Romanfoɛ 15
15
1Yɛ bɔ yɛyɛ se ne, odikyɛ yɛsoa bɛ bɔ bɛnyɛ se ne mmerɛyɛ, na nnɛmɔ maa yɛyɛ bɔ ɔkɔsɔ yɛ mmom yɛ nye ɔ. 2Ɛmɔma yɛ nu biala yɛ bɔ ɔkɔsɔ ye mmango nye, nikye bɔ ɔkɔmaa okonya ngɔsoɛ. 3Ofikyɛ Kristo po anyɛ bɔ okuro; mmom kyɛbɔ bahworɔ ne: “Bɛ bɔ bɛgua ɛmɔ nyunu ase ne, bɛ animguaseɛ ne awa me so.” 4Na nikye biala bɔ bahworɔ bato berɛ ne, bahworɔ kyɛ ohyirehyire yɛ, kyɛbɔ ɔkɔyɛ a yɛnate animia ne awerɛkyekye bɔ ɔwɔ tworɔnzɛm nanu naso konya anidasoɛ ɔ. 5Nyameɛ bɔ ɔma animia ne awerɛkyekye ne, ɔma ɛmɔnya adwene bɔ ne Kristo Yesu le ye ne bie, 6kyɛbɔ ɔkɔyɛ a ɛmɔ kɔyɛ kõ, na ɛmɔ afa konviɛ kõ bahyɛ y'Awurade Yesu Kristo Nyameɛ ne ye Baba ne anuonyam.
7Yeti ebiala lɛ́ ye mmango to nu, kyɛbɔ Kristo alɛ́ ɛmɔ ato nu ne, na wamaa wahyɛ Nyameɛ anuonyam. 8Meka mekyire ɛmɔ kyɛ, Nyameɛ nahorɛlilɛ ti, Kristo wale kyɛ ɔbaasõ bɛ bɔ bapɛ bɛ toa ne, kyɛbɔ ɔkɔyɛ a ɛbɔ bɔ ɔhyɛle bɛ nana mɔ ne kɔwa nu, 9ná Nyameɛ anwunvoin ti, maen-maen ne ahyɛ ye anuonyam. Ofikyɛ kyɛbɔ bahworɔ ne:
“Ɛhe ati yeɛ ngɔye wɔ ayɛ wɔ maen-maen nanu ne;
na ngɔto ayɛyie dwein ngɔma wɔ dumaa.”
10Na osa hane kyɛ:
“Maen-maen nanufoɛ, ɛmɔ ne ye mmenia ne nye gye.”
11Yeɛ ɔhane ye bieku kyɛ:
“Maen-maen namukoraati, ɛmɔye Awurade ayɛ,
ná ma mmenia mukoraati ye y'ayɛ.”
12Na Isaiah koso hane kyɛ:
“Yese ndii ne kɔwa,
ɔkɔwa kooli maen-maen naso,
ye yeɛ maen-maen ne kɔfa bɛ nye bɛkɔto ye so ɔ.”
13Gyidie bɔ ɛmɔ anya ye wɔ Nyameɛ bɔ ɔma anidasoɛ ne nu nati, ɔma ɛmɔ anigye ne asomdwie mukoraati bie, kyɛbɔ ɔkɔyɛ a, ɔnate honhom krongron né tumi so ne, ɛmɔ anidasoɛ ne kobu so.
14Nniemamɔ, medɛ́ medi paa kyɛ, paayɛlɛ ayi ɛmɔ bo, na ɛmɔ anya nimdeɛ mukoraati bie maa waboso, yeti ebiala kɔhora kɔhyɛ ye mmango ngunaen.#15:14 Anaa “Kohyirehyire ye mmango.” 15Nakoso edwirɛ biemɔ wɔ berɛ a, mahworɔ ye pen-pen mabrɛ ɛmɔ, kyɛbɔ ngosa ngɔkaye ɛmɔ ɔ. Ɔnate adom bɔ Nyameɛ afa alo me 16kyɛ nyɛ Kristo Yesu badwanu somvoɛ mma maen-maen nati, mafa me nwo mawura Nyameɛ nzɛmba nwo adwuma krongron nanu, kyɛbɔ ɔkɔyɛ a maen hemɔ kɔyɛ afɔleɛ bɔ ɔsɔ anyeɛ, bɔ bafa honhom krongron bate ye nwo. 17Yeti adwuma bɔ meyɛ mema Nyameɛ ne, nne bɔ ngɔhora ngogyina so ngoli ahurusi wɔ Kristo Yesu nu. 18Bɔ Kristo nate me so ayɛ ne, ɛhene ngome yeɛ ngosi me hue ngɔha ye nwo dwirɛ ɔ. Kristo nate me dwirɛ ne m'adwuma so amaa maen-maen ne ayɛ sotie. 19Ɔfale nzɛngyerɛneɛ ne anwanwadeɛ tumi, ɔne honhom krongron né tumi so yeɛ ɔyɛle sɔ ɔ. Yeti maha Kristo nwo nzɛmba ne fekɔ-fekɔ mafi Yerusalem tonn maadwu Ilirikum. 20Yeti, mva nziele me nye so kyɛ, mengɔha nzɛmba ne wɔ nekaa bɔ bate Kristo dumaa ne nwo dwirɛ dada ne, na manzi manzie ebie fapem so; 21mmom kyɛbɔ bahworɔ ne:
“Bɛ bɔ bɛhanne ye nwo dwirɛ bɛhyirelle bɛ ne konwu ye,
na bɛ bɔ bɛtelle ne kɔte yebo.”
22Ɛhe ati yeɛ bɛsili me atee mmerɛ pee, kyɛbɔ ɔkɔyɛ a mengɔwa ɛmɔ berɛ ne. 23Nakoso kesaalae de, nekaa biala nne ɛmɔ mandanu berɛ bɔ ngane edwirɛ ne wɔ berɛ ɔ, na afoɛ pee yeɛ me nye agyina kyɛ ngonwu ɛmɔ ɔ. 24Yeti me nye la so kyɛ mekɔ Spain a, ngonwu ɛmɔ. Na sɛ mene ɛmɔ tena berɛ kaa a, né ɛmɔ asoma me atee kaa maa mahɔ. 25Nakoso kesaalae de, me gya gyi atee so bɔ mekɔ Yerusalem mekɔsõ akrongronfoɛ nemɔ. 26Ofikyɛ ɔyɛ Makedonia ne Akaiafoɛ nemɔ fɛ kyɛ baye ndoboa kaa kyɛ bɛfa bɛkɔma akrongronfoɛ bɔ wahia bɛ wɔ Yerusalem ne. 27Nahorɛ nu, anigye yeɛ bɛfa bɛyɛle sɔ ɔ, nakoso né bɛma bɛ kerɛ; ofikyɛ sɛ́ bɛne maen-maen ne ahyɛ bɛ honhom nu nningyein a, ye de bɛ koso, odikyɛ bɛfa bɛ anwoɔnaen nu nningyein bɛsõ bɛ. 28Yeti sɛ meyie ɛhe, na mefa ndoboa ne mewura bɛ sa nu a, ngɔfa ɛmɔ berɛ ngɔhɔ Spain. 29Mese kyɛ meba ɛmɔ berɛ a ngɔfa Kristo nhyira bɔ wabu so ngɔwa.
30Aliemaa mɔ, kesaalae de, nnate y'Awurade Yesu Kristo ne honhom né dɔ so mesrɛ ɛmɔ kyɛ, ɛmɔboka me so, na ɛmɔyere ɛmɔ nwo bɛbɔ Nyameɛ mbaeɛ bɛma me. 31Ɛmɔbɔ mbaeɛ kyɛbɔ ɔkɔyɛ a bɛkole me bɛkofi Yudeafoɛ bɔ bennɛ benni ne sa nu, na ɔsom adwuma bɔ mekwaayɛ ye wɔ Yerusalem ne koso, akrongronfoɛ ne kole kɔto nu, 32na sɛ ɔte Nyameɛ pɛ a, ngɔfa anigye ngɔwa ɛmɔ berɛ, na mene ɛmɔ mukoraati, yɛ nwo atɔ yɛ. 33Asomdwie Nyameɛ ne, ɔboka ɛmɔ mukoraati so. Amen.
Currently Selected:
Romanfoɛ 15: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
