Marko 11
11
1Bɛ́pingye Yerusalem, na bɛdwuli Bɛtfage ne Betania bɔ ɔwɔ Olive Bokaa naso ne, ɔsomane ye asuafoɛ nanu nyɔ, 2na ɔha hyirele bɛ kyɛ: “Ɛmɔhɔ nnamue bɔ ɛmɔ nye ta ye dɔ nanu, ɛmɔ dwu berɛ a, ɛmɔ konwu kyɛ bamenda afunum ba bie bɔ ebiala ttenane ye so le. Ɛmɔ sangye ye, na ɛmɔfa ye bɛbra. 3Na sɛ ebie bisa ɛmɔ kyɛ, ‘Nzu yeɛ ɛmɔyɛ ne?’ a, ɛmɔha kyɛ, ‘Awurade hia ye, na oyie ala a, ɔkɔfa ye kɔwa.’ ” 4Yeti bɛhɔle, na bɛnwuni afunum ne wɔ dwaaso berɛ, né bamenda ye wɔ anoa bie nyunu, na bɛsangyele ye. 5Yeɛ bɛ bɔ bɛgyigyi berɛ ne bie bisale bɛ kyɛ: “Nzuati yeɛ ɛmɔ sangye afunum ne?” 6Asuafoɛ nemɔ hane bɔ Yesu hane kyɛ bɛha ne, na bɛmaa bɛfale ye bɛhɔle. 7Bɛfale afunum ne bɛbrɛle Yesu, na bɛfale bɛ ndadeɛ bɛguale ye so maa ɔtenane ye so. 8Afei mmeni pee fale bɛ ndadeɛ sɛle atee nanu, na ebiemɔ bubule nyaa fili ndire nanu. 9Ná bɛ bɔ bɛli ye nyunu ne ye si ne hane kyɛ:
“Hozanna!#11:9 Hozanna te Hebri dwirɛ bɔ yebo kyire kyɛ, “Yɛsrɛ wɔ, de ye.” Greek nu ne, sɔa yeɛ bɛtworɔ ye ɔ: “ὡσαννά (hōsanná).”
Nhyira yeɛ ole bɔ ɔba Awurade dumaa nu ne!
10Nhyira yeɛ ole yɛ Baba David ahennie bɔ ɔba ne.
Wɔ bɔ ɛwɔ anwuro-anwuro dɔ ne, Hozanna!”
11Mmerɛ bɔ owurale Yerusalem kuro nanu ne, ɔhɔle asɔre awuro berɛ. Ɔtotole ye nye neane ɛberɛ mukoraati, nakoso ne aleɛ pena sa, yeti ɔne buru-ne-nyɔ ne hɔle Betania.
12Na aleɛ hene bɔ bɛ́fi Betania ne, né ɛhɔen ku ye. 13Na ye nye bɔle borɔdoma bie so wɔ dede, ne nyaa wɔ so, yeti ɔhɔle kyɛ ɔkwanea sɛ aleɛ wɔ so a. Nakoso odwuli berɛ ne, ne hwee nne so, nyaa ngome yeɛ ne ɔwɔ so ɔ. Ofikyɛ né ɔtte mmerɛ bɔ borɔdoma su ɔ. 14Yeti, ɔha hyirele bakaa ne kyɛ: “Ebiala nngoli wɔ so mmaa kõ.” Na ye asuafoɛ nemɔ tele sɔ dwirɛ ne. 15Mmerɛ bɔ bɛdwuli Yerusalem ne, Yesu hɔle asɔre awuro berɛ, na ɔfoane bɛ bɔ bɛtɔne nningyein, ɔne bɛ bɔ bɛtɔ namukoraati fili berɛ, na ɔhane bɛ bɔ bɛsesã sikaa nemɔ tɛbulu, ɔne bɛ bɔ bɛtɔne mmubure nemɔ bia namukoraati guale ase. 16Na wamma ebiala amva nikye fee ambɛ nu wɔ asɔre awuro berɛ. 17Na ohyirehyirele bɛ, yeɛ ɔha hyirele bɛ kyɛ: “Aso bɛhworɔlle kyɛ, ‘Bɛkɔfrɛ m'awuro ne maen-maen mukoraati mbaebɔ awuro’? Nakoso ɛmɔ de, ɛmɔ ayɛ ye awiefoɛ adwosuo.” 18Sɔfo mbanyi ne atwerɛfoɛ nemɔ tele ɛhe ne, né bɛsuro ye, ofikyɛ ye ngyerɛkyerɛ ne maa mmenia ne nwo dwirili bɛ. Yeti né bɛpena atee bɔ bɛkɔfa so bɛ kohu ye ɔ. 19Odwuli nnɔsoa ne, Yesu ne ye asuafoɛ nemɔ fili kuro nanu.
20Na ngyerɛmɔ bɔ bɛse ne, bɛnwuni kyɛ borɔdoma bakaa ne awu fi anwuro waadwu yebo.#11:20 Anaa “Waaha ye ndii.” 21Petro kayele, yeɛ ɔhane kyɛ: “Rabi, nea borɔdoma bɔ edomene ye ne, wawu oo.” 22Yesu ha hyirele bɛ kyɛ: “Ɛmɔnya gyidie wɔ Nyameɛ nu. 23Nahorɛ, meka mekyire ɛmɔ kyɛ, ebiala bɔ ɔkɔha kohyire bokaa he kyɛ, ‘Tu kɔtɔ ɛpo nu,’ na onzu ye nwo aporowaa wɔ y'ahone nu, na mmom ole gyidie kyɛ bɔ waha ne kɔwa nu ne, ɔkɔwa nu kɔma ye. 24Yeti, meka mekyire ɛmɔ kyɛ, nikye biala bɔ ɛmɔkɔbɔ ye nwo mbaeɛ ne, ɛmɔnya gyidie kyɛ ɛmɔ sa aha ye, na ɛmɔ konya ye. 25Na sɛ ɛmɔgyina berɛ kyɛ ɛmɔbɔ mbaeɛ a, bɔ ebie afa ayɛ ɛmɔ ne, ɛmɔfa bɛhyɛ ye, ná ɛmɔ Baba bɔ ɔwɔ anwuro ne koso kɔfa ɛmɔ bɔne kɔhyɛ ɛmɔ.” 26#11:26 Sɛ ɛnea Bible biemɔ nu a, edwirɛ bie wura ɛwa kyɛ: “Nakoso sɛ ɛmɔ amva bangyɛ a, ɛmɔ Baba bɔ ɔwɔ anwuro ne koso ngɔfa ngɔhyɛ ɛmɔ lle.” Nakoso sɔ dwirɛ ne, sɛ ɛnea tete asaanoa ndworɔyɛ bɔ odi mu paa, ɔne bɔ wahyɛ paa nemɔ nu a, ɔnne nu.—
27Mmerɛ bɔ bɛdwuli Yerusalem ne, né ɔne ye asuafoɛ nemɔ nate asɔre awuro berɛ. Ná sɔfo mbanyi, atwerɛfoɛ, ne kuro nanu mbanyi ne wale ye berɛ, 28yeɛ bɛbisale ye kyɛ: “Tumi beni yeɛ ɛfa yɛ sɔ nningyein hemɔ ne? Na nwa yeɛ ɔmane wɔ sɔ tumi ne?” 29Yesu ha hyirele bɛ kyɛ: “Me bisa ɛmɔ dwirɛ kõ, sɛ ɛmɔye me noa a, ngɔha tumi bɔ mefa meyɛ sɔ nningyein ne ngohyire ɛmɔ. 30Yohane asubɔ ne, né ofi anwuro anaa né ofi sona? Ɛmɔye me noa.” 31Yeti bɛdwenene ye nwo kyɛ: “Sɛ yɛka kyɛ ‘Ofi anwuro’ a, okobisa yɛ kyɛ, ‘Ye de nzuati yeɛ ɛmɔ anne ye banni ne?’ 32Na yɛkɔyɛ sɛɛ na yaha kyɛ, ‘Ofi sona’?” Né bɛsuro mmenia ne, ofikyɛ né bɛ mukoraati bɛnwu ye kyɛ Yohane te diifoɛ. 33Yeti, bɛha bɛhyirele ye kyɛ: “Yɛnze.” Yeɛ Yesu koso ha hyirele bɛ kyɛ: “Nzaade me koso, tumi bɔ mefa meyɛ sɔ nningyein hemɔ ne, mengɔha mengohyire ɛmɔ.”
Currently Selected:
Marko 11: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
