Mateo 21
21
1Bɛ́pingye Yerusalem, ná bɛdwuli Bɛtfage bɔ ɔwɔ Olive Bokaa naso ne, Yesu somane ye asuafoɛ nanu nyɔ, 2na ɔha hyirele bɛ kyɛ: “Ɛmɔhɔ nnamue bɔ ɛmɔ nye ta ye dɔ nanu, ɛmɔ konwu kyɛ bamenda afunum bie ne ɔwa wɔ berɛ. Ɛmɔ sangye bɛ, na ɛmɔfa bɛbra. 3Sɛ ebie bisa ɛmɔ ye nwo dwirɛ a, ɛmɔha kyɛ, ‘Awurade hia bɛ.’ Na ɛberɛ ala, ɔkɔmaa ɛmɔ kɔfa bɛ bɛkɔwa.” 4Ɛhe sili kyɛbɔ ɔkɔyɛ a, bɔ diifoɛ ne hane ne kɔwa nu ɔ, ɔhane kyɛ:
5“Ka kyire Zion awa brasua ne kyɛ
‘Nea, wɔ hene ba wɔ berɛ,
odwo, na ɔte afunum so,
afunum awa bɔ ye maame soa nningyein so.’”
6Yeti, asuafoɛ ne hɔle, na bɛɛyɛle bɔ Yesu ha hyirele bɛ ne. 7Bɛfale afunum ne né ɔwa ne bɛwale, na bɛfale bɛ ndadeɛ bɛguale bɛ so maa ɔtena so. 8Mmeni pee fale bɛ ndadeɛ sɛle atee nanu, na ebiemɔ koso bubuli nyaa guale atee nanu. 9Na mmenia bɔ beli ye nyunu ne ye si ne teɛteane nu kyɛ:
“David Awa, Hozanna!#21:9 Hozanna te Hebri dwirɛ bɔ yebo kyire kyɛ, “Yɛsrɛ wɔ, de ye.” Greek nu ne, sɔa yeɛ bɛtworɔ ye ɔ: “ὡσαννά (hōsanná).””
“Nhyira yeɛ ole bɔ ɔba Awurade dumaa nu ne!”
“Wɔ bɔ ɛwɔ anwuro-anwuro dɔ ne, Hozanna!”
10Yesu wurale Yerusalem kuro nanu ne, kuro nanu yɛle bagya-bagya, na bɛbisale kyɛ: “Nwa ɛne?” 11Mmenia ne yele ye noa kyɛ: “Yesu, diifoɛ bɔ ofi Nazerɛt bɔ ɔwɔ Galilea ne.”
12Yesu wurale asɔre awuro berɛ ne, ɔfoane bɛ bɔ bɛtɔne nningyein, ɔne bɛ bɔ bɛtɔ namukoraati fili berɛ, ɔhane bɛ bɔ bɛsesã sikaa nemɔ tɛbulu ne, ɔne bɛ bɔ bɛtɔne mmubure nemɔ bia namukoraati guale ase. 13Yeɛ ɔha hyirele bɛ kyɛ: “Bahworɔ kyɛ, ‘Bɛkɔfrɛ m'awuro ne mbaebɔ awuro,’ nakoso ɛmɔ de, ɛmɔ afa bayɛ awiefoɛ adwosuo.”
14Ɔwɔ asɔre awuro berɛ ne, bɛ bɔ bɛ nye asi, ɔne bɛ bɔ babubu wale ye berɛ, na ɔsale b'anwonyerɛ. 15Nakoso sɔfo mbanyi ne atwerɛfoɛ ne nwuni anwanwadeɛ bɔ ɔyɛ, ɔne ngwalaa bɔ bɛteɛtea nu wɔ asɔre awuro berɛ kyɛ: “David Awa, Hozanna ne!” Ɔyɛle bɛ ahi. 16Yeti bɛbisale ye kyɛ: “Nnaa ate bɔ ngwalaa nemɔ ka ne?” Yesu hane kyɛ: “Yoo, ɛmɔ kenngale ye le kyɛ:
‘Ngwalaa ne bɛ bɔ bɛtua nyɔfone noa ne,
bɛ noanu yeɛ ayɛyie fi ba ɔ’?”
17Na ɔyakyile bɛ berɛ fili kuro nanu hɔle Betania, na kɔngɔen ne, ɛdɔ yeɛ ɔlale ɔ.
18Ngyerɛmɔ bɔ osa ba kuro nanu ne, né ɛhɔen ku ye. 19Onwuni borɔdoma bakaa bie wɔ atee ne noa, na ɔhɔle yebo, nakoso né aleɛ biala nne so, nyaa ngome yeɛ ne ɔwɔ so ɔ. Yeɛ ɔha hyirele bakaa ne kyɛ: “Ɛngosu mmaa kõ.” Na ɛberɛ ala bakaa ne wuli. 20Asuafoɛ nemɔ nwuni ɛhe ne, ɔyɛle bɛ nwanwa, na bɛhane kyɛ: “Nzuati yeɛ borɔdoma bakaa ne awu kesaalae ne?” 21Yeɛ Yesu ha hyirele bɛ kyɛ: “Nahorɛ, meka mekyire ɛmɔ kyɛ, sɛ ɛmɔle gyidie, na ɛmɔ adwene nu nyɛ ɛmɔ nnaa a, nná bɔ nyɛle borɔdoma bakaa ne ngome yeɛ ɛmɔ kɔyɛ ɔ, mmom sɛ ɛmɔka bɛkyire bokaa he kyɛ, ‘Tu fi wa, na kɔtɔ ɛpo nu’ a, ɔkɔtu. 22Na bɔ ɛmɔkɔbɔ mbaeɛ bɛkɔsrɛ biala ne, sɛ ɛmɔle gyidie a, ɛmɔ sa kɔha ye.”
23Yesu hɔle asɔre awuro berɛ, na ɔhyɛle yebo kyɛ okyirekyire ne, sɔfo mbanyi ne maen nanu mbanyi nemɔ wale ye berɛ, na bɛbisale ye kyɛ: “Tumi beni yeɛ ɛfa yɛ nningyein hemɔ ne? Na nwa yeɛ ɔmane wɔ sɔ tumi ne?” 24Yesu koso hane kyɛ: “Mepena kyɛ mebisa ɛmɔ dwirɛ kõ. Sɛ ɛmɔye me noa a, me koso ngɔha nekaa bɔ nyane tumi ne ngohyire ɛmɔ: 25‘Tumi beni yeɛ ne Yohane fa bɔ asu ne? Ye tumi ne, né ofi anwuro, anaa né ofi sona berɛ?’” Yeɛ bɛhyɛle yebo kyɛ bɛsusu ye nwo, na bɛhane kyɛ: “Sɛ yɛka kyɛ ofi anwuro a, okobisa yɛ kyɛ, ‘Ye de, nzuati yeɛ ɛmɔ anne ye banni ne?’ 26Nakoso sɛ yɛka kyɛ, ‘Ofi sona’ a, yɛnze bɔ mmeni lɔen ne kɔyɛ ɔ, ofikyɛ né bɛnwu ye kyɛ Yohane te diifoɛ.” 27Yeti bɛha bɛhyirele ye kyɛ: “Yɛnze.” Yeɛ Yesu koso ha hyirele bɛ kyɛ: “Nzaade me koso, tumi bɔ mefa meyɛ sɔ nningyein hemɔ ne, mengɔha mengohyire ɛmɔ.”
28“Ɛmɔdwene ɛhe nwo sɛ? Né biaa bie le mmaa mmrienzua nyɔ, ɔhɔle bɔ oli moa ne berɛ, yeɛ ɔha hyirele ye kyɛ: ‘Mma, ɛnɛ, kɔyɛ adwuma wɔ me bobe boo nanu.’ 29Yeɛ ɔhane kyɛ: ‘Mengɔhɔ, nakoso yesi ne, ɔsesane y'adwene, na ɔhɔle.’ 30Biaa ne hɔle bɔ ɔtɔ so nyɔ ne berɛ, yeɛ ɔhane edwirɛ komapɛ nala hyirele ye. Yeɛ ɔhane kyɛ, ‘Daa, ngɔhɔ. Nakoso wangɔ.’ 31Ngwalaa nanu beni yeɛ ɔyɛle bɔ Baba ne kuro ɔ? Bɛhane kyɛ, ‘Bɔ oli moa ne.’ Yeɛ Yesu ha hyirele bɛ kyɛ: ‘Nahorɛ, meka mekyire ɛmɔ kyɛ, bɛ bɔ bɛdide toɔ, ne bɛ bɔ besi tuutuu ne koli ɛmɔ nyunu moa kɔhɔ Nyameɛ Ahennie nanu.’ 32Ofikyɛ Yohane wale ɛmɔ berɛ kyɛ ɔbaahyire ɛmɔ tenenee atee ne, ɛmɔ anne ye banni. Nakoso bɛ bɔ bɛdide toɔ ne tuutuufoɛ ne de, bɛlɛle ye bɛlili. Na ɛmɔ nwuni ye sɔ ne po ne, ɛmɔ annu ɛmɔ nwo banne ye banni.
33“Ɛmɔtie edwirɛ#21:33 Anaa “Mvandoho” he koso: Efiewura bie yɛle bobe boo, olɛle ye nwo, otuli nekaa bɔ bɛtwi nzãa wɔ nu, yeɛ osili awaen tendee wɔ nu. Afei ɔfa yakyile ahwɛsofoɛ, na otuli atee. 34Osuli ne, ɔsomane ye ngoaa kyɛ bɛhɔ ahwɛsofoɛ ne berɛ, na beele ye kyɛfa deɛ bɛ berɛ ye. 35Nakoso, ahwɛsofoɛ ne hyele ngoaa nemɔ. Bɛbole kõ, bɛhuni kõ, yeɛ bɛsili bɔ ɔpɛ yebo ne nyɔboɛ. 36Osa somane ngoa bieku, bɛ de, né bɛsone bɛtra bɛ bɔ bɛli moa ne. Nakoso, sɔ ala yeɛ bɛyɛle bɛ ɔ. 37Afei ɔsomane ye bɔbɔ ye kunu ba, yeɛ ɔhane kyɛ, ‘Mma ne de, bɛkɔfɛle ye.’ 38Nakoso ahwɛsofoɛ nemɔ nwuni ɔwa ne, bɛha bɛhyirele bɛ nwo kyɛ, ‘Koliagyaa ne ɛhe, ɛmɔbra ma yɛhu ye, na yɛfa agyapadeɛ ne.’ 39Yeti bɛhyele ye, na bɛfale ye bɛhɔle ɛboo ne si bɛɛhuni ye. 40Ye de, sɛ ɛboo ne wura ne ba a, nzu yeɛ ɔkɔfa kɔyɛ ahwɛsofoɛ nemɔ ɔ?” 41Yeɛ bɛhane kyɛ: “Ɔnate kyɛ bɛtte mmeni pa nati, ɔkɔsɛkye bɛ koraa, na wafa bobe boo ne wama ahwɛsofoɛ foforɛ, bɔ osu a, bɛkɔfa ye kyɛfa bɛkɔma ye ɔ.”
42Yesu ha hyirele bɛ kyɛ, “Ɛmɔ kenngale ye wɔ tworɔnzɛm nanu kyɛ:
‘Nyɔboɛ bɔ brekyafoɛ ne gyi tole ne,
ɛhene yeɛ waayɛ nyɔboɛ bɔ ye nwo hia paa ne.
Ɛhe fi Awurade berɛ,
na ɔyɛ yɛ nwanwa’?
43Yeti, meka mekyire ɛmɔ kyɛ, bɛkole Nyameɛ Ahennie ne bɛkofi ɛmɔ sa nu, ná bafa bama maen bɔ okosu mmaa ɔ. 44Ebiala bɔ okofi nyɔboɛ he aso ne, okobubu pasaa, ná sɛ nyɔboɛ ne tɔ ebie so a, okotĩ ye muhu-muhu.”
45Sɔfo mbanyi ne Farisifoɛ nemɔ tele sɔ dwirɛ ne, bɛnwuni ye kyɛ, bɛ nwo dwirɛ yeɛ ɔka ne. 46Ɔwɔ nu, né bɛpena ye bɛkye ye, nakoso ne bɛsuro mmenia ne, ofikyɛ ne bɛnwu ye kyɛ ɔte diifoɛ.
Currently Selected:
Mateo 21: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
