Lukasi 22
22
Mupanjo gwa kukopolwa kwa Yesu
Matayo 26:1-5; Maliko 14:1-2; Yohana 11:45-53
1Siku ya liwungo lya mibumunda jojilihela hamila yoyachemwaga Pasaka, ho yavaga yilihabehi. 2Vavina va vatawula nambiko hamwe na vadahitsi va malajitso ga Musa vakavaje vansaka hila fyo vakumukopola Yesu, nawo vaditaga ihyo kwa fiho kwasawuli vawogopaga vanu.
Yuda angidichila kumupituka Yesu
Matayo 26:14-16; Maliko 14:10-11
3Duve lisoka likamwinjilaje Yuda yo achemwaga Isikaliyoti, yumwe va vala vatumi kumi na vavili. 4Ihyo Yuda akabitaje kwa vavina va vatawula nambiko na vavina va vimilitsi va Nyumba ya Mulungu, akalonganaje nawo hila fyo akumupituka Yesu. 5Nawo vatawula nambiko vakahechelelaje ndala hela vakalaganaje kumuhomba magobole. 6Yuda akidichilaje, na akantsaje kusaka muda gula go akumupituka Yesu, chipindi ho kukuva kuduhu vanu.
Pasaka ya wudugo ya Yesu
Matayo 26:17-25; Maliko 14:12-21; Yohana 13:21-30
7Ho yavaga kufika siku ya Liwungo lya Mabumunda go galihela hamila, iyo yo yavaga siku ya kusintswa kwa ntsanang'olo ya Pasaka. 8Ihyo Yesu akavatumaje Petulo na Yohana, “Mubite mukatuditile chilyo cha Pasaka ili tulye.” 9Nawo vakamuputsaje, “Un'gana tukayidite kwiya?” 10Yesu akavalonjelaje, “Muhulikitse! Ho mukuva mum'bita mujini, mukitang'ana na munu mulume yo itwisile chiya cha malenga. Mubitase mbaka mu nyumba yo akwinjila. 11Nanye mumulonjele munya nyumba kuta, ‘Mudahitsi amputsa, chilikwiya chumba cha vajentsi cho akulila chilyo cha Pasaka hamwe na vadahitswa vangu?’ 12Nayo akuvalajila chumba chikomi chili kugolofwa mwanga chivisilwe chang'ani, na henye mudite chilyo cha pasaka mumo.”
13Ihyo vakabitaje, vakafikaje chila chinu chavaga hihilaga kota Yesu fyo avaga avalonje, vakaditaje chilyo cha Pasaka.
Chilyo cha Mutwa
Matayo 26:26-30; Maliko 14:22-26
14Ho chavaga kufika chipindi, Yesu akikalisaje kulya hamwe na vatumi vake. 15Yesu akavalonjelaje, “Ntsiviniwe ndalahela kulya chilyo cha Pasaka hamwe na henye ho ntsing'acha kwinjila mu ng'odeko tsangu. 16Ntsinguvalonjela kuta singulya kaha pasaka mbaka hala Mulungu ho akuva avagombwe vanu vake veka na kutavala.”
17Ihyo Yesu akategulaje chikombe cho chavaga na difwayi, akamulumbaje Mulungu na kulonga, “Mwanuchile chikombe chino na mung'we nyeka. 18Kwasawuli ntsinguvalonjela, kuhuma sambi singung'wa kaha difwayi ya libawo lya mutsabibu, mbaka ho wukutsa Wuntsajila wa Mulungu.” 19Kaha akatolaje libumunda, akalumbaje na kulonga, “Guno go muvili gwangu go guntawulwa kwasawuli yenyu. Muditaje hino kwa kuntsiwuka heni.” 20Ho avaga kulya akaditaje hihilaga, akategulaje chikombe, akalongaje, “Difwayi yino mu chikombe yo lilagano lipya lyo lin'ditwa kwa danda yangu yo yim'bohoka kwasawuli yenyu.
21“Lechelelo mulave! Yula munu yo akumituka alihamwe na hetwe bahanago ankulya hamwe na heni. 22Heni Mwana va Munu ntsim'bita kukopolwa kota fyo aganile Mulungu, lechelelo akudutsa munu yula yo akungaluka.” 23Iho vatumi vakantsaje kwiputsa vene kwa vene kuta, nani yoali hagati hetu yo akudita lulongwa ulo.
Kusumwanila wuvina
24Kukahumilaje wusumwano hagati ha vatumi viwutsaga kuta nani yo akuva muvina vawo. 25Yesu akavalonjelaje, “Vantsajila na vanu va muinyi vavatavalaga vanu kwa ludali, nawo vaganaga vachemwe kuta vanguvatanga vanu. 26Lechelelo kwa henye yivaje finji, yula yoan'gana ave muvina kwa henye, an'ganika ave mutantsi venyu. 27Ihyo nani yo muvina? Mbe, yula yo ichite mumetsa kulya, awu yula yo ankola katsi ya wutantsi? Akuva yula yo angikala mumetsa kulya chilyo! Nambe ihyo, lechelelo heni ntsili hano hagati henyu ntsinakota mutantsi.”
28Kaha Yesu akalongaje, “Henye yomuli hamwe na heni chipindi cheka cha njelo tsangu. 29Ihyo kota hila Dada vangu fyo amelye Wuntsajila, na heni ntsinguvapela mamulaka ga kutavala, 30ili muvetse kulya na kung'wa mu metsa ya Wuntsajila wa heni na kikala mu figoda fya wuvina kutsitavala tsila kabila kumi na tsivili tsa Vaisilaheli.”
Yesu anlonga hila Petulo fyo akumukana
Matayo 26:31-35; Maliko 14:27-31; Yohana 13:36-38
31“Yesu akamulonjelaje, Simoni! Simoni! Hulikitse! Lisoka lisusile kwa Mulungu livapete henye kota munu fyo ampeta wuhemba. 32Lechelelo heni ngusuchye heve, ili litumbilo lyako lileche kutindajila. Nave ho ukuva umiluchilye uvakangatse vang'olotso.”
33Petulo akamulonjelaje Yesu, “Mutwa, heni ntsili chang'ani kubitasa hamwe na heve ku nyumba ya vawopwa, nambe kufwa hamwe na heve.”
34Yesu akamulonjelaje, “Ntsingukulonjela heve Petulo kuta, munyiguno hachilo ntsogolo ying'acha kuvika mwanga ukuva ung'anile mala kadatu kuta si untsele.”
Wiviche chang'ani kwa ligalu
35Kahi Yesu akavaputsaje vadahitswa vake, “Hala ho ntsaganile mubite bila mufuko gwa magobole awu libeji, awu filatu, Mbe, mwagatsile chinu chochive?” Nawo vakamulonjelaje, “Ndaya.” 36Yesu akavalonjelaje, “Lechelelo sambi, yula yo anago magobole ategule, awu libeji ategule. Yoyuve yo alihela waladi, agutse likoti lyake abite akagule. 37Kwasawuli yandikwe mu Mandiko ga Mulungu kuta, Avalilwe hamwe na vawumiyani, na heni ntinguvalonjelani chila cho chandikwe kwajili ya heni chin'ganika chihumile.” 38Vadahitswa vake vakamulonjelaje, “Mutwa, hano hana waladi wuvili.” Yesu akavalonjelaje, “Duve tutsileche ndongwa itso!”
Yesu ansuka mu chinyungu cha Jetisemane
Matayo 26:36-46; Maliko 14:32-42
39Ihyo Yesu akawukaje na kubita ku chidunda cha Mitseyituni kota fyo aditaga kuhuma hamutalo, nawo vadahitswa vake vakamufwataje. 40Hovavaga kufika uko, akavalonjelaje, “Musukaje, muleche kwinjila mu majetso.” 41Mwene akibagulaje nawo kota wutali wa munu kutotsa liganga, akafugamaje na kwantsa kusuka. 42Akalongaje, “Dada manyi ugane nyetsele chikombe chino cha ng'odeko. Sikota fyontsin'gana heni, lechelelo kota hila fyo un'gana heve.” 43Mutantsi va kilanga va Mulungu akahumilaje na kumukangatsa. 44Yesu hoavaga mu wusungu wukomi, akasukaje ndalahela na lifuche lyake lyo lyagwaga hanyi lyahumyaga na danda.
45Hoavaga kusinda kusuka, akavapiluchilaje vadahitswa vake akavafikaje vavasise, kwasawuli vavaga vafuluje kwa wususutalo. 46Yesu akavalonjelaje, “Mbona muvasise? Mulamuche musuche, muleche kwinjila mumajetso.”
Kwibatika kwa Yesu
Matayo 26:47-56; Maliko 14:43-50; Yohana 18:3-11
47Yesu hoavaga ang'acha anlonga ihyo, likatsaje lilugu lya vanu kuno Yuda avalongwe yula yo avaga yumwe va vala vatumi kumi na vavili. Yuda akamuhejelelaje Yesu ili amunonele. 48Lechelelo Yesu akamulonjelaje, “Yuda, Ino ungumupituka Mwana va Munu kwa kumunonela?”
49Vala vafwasi va Yesu vavaga kuwona chila cho chinhumila vakalongaje, “Mutwa, tufuluche tuvatemanje kwa nyaladi tsetu?” 50Yumwe va vala akamutemaje lipulichilo lyake la lubali lwa kwililo mutantsi va muvina va vatawula nambiko.
51Lechelelo Yesu akalongaje, “Muleche!” Kahi akalidometsaje lipulichilo lya munu uyo, akamuponetsaje.
52Kaha Yesu akavalonjelaje vala vavina va vatawula nambiko na vala wo vatsitse kumubata, na vavina va vimilitsi va Nyumba ya Mulungu, “Mutsitse na waladi na ndumbi kota hila heni mitwe silikali? 53Siku tseka ntsavaga hamwe na henye mu lidama lya Nyumba ya Mulungu simwimbite. Lechelelo sambi cho chipindi chenu, chino cho chipindi cha wutavala wa jitsa,”
Petulo angumukana Yesu
Matayo 26:57-58; Maliko 14:53-54,66-72; Yohana 18:12-18,25-27
54Ihyo vakamubataje Yesu, vakabitaje nayo mbaka ku nyumba ya muvina va vatawula nambiko. Lechelelo Petulo akavaga angumufwata kumbele kwa kutali. 55Hovavaga vakotsitse moto hidama, nawo vavaga vichite kota moto, Petulo nayo akikalaje hamwe nawo. 56Mutantsi yumwe muhintsa hoavaga kumuwona Petulo ichite ha moto, akamukangatsilaje miho, na kulonga, “Munu yuno aka hamwe na Yesu.”
57Lechelelo Petulo akalongaje, “Bee mudala, sintsimutsele munu uyo!”
58Hambele munu yunji akamuwonaje Petulo na kulonga, “Heve nave uli yumwe vawo!”
Lechelelo Petulo akamulonjelaje, “Ndaya be munu heve, si heni!”
59Ho yavaga kulutila kota lisala limwe hino, munu yunji akalongaje kwa kuhahanitsa kuta, “Wukweli munu yuno aka hamwe na Yesu, kwasawuli na mwene nayo anhumila ku Galilaya.”
60Lechelelo Petulo akamulonjelaje, “Be munu heve, sintsichitsele ndaya icho chounlonga!”
Luvala lulo lo alongaga Petulo ntsogolo yikavikaje. 61Mutwa akapitukaje na kumulola Petulo, Petulo nayo akiwukaje ndongwa tsila tso alontsile Muntsajila kuta, “Munyi guno ying'acha siyilavikantsogolo, ukung'ana mala kadatu.” 62Iho Petulo akahumaje kwivala na kuvemba kwa wusungu ndalahela.
Vimilitsi vangumubedala Yesu
Matayo 26:67-68; Maliko 14:65
63Vanu vala wovavaga vangumwimilila Yesu, vakantsaje kumubedala na kumutova. 64Vakamuwopaje chitambala kumiho, vakavaje vangumuputsa, “Lagule nani yo akutofile?” 65Vakendelelaje kumulonjela ndongwa tsinji ntsolofu tsinya maligo.
Yesu halutalo ha Libalatsa lya Vayawudi
Matayo 26:59-66; Maliko 14:55-64; Yohana 18:19-24
66Hamilawu ho kwavaga kwela, libalatsa lya vavina va vanu, na vavina va vatawula nambiko, na vadahitsi va malajitso ga Musa, vakakong'anaje, vakamuletaje Yesu halutalo ha hono ha kuhijila. 67Nawo vakamulonjelaje, “Utulonjele! Mbe heve yo Chilisito?” Lechelelo Yesu akavalonjelaje, “Nambe ntsivalonjele, simukunumba. 68Nayivaje ntsivaputse lulongwa, simukumitula. 69Lechelelo kuhuma sambi, heni Mwana va Munu nguva ntsichite lubali lwa hesima lwa Mulungu Munya Wuvetso weka,” 70Iho veka vakalongaje, “Ihyo un'gana ulonje kuta heve uli Mwana va Mulungu?” Yesu akavalonjelaje, “Kota fyo mulontsile henye, hihyo fyo ntsili.” 71Nawo vakalongaje, “Mbe, tukugana vanu vanji vatulonjele chinu chachi? Hetwe vene tuhuliche fyo anlonga.”
Currently Selected:
Lukasi 22: SBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Sagala Language @The Word for The World International and Sagala Language translation. All rights reserved.
