Luka 9
9
1Yeɛ Yesu frɛle asuafoɛ 12 ne maa beyiale, na ɔmane bɛ tumi ne anwoserɛ bɔ bɛkɔfa bɛkɔtu sunzummɔne mukoraati, ɔne tumi bɔ bɛkɔfa bɛkɔsa anwonyerɛ. 2Yeɛ ɔsomane bɛ kyɛ bɛɛha Nyameɛ Ahennie nanwo dwirɛ, na bɛsa anwonyerɛ. 3Ɔha hyirele bɛ kyɛ: “Nnɛmɔfa hwee bɛtu atee ne; nnɛmɔfa pɔmaa, bɔtɔ, paanoo, sikaa anaa ndadeɛ nyɔ. 4Na awuro biala bɔ ɛmɔ kɔhɔ nu ne, ɛmɔtena berɛ ma oodwu kyɛ ɛmɔ kofi berɛ. 5Na nekaa biala bɔ banne ɛmɔ ne, sɛ ɛmɔfi kuro nanu a, ɛmɔ poro-poro ɛmɔ gya bo mvuture bɛgua berɛ, ná wayɛ adanzeɛ wama bɛ.” 6Na bɛsili nu bɛhɔle nguraa nemɔ anu bɛɛhane nzɛmba ne, na bɛsale anwonyerɛ wɔ nekaa biala.
7Afei Herode bɔ odi manzini naso ne tele bɔ osisi namukoraati, na ɔbɔle ye pusa, ofikyɛ né ebiemɔ ka kyɛ Yohane adwɔso afi ewue nu, 8né ebiemɔ koso nwa, Elia yeɛ wawa ne, yeɛ ebie koso nwa, tete adiifoɛ nanu kõ yeɛ wadwɔso ne. 9Herode hane kyɛ: “Yohane de, mapɛ ye ti. Ye de nwa yeɛ metete kyɛ ɔyɛ sɔ nningyein nemɔ ne?” Yeti né ɔpena kyɛ onwu ye.
10Asomafoɛ ne sa wale ne, bɛhane nningyein bɔ bayɛ namukoraati bɛhyirele Yesu. Yeti ɔne bɛ hɔle kuro bie bɔ bɛfrɛ ye Betsaida nu, ná bɛɛwurale nekaa bie dinn. 11Mmenia ne nwuni ye sɔ ne, bɛlili ye si, na ye koso olɛle bɛ kama, na ɔhane Nyameɛ Ahennie nanwo dwirɛ hyirele bɛ, na ɔsale bɛ bɔ bɛnde apɔ ne anwonyerɛ. 12Afei ne aleɛ sa, yeti buru-ne-nyɔ ne wale ye berɛ, na bɛha bɛhyirele ye kyɛ: “Nekaa bɔ yɛwɔ ne ate ye nwo, yeti gua mmenia ne atee, ma bɛhɔ nguro ne nnamue bɔ wapɛ yɛ nwo wayia nanu bɛɛpena nekaa bɛla, na bɛpena aleɛ bɛli.” 13Nakoso Yesu ha hyirele bɛ kyɛ: “Ɛmɔma bɛ nikye ma bɛli.” Na bɛhane kyɛ: “Aleɛ bɔ yɛle ye wa te paanoo nnu ne egyein nyɔ. Ye de sana yɛkɔtɔ aleɛ yɛbrɛ mmenia he amukoraati.” 14Mmrienzua ngome kɔyɛ 5,000 yeɛ ne bɛwɔ berɛ ɔ. Yeɛ ɔha hyirele ye asuafoɛ nemɔ kyɛ: “Ɛmɔma bɛtena ase kue-kue, kue biala yɛ mmenia kɔyɛ 50.” 15Na bɛyɛle ye sɔ maa ebiala tenane ase. 16Yeɛ ɔfale paanoo nnu ne egyein nyɔ ne, na ɔneane anwuro hyirale so. Afei obubuli paanoo nanu mane asuafoɛ nemɔ kyɛ, bɛfa bɛma mmenia ne. 17Bɛ mukoraati bɛdidili maa bɛ ko yili. Ná bɛsesale yebo mbo-poro-ka ne, benyane kɛndɛn buru ne nyɔ.
18Ɛlɛho bie, né Yesu ngome wɔ nekaa bie ɔbɔ mbaeɛ, ná ye asuafoɛ nemɔ wale ye berɛ, yeɛ obisale bɛ kyɛ: “Mmenia keka kyɛ, nde sona beni?” 19Bɛyele yenoa kyɛ: “Ebiemɔ nwa wɔ yeɛ ɛle Yohane Suboniɛ ne; ebiemɔ nwa Elia, yeɛ ebiemɔ koso nwa tete adiifoɛ nanu kõ yeɛ wadwɔso ne.” 20Yeɛ osa bisale bɛ kyɛ: “Na ɛmɔ koso, ɛmɔnwa nde sona beni?” Yeɛ Petro yele yenoa kyɛ: “Kristo, bɔ Nyameɛ asoma ye ne.” 21Yeɛ ɔbrale bɛ kitii kyɛ, nnɛmaa bɛbɔso bɛkyire ebiala, 22na ɔhane kyɛ: “Odikyɛ Sona Awa ne nwu amaneɛ paa, na mbanyi nemɔ ne sɔfo mbanyi ne atwerɛfoɛ nemɔ ye ye ma, maa bɛku ye, na ye ɛlɛsa naso ne, ɔkɔtingye.”
23Na ɔha hyirele bɛ mukoraati kyɛ: “Sɛ ebie pena kyɛ odi me si a, ma ɔpa ye nwo si, na ɔfa ye asɛnnua daa biala, ná oli me si. 24Ofikyɛ ebiala bɔ ɔpena kyɛ ɔbɔ ye ngoa nwo waen ne, okofi ye sa, nakoso ebiala bɔ me ti, ye ngoa kofi ye sa ne, ye yeɛ ye sa kɔha ye ɔ. 25Sɛ sona nya ewiase amukoraati, ná ye ngoa fi ye sa anaa ɔsɛkye a, mvasoɛ beni yeɛ ɔwɔ so ɔ? 26Na sona biala bɔ ɔkɔfɛle me ne me dwirɛ nanwo ne, sɛ Sona Awa ne ba ye Baba ne abɔfo krongron ne anuonyam nu a, ye nwo kɔyɛ Sona Awa ne fɛle. 27Nahorɛ bɔ meka mekyire ɛmɔ yeɛ ole kyɛ, mmenia biemɔ gyi wa bɔ bɛngonwu ewue, sana banwu Nyameɛ Ahennie ne kora.”
28Ɔhane sɔ dwirɛ hemɔ si kɔyɛ ngyẽa mmɔtwɛ ne, ɔne Petro, Yohane ne Yakobo hɔle bokaa naso dɔ kyɛ bɛkwaabɔ mbaeɛ. 29Na ogu so ɔbɔ mbaeɛ ne, ye nyunu sesane, na ye atadeɛ ne tale hyireinn. 30Na nea, né mmrienzua nyɔ bie ne ye bɔ ngɔmmɔ—Mose ne Elia. 31Bɛwale anuonyam nu, na bɛhyɛle yebo bɛhane ye hɔlɛ nanwo dwirɛ, ɛhene yeɛ ne ɔkɔwa nu wɔ Yerusalem ne. 32Sɔ mmerɛ ne, né Petro ne bɛ bɔ bɛboka ye so ne ala hatee, bɛ nye so tele bɛ ne, bɛnwuni ye anuonyam ne, ɔne mmrienzua nyɔ bɔ ɔne bɛ gyi berɛ ne. 33Na mmerɛ bɔ mmrienzua nyɔ nemɔ fi ye nwo berɛ kɔ ne, Petro ha hyirele Yesu kyɛ: “Me wura, ɔte kama paa kyɛ yɛwɔ wa. Ma yesi tɛnt nza, wɔ deɛ kõ, Mose deɛ kõ, yeɛ Elia deɛ kõ”—né ɔnze bɔ ɔka po. 34Ogu so ɔka sɔ dwirɛ ne, munungum bie katale bɛ so, munungum ne katale bɛ so ne, né bɛsuro. 35Afei, konviɛ bie fili munungum nanu hane kyɛ: “Ɛhe yeɛ ole mma bɔ maye ye ne. Ɛmɔtie ye.” 36Konviɛ ne si ne, Yesu ngome yeɛ bɛnwuni kyɛ ogyi berɛ ɔ.
37Aleɛ hene ne, bɛfili bokaa ne aso bedwuli ase, na mmenia somaa bie yiale ye. 38Ná biaa bie teane nu wɔ mmenia nanu kyɛ: “Kyerɛkyerɛniɛ, mesrɛ wɔ, nea mma ne, ofikyɛ ɔte mma komapɛ. 39Nea! ɛyɛ a ne sunzummɔne awa ye so, ɔba sɔ a, ɔteanu komapɛ, na ɔpɛ ye fi ase maa ɔsenze, na ye noa pu ahure. Na sɛ opira ye yie po a, ɛyɛ a né ɔyɛ se kyɛ okofi ye nu. 40Nzrɛle w'asuafoɛ nemɔ kyɛ bɛtu bɛfi ye nu, nakoso bangora.” 41Yeɛ Yesu hane kyɛ: “Ao, ɛnɛ mmerɛ mmenia bɔ bɛlle gyidie na bɛ so yɛ se, mene ɛmɔtena na nya ɛmɔ nwo aboterɛ maa oodwu kyẽa beni? Fa ɛwa ne bra.” 42Mmerɛ bɔ akwalaa ne pingye Yesu ne, sunzum ne maa ɔpɛ fini na ɔsenzene. Nakoso Yesu hwili sunzummɔne ne nyunu na ɔsale akwalaa ne anwonyerɛ, yeɛ ɔfale ye mane ye baba ɔ. 43Na Nyameɛ tumi pirikua ne maa mmenia namukoraati nwo dwirili bɛ.
Na mmerɛ bɔ nningyein bɔ ɔyɛ ne yɛle mmenia namukoraati nwanwa ne, ɔha hyirele ye asuafoɛ ne kyɛ: 44“Ɛmɔma sɔ dwirɛ he la ɛmɔ ti anu paa, ofikyɛ ɔngɔhyɛ ne bafa Sona Awa ne bawura mmenia sa.” 45Nakoso bande edwirɛ bɔ ɔhane ne bo. Bɔ ɔte yeɛ ole kyɛ, né bafa bafea bɛ, kyɛbɔ ɔkɔyɛ a bɛngɔte yebo, nakoso ne bɛsuro kyɛ bɛkobisa ye nwo dwirɛ.
46Na asuafoɛ nemɔ suli aporowaa paa, ne bɛpena kyɛ bɛnwu bɔ ɔte piri wɔ bɛ nu ɔ. 47Ne Yesu anwu adwene bɔ ɔwɔ b'ahone nu ɔ, yeti ɔfale akwalaa bie gyinane ye nwo berɛ, 48na ɔha hyirele bɛ kyɛ: “Ebiala bɔ me dumaa ti, ɔkole sɔ akwalaa he ne, wale me; na ebiala bɔ okole me ne, wale bɔ ɔsomane me ne. Na bɔ ɔte kaa wɔ ɛmɔ nu ne, ye yeɛ ɔte piri ɔ.”
49Yohane hane kyɛ: “Me wura, yɛnwuni kyɛ ebie fa wɔ dumaa tu sunzummɔne, na né yɛpena kyɛ yɛsi ye atee, ofikyɛ ɔbokka yɛbɔ yɛli wɔ si naso.” 50Nakoso Yesu ha hyirele ye kyɛ: “Nnɛmɔsi ye atee, ofikyɛ ebiala bɔ ɔndwɔso ndia ɛmɔ ne, né ɔta ɛmɔ si.”
51Na ɔwale kyɛ, mmerɛ bɔ odikyɛ bɛfa ye bɛkɔ anwuro ne pena pingye ne, ɔfale ye nye hyirele Yerusalem. 52Yeti ɔsomane ebiemɔ kyɛ bɛli ye nyunu moa. Na bɛhɔle Samaria nnamue bie nu, kyɛ bɛ kwaasiesie berɛ bɛma ye. 53Nakoso banne ye, ofikyɛ ne ye nye kyire Yerusalem. 54Na mmerɛ bɔ Yakobo ne Yohane bɔ bɛte ye asuafoɛ ne nwuni ye sɔ ne, bɛhane kyɛ: “Awurade, ɛpena kyɛ yɛfrɛ see yɛfi anwuro maa ɔbayera bɛ hɔ?” 55Nakoso ɔkakyile ye nwo hwili bɛ nyunu. 56Na bɛtoale so bɛhɔle nnamue foforɛ nu.
57Bɛnate atee so bɛkɔ ne, ebie ha hyire ye kyɛ: “Nekaa bɔ ɛkɔhɔ biala, mene wɔ kɔhɔ.” 58Na Yesu ha hyirele ye kyɛ: “Kangane mɔ le bɔen, na ewienu nnomaa le buye, nakoso Sona Awa ne de, olle nekaa bɔ ɔfa ye ti to ɔ.” 59Yeɛ ɔha hyirele sona foforɛ kyɛ: “Di me si.” Nakoso ɔha hyirele Yesu kyɛ: “Awurade, ma nni moa ngɔnzie me baba kora.” 60Yesu ha hyirele ye kyɛ: “Ma awufo sie b'awufo. Na wɔ de, kɔbɔ Nyameɛ ahennie nanwo dawure.” 61Yeɛ sona foforɛ ha hyirele ye kyɛ: “Awurade, ngoli wɔ si, nakoso ma nni moa ngɔ ngra m'awurofoɛ kora.” 62Yesu ha hyirele ye kyɛ: “Ebiala bɔ ɔfa ye sa sɔ buralɛ bɔ bɛfa bɛfundam aseɛ nanu, ná ɔnea nningyein bɔ ɔwɔ ye si ne, ɔmvata Nyameɛ Ahennie ne.”
Currently Selected:
Luka 9: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
