade koso wɔ berɛ ma nipadua ne. 14Nyameɛ fale ye tumi tingyele Awurade fili ewue nu, na okotingye yɛ koso.
15Ɛmɔnze kyɛ ɛmɔ nipadua ne te Kristo akwaa? Mva Kristo akwaa ne mmata tuutuuniɛ nwo anaa? Nyameɛ pa gua! 16Anaa ɛmɔnze kyɛ, ebiala bɔ ɔkɔfa ye nwo kɔbata tuutuuniɛ ne, ɔne ye ayɛ kõ? Ofikyɛ bahworɔ kyɛ, “Bɛ munyɔ ne ayɛ anwoɔnaen kõ.” 17Nakoso, bɔ ɔfa ye nwo bata Awurade ne, ɔne ye ayɛ kõ wɔ honhom nu. 18Ɛmɔnwati bɛfi adwamammɔ nwo. Bɔne biala bɔ sona kɔyɛ ne, ɔnne ye nipadua nanu, nakoso bɔ ɔbɔ adwaman ne de, ɔyɛ bɔne tia ye bɔbɔ ye nipadua ne. 19Anaa ɛmɔnze kyɛ ɛmɔ nipadua ne te honhom krongron bɔ Nyameɛ afa ama ɛmɔ, bɔ ɔwɔ ɛmɔ nu né asɔre awuro? Afei koso, ɛmɔlle ɛmɔ nwo, ɛmɔte Nyameɛ deɛ, 20ofikyɛ ɔtɔle ɛmɔ nyɔboɛ serɛ. Yeti, ɛmɔfa ɛmɔ nipadua ne bɛhyɛ Nyameɛ anuonyam.
