Ng’olwa 10
10
Petulo na Kolineliyo
1Kwavaga na munu yumwe yo anchemwa litawa lyake Kolineliyo, yo ikalaga ku muji gwa Kayisaliya yo avaga muvina va chikundi cha vimilitsi cho chatselanikaga kota chikundi cha Chiitaliyano. 2Mwene avaga munu muwuya na amufugamilaga Mulungu hamwe na vanu va mu nyumba yake. Avapelaga vanu finu fyolofu na kumusuka Mulungu chila siku. 3Siku yimwe hamunyi yavaga kota sa tisa hino, kuno alimiho akamuwonaje mu nduntsuchilo mutantsi va kilanga va Mulungu akatsaje na kumuchema, “Kolineliyo!” 4Kolineliyo kwa muhwehwe akamukangatsilaje miho yula mutantsi va kilanga va Mulungu na kumuputsa, “Kuna chinu chachi, Muvina?” Mutantsi yula va kilanga va Mulungu akamulonjelaje, Suko tsako na sadaka tsako tso uvatantsile vanu tsifisile kilanga na tsiveye wiwuso halutalo ha Mulungu. 5Ino lelo uvatume vanu vatunga vabite ku muji gwa Yafwa, vakamucheme munu yumwe litawa lyake Simoni yo anchemwa litawa linji Petulo. 6Mwene yo mujentsi va munu yo anchemwa Simoni muwuyapi va finu fya nyingo, nyumba yake yili mulubali lwa bahali. 7Yula mutantsi va kilanga va Mulungu yo alongaga nayo hoavaga kuwuka, Kolineliyo akavachemaje vatantsi vake vavili, hamwe na mwimilitsi vake yumwe yo amufugamilaga Mulungu hagati ha vala wo vamutangaga katsi. 8Kolineliyo akavalonjelaje ndongwa tseka tso tsihumye, na kuvatuma vabite ku muji gwa Yafwa.
9Siku ya kavili hovavaga kufika habehi na muji gwa Yafwa yavaga kota sasita ya hamunyi, Petulo akakwinaje mukano ya nyumba ili amusuche Mulungu. 10Hoavaga ansuka akawonaje tsala yintama na akaganaje kulya, lechelelo hovavaga van'teleka chilyo, akawonaje nduntsuchilo. 11Petulo akawonaje kilanga kwa Mulungu kudinduche na chinu chinakota mugolole mukomi gunkwiswa mu inyi kwa mbali tsake tsitayi. 12Mugati mwa mugolole ugo mwavaga na chila ayina tsa minyama, kwavaga na minyama jinya magulu gatayi, na minyama jo jinkwava mu inyi na ayina tseka tsa fideje. 13Akahulikaje litsi, “Petulo, winuche usintse ulye!”
14Petulo akajibulaje, “Ndaya Mutwa, heni ntsing'ali kulya chinu cho chalemitswe mu malajitso ga Musa awu cho chingumudita munu aleche kudichilwa na Mulungu.” 15Akahulikaje kanji litsi lila, “Uleche kufichema finu fyo afidiche Mulungu kuta filemitswe mu malajitso ga Musa!” 16Lulongwa ulo lukakolekaje mala kadatu, na luvala lulo mugolole gula gukapilulwaje Kilanga kwa Mulungu.
17Petulo hoavaga ang'acha angiputsa kwa chila cho achiwene mu nduntsuchilo, vanu vala wo vavaga vatumilwe na Kolineliyo vakayiwonaje nyumba ya Simoni muwuyapi va finu fya nyingo na kwima halutalo ha lwitsi. 18Vakahodetsaje na kuwutsa, “Mbe, hano hana mujentsi yoyuve yoanchemwa Simoni litawa linji Petulo?” 19Petulo hoavavga ang'acha anhotsa mana ya nduntsuchilo tsila, Muhe va Mulungu akamulonjelaje, “Simoni! Kuna vanu vadatu vangukusaka. 20Wiche mubitase na uleche kogopa kwasawuli heni yo ntsivatumile.” 21Ihyo Petulo akikaje hasi na kuvalonjela vanu vala, “Heni yo yula yo munsaka. Mutsitse mun'gana chichi?” 22Vene vakamujibulaje, “Kolineliyo muvina va vimilitsi na munu muwuya, na yo angumufugamila Mulungu na munu mutambulwa kwa Vayawudi veka alajitswe na mutantsi va kilanga va Mulungu kuta ubite mu nyumba yake, ili ahulikitse chila cho ukumulonjela.” 23Petulo akavalibulitsaje mu nyumba.
Hamilawu iyage, Petulo akantsaje lujendo hamwe nawo na vayage vamwe wo vamutumbye Chilisito va kuko ku muji gwa Yafwa. 24Siku ya kavili vakafikaje ku Kayisaliya, uyo Kolineliyo avaga anguvatsinda hamwe na vanu vake va habehi na vang'olotse wo avaga avalibulitse. 25Petulo hoavaga ankwinjila hono hala, Kolineliyo akahumaje kivala ili amulibulitse, akamufugamilaje na kumuhonamila ha magulu gake kwa kumuhesimila. 26Lechelelo Petulo akamwinulaje na kumulonjela kuta, “Wime, kwasawuli na heni ntsili munu hela kota heve.” 27Petulo hoavaga ankwendelela kulongana na Kolineliyo kuno vankwinjila mu nyumba yila, akavafikaje vanu wolofu vakong'ine. 28Petulo akavalonjelaje vanu vala, “Henye veka mun'tsela kuta malajitso ga Musa gangumulemetsa Muyawudi yoyuve kihantsa awu kijendela na munu yoyuve yosi Muyawudi. Lechelelo Mulungu andemitse ndekaje kuhotsa kuta munu yoyuve yosi Muyawudi sinambe aganiche halutalo ha Mulungu. 29Ihyo homuvije munyema sindemile kutsa. Lelo mundonjele, munyemile kwasawuli yachi?” 30Kolineliyo akamulonjelaje, siku tsidatu tso tsilutye luvala kota lulunago, sa tisa ya hamunyi ntsavaga ntsinsuka mu nyumba. Luvala lulo akahumilaje munu yo afwite myenda myelu tswee! Akimaje halutalo hangu, 31akalongaje, “Kolineliyo! Mulungu ahuliche suko yako na sadaka tsako atsidichye. 32Ino lelo uvatume vanu vabite ku muji gwa Yafwa, vakamucheme Simoni yo anchemwa Petulo, mujentsi yo angikala mu nyumba ya Simoni muwuyapi va finu fya nyingo, nyumba yake yili habehi na bahali. 33Ihyo ngasupanitsaje kuvatuma vanu, na heve udisile finofu kutsa. Lelo hetwe tweka tulihano halutalo ha Mulungu kuhulikitsa fila fyeka fyo akulajitse Mutwa utulonjele.”
Petulo anguvavikulila vanu
34Iho Petulo akantsaje kulonga, “Lelo ntseliwe wukweli kuta Mulungu alihela wubagulo, 35lechelelo mu chila inyi, na kwa chila munu yo angumufugamila na kudita kota fyo an'gana Mulungu idichilwaga na mwene. 36Luno lo lulongwa lula Mulungu lo alusindiche kwa vanu va Isilaheli na kuvavikulila Ndongwa Nofu tso tsinleta wusichimafu wa Mulungu kukolela kwa Yesu Chilisito kuta mwene yo Mutwa va veka. 37Henye mun'tsela chila cho chihumye ku Wuyawudi weka kwantsila ku Galilaya, hala Yohana mubatitsi hoavaga kusinda kuvikula lulongwa lwake lwa wubatitso. 38Kaha mun'tsela hila Mulungu fyo amuhagwe Yesu va ku Natsaleti na fyo amupelye Muhe vake na wuvetso. Mulungu avaga hamwe nayo ho abitaga chila hono na kudita ndongwa nofu na kuvaponetsa vanu veka wo vavaga van'wonelwa na lilungu. 39Hetwe yo twawene na kuhulika chila chinu cho adisile Yesu ku inyi ya Yudeya na Yelusalemu. Vamukopwe kwa kumuvamba mu musalaba. 40Lechelelo Mulungu akamutsilipulaje siku ya kadatu na kumudita awoneche na vanu, 41siyo kwa vanu veka ila kwa vanu vala ng'ani wo avahagwe Mulungu ili valonje chila cho vatsiwene na kuchihulika, na vanu iwo yo hetwe yo twalyeye na kung'wa hamwe nayo Yesu hala hoavaga kutsilipuka. 42Uyo Yesu akatulajitsaje tuvavikulile vanu Ndongwa Nofu na kuvalonjela ndongwa tso twatsiwene kuta mwene yo ahagulwe na Mulungu ili atse avahije vanu wumi na wo vafweye. 43Valoli veka va Mulungu valongwe kulonga ndongwa tsake kuta, chila munu yo akumutumba uyo Yesu akuhulumilwa ndongwa ntsibi kukolela kwa litawa lyake.”
Vanu wosi Vayawudi vangumwanuchila Muhe va Mulungu.
44Petulo hoavaga ang'acha anlonga ndongwa itso, vanu vala veka wovavaga vanhulikitsa ndongwa tso alongaga vakanuchilaje wuvetso wa Muhe va Mulungu. 45Vala Vayawudi wo vamutumbye Chilisito wo vavaga vatsitse hamwe na Petulo kuhuma ku muji gwa Yafwa vakapomokaje kwa kuvawona vanu wosi Vayawudi nawo vanuche Muhe va Mulungu. 46Vakalutselaje lulongwa ulo kwasawuli vavahulikaga vanlongaga kwa kabila ntsinji na kumutsumitsa Mulungu. Ihyo Petulo akalongaje, 47“Manyi vanu vano vanuche Muhe va Mulungu kota hetwe fyo tukanuche! Mbe, kuna munu yoyuve yo afuluche avalemetse vanu vano valeche kubatitswa kwa malenga?” 48Akalajitsaje vanu vala vabatitswe mu malenga kwa litawa lya Yesu Chilisito. Nawo vakamusukaje Petulo ikale nawo kwa siku nunga.
Currently Selected:
Ng’olwa 10: SBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Sagala Language @The Word for The World International and Sagala Language translation. All rights reserved.
