2
1Mmerɛ bɔ bɛwole Yesu wɔ Betlehem bɔ ɔwɔ Yudea ne, Herode yeɛ né ɔte ɔhene ɔ. Na sɔ mmerɛ ne, mmenia biemɔ bɔ bɛnea nzramaa nu fili Eyia Afiteleɛ wale Yerusalem, 2na bɛbisale kyɛ: “Yudafoɛ hene bɔ bawo ye ne, nisua yeɛ ɔwɔ ɔ? Yɛnwuni ye nzramaa, mmerɛ bɔ ne yɛwɔ Eyia Afiteleɛ ne, na yawa kyɛ yɛbaasõ ye.” 3Ɔhene Herode tele ɛhe ne, edwirɛ ne hale ye paa, na ɔhale Yerusalemfoɛ koso. 4Yeti ɔfrɛle sɔfo mbanyi ne atwerɛfoɛ bɔ bɛwɔ maen nanu ne, na obisale bɛ nekaa bɔ ne bɛkɔwo Kristo ne.
5Bɛha behyirele ye kyɛ: “Betlehem bɔ ɔwɔ Yudea ne, ofikyɛ bɔ diifoɛ né hworɔle yeɛ ole kyɛ:
6‘Na wɔ Betlehem, bɔ ɔwɔ Yuda aseɛ so,
sɛ ɔba Yuda atitire nu a, ɛtte maen baa;
ofikyɛ, wɔ nu yeɛ ebie kofi kɔwa
kɔɔnea me maen Israel so ɔ.’”
7Yeɛ Herode frɛle bɛ bɔ bɛnea nzramaa nu ne kodɛɛ, na obisale bɛ mmerɛ deinn bɔ nzramaa ne fitele ne. 8Afei ɔsomane bɛ hɔle Betlehem, na ɔha hyirele bɛ kyɛ: “Ɛmɔhɔ, na ɛmɔto ɛmɔ bo ase bɛpena akwalaa ne, sɛ ɛmɔnwu ye a ɛmɔbra bɛɛbɔ me amaneɛ, na me koso ngɔngoto ye bie. ”
9Betiele Ɔhene ne dwirɛ ne beyiele ne, bɛsili nu kyɛ bɛkɔ, na nzramaa bɔ bɛnwuni ye ne lili bɛ nyunu alaa oogyinane awuro bɔ akwalaa ne wɔ nu ne ti afia. 10Bɛnwuni nzramaa ne, bɛ nye gyele paa. 11Na bɛhɔle awuro nanu ne, bɛnwuni akwalaa ne, ɔne ye maame Mary, na bɛbɔle bɛ nu ase bɛkotole ye. Afei bɛbukyele bɛ nningyein nu bɛhyɛle ye sikaa kɔkorɛ, insɛns, yeɛ kurobow.
12Nakoso né Nyameɛ abɔ bɛ kɔkɔ wɔ nnaleɛ nu kyɛ, nnɛmaa besa bɛkɔ Herode dɔ. Yeti bɛfale atee foforɛ so bɛhɔle bɛ kuro.
13Bɛhɔle ne, Awurade abɔfo yele ye nwo ali hyirele Yosef wɔ nnaleɛ nu, yeɛ ɔha hyirele ye kyɛ: “Dwɔso, fa akwalaa ne né ye maame nwati kɔ Egypt. Na tena berɛ kodwu kyɛ mene wɔ kodwudwo, ofikyɛ Herode pena akwalaa ne ku ye.” 14Yeti Yosef dwɔsole, na kɔngɔen nala, ɔfale akwalaa ne né ye maame, na bɛnwati bɛhɔle Egypt. 15Ɔtenane berɛ tonn oodwuli kyɛ Herode wuli. Ɛhene maa bɔ Awurade nate diifoɛ naso hane ne wale nu kyɛ: “Mvrɛle mma ne mvili Egypt.”
16Herode nwuni kyɛ bɛ bɔ bɛnea nzramaa nu né alaka-laka ye ne, ɔfɛle yaa paa. Na ɔhyɛle mmeraa kyɛ behu mmrienzua bɔ bɛwɔ Betlehem ne ye mandanu berɛ namu, ofi bɛ bɔ bawo bɛ foforɛ so ɔkwaadwu bɛ bɔ banya afoɛ nyɔ naso, kyɛbɔ mmenia bɔ bɛnea nzramaa nu ne maa onwuni ye ne pɛpɛɛpɛ. 17Ɛhe maa edwirɛ bɔ diifoɛ Yeremia hane ne koso wale nu kyɛ:
18“Bɛtele konviɛ bie wɔ Rama,
esuɛ ne ndeɛteamuɛ,
Rahel yeɛ osu ye mmaa mɔ ɔ,
bɛkyekye ye wora po a, ondie,
ofikyɛ bɛnne berɛ kõ.”
19Herode wue si ne, Awurade#2:19 Nea 2:13 ne bo berɛ dwirɛ ne. bɔfo yele ye nwo ali hyirele Yosef wɔ nnaleɛ nu wɔ Egypt, 20na ɔha hyirele ye kyɛ: “Dwɔso, fa akwalaa ne né ye maame sa kɔ Israel aseɛ so, ofikyɛ bɛ bɔ bɛpena akwalaa ne beku ye, bɛ mukoraati bawu.”
21Yeti Yosef dwɔsole, na ɔfale akwalaa ne né ye maame hɔle Israel aseɛ so. 22Nakoso, ɔtele kyɛ Arkelao yeɛ wasi ye baba Herode gya nu odi bia wɔ Yudea, yeti né osuro kyɛ ɔkɔhɔ berɛ. Afei koso, Nyameɛ bɔle ye kɔkɔ wɔ nnaleɛ nu, yeti ofili berɛ hɔle Galilea mandam nanu. 23Na ɔɔtenane kuro bie bɔ bɛfrɛ ye Nazerɛt nu, na ɛhe maa bɔ adiifoɛ ne hane ne wale nu kyɛ: “Bɛkɔfrɛ ye Nazerɛtniɛ.”
