Mateo 10
10
1Yeti ɔfrɛle asuafoɛ 12 ne, na ɔmane bɛ tumi bɔ bɛkɔfa bɛkɔtu sunzummɔne, ná basa bɛ bɔ bɛnde apɔ, ɔne bɛ bɔ bayɛ mmerɛ ne anwonyerɛ. 2Asuafoɛ 12 ne dumaa ɛhe: Simon bɔ bɛfrɛ ye Petro ne, ɔne oliema Andrea; Sebedeo awa Yakobo, ne oliema Yohane, 3Filipo, ne Bartolomeo; Tomas ne Mateo bɔ odidɛ toɔ ne; Alfeo awa Yakobo, ne Tadeo;#10:3 Besa bɛfrɛ ye “Yakobo awa Yuda.” 4Simon bɔ ofi Kanaan ne, ɔne Yuda Iskariot bɔ ɔyele ye mane ne.
5Yesu somane mmenia 12 he, na ɔhyɛle bɛ kyɛ: “Nnɛmɔ kɔ maen-maen nanufoɛ ne berɛ, ná nnɛmɔ wura Samariafoɛ kuro biala nu; 6Israelfoɛ bɔ bamini ne mmom yeɛ ɛmɔhɔ b'awuro ɔ. 7Sɛ ɛmɔkɔ a#10:7 Anaa “Ɛmɔnate atee so bɛkɔ a.” ɛmɔha kyɛ, ‘anwuro Ahennie ne apingye.’ 8Ɛmɔsa anwonyerɛ, ɛmɔtingye awufo, ɛmɔma akwatafoɛ nwo te, na ɛmɔtu sunzummɔne. Ɛmɔ nyane ye mbaen, yeti ɛmɔfa bɛma mbaen. 9Nnɛmɔfa sikaa kɔkorɛ, dwetɛ, anaa kɔɔbere bɛbɔ ɛmɔ abɔsoɛ nu. 10Na nnɛmɔfa aleɛ bɔtɔ bɛtu atee ne, yeɛ nnɛmɔfa ndadeɛ nyɔ, mmaboa, anaa pɔmaa; ofikyɛ ebie yɛ adwuma a, ye aleɛ fata ye.
11“Kuro anaa nnamue biala bɔ ɛmɔ kowura nu ne, ɛmɔpena ebie bɔ ɔfata, na ɛmɔtena berɛ kodwu kyɛ ɛmɔ kofi berɛ ɔ. 12Sɛ ɛmɔwura awuro bie nu a, ɛmɔhyea bɛ bɔ bɛwɔ berɛ ne, 13na sɛ awura ne fata a, ɛmɔma ɛmɔ asomdwie bra so, na sɛ awuro ne mvata a, ɛmɔ asomdwie ne sa bra ɛmɔ berɛ. 14Nekaa biala bɔ banne ɛmɔ, anaa bandie ɛmɔ ne, sɛ́ ɛmɔfi sɔ awuro ne, anaa kuro nanu bɛkɔ a, ɛmɔ poro-poro ɛmɔ gya bo mvuture bɛgua berɛ. 15Nahorɛ, meka mekyire ɛmɔ kyɛ, atemmuda ne, bɔ ɔkɔto sɔ kuro ne, Sodom ne Gomora deɛ ne po te kaa.
16“Nea, mesoma ɛmɔ kyɛ mmoan mekɔ mbataku nu, yeti, ɛmɔma ɛmɔ nye la berɛ kyɛ ɛwoo, na ɛmɔyɛ mmenia bɔ edwirɛ nne bɛ nwo te kyɛ mmubure. 17Nakoso ɛmɔnea ɛmɔ nwo ye wɔ mmenia nwo, ofikyɛ bɛkɔhwe ɛmɔ bɛkɔhɔ kɔɔto,#10:17 Anaa “Kɔɔto mmaa-mmaa.” na bɛkogwa ɛmɔ wɔ bɛ sua bɔ beyia nu nemɔ nu. 18Me ti, bɛkɔfa ɛmɔ bɛkɔhɔ awaen ne ahemvo mɔ nyunu, ná wayɛ adanzeɛ wama maen-maen ne. 19Nakoso, sɛ bɛfa ɛmɔ bɛkɔ a, nnɛmɔ dwene kyɛbɔ ɛmɔ kodwudwo, anaa bɔ ɛmɔkɔha nwo, ofikyɛ sɔ mmerɛ nala, bɛkɔfa bɔ ɛmɔkɔha ne bɛkɔma ɛmɔ. 20Yeti nná ɛmɔ yeɛ ɛmɔ kodwudwo ɔ, mmom honhom bɔ ofi Baba ne berɛ ne, ye yeɛ ɔnate ɛmɔ so kodwudwo ɔ. 21Afei, aliemaa kɔye oliema kɔma maa bɛkɔhu ye, baba kɔye ɔwa kɔma, na ngwalaa kɔdwɔso kotia b'awofo, na bɛkɔmaa bɛkɔhu bɛ. 22Na me ti, mmenia mukoraati kɔtane ɛmɔ; nakoso bɔ okogyina nu koodwu awieɛ ne, ye yeɛ bɛkole ye ngoa ɔ. 23Sɛ bɛtane ɛmɔ nye wɔ kuro kõ nu a, ɛmɔhɔ foforɛ nu. Nahorɛ meka mekyire ɛmɔ kyɛ, nguro bɔ ɔwɔ Israel ne, ɛmɔngoyie nu adwuma, né sona Awa ne awa.
24“Suaniɛ ndra ye kyerɛkyerɛniɛ, na akoaa ndra ye wura. 25Yeti sɛ suaniɛ kora bayɛ kyɛ ye kyerɛkyerɛniɛ a, ɛhene ala te pa, na akoaa koso yɛ kyɛ ye wura a, ɛhene ala te pa. Sɛ bɛfrɛ efiewura ne Beelsebub a, ye de, nná sɔ ala yeɛ bɛkɔfrɛ bɛ bɔ bɛte awuro berɛ ne ɔ? 26Nakoso, nnɛmɔ suro bɛ, ofikyɛ nikye fee nne berɛ bɔ ɛso akata, bɔ ye nwo ngɔla berɛ, anaa wafia bɔ bɛngonwu ye ɔ. 27Bɔ ngɔha ngohyire ɛmɔ wɔ awosii nu ne, ɛmɔha ye eyia ketee, na bɔ ngɔha ngogua ɛmɔ soa nu ne, ɛmɔha ye sua ti afia. 28Nnɛmɔ suro bɛ bɔ bɛku nipadua ne, nakoso bɛngora bɛngu ɔkra ne; mmom, ɛmɔsuro bɔ ɔkora sɛkye ɔkra ne né nipadua namukoraati wɔ Gehenna ne. 29Bɛtɔne ngasa-nnomaa nyɔ a, nná kaprɛ yeɛ bedɛ ɔ, anaa melaka? Nakoso bɛ nu komapɛ po ngɔtɔ ase bɔ ɛmɔ Baba ngonwu ye ɔ. 30Ɛmɔ ti so nwiaa po, waha ye mukoraati. 31Yeti nnɛmɔ suro, ɛmɔ nwo hia tra ngasa-nnomaa pee.
32“Yeti, ebiala bɔ ɔbɔ me dumaa wɔ mmenia nu ne, me koso ngɔbɔ ye dumaa wɔ me baba bɔ ɔwɔ anwuro ne nyunu. 33Nakoso ebiala bɔ ɔpo me wɔ mmenia nyunu ne, me koso ngɔpo ye wɔ me Baba bɔ ɔwɔ anwuro ne nyunu. 34Nnɛmɔ nya adwene kyɛ asomdwie yeɛ mva mmale aseɛ he aso ɔ; mamva asomdwie mamma, mmom dadeɛ. 35Ofikyɛ mmale kyɛ mebaatete mmenia nu,
Ná baa brienzua adwɔso tia ye baba,
baa brasua adwɔso atia ye maame,
ná sia brasua adwɔso atia ye sia.
36Nahorɛ dwirɛ yeɛ ole kyɛ, ebie abusuafoɛ
yeɛ bɛkɔyɛ ye atamfo ɔ.
37“Ebiala bɔ okuro ye baba anaa ye maame dwirɛ tra me ne, ɔmvata me, na ebiala bɔ okuro ɔwa brienzua anaa brasua dwirɛ tra me ne, ye koso, ɔmvata me. 38Na ebiala bɔ wamva ye asɛnnua wanni me si ne, ɔmvata kyɛ ɔyɛ me suaniɛ. 39Ebiala bɔ ɔpena ye ngoa ne, okofi ye sa, nakoso ebiala bɔ me ti ye ngoa kofi ye sa ne, ye sa kɔha ye.
40“Ebiala bɔ okole ɛmɔ ne, wale me, na ebiala bɔ okole me ne, wale bɔ ɔsomane me ne koso. 41Ebiala bɔ odɛ́ diifoɛ, ɔnate kyɛ ɔte diifoɛ ne konya diifoɛ akatua. Na ebiala bɔ odɛ́ teneneeniɛ, ɔnate kyɛ ɔte teneneeniɛ ne konya teneneeniɛ akatua. 42Na ebiala bɔ ɔkɔma mmaa-mmaa he anu kõ nzue frɔlɔɔ kwangoa kõ maa ɔkɔno, ɔnate kyɛ ɔte me suaniɛ nati ne, nahorɛ, meka mekyire ɛmɔ kyɛ, ye akatua nngɔbɔ ye.”
Currently Selected:
Mateo 10: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
