Ng’olwa 21
21
Pawulo am'bita ku Yelusalemu
1Twavaga kilagana nawo kwa wususutafu tukawukaje. Tukantsaje lujendo kwa kukwina meli mbaka tukafikaje hono hanchemwa Kosi. Siku ya kavili tukafikaje ha chijiji cha Lode, na kuhuma uko tukabitaje ku muji gwa Patala. 2Iho tukayifikaje meli yo yavaga yim'bita ku Foyiniche, ihyo tukakwinaje na kuwuka. 3Hotwavaga kuhawona hono hakafu ho hapilimwe na malenga ho hachemwaga Chipulo, tukakolaje lubali lwa kusika lwa ugo muji na kubita ku Siliya. Tukawukaje iho na kubita muji gwa Tilo go gwavaga mulubali lwa bahali, iho ho meli yetu yaganikaga yikise mitsigo. 4Kuko tukavafikaje vafwasi va Yesu na tukikalaje hamwe nawo kwa wichi yimwe. Vafwasi vala kwa kulongotswa na Muhe va Mulungu vakamulonjelaje Pawulo kuta aleche kubita ku Yelusalemu. 5Lechelelo ho lwavaga kusila luvala lwa kikalasa nawo, tukawukaje tukendelelaje na lujendo lwetu. Vala vafwasi veka hamwe na vadala vawo na vana vawo vakatusindikitsaje mbaka mulubali lwa bahali, tweka tukafugamaje na kumusuka Mulungu. 6Hotwavaga kilagana nawo tukakwinaje mu meli, nawo vakawuyaje ku nyumba tsawo. 7Hetwe tukantsaje lujendo lwetu mu meli kuhuma ku Tilo tukafikaje ku Tolemayi, tukavasamusaje vanyalukolo vayetu wo vamutumbye Chilisito wovavaga kuko, uko tukikalaje nawo kwa siku yimwe. 8Hamilawu iyage tukawukaje tukabitaje ku muji gwa Kayisaliya. Uko tukabitaje kikala mu nyumba ya Fwilipo yo avaga muvikutsi va Ndongwa Nofu tsa Mulungu, yo avaga muyawo va vala vanu saba wo vavaga vahagulwe. 9Munu uyo avaga na vahintsa vatayi wosi vavatsele valume wovavaga vanlonga wuloli wa Mulungu. 10Duve, hotwavaga kikala kuko kwa siku nunga, muloli yumwe litawa lyake Hagabo akafikaje kuhuma ku Yudeya. 11Munu uyo akatsaje kotuli akategulaje musipi gwa Pawulo, akiwopaje mu mawoko na mu magulu gake na kulonga, “Muhe va Mulungu anlonga kuta, Vayawudi va ku Yelusalemu ihi fyo vakumuwopa munu munya musipi guno na vakumusindika kwa vanu wosi Vayawudi.” 12Hala hotwavaga kuhulika ndongwa tsino, hetwe na vayetu vanji va hono hala, tukamugongolaje Pawulo aleche kubita ku Yelusalemu. 13Lechelelo mwene Pawulo akapitulaje, Kwasawuli yachi munvemba na kumbenanga numbula ntsi muyenyu? Heni tsili chang'ani kusindikwa mu kaye ya vawopwa nambe kufwa uko ku Yelusalemu kwasawuli ya Mutwa Yesu.
14Hotwavaga kulemwa kumudita aleche kubita ku Yelusalemu tukamulekaje na kulonga, “Mutwa aditaje cho an'gana mwene!”
15Tukikalaje hono iho kwa siku nunga, hambele tukivikaje chang'ani na tukawopa mitsigo jetu kwendelela na lujendo lwetu lwa kubita ku Yelusalemu. 16Vafwasi vatunga va Yesu va kuhuma Kayisaliya vakatusindikaje kukaye kwa munu va kuhuma ku Chipulo yo achemwaga Munasoni, munu uyo avaga mufwasi va kuhuma katali tukikalaje kwake.
Pawulo am'bita kumujendela Yakobo
17Hotwavaga kufika ku Yelusalemu, vanyalukolo wo vavaga vamutumbye Chilisito vakatwanuchilaje finofu ndalahela. 18Hamilawu iyage Pawulo akabitaje na hetwe tukamujendele na kulongana na Yakobo, nawo vavina veka va chikundi cha Chilisito vavaga baho. 19Hotwavaga kuvasamusa, Pawulo akantsaje kuvalonjela lulongwa lumwelumwe lo adisile Mulungu kwa vanu wosi Vayawudi mu katsi yake ya wuvikusti. 20Vavina vala hovavaga kuhulika ihyo, vakamutsumitsaje Mulungu. Ihyo vakamulonjelaje Pawulo, Munyalukolo ulave malugu ga Vayawudi fyo vamutumbye Chilisito, iwo veka vangugadita malajitso ga Musa. 21Nawo vahuliche kuta heve unguvadahitsa Vayawudi veka wo vangikala hagati ha vanu wosi Vayawudi kuta, vagaleche malajitso ga Musa na kuvalonjela valeche kuvingitsa likumbi vana vawo na kaha valeche kufwata ntsovelo tsa Vayawudi. 22Lelo tun'tsela kuta vanu iwo vakuhulika kuta heve mwanga ufisile hano Yelusalemu. Ino lelo tukudita ndawuli? 23Ihyo lelo udite kota fyo tungukulonjela. Ihano tuna vanu vatayi wo vilahye kumutawulila Mulungu. 24Wihantse nawo ho vakuva vangivika chang'ani kwa Mulungu na uhombe galama tseka ili vamogwe fwili tsawo. Manyi udite ihyo chila munu akutsela kuta ndongwa tso vatsihuliche tsavaga tsa wudesi na vakutijila kuta na heve ung'acha ungibata malajitso ga Musa. 25Lechelelo vala vanu wosi Vayawudi wo vamutumbye Chilisito vene mwanga tuvasindichilye baluva na kuvalonjela kuta tulamwe kuta, “Viyangalile na kulya nyama tsa nambiko kwa sanamu na valeche kulya danda yoyive awu kulya nyama tso sitsilasintswa na kaha viviche kutali na mbwiniwo tsa waafu.”
26Ihyo hamilawu iyage Pawulo akavatolaje vala vanu na kwantsa kivika chang'ani kwasawuli ya ntsovelo tsa kumufugamila Mulungu hamwe nawo. Hambele akinjilaje mu Nyumba ya Mulungu ili avalonjele kuta talehe yachi yo yikuva ya wudugo wa siku tsawo kivika chang'ani kwasawuli ya ntsovelo tsa kumufugamila Mulungu na galama yo yikutawulwa kwasawuli ya chila yumwe.
Pawulo angibatika
27Tsila siku saba hotsavaga kuva habehi na kufika wudugo, Vayawudi vatunga wo vavaga vahumye ku Asiya vamuwene Pawulo mugati mwa Nyumba ya Mulungu. Vakalikokaje lilugu lyeka lya vanu ili vamubate. 28Vakayovaje fikami na kutya, “Henye vanu va Isilaheli mututanje tuvayenu! Uyuno yo yula munu yo an'dahitsa vanu chila hono vave tebe na vanu va Isilaheli na gala malajitso ga Musa na ali tebe na Nyumba ya Mulungu. Kulutila ndongwa itso tseka avaletite vanu vatunga wosi Vayawudi na kutsidita ndongwa tsila tso tsalemitswe hono hano hahagulwa.” 29Valontsile ihyo kwasawuli vavaga vamuwene Tulofwimo yoavaga munyakaye va ku Efweso avaga hamwe na Pawulo ku mujini, nawo vatijilaga kuta Pawulo akuva amwingitse mu Nyumba ya Mulungu. 30Muji gweka gukatagalilaje chitika, vanu vakatsaje kuhuma mbali tseka na vakamubataje Pawulo, vakamubulunaje na kumuhumya mu Nyumba ya Mulungu. Luvala lulo ntsitsi tsa Nyumba ya Mulungu tsikadindwaje. 31Vanu vala ho vaganaga kumukopola Pawulo, lulongwa ulo lukamufichilaje muvina va vimilitsi va Chilumi kuta Yelusalemu yeka yitagalye chitika. 32Luvala lulo yula muvina va vimilitsi akavategulaje vavina va vimilitsi mya mya na vimilitsi vawo, nawo vakabilimilaje hagati ha chitika chila. Vala vanu wo vaditaga chitika vavaga kumuwona muvina yula na vimilitsi vake, vakalekaje kumutova Pawulo. 33Yula muvina va vimilitsi akabitaje hoali Pawulo, akamubataje na akalajitsaje vamuwope kwa nyololo tsivili. Kahi akamuputsaje kuta, “Uyu nani na adisile lulongwa lwachi?” 34Vanu vamwe ha lilugu lila wo vavaga vanhabuka hela ndonga, chila munu alongaga lulongwa lwake. Yula muvina va vimilitsi hoavaga kuwona hila kuta siafuluche apate wukweli wa ndongwa tsila kwasawuli ya chiyove chila, akalajitsaje kuta vamusindiche Pawulo mugati mwa kambi ya vimilitsi. 35Pawulo hoavaga kufika ha ngatsi tsa kwinjilila ha lwitsi lukomi lwa kwinjilila mu kambi ya vimilitsi, vimilitsi vakamutegulaje mwilanga mwilanga kwasawuli ya chitika chikomi cha lilugu lila lya vanu. 36Kwasawuli lilugu lya vanu lya mufwataga kwa chiyove kuta, “Mumukopole munu uyo! Mumukopole munu uyo!”
Pawulo angipamana ha lilugu lya vanu
37Hovavaga vangumwingitsa mugati mwa kambi ya vimilitsi, Pawulo akamusukaje muvina va vimilitsi kuta, “Mbe, fuluche ngulonjele lulongwa lumwe?” Yula muvina va vimilitsi akamuputsaje, “Mbe, ufitsele kulonga Chijilichi?” 38Mbe, heve siyo yula munu muwumiyani va ku Misili yo wavalongotsaga vanu elufu tsitayi vawumiyani siku tso tsilutye kula ku balali?
39Pawulo akamupitulaje kuta, “Heni tsili munu va ku Wuyawudi, yo ntsaleliche ku muji gwa Taliso gwa ku Chilichiya, heni ntsili munu va muji mutambulwa. Ntsinsuka undichile ndonje na vanu vano.” 40Yula muvina va vimilitsi akamudichilaje alonje. Ihyo Pawulo akimaje hilanga ha ngatsi, akavagololelaje vanu liwoko chinya kutijila vakatuche. Hovavaga kukatuka, Pawulo akalonganaje nawo kwa Chiebulaniya.
Currently Selected:
Ng’olwa 21: SBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Sagala Language @The Word for The World International and Sagala Language translation. All rights reserved.
