Lukasi 3

Mbikulo tsa Yohana mubatitsaji

Matayo 3:1-12; Maliko 1:1-8; Yohana 1:19-28

1Mwaka gwa kumi na kahanu gwa wutavala wa Kayisali Tibeliyo, Pondiyo Pilato avaga mutavala va ku Yudeya, Helode avaga muntsajila va ku Galilaya, na Filipi mame va Helode avaga muntsajila va mukova gwa Ituleya na inyi ya Tulakoniti. Lisaniya avaga muntsajila va ku Abilene, 2na Hanasi na Kayafwa vavaga vavina va vatawula nambiko. Luvala ulo lulongwa lwa Mulungu lukamutsilaje kwa Yohana mwana va Tsakaliya uko kumbuga. 3Yohana akabitaje chila hono hoha bakanaga na lulenga lwa Yolidani na kulonga, “Mugaluche na kutsileka ndongwa tsenyu ntsibi, mubatitswe, na Mulungu akuvahulumila ndongwa tsenyu ntsibi.” 4Kota fyoyandikwe muchitabu cha Isaya Muloli va Mulungu kuta, “Litsi lya munu yoankola kumbuga, ‘Mumuwuyapile Mutwa ng'asi na mugolose wukolo wake. 5Chila likwava likutilwa, na chila chidunda na fidunda fikubong'olwa, na ng'asi tsotsibibinde tsikugololwa. 6Na vanu veka vakuwuwona wukuluso wa Mulungu.’ ” 7Yohana akavalonjelaje vala vanu wolofu wovatsitse kubatitswa, “Henye chilelo cha ntsoka.” Nani yoavalonje muyibilime ghatsabu ya Mulungu yoyinkutsa? 8Lelo mudite ndongwa nofu tsotsikihwana na kugaluka kwenyu luhuma mu ndongwa tsenyu ntsibi. Mulekaje kilonjela mu numbula tsenyu kuta, “Hetwe tunayo Dada vetu Ibulahimu kwasawuli ntsinguvalonjela, Mulungu afuluche agadite maganga gano gave vana va Ibulahimu. 9Lelo vega mwanga yili mumasina ga mibichi. Ihyo chila mubichi gosinambe gulele mibawo minofu gukudumulwa na kutagwa mumoto.” 10Vala vanu wolofu vakamuputsaje, “ Lelo tun'ganika tudite ndawuli?” 11Yohana akavalonjelaje, “Munu yoana myenda jivili amugavile yula yo alihela mwenda, yoana chilyo amugavile yoalihela chilyo.” 12Nawo vakongotsa kodi vakatsaje vabatitswe, vakamuwutsaje, “Mudahitsi tuditaje ndawuli?” 13Yohana akavalonjelaje, “Mulekaje kukongotsa kodi kulutila yoyin'ganika.” 14Vamilitsi nawo vakamuputsaje, “Na hetwe natwe tuditaje ndawuli?” Yohana akavalonjelaje, “Mulekaje kumusukula chinu munu yoyuve awu kumuhiga munu kwa wudeteletsi, mukwilwaje na mahombo genyu.” 15Vanu vavaga na wihuvilo wukomi munumbula tsawo kuta, Yohana akuva yo Chilisito yo muhagulwa na Muntsajila. 16Yohana akavalonjelaje, “Heni ntsimbatitsa kwa malenga, lechelelo yoankutsa ana wuvetso kundutila heni. Heni sifuluche ndejetse ndejesi tsa katambuga tsake, mwene akuvabatitsa kwa Muhe va Mulungu na kwa moto. 17Mwene analo luhelo lwa kupetela, na hono ha kupetela akuhaselega ndalahela na akutsa akong'ase wuhemba wake mwidoga lyake, lechelelo misuyo jeka akukong'asa na kujinyanya mumoto go sigutsimaga.” 18Ho ihyo kwa ndongwa ntsolofu hamwe na kuvafunda, Yohana akavahimilitsaje vanu na kuvalonjela Ndongwa Nofu. 19Lechelelo Yohana hoakavaga kumung'anulila muntsajila Helode kwasawuli ya kumutola Helodeya yoavaga mudala va mung'olotse, hamwe na ng'ani tsinji ntsibi tso aditaga. 20Helode akalutitsaje wubi wake kwasawuli ya lulongwa ulo, akamuwopaje Yohana mu nyumba ya wuwopwa.

Kubatitswa kwa Yesu

Matayo 3:13-17; Maliko 1:9-11

21Vanu veka hovavaga vam'batitswa, Yesu nayo akabitaje kubatitswa. Hoavaga angumusuka Mulungu, kilanga kukadindukaje, 22na Muhe va Mulungu akikaje mwilanga mwake kwa wuwoneko kota wa ng'unda, na litsi kuhuma kilanga kwa Mulungu likahulikwaje, “Heve yo mwanangu yontsingukugana, yo ntsingukwenda hilo.”

Lukolo lwa Yesu

Matayo 1:1-17

23Yesu hoantsaga katsi yake avaga na myaka machumi gadatu. Vanu vatselaga kuta, avaga mwana va Yusufu, mwana va Heli. 24Heli avaga mwana va Matati, na Matati avaga mwana va Lavi, na Lavi avaga mwana va Melichi, na Melichi avaga mwana va Yanayi, na Yonana avaga mwana va Yusufu, 25Yusufu avaga mwana va Matatiya, na Matatiya avaga mwana va Amosi, na Amosi avaga mwana va Nahumu, na Nahumu avaga mwana va Hesili, na Hesili avaga mwana va Nagayi, 26nayo Nagayi avaga mwana va Maati, na Maati avaga mwana va Matatiya, na Matatiya avaga mwana va Semeyini, na Semeyini avaga mwana va Yosechi, na Yosechi avaga mwana va Yoda, 27Nayo Yoda avaga mwana va Yoanani, na Yoanani avaga mwana va Lesa, na Lesa avaga mwana va Tselubabeli, na Tselubabeli avaga mwana va Selitiyeli, na Selitiyeli avaga mwana va Neli, 28Neli avaga mwana va Melichi, na Melichi avaga mwana va Adi, na Adi avaga mwana va Kosamu, na Kosamu avaga mwana va Helimadamu, na Helinadabu avaga mwana va Heli, 29Heli avaga mwana va Yosuva, na Yosuva avaga mwana va Helietseli, na Helietseli avaga mwana va Yolimu, na Yolimu avaga mwana va Matati, na Matati avaga mwana va Lavi, 30Lavi avaga mwana va Simiyoni, na Simiyoni avaga mwana va Yuda, na Yuda avaga mwana va Yusufu, na Yusufu avaga mwana va Yonamu, na Yonamu avaga mwana va Heliyachimu, na Heliyachimu avaga mwana va Meleya, 31Meleya avaga mwana va Mena, na Mena avaga mwana va Matata, na Matata avaga mwana va Nasani, nayo Nasani avaga mwana va Dawudi, 32Dawudi avaga mwana va Yese, Yese avaga mwana va Ubedi, na Ubedi avaga mwana va Bowatsi, na Bowatsi avaga mwana va Salumoni, na Salumoni avaga mwana va Nasoni, 33Yuyo Nasoni avaga mwana va Aminadabu, na Aminadabu avaga mwana va Adimini, na Adimini avaga mwana va Alamu, nayo Alamu avaga mwana va Hetsiloni, na Hetsiloni avaga mwana va Pelesi, na Pelesi avaga mwana va Yuda, 34Yuda avaga mwana va Yakobo, na Yakobo avaga mwana va Yisaka, na Yisaka avaga mwana va Abulahamu, na Abulahamu avaga mwana va Tela, na Tela avaga mwana va Naholi, 35Yuyo Naholi avaga mwana va Seluji, na Seluji avaga mwana va Lehu, na Lehu avaga mwana va Peleji, nayo Peleji avaga mwana va Hebeli, na Hebeli avaga mwana va Sela, 36Sela avaga mwana va Chenani, na Chenani avaga mwana va Alifakisadi, na Alifakisadi avaga mwana va Semu, nayo Semu avaga mwana va Nuwu yoaleliche na Lamechi, 37Lamechi avaga mwana va Metusela, na Metusela avaga mwana va Henochi, nayo Henochi avaga mwana va Yaledi, na Yaledi avaga mwana va Mahalaleli, na Mahalaleli avaga mwana va Chenani, 38Chenani avaga mwana va Henosi, na Henosi avaga mwana va Seti, nayo Seti avaga mwana va Adamu, na Adamu avaga mwana va Mulungu.

Currently Selected:

Lukasi 3: SBV

Highlight

Compare

Copy