Yohana 3

Yesu na Nikodemu

1Kwavaga na munu yumwe Mufwalisayo litawa lyake Nikodemu yoavaga yumwe va chilongotsi va Libalatsa lya Vayawudi. 2Siku yimwe Nikodemu ahele kwa Yesu hachilo na kumulonjela “Labi, tuntsela kuta heve uli mudahitsi yo utumilwe na Mulungu, kwa kwasawuli kuduhu munu yo afuluche adite ndajilo kota tsino tso un'dita heve manyi Mulungu si alihamwe nayo.” 3Yesu akamulonjelaje, “Ntsingukulonjela wukweli kuta, manyi munu ave sialeliche lwa kavili si akuvetsa kuwuwona Wuntsajila wa Mulungu.” 4Nikodemu akaputsaje, “Mbe, munu mugogolo akuvetsa chinya ndawuli kuleleka lwa kavili? Mbe, afuluche injile mulileme lya yuve na kuleleka kaha?” 5Yesu akamupitulaje, “Ntsingukulonjela wukweli kuta, kuduhu munu yoyuve yo afuluche injile mu Wuntsajila wa Mulungu, mbaka ave aleliche kwa lulenga na kwa Muhe va Mulungu. 6Munu alelekaga chimuvili kwa yuve na dade, lechelelo alelekaga chimuhe kwa Muhe va Mulungu. 7Ulekaje kupomoka kwasawuli ngulonje kuta un'ganika kuleleka lwa kavili. 8Ng'ala yiwugaga na kubita kokuve ko yin'gana na chibumo chake unguchihulika, lechelelo siufuluche utsele kochinhuma wala kochim'bita. Hohihyo fyo yili kwa chila munu yo aleliche kwa Muhe va Mulungu.” 9Nikodemu akamuputsaje Yesu, “Ndogwa tsino tsifuluche tsive chinya ndawuli?” 10Yesu akamulonjelaje, “Heve uli mudahitsi mutambulwa va Isilaheli. Mbe, na heve sinambe utsitsele ndogwa tsino?” 11Ntsingukulonjela wukweli kuta, hetwe tunlonga ndongwa tsila tso tunguntsitsela na kulonga tsila tso tutsiwene, lechelelo henye vanu sinambe mutsidichile ndongwa tsila tso tunlonga. 12Manyi tsinguvalonjela ndogwa tsa muinyi na henye sinambe munumbile. Mbe, mukuvetsa ndawuli kunumba manyi ntsivalonjele ndogwa tsa Kilanga kwa Mulungu? 13Kuduhu munu yoahele Kilanga kwa Mulungu, ila Mwana va Munu ng'ani yo isile kuhuma Kilanga. 14Kota hila Musa fyo atumbiche kuchanya ntsoka mu mubichi kula kumbuga, hohihyo nayo Mwana va Munu fyo an'ganika kutumbikwa kilanga mu mubichi. 15Ili chila munu yo angumutumbila ave na wumi wowugaya wudugo. 16Kwasawuli iyi Mulungu avaganite vanu va inyi tseka, mbaka akamutawulaje Mwanage va wiyeka, ili chila munu yo angumutumba aleche kuyaga, ila ave na wumi wowugaya wudugo. 17Kwasawuli Mulungu si amutumile Mwanage mu inyi ili avahije vanu va inyi tseka, ila kukolela kwa mwanage vanu va inyi tseka vakuluswe. 18Munu yoyuve yo angumutumbila Mwana siakuhigwa, lechelelo yo sinambe amutumbile Mwana mwanga ahijitwe, kwa kuva siamutumbye Mwana va wiyeka va Mulungu. 19Wuno wo wuhigo kuta Mwangatsa mwanga atsitse kwa vanu va inyi tseka, lechelelo vanu vaganite jitsa kulutila Mwangatsa, kwasawuli ya ng'olwa tsawo ntsibi. 20Kwasawuli chila munu yo an'dita ndongwa ntsibi aguvipilaga mwangatsa, kaha sinambe atse ku mwangatsa, ili ndongwa tsake ntsibi tsileche kutselanika. 21Lechelelo vala wovaditaga kota fyo an'gana Mulungu vatsaga ku mwangatsa, ili ndongwa tsawo tsitselaniche finofu kuta tsikoliche kota fyoan'gana Mulungu.

Yohana Mubatitsi anlonga ndongwa tsa Yesu

22Hotsavaga kulutila ndongwa itso, Yesu na vadahitswa vake vakabitaje ku inyi ya Yudeya, nayo akikalaje kuko na vadahitswa vake kwa luvala lutunga na kubatitsa vanu. 23Yohana nayo avaga kuko ku Ayinoni habehi na Salimu ambatitsa vanu, kwasawuli kono uko kwavaga na malenga molofu. Vanu volofu vavaga vam'bita kuko na kubatitswa. 24Luvala ulo Yohana avaga ang'ali kuwopwa mu nyumba ya vawopwa. 25Ihyo kukahumilaje sumwano hagati ha vadahitswa va Yohana na Muyawudi yumwe kwajili ya kihofuga kwa ntsovelo tsa kumufugamila Mulungu. 26Vadahitswa vala vakabitaje kwa Yohana na kumulonjela, “Mudahitsi, yula munu yo akalihamwe na heve kumwambu gula gwa lulenga lwa Yolidani, yula yo watulonje ndongwa tsake, sambi am'batitsa vanu, na veka vam'bita kwa mwene!” 27Yohana akavapitulaje, “Kuduhu munu yoyuve yoafuluche anuchile chochive, mbaka ave apasile kuhuma Kilanga kwa Mulungu. 28Henye vene mun'tsela nachene kuta ntsalontsile, heni sintsili Chilisito muhagulwa na Mulungu, ila numilwe ili tsimulongole. 29Munya kukwela yo amutolaga mwenga. Lechelelo muyage va munya kukwela imaga habehi nayo na kumuhulikitsa, asangalalaga ndalahela hala hoangulihulika litsi lyake. Kwasawuli ya lulongwa ulu wusangalo wangu wukwilye. 30Chilitso Muhagulwa na Mulungu an'ganika kuva muvina ndalahela, na heni ndutilaje kuva ntsi mudodo ndalahela.”

Ndongwa tsa yo ankutsa kuhuma Kilanga kwa Mulungu.

31Mwene yo ahagulwe na Mulungu kuhuma Kilanga uyo yo muvina va finu fyeka, na mwene yo ali muinyi yo va mu inyi, nayo alongaga ndongwa tsa muinyi. Lechelelo yo ahagulwe na Mulungu kuhuma Kilanga uyo yo muvina va finu fyeka. 32Mwene yo alongaga fila fyo afiwene na kufihulika, lechelelo kuduhu munu yo angutsitumba ndongwa tsake. 33Munu yoyuve yo angutsidichila ndongwa tsake, alajilaga kuta Mulungu yo va wukweli. 34Munu yula yo atumilwe na Mulungu alongaga ndongwa tsa Mulungu, kwakuva Mulungu amutawulaga Muhe vake kwa wukwilo weka. 35Dada angumugana Mwanage, nayo amupelye wuvetso wa kudita chila chinu. 36Munu yoyuve yo angumutumba Mwana uyo ana wumi wowugaya wudugo, lechelelo munu yula yo sinambe amuhulikitse Mwana si akuva na wumi wo wugaya wudugo, ila Mulungu akumuvipila.

Currently Selected:

Yohana 3: SBV

Highlight

Compare

Copy