Mateo 25
25
1“Afei, anwuro ahennie ne te kyɛ mmabunu buru bie bɔ bɛfale bɛ nganea kyɛ bɛkwaayia brienzua bɔ ɔyɛ ayeforɔ ne. 2Né bɛ nu nnu te ngwasea, yeɛ ne nnu koso se nworɛ. 3Ngwaseafoɛ nemɔ fale bɛ nganea ne, bamva kerezin#25:3 Ngyerɛaseɛ Tee: “Ngoo” bammoka so. 4Nakoso, anyanzafoɛ nemɔ fale kerezin guale towaa nu bokale bɛ nganea naso. 5Brienzua bɔ ɔbaayɛ ayeforɔ ne hyɛle, yeti bɛ mukoraati né bɛ nye kõ, na bɛlale. 6Na kɔngɔen tumm ne, ebie teane nu kyɛ: ‘Brienzua#25:6 Anaa “Brienzua bɔ ɔyɛ ayeforɔ” ne ba oo! Ɛmɔhɔ beeyia ye.’ 7Yeti, mmabunu namukoraati dwɔsole, na bɛsosɔle bɛ nganea ne. 8Yeɛ ngwaseafoɛ ne ha hyirele anyanzafoɛ nemɔ kyɛ, ‘Ɛmɔma yɛ ɛmɔ kerezin ne bie; na yɛ nganea ne baanua.’ 9Anyanzafoɛ ne koso hane kyɛ, ‘Daabi, ɔngɔso yɛ po, né wasõ ɛmɔ. Ɛmɔhɔ bɛ bɔ bɛtɔne ye ne berɛ, na ɛmɔɔtɔ bie.’ 10Bɛnate atee so bɛkɔ ne, brienzua bɔ ɔyɛ ayeforɔ ne wale. Mmabunu bɔ baboaboa bɛ nwo ne, bɛne ye hɔle ayeforɔ nabo, na bɛtole anoa nanu. 11Ye si ne, mmabunu ngaa nemɔ wale, na bɛhane kyɛ, ‘Yɛ wura, yɛ wura, bukye yɛ!’ 12Na ɔha hyirele bɛ kyɛ, ‘Nahorɛ, meka mekyire ɛmɔ, menze ɛmɔ.’ 13Yeti, ɛmɔma ɛmɔ nye la berɛ, ofikyɛ ɛmɔnze kyẽa ne, anaa dɔnhwere ne.
14“Afei koso, anwuro ahennie ne te kyɛ biaa bie bɔ ɔbaatu atee, na ɔfrɛle ye ngoaa fale ye nningyein wurale bɛ sa. 15Ɔmane kõ talɛnde#25:15 Talɛnde kõ nyɔboɛ kɔyɛ dɛnare 6,000, wɔ Roman sikaa nu. nnu, ɔmane foforɛ talɛnde nyɔ, yeɛ ɔmane kõ ne koso talɛnde kõ, kyɛbɔ bɛ nu biala anwoserɛ te ɔ. Na otule ye atee ne. 16Ɛberɛ ala, bɔ onyane nnu ne hyɛle yebo fa yɛle adwuma, na onyane nnu bokale so. 17Bɔ onya nyɔ ne koso nyane nyɔ bokale so. 18Nakoso bɔ onyane kõ ne de, otutule ase, yeɛ ɔfale ye wura ne sikaa ne feale berɛ ɔ. 19Afoɛ bie si ne, ngoaa nemɔ wura ne wale kyɛ ɔne bɛ baabu ngondaa. 20Yeti, akoaa bɔ onyane talɛnde nnu ne ba ne, ɔfale nnu bokale so wale, na ɔhane kyɛ, ‘Me wura, talɛnde nnu yeɛ ɛfa mane me ɔ, nea, manya nnu maboka so.’ 21Ye wura ne ha hyirele ye kyɛ: ‘Mo, akoaa pa bɔ odi nahorɛ! Ali nningyein kaa he anu nahorɛ. Ngɔfa pee ngowura wɔ sa. Nya wɔ wura anigye ne bie.’
22“Na akoaa bɔ onyane nyɔ ne koso wale, na ɔhane kyɛ, ‘Me wura, talɛnde nyɔ yeɛ ɛfa mane me ɔ, manya nyɔ maboka so.’ 23Ye wura ne ha hyirele ye kyɛ: ‘Mo, akoaa pa bɔ odi nahorɛ! Ali nningyein kaa he anu nahorɛ. Ngɔfa pee ngowura wɔ sa. Nya wɔ wura anigye ne bie.’
24“Afei, akoaa bɔ onyane talɛnde kõ ne wale, na ɔhane kyɛ: ‘Me wura, mese kyɛ wɔ dwirɛ yɛ se; nekaa bɔ elluale hwee ne, ɛberɛ yeɛ ɛpɛ ɔ, ná nekaa bɔ ɛhulli hwee ne, ɛberɛ yeɛ ɛsesa ɔ. 25Yeti né mesuro, na mvale wɔ sikaa ne ngɔnveale ase. Ye ɛhe, de wɔ nikye.’
26“Yeɛ ye wura ne ha hyirele ye kyɛ: ‘Wɔ akoaa he, wɔ ti anu yɛ se, na ɛte foen! Nnaa ɛse kyɛ bɔ nnuale ne yeɛ mepɛ ɔ, na bɔ nnhuli ne yeɛ mesesa ɔ? 27Nzuati yeɛ amva me sikaa ne ando bank, na meba a, mannya ye nwo nzihoɛ ɔ? 28Ɛmɔle talɛnde kõ ne bɛfi ye sa nu, na ɛmɔfa bɛma bɔ ole talɛnde buru ne. 29Ofikyɛ ebiala bɔ ole bie ne, bɛkɔfa pee bɛkɔboka ye so, na okonya ye maa okobu so. Na bɔ olle bie ne de, bɔ ole ye ne po, bɛkole bɛkofi ye sa nu. 30Ɛmɔfinde sɔ akoaa bɔ mvasoɛ nne ye so ne bɛto awosii nanu wɔ aluo dɔ. Ɛberɛ yeɛ okosu kɔnwose ye gye ɔ.’
31“Sɛ sona Awa ne ba ye anuonyam nu, bɔ ye abɔfo mukoraati boka ye so ne, ɔkɔtena ye anuonyam bia#25:31 Ngyerɛaseɛ Tee: “Ɔhene bia” so. 32Ná ɔkɔboaboa maen-maen namukoraati noa wɔ ye nyunu, na ɔkɔyeye bɛ nu, kyɛbɔ bɛ bɔ bɛnea mmoan ne yeye mmoan ne mmɔngye nu ne. 33Ɔkɔfa mmoan ne kosie ye sa famaa so, na wafa mmɔngye ne wasie ye sa bɛen so. 34Na Ɔhene ne kɔha kohyire bɛ bɔ bɛwɔ ye famaa so ne kyɛ, ‘Ɛmɔbra, ɛmɔ bɔ me Baba ayira ɛmɔ, ɛmɔɔfa Ahennie bɔ basiesie bama ɛmɔ fi wiase ahyɛaseɛ ne. 35Ofikyɛ ɛhɔen huni me ne, ɛmɔ mane me aleɛ, nzuhɔen huni me ne, ɛmɔ mane me nzue, nyɛle ɛwɔfoɛ ne, ɛmɔlɛle me kama, 36mmerɛ bɔ me nwo la so ne, ɛmɔ wurale me atadeɛ, mvokyɛle ne, ɛmɔ wale bɛɛneane me, ná nna prizin ne, ɛmɔ wale bɛɛsrale me.’
37“Yeɛ ateneneefoɛ nemɔ kobisa ye kyɛ, ‘Awurade, mmerɛ beni yeɛ yɛnwuni kyɛ ne ɛhɔen ku wɔ, bɔ yɛmane wɔ aleɛ maa ɛlili, anaa nzuhɔen ku wɔ, bɔ yɛmane wɔ nzue maa ɛnone ɔ? 38Mmerɛ beni yeɛ yɛnwuni kyɛ ɛte wɔfoɛ bɔ yɛfale wɔ yɛhɔle awuro, anaa wɔ nwo la so bɔ yɛwurale wɔ atadeɛ ɔ? 39Na mmerɛ beni yeɛ né afokyɛ anaa ɛla prizin bɔ yɛɛneane wɔ ɔ?’ 40Na Ɔhene ne kɔha kohyire bɛ kyɛ, ‘Nahorɛ meka mekyire ɛmɔ kyɛ, mmerɛ bɔ ɛmɔyɛ bɛmane nniema mmaa-mmaa he anu kõ ne, ɛmɔyɛ bɛmane me.’
41“Na ɔkɔha kohyire bɛ bɔ bɛwɔ ye bɛen so ne kyɛ, ‘Ɛmɔ bɔ badome ɛmɔ, ɛmɔfi me so bɛhɔ see bɔ ɔsɔ daa, bɔ basiesie bama Abɔnzam ne ye abɔfo nanu. 42Ofikyɛ ɛhɔen huni me ne, ɛmɔ amma me aleɛ, nzuhɔen huni me, na ɛmɔ amma me nzue ma manno. 43Nyɛle ɛwɔfoɛ ne, ɛmɔ anne me, me nwo la so ne, ɛmɔ anwura me atadeɛ, mvokyɛle na ngɔ nnale prizin, nakoso ɛmɔ amma anzra me.’
44“Na bɛ koso, bɛkobisa ye kyɛ, ‘Awurade, mmerɛ beni yeɛ yɛnwuni kyɛ ɛhɔen ku wɔ, nzuhɔen ku wɔ, ayɛ wɔfoɛ, wɔ nwo la so, afokyɛ, anaa ɛla prizin bɔ yammoka wɔ ɔ?’ 45Yeɛ Ɔhene ne kɔha kohyire bɛ kyɛ, ‘Nahorɛ, meka mekyire ɛmɔ kyɛ, ɔnate kyɛ ɛmɔ annyɛ bamma nniema mmaa-mmaa he anu kõ po ne, ɛmɔ anyɛ bamma me.’ 46Yeti, bɛkɔsɛkye ɛhemɔ koraa, na ateneneefoɛ ne de, bɛkɔhɔ daa ngoa nu.”
Currently Selected:
Mateo 25: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
