Luka 12
12
1Wangyɛ biala, mmeni pee boale bɛ noa, né bɛsone alaa ma ebie nnya nekaa po né wafa ye gya watia, ɔhyɛle yebo kyɛ odwudwo ne, oli moa ha hyirele ye asuafoɛ nemɔ kyɛ: “Ɛmɔnea ɛmɔ nwo yé wɔ Farisifoɛ mmɔka bɔ ɔte nyaatwom nanwo. 2Nikye biala nne berɛ bɔ bakata so bɔ ongofite, anaa wafea bɔ bɛngonwu ye ɔ. 3Na edwirɛ biala bɔ ɛmɔkɔha ye wɔ awosii nu ne, bɛkɔte ye wɔ kanea nu, na bɔ ɛmɔha bɛguale ebie so anu ne, bɛkɔtea nu bɛkɔha ye wɔ sua ti afia.
4“Me damvo mɔ, meka mekyire ɛmɔ kyɛ, nnɛmɔ suro bɛ bɔ bɛku nipadua ne a, bɛngora bɛnyɛ hwee kõ ne. 5Mmom mepena kyɛ ɛmɔnwu bɔ odikyɛ ɛmɔsuro ye ɔ: Ɛmɔsuro bɔ oku nipadua ne yie a, ole tumi bɔ ɔkora gyi to Gehenna ne. Amba, meka mekyire ɛmɔ kyɛ, ɛhe yeɛ ɛmɔsuro ye ɔ. 6Nnaa bɛtɔne ngasa-nnomaa nnu bedɛ kaprɛ nyɔ? Nakoso bɛ nu komapɛ po nne berɛ, bɔ Nyameɛ wora fi ye ɔ. 7Na nwiaa bɔ ogua ɛmɔ ti so ne po, waha ye mukoraati. Nnɛmɔ suro, ɛmɔ nwo hia tra ngasa-nnomaa pee.
8“Meka mekyire ɛmɔ kyɛ, ebiala bɔ ɔbɔ me dumaa wɔ mmenia nyunu ne, Sona Awa ne koso kɔbɔ ye dumaa wɔ Nyameɛ abɔfo nemɔ nyunu. 9Na ebiala bɔ ɔka ye wɔ mmenia nyunu kyɛ ɔnze me ne, ngɔpo ye wɔ Nyameɛ abɔfo nemɔ nyunu. 10Ebiala bɔ ɔkodwudwo kotia Sona Awa ne, bɛkɔfa bɛkɔhyɛ ye, nakoso ebiala bɔ ɔkɔha mmusue dwirɛ kotia honhom krongron ne de, bɛngɔfa bɛngɔhyɛ ye. 11Sɛ bɛfa ɛmɔ bɛkɔ badwafoɛ, awaen nu mbanyi ne atumvoɛ ne nyunu a, nnɛmɔ ha ɛmɔ nwo bɛdwene kyɛbɔ ɛmɔ kɔye ɛmɔ noa anaa bɔ ɛmɔkɔha nwo. 12Ofikyɛ sɔ mmerɛ nala, honhom krongron ne kohyire ɛmɔ bɔ ɛmɔha ɔ.”
13Yeɛ ebie hane ye wɔ mmenia nanu kyɛ: “Kyerɛkyerɛniɛ, ka kyire nniema ne, na ɔne me hyɛ agyapadeɛ ne.” 14Nakoso ɔha hyirele ye kyɛ: “Ngya biaa, nwa yeɛ ɔyele me kyɛ mmu ɛmɔ atɛn, anaa nziesie ɛmɔ afia dwirɛ ɔ?” 15Yeɛ ɔha hyirele bɛ kyɛ: “Ɛmɔma ɛmɔ nye la berɛ, na ɛmɔnea ɛmɔ nwo yé wɔ anyeborolɛ biala nwo, ofikyɛ sɛ ebie nya ye nwo maa ɔbo so po a, nná sɔ nningyein nanu yeɛ ye ngoa wɔ ɔ.” 16Na ɔyɛle mvandoho bie hyirele bɛ kyɛ: “Sikaniɛ bie aseɛ suli mmaa paa, 17yeti ɔhane ye wɔ ye tianu kyɛ, ‘Kesaalae bɔ nnne nekafee bɔ ngɔfa m'aleɛ né ngogua ne, nzu yeɛ nyɛ ɔ?’ 18Yeti ɔhane kyɛ, ‘Bɔ ngɔyɛ ɛhe: Ngodwiri sua daa bɔ mefa me nningyein megua nu ne ngogua, na masi mbiri, ɛberɛ yeɛ ngɔfa me hwiit ne me nningyein pa mukoraati ngogua ɔ. 19Ná maha mahyire me nwo kyɛ: “Ɛle nningyein pa pee bɔ ɛkoli ye afoɛ pee; yeti de wɔ nwomeɛ, didi, no, na gye wɔ nye.” ’ 20Yeɛ Nyameɛ ha hyirele ye kyɛ, ‘Kwasea, kɔngɔen he ala, bɛkole wɔ ngoa bɛkofi wɔ sa nu. Ye de nningyein bɔ aboa ye noa agua berɛ ne, nwa yeɛ ɔkɔyɛ ye deɛ ɔ?’ 21Sɔ ala yeɛ ebiala bɔ ɔboɔboa ahonyadeɛ noa ma ye nwo, ná ɔtte sikaniɛ wɔ Nyameɛ nye so ne te ɔ.”
22Yeɛ ɔha hyirele ye asuafoɛ nemɔ kyɛ: “Yeti meka mekyire ɛmɔ kyɛ, nnɛmɔ dwene ɛmɔ ngoa nwo kyɛ, nzu yeɛ yekoli ɔ, anaa ɛmɔ nipadua nwo kyɛ, nzu yeɛ yɛkowura ɔ. 23Ngoa nwo hia koraa tra aleɛ, na nipadua ne nwo hia koraa tra atadeɛ. 24Ɛmɔnea kwaakwaadabi, bɛnyɛ boo, bɛmbɛ, ná belle pata anaa nekaa bɔ bɛfa aleɛ bɛgua ɔ, nakoso Nyameɛ ma bɛ aleɛ. Ɛmɔnnwu ye kyɛ, ɛmɔ nwo hia koraa tra nnomaa ne? 25Ɛmɔ nu nwa yeɛ ɔdwene dee a, ɔkɔhora kɔfa dɔnhwere komapɛ po, kɔboka ye ngoa so ɔ? 26Sɛ ɛmɔngora bɛnyɛ sɔ nikye kamba he po a, nzuati yeɛ ɛmɔha ɛmɔ nwo wɔ bɔ waha nanwo ɔ? 27Ɛmɔnea kyɛbɔ flawa nyi ne: Bɛnyɛ adwuma, na bɛnnwo ɛtena, nakoso meka mekyire ɛmɔ kyɛ, anuonyam bɔ Solomon nyane ye namukoraati si ne, wanziesie ye nwo kyɛ ɛhemɔ nu kõ po. 28Na sɛ Nyameɛ wura ndire bɔ ɔwɔ berɛ ɛnɛ, na ɛhema bagyi bagua fonoo nu ne atadeɛ a, atadeɛ beni yeɛ ɔngɔhora ngɔfa ngowura ɛmɔ ɔ? Ɛmɔ bɔ ɛmɔ gyidie te kaa. 29Yeti nnɛmɔ maa bɔ ɛmɔ koli ne bɔ ɛmɔ kɔno nwo adwene-dwene hyɛ ɛmɔ so, na nnɛmɔ ha ɛmɔ nwo wɔ ye nwo. 30Ofikyɛ sɔ nningyein hemɔ yeɛ bɛ bɔ bɛwɔ wiase nanu ne nye aboro ye nwo paa ne, na ɛmɔ Baba se kyɛ ɛmɔ hia sɔ nningyein nemɔ. 31Mmom ɛmɔpena Ye Ahennie ne, na ɔkɔfa sɔ nningyein nemɔ kɔboka so kɔma ɛmɔ.
32“Mmoan kue kamba, nnɛmɔ suro, ofikyɛ ɔyɛ ɛmɔ Baba ne fɛ kyɛ, ɔkɔfa Ahennie ne kɔma ɛmɔ. 33Ɛmɔtɔne nningyein bɔ ɛmɔle ye, ná ɛmɔyɛ ahiafoɛ adɔyɛ; ɛmɔyɛ sikaa bɔtɔ bɔ ɔnzɛkye bɛfa, kyire kyɛ, agyapadeɛ bɔ onyie lle wɔ anwuro, nekaa bɔ awiefoɛ mma berɛ, ná mvrɔlɔ koso nni ne. 34Ofikyɛ, nekaa bɔ ɛmɔ agyapadeɛ wɔ ne, ɛberɛ yeɛ ɛmɔ ahone koso wɔ ɔ.
35“Ɛmɔyɛ krado, ɛmɔsiesie ɛmɔ nwo, na ɛmɔma ɛmɔ kanea ne hɔso ta. 36Ɛmɔyɛ kyɛ mmrienzua bɔ bɛnwondɛ bɛ wura bɔ ɔkwaayɛ ayeforɔ ne, kyɛbɔ ɔbadwu na ɔbɔ anoa nanu a, ɛberɛ nala bekobukye ye ɔ. 37Anigye yeɛ ole ngoaa bɔ bɛ wura kɔɔto bɛ kyɛ betɛ́ nwondɛ ne. Nahorɛ bɔ meka mekyire ɛmɔ yeɛ ole kyɛ, bɛ wura ne bɔbɔ kosiesie ye nwo, ná wamaa ngoaa ne atena tɛbulu nwo, na wasõ bɛ. 38Sɛ ɔba kɔngɔen tumm anaa alobahene po, na ɔbato sɔ ngoaa nemɔ kyɛ bɛnwondɛ a, bekonya anigye. 39Nakoso ɛmɔnwu ye kyɛ, sɛ né efiewura ne se mmerɛ bɔ awieniɛ ne kɔwa a, ahaa okosi pɛ, kyɛbɔ ɔkɔyɛ a, awieniɛ ne ngonya atee ngowura ye awuro berɛ ɔ. 40Yeti ɛmɔ koso, ɛmɔyɛ krado, ofikyɛ mmerɛ bɔ ɛmɔ nye nne so ne, yeɛ Sona Awa ne kɔwa ɔ.”
41Yeɛ Petro bisale ye kyɛ: “Awurade, edwirɛ bɔ ɛka ne, ɛka kyire yɛ ngome, anaa ɛka kyire ebiala?” 42Awurade ha hyirele ye kyɛ: “Akoaa beni yeɛ odi nahorɛ na ɔse nworɛ, bɔ ye wura afa ye awuro awura ye sa kyɛ ɔma ye ngoaa aleɛ wɔ mmerɛ bɔ ɔsɛ nu ne? 43Anigye yeɛ ole akoaa bɔ ye wura kɔwa kɔɔto ye kyɛ ogu so ɔyɛ sɔ ne. 44Nahorɛ, meka mekyire ɛmɔ kyɛ, ɔkɔfa bɔ ole ye biala kowura ye sa. 45Nakoso sɛ ɔkɔba kyɛ akoaa ne ka ye wɔ ye ahone nu kyɛ, ‘Me Wura mia onya walle,’ ná ɔhyɛ yebo bo ngoaa bɔ baha ne, odidi, ɔno nzãa, na ɔbo a, 46kyẽa bɔ ye nye nne ye nwo so, ɔne mmerɛ bɔ ɔnze ne, yeɛ ye wura ne kɔwa ɔ; na ɔkɔhwe ye so paa, ná wafa ye waboka bɛ bɔ benni nahorɛ naso.
47“Akoaa bɔ ɔse ye wura ne apɛdeɛ, nakoso wanyɛ krado anaa wanyɛ bɔ ye wura ne kuro ne, bɛkɔbo ye pa-pa. 48Nakoso akoaa bɔ ɔnze, ná ɔyɛle nikye bɔ odikyɛ bɛbo ye ne, bɛkɔbo ye kaa bie. Bɔ ɔte yeɛ ole kyɛ, ebiala bɔ bama ye pee ne, bɛkobisa pee bɛkofi ye berɛ, na bɔ bafa pee bawura ye sa ne, bɛkole pee bɛkofi ye berɛ.
49“Mmale kyɛ mebaasɔ see wɔ aseɛ so, na ɔhale me ngome a, ahaa basɔ ye dada. 50Nne asu bie mebɔ, na me nwo tete me tonn kodwu kyɛ ngɔbɔ ɔ. 51Ɛmɔ adwene yɛ ɛmɔ kyɛ asomdwie yeɛ mva mmale aseɛ he aso ɔ? Daabi oo, meka mekyire ɛmɔ kyɛ, mbakye–mbakye–muɛ yeɛ mva mmale ɔ. 52Ofi ɛnɛ bɔ ɔkɔ ne, sɛ mmenia nnu te awuro kõ nu a, bɛ nu kɔpakye–pakye; mmenia nza kɔdwɔso kotia nyɔ ne, na nyɔ ne adwɔso atia nza ne. 53Bɛ nu kɔkyekyɛ, baba kɔdwɔso kotia ɔwa brienzua, na baa brienzua adwɔso atia ye baba, maame kɔdwɔso kotia ɔwa brasua, na baa brasua adwɔso atia ye maame, sia brasua kɔdwɔso kotia ye sia, na sia ne koso adwɔso atia ye sia brasua.”
54Yeɛ Yesu ha hyirele mmenia ne kyɛ: “Sɛ ɛmɔnwu ye kyɛ nzue amuna wɔ nekaa bɔ eyia kɔtɔ ne a, ɛberɛ ala ɛmɔka kyɛ, ‘Nzue kandinga bie baatɔ,’ na amba, ɔtɔ. 55Na sɛ mvrama bɔ fi ngwan a, ɛmɔka kyɛ, ‘Ahuhuro kɔwa,’ na ɔba koso. 56Nyaatwomfoɛ, ɛmɔ kora bɛnea ewienu ne aseɛ so, ná ɛmɔ anwu bɔ okosi ɔ. Nzuati yeɛ ɛmɔnnea mmerɛ bɔ yɛwɔ nu ne, na ɛmɔ nga bɔ okosi ne?
57“Ye de, nzuati yeɛ ɛmɔnnwu nikye pa bɔ odikyɛ ɛmɔyɛ ne? 58Sɛ ebie fa wɔ kɔ kɔɔto a, mmerɛ bɔ ɛmɔ nate atee so ɛmɔkɔ ne, bɔ mmɔden kyɛ ɛne ye kosiesie ɛmɔ afia, wanyɛ sɔ a, ɔkɔfa wɔ kɔma temmufoɛ ne, ná temmufoɛ ne koso afa wɔ awura bɔ ɔnea berɛ ne sa, ná ye koso wafa wɔ wato prizin. 59Meka mekyire wɔ kyɛ, sɛ etualle kerɛ namukoraati a, bengɔye wɔ maa ɛngɔhɔ.”
Currently Selected:
Luka 12: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
