20
1Na dapɛn nanu kyẽa bɔ oli moa ne, Mary Magdalene wale asieleɛ naso ngyerɛmɔ tutuutu, né ewienu tettele pa, na onwuni kyɛ baye nyɔboɛ ne bafi asieleɛ ne noa berɛ dada. 2Yeti, otuli mirika wale Simon Petro ne suaniɛ bɔ ne Yesu kuro ye dwirɛ paa ne berɛ, na ɔha hyirele bɛ kyɛ: “Baye Awurade bafi asieleɛ nanu, na yɛnze nekaa bɔ bafa ye baato ɔ.” 3Yeti, Petro ne suaniɛ kõ ne sili nu kyɛ bɛkɔ asieleɛ naso dɔ. 4Né bɛ munyɔ namukoraati tu mirika, nakoso suaniɛ kõ ne nwo yɛle nyera trale Petro, yeti odwuli asieleɛ naso dɔ yakyile ye. 5Na ɔkotole berɛ tole ye nye neane kumaa nanu, na onwuni kyɛ nwera ne gua berɛ, nakoso wangɔ ye kunu dɔ. 6Na Simon Petro koso lili ye si wale, na ɔhɔle asieleɛ nanu. Na onwuni kyɛ nwera ne gua berɛ. 7Ɛtena bɔ bɛfa bɛkyekyele ye ti ne de, né ɔbokka nwera naso, mmom ne babobɔ bagua nekaa bie. 8Afei suaniɛ bɔ oli moa hɔle asieleɛ naso ne koso wurale nu, onwuni ye, na ole lili. 9Né benya bɛtelle tworɔnzɛm nabo kyɛ, odikyɛ otingye fi ewue nu. 10Yeti asuafoɛ nemɔ sa hɔle b'awuro.
11Nakoso né Mary tɛ́ gyi asieleɛ ne nyunu berɛ, bɔ ne osu ɔ. Osu ne, ɔkotole berɛ tole ye nye neane asieleɛ nanu dɔ, 12na onwuni abɔfo nyɔ bɔ bɛwura ndadeɛ fufue, kyɛ bɛte nekaa bɔ né Yesu la ne. Né kõ te nekaa bɔ né yeti la ne, yeɛ kõ ne koso te nekaa bɔ né ye gya gua ne. 13Na bɛbisale ye kyɛ: “Maame, nzuati yeɛ esu ne?” Ɔha hyirele bɛ kyɛ: “Bafa me wura bahɔ, na menze nekaa bɔ baafa ye bato ɔ.” 14Ɔhane ɛhe ne, ɔkakyile ye nwo, na onwuni kyɛ Yesu gyi berɛ, nakoso wannwu kyɛ Yesu ɔ. 15Yesu bisale ye kyɛ: “Maame, nzuati yeɛ esu ne? Ɛpena nwa?” Ye de, né y'adwene yɛ ye kyɛ, bɔ ɔnea turo nu berɛ ne ɔ, yeti ɔha hyirele ye kyɛ: “Me wura, sɛ wɔ yeɛ afa ye ne a, kyire me nekaa bɔ afa ye ato ne, na ngɔhɔ ngɔɔfa ye.” 16Yesu ha hyirele ye kyɛ: “Mary!” Na Mary kakyile ye nwo, yeɛ ɔha hyirele ye wɔ Hebri nu kyɛ “Raboni!” (yebo kyire “Kyerɛkyerɛniɛ”). 17Yesu ha hyirele ye kyɛ: “Yakyi me nu, na nnya ngɔle Baba ne dɔ. Nakoso, kɔ nniema nemɔ dɔ, na ka kyire bɛ kyɛ, ‘Mekɔ me Baba ne ɛmɔ Baba, ne me Nyameɛ ne ɛmɔ Nyameɛ ne berɛ.’” 18Yeti, Mary Magdalene wale, na ɔɔbɔle asuafoɛ nemɔ amaneɛ kyɛ: “Manwu Awurade!” Na bɔ Yesu ha hyirele ye ne, ye koso ɔha hyirele bɛ.
19Na sɔ kyẽa ne, dapɛn ne kyẽa bɔ oli moa ne nnɔsoa ne, né asuafoɛ nemɔ ayia nu, nakoso Yudafoɛ nanwo suronyi ti, né batoto anoa nanu. Na Yesu wale oogyinane bɛ afia berɛ, yeɛ ɔha hyirele bɛ kyɛ: “Asomdwie ha ɛmɔ.” 20Ɔhane sɔ ne, ɔfale ye sanu ne ye mvenu ne hyirele bɛ. Na asuafoɛ nemɔ nwuni Awurade ne, bɛ nye gyele paa. 21Yesu sa ha hyirele bɛ kyɛ: “Asomdwie ha ɛmɔ. Kyɛbɔ Baba ne asoma me ne, sɔ ala yeɛ me koso, mesoma ɛmɔ ɔ.” 22Ɔhane ɛhe yiele ne, ohuli mvrama guale bɛ so, na ɔha hyirele bɛ kyɛ: “Ɛmɔle honhom krongron. 23Sɛ ɛmɔfa ebie bɔne bɛkyɛ ye a, bafa bahyɛ ye, na ebiala bɔ ɛmɔ amva ye bɔne bangyɛ ye ne, bɛngɔfa bɛngɔhyɛ ye.”
24Nakoso mmerɛ bɔ Yesu wale ne, Tomas, buru-ne-nyɔ nanu kõ bɔ bɛfrɛ ye Atta ne de, né ɔnne berɛ. 25Yeti asuafoɛ bɔ baha ne ha hyirele ye kyɛ: “Yanwu Awurade!” Nakoso, ɔha hyirele bɛ kyɛ: “Sɛ mvale me nye nwuni nnadoaa ne boso bɔ ɔwɔ ye sa nu ne, na mvale me sa ngane ye, na mvale me sa ngane ye mvenu ne a, mengole mengoli.”
26Na ngyẽa mmɔtwɛ si ne, né asuafoɛ ne asa ayia nu wɔ sua nu, sɔ mmerɛ ne de, ne Tomas boka bɛ so. Né bato anoa nanu, nakoso Yesu wale berɛ, na oogyinane bɛ afia, yeɛ ɔhane kyɛ: “Asomdwie ha ɛmɔ.” 27Na ɔha hyirele Tomas kyɛ: “Fa wɔ sa ka wa, na nea me sa nu, na fa wɔ sa ka me mvenu ne, na yakyi aporowaa bɔ esu ne, na dɛ́ di.” 28Na Tomas ha hyirele ye kyɛ: “Me Awurade ne me Nyameɛ.” 29Yeɛ Yesu ha hyirele ye kyɛ: “Ɛnwuni me nati yeɛ alɛ́ ali ne? Anigye#20:29 Anaa “Nhyira.” yeɛ ole bɛ bɔ bɛnwuni ye, ná bedɛ bɛdi ne.”
30Yesu sa yɛle nzɛngyerɛneɛ pee wɔ asuafoɛ nemɔ nyunu, na ɛhene de, bandworɔ ye wɔ nwomaa he anu. 31Mmom bahworɔ sɔ nningyein hemɔ bato berɛ, kyɛbɔ ɔkɔyɛ a, ɛmɔkole bɛkoli kyɛ Yesu yeɛ ɔte Kristo ne, Nyameɛ awa ne, na ɔnate kyɛ ɛmɔ alɛ́ bali nati, ɛma nate Yesu dumaa naso anya ngoa.
