Mateo 27
27
1Aleɛ hene ne, sɔfo mbanyi ne maen nanu mbanyi namukoraati yiale nu fale adwene bɔ bɛkɔfa so bɛkɔhu Yesu ɔ. 2Bɛkyekyele ye, na bɛfale ye bɛɛwurale amrado Pilato sa. 3Yuda bɔ ɔyele Yesu mane ne nwuni kyɛ babu ye kumfɔ ne, ɔyɛle ye yea paa, na osa fale dwetɛ aburasa ne ɔɔmane sɔfo mbanyi ne maen mbanyi nemɔ. 4Na ɔha hyirele bɛ kyɛ: “Mayɛ bɔne paa kyɛ maye mogya bɔ odi bem mama ɛmɔ ɔ.” Bɛha bɛhyirele ye kyɛ: “Ɛhe de, ɔfa yɛ nwo nzu? Ɔte wɔ bɔbɔ wɔ dwirɛ.” 5Yeti, Yuda gyile sikaa ne guale asɔre awuro berɛ, yeɛ ɔhɔle ɔ. Ná ɔɔbɔle ye kɔme. 6Sɔfo mbanyi nemɔ sesale sikaa ne, na bɛhane kyɛ: “Ɛhe de, mmeraa mma ate kyɛ yɛfa yɛgua nekaa krongron bɔ bɛfa sikaa bɛgua ne, ofikyɛ, ɔte mogya sikaa.” 7Yeti bɛdwenene ye nwo ne, bɛfa bɛɛtɔle aseɛ#27:7 Anaa “Aseɛ bɔ bɛfa bɛ nwo ngukuye” bɔ bɛkɔfa bɛkosie ɛwɔfoɛ. 8Yeti yeɛ bafrɛ ɛberɛ Mogya Aseɛ tonn maa waadwu ɛnɛ ne. 9Ɛhe maa edwirɛ bɔ diifoɛ Yeremia hane ne wale nu kyɛ:
“Na bɛfale dwetɛ aburasa ne,
nyɔboɛ bɔ bɛpɛ bɛtole ye so ne,
bɔ Israel mmaa nemɔ bie pɛ tole ye so ne,
10na bɛfa bɛtɔle aseɛ, #27:10 Nea 27:7 ne bo berɛ dwirɛ ne.
Kyɛbɔ ne Awurade ahyɛ me ne.”
11Sɔ mmerɛ ne, né Yesu gyi amrado ne nyunu, na amrado ne bisale ye kyɛ: “Wɔ yeɛ ele Yudafoɛ Hene ne?” Yesu yele ye noa kyɛ: “Ye ala yeɛ aha ne.” 12Nakoso sɔfo mbanyi ne maen nanu mbanyi ne bɔ ye kwaadu ne, wandwudwo. 13Yeɛ Pilato bisale ye kyɛ: “Yeti, edwirɛ nwora bɔ bɛka bɛgua wɔ so ne, ɛtelle?” 14Nakoso, Yesu ammukye ye noa; wanga edwirɛ komapɛ po. Ɛhe yɛle amrado ne nwanwa paa.
15Sɛ́ bɛdi afahyɛ biala a, né amrado ne yakyi bɛ bɔ bɛla prizin nanu kõ, sona biala bɔ mmenia ne pena kyɛ ɔyakyi ye ne. 16Sɔ mmerɛ ne, né ebie bɔ bɛfrɛ ye Barabas la prizin, na ne wale dimmɔne paa. 17Yeti mmenia nemɔ yiale ne, Pilato bisale bɛ kyɛ: “Nwa yeɛ nyakyi ye mma ɛmɔ ɔ, Barabas anaa Yesu bɔ ɛmɔnwa bɛfrɛ ye Kristo ne?” 18Ofikyɛ né ɔse kyɛ ahoɔyaa ti yeɛ bafa Yesu babrɛ ye ne. 19Afei koso, mmerɛ bɔ Pilato te atemmuo bia naso ne, ɔye somane maa bɛɛha bɛhyirele ye kyɛ: “Ye wɔ nwo fi teneneeniɛ he dwirɛ nanu, ofikyɛ ye ti, kɔngɔen he nwuni amaneɛ paa wɔ nnaleɛ nu.” 20Nakoso, sɔfo mbanyi ne maen nanu mbanyi ne tutu guale mmenia nemɔ so anu kyɛ, bɛha kyɛ bɛkuro Barabas, na bɛma ohu Yesu. 21Yeti, amrado ne bisale bɛ kyɛ: “Mmenia nyɔ he, bɛ nu beni yeɛ nyakyi ye mma ɛmɔ ɔ?” Bɛhane kyɛ: “Barabas!” 22Yeɛ Pilato bisale kyɛ: “Ye de, nzu yeɛ mva nyɛ Yesu, bɔ ɛmɔnwa bɛfrɛ ye Kristo ne?” Bɛhane kyɛ: “Bɔ ye asɛnnua nu!” 23Yeɛ obisale bɛ kyɛ: “Nzuati ɔ? Bɔne beni yeɛ wayɛ ɔ?” Nakoso bɛteɛteane nu kyɛ: “Bɔ ye asɛnnua nu!”
24Mmerɛ bɔ Pilato nwuni kyɛ, bɔ ɔyɛle ne anzi aga, mmom mmenia ne pena kyɛ bɛyɛ basabasa ne, ɔfale nzue nwuzini ye sa wɔ bɛ mukoraati nyunu, na ɔhane kyɛ: “Menni biaa he mogya nwo fɔ. Ɛmɔ bɔbɔ ɛmɔyɛ ye bɔ ɛmɔ kuro biala.” 25Mmenia namukoraati hane kyɛ: “Ye mogya gua yɛ, ne yɛ mmaa mɔ so.” 26Yeti, ɔfale Barabas mane bɛ, nakoso ɔmaa bɛgwale Yesu, na ɔfale ye mane bɛ kyɛ, bɛɛbɔ ye asɛnnua nu.
27Yeɛ amrado né sogyafoɛ ne fale Yesu hɔle amrado ne awuro dɔ, na sogyafoɛ namukoraati pɛle ye nwo yiale. 28Bɛyele ye atadeɛ ne, na bɛfale ɛtena kɔkorɛ bie bɛhrale ye. 29Yeɛ bɛfale mmowie bɛyɛle abotire bɛwurale ye, na bɛfale elemmire bɛwurale ye sa nu. Na bɛbule ndwerɛ wɔ ye nyunu bɛgorole ye nwo kyɛ: “Yudafoɛ hene, wɔ ngoa so oo!” 30Bɛtetele ngɔserɛ bɛguale ye nyunu, na bɛlɛle elemmire ne bɛfili ye sa nu bɛfa bɛfifini ye tia nu. 31Bɛgorole ye nwo bɛyiele ne, bɛyele ɛtena ne, na besa bɛfale ye bɔbɔ ye atadeɛ ne bɛwurale ye. Na bɛfale ye bɛhɔle kyɛ bɛkwaabɔ ye asɛnnua nu.
32Bɛfite bɛkɔ ne, bɛnwuni Kireniɛ bie bɔ bɛfrɛ Simon. Bɛhyɛle sɔ biaa ne maa ɔsoale Yesu asɛnnua ne. 33Na bɛdwuli nekaa bɔ bɛfrɛ berɛ Golgota, bɔ okyire “Tire Kokuroka” ne, 34bɛfale abɔwee bɛfrale nzãa bɛmane ye kyɛ ɔno, nakoso ɔhane ye noa ne, wanno. 35Bɛbɔle ye asɛnnua nu bɛyiele ne, bɛtɔɔsole#27:35 Anaa “Bɛbɔle ndondo.” bɛhyɛle ye atadeɛ nanu. 36Na bɛtenane berɛ bɛneane ye so. 37Afei, bɛhworɔle ye kwaadu ne bɛbɔle ye ti afia kyɛ:
YESU,
YUDAFOƐ HENE NE.
38Bɛbɔle awiefoɛ nyɔ asɛnnua nu bɛbokale ye so, né kõ wɔ ye bɛen, yeɛ né kõ wɔ ye famaa. 39Na bɛ bɔ bɛpɛ nu berɛ ne dwudwo tiale ye, na bɛwosole bɛ ti 40bɛhane kyɛ: “Wɔ yeɛ enwa ɛkodwiri asɔre awuro ne kogua, na afa ɛlɛsa asi ne, ye de, dɛ́ wɔ nwo ee! Sɛ ɛte Nyameɛ awa a, fi asɛnnua naso dwu ase.” 41Na sɔ ala yeɛ sɔfo mbanyi, atwerɛfoɛ, ne maen nanu mbanyi ne koso hyɛle yebo gorole ye nwo kyɛ: 42“Odɛ́ amanvoɛ, nakoso ɔngora nne ye nwo. Ɔte Israelfoɛ Hene, ma odwu fi asɛnnua naso, na yɛkole ye yɛkoli. 43Wafa ye nwo wato Nyameɛ so, sɛ okuro ye dwirɛ a, ma ole ye, ofikyɛ né ɔka kyɛ, ‘Nde Nyameɛ Awa.’” 44Na awiefoɛ bɔ babɔ bɛ asɛnnua nu baboka ye so ne koso pepɛle ye nzoaa.
45Ná ofi eyia 12:00#27:45 Sɛ ekyire yebo tee a, ɔte: “Dɔnhwere bɔ ɔtɔ so nzia.” bɔ ɔkɔ ne, aseɛ naso yɛle tumm tonn oodwuli eyia 3:00.#27:45 Sɛ ekyire yebo tee a, ɔte: “Dɔnhwere bɔ ɔtɔ so ngona.” 46Ɔbɔle kɔyɛ kyɛ 3:00#27:46 Nea 27:45 ne bo berɛ dwirɛ ne. ne, Yesu teane nu kyɛ: “Eli, Eli, lama sabaktani?” Yebo kyire kyɛ: “Me Nyameɛ, Me Nyameɛ, nzuati yeɛ aye wɔ nye ama me ne?” 47Bɛ bɔ bɛgyigyi berɛ ne bie tele ɛhe ne, bɛhane kyɛ: “Ɔfrɛ Elia.” 48Bɛ nu kõ tuli mirika ɔɔfale eminaen, na ɔfa bɔle nzãa bɔ enu ka nu, yeɛ ɔfa tuale elemmire noa fa mane ye kyɛ ɔno. 49Nakoso, bɛ ngaa ne hane kyɛ: “Yakyi ye! Ma yɛnea sɛ Elia koolɛ́ ye a.” 50Yesu sa teane nu bieku, na oyakyile ye honhom nu. 51Na nea, kɛtens bɔ ɔwɔ nekaa krongron berɛ nanu tele nyɔ fili anwuro oosili ase, aseɛ wosole, na nyɔboɛ mɔ nu pakye-pakyele. 52Asieleɛ mɔ so bukye-bukyele, na akrongronfoɛ bɔ bawuwu#27:52 Anaa “Badeda.” nemɔ fuin ne fitele, 53na mmeni pee nwuni fuin nemɔ. (Otingye fili ewue nu ne, bɛ bɔ bɛhɔle asieleɛ naso berɛ ne hɔle kuro krongron nanu.) 54Sogyaniɛ panyi ne né bɛ bɔ bɛboka ye so, bɔ né bɛnea Yesu so ne nwuni aseɛ wosolɛ ne, ɔne nningyein bɔ osisile namukoraati ne, esuronyi hane bɛ, na bɛhane kyɛ: “Ampa, ɛhe yeɛ ole Nyameɛ Awa ne.”
55Né mmrasua pee gyi nekaa bie bɛnea bɔ ɔkɔ so ne. Né bali Yesu si bafi Galilea, bɛ yeɛ ne bɛsõ ye ɔ. 56Bɛ nu bie yeɛ ole Mary Magdalene, Yakobo ne Yosef maame Mary, ɔne Sebedeo mmaa nemɔ maame.
57Odwuli nnɔsoa ne, sikaniɛ bie bɔ bɛfrɛ ye Yosef bɔ ofi Arimatea wale berɛ, né ɔte Yesu suaniɛ. 58Ɔhɔle Pilato berɛ ɔɔsrɛle Yesu fuin ne, na Pilato hane kyɛ bɛfa bɛma ye. 59Yosef fale fuin ne, na ɔfale nwera kama-kama kyekyele ye nwo, 60na ɔfa tole ye bɔbɔ ye asieleɛ bɔ watu ye foforɛ wɔ nyɔboɛ bie nu. Mmerɛ bɔ ɔfale nyɔboɛ kandinga bie tole bɔen ne noa ne, oyakyile ye berɛ hɔle. 61Nakoso, Mary Magdalene, ne Mary kõ ne de, bɛhale berɛ, né bɛte asieleɛ ne nyunu.
62Kyẽa bɔ oli Anwoboaboa kyẽa ne si ne, sɔfo mbanyi ne Farisifoɛ nemɔ hɔle Pilato berɛ, 63na bɛha bɛhyirele ye kyɛ: “Yɛ wura, yɛkaye kyɛ, ngondomboniɛ ne te ase ne, ɔhane kyɛ, ‘Ɛlɛsa si ne, ngotingye.’ 64Yeti, ma bɛɛbɔ asieleɛ nanwo waen ma oodwu ye lɛsa naso. Wanyɛ sɔ a, ye asuafoɛ nemɔ koowia ye, ná baaha bahyire yɛ kyɛ watingye. Ye de, ahaa ngondombo bɔ yesi ne ɔkɔwa ne, ɔkɔtra daa deɛ ne.” 65Pilato ha hyirele bɛ kyɛ: “Ɛmɔle sogyafoɛ, ɛmɔma bɛɛbɔ asieleɛ nanwo waen, kyɛbɔ ɛmɔ kɔhora ɔ.” 66Yeti bɛhɔle, na bɛfale nikye bɛɛtale nyɔboɛ ne si serɛ-serɛ, na bɛmaa sogyafoɛ nemɔ neane berɛ.
Currently Selected:
Mateo 27: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
