Maliko 6
6
Vanu va ku Natsaleti vangumukana Yesu
Matayo 13:53-58; Lukasi 4:16-30
1Yesu akawukaje kuhuma hono ho avaga ahele, akawuyaje hamwe na vadahitswa vake ku muji gwa Natsaleti go akalagalye. 2Hoyavaga kufika Siku ya Weselo wa Vayawudi, Yesu akantsaje kuvadahitsa vanu hono hala ha nyumba ya kitang'anila Vayawudi. Vanu wolofu yo vahulikaga Yesu cho adahitsaga vakatinukaje na kwiputsa kuta, “Mwene uyu apasile kwiya ndongwa tsino tso an'dahitsa? Mbe, luhala lwachi lwene ulu lo apelitwe munu uyu? Kaha an'dita chinya ndawuli ndongwa tsino tsinya mitinuso? 3Mbe, yuno siyo yula muhongola mbawo, mwana va Maliya, na mung'olotsawo va Yakobo, na Yose, na Yuda, na Simoni? Mbe, vahatsave sivangikala hetu bahanago?” Ihyo vakavipaje ndalahela na vakalemaje kumutumba. 4Yesu akavalonjelaje, “Muloli va Mulungu ahesimilwaga na vanu chila hono, lechelelo abedalwaga ku muji gwawo, na kwa vang'olotse na ku kaye yawo.” 5Yesu siavaditye ndongwa tsotsive tsinya mitinuso kwasawuli ya mbedatsi tsawo, lechelelo avasuchye kwa kuvavichila mawoko vanu vatunga hela na kuvaponetsa. 6Yesu akabubuluvaje kwasawuli ya vanu vala kulema kumutumba.
Yesu anguvatuma vadahitswa kumi na vavili
Matayo 10:5-15; Lukasi 9:1-6
Yesu afijendelaga fijiji fya habehi na kuvadahitsa vanu. 7Akavachemaje vadahitswa vake kumi na vavili, akavapelaje wuvetso wa kuvinga misoka na kuvatuma vavilivavili. 8Akavalajitsaje kuta, “Muleche kutolanitsa chinu chochive uko komum'bita, muleche kutegulitsa chilyo, awu libeji lya mwenda, awu magobole mu musipi gwenyu. Mutolaje ng'weku ng'ani. 9Mufwalaje filatu, lechelelo mulekaje kutegula mugolole gunji gwa kubadila.” 10Akavalonjelaje kaha, “Kaye yoyive yo mukulibulitswa, mwikalaje baho mbaka ho mukuwuka ku muji ugo. 11Lechelelo hono hohave manyi vanu valeme kuvalibulitsa, awu valeche kuvahulikitsa cho munguvalonjela muhume mu muji ugo, ho mukuva munhuma mukung'unaje lingundi lya mu magulu genyu, kuvalajila kuta Mulungu avalemile.” 12Ihyo vala vadahitswa kumi na vavili vakawukaje, vakavavikulilaje vanu kuta valeche ndongwa tsawo ntsibi. 13Vavingaga misoka myolofu na kuvabaka mafuta vatamwa wolofu na kuvaponetsa.
Kufwa kwa Yohana Mubatitsi
Matayo 14:1-12; Lukasi 9:7-9
14Muntsajila Helodi hoavaga kuhulika ndongwa tseka tsoaditaga Yesu, kwasawuli Yesu avaga mutambulwa chila hono. Vanu vanji valongaga kuta, “Yohana Mubatitsi atsilipuche kuhuma kwa wowafweye na an'dita mitinuso kwasawuli mwene yo muloli va Mulungu.” 15Vanji valongaga, “Uyu akuva atsilipuche Eliya muloli va Mulungu.” Vamwe valongaga, “Uyu akuva yumwe va valoli va Mulungu kota vala va katali.” 16Lechelelo Helode avaga kuhulika ndongwa tsa Yesu, akalongaje, “Uyu yo Yohana, yo ntsamudumwe mutwi, lechelelo atsilipwiche!” 17Helode alontsile ihyo kwasawuli iho hamutalo mwene avaga avatumile Vimilitsi vamubate Yohana na kumuwopa mu kaye ya vawopwa. Helode adisile ihyo kwasawuli ya mudala vake yo achemwaga Helodiya yo hamutalo avaga mudala va mung'olotse Helode yo achemwaga Fwilipo. 18Helode amuditye ihyo kwasawuli Yohana Mubatitsi avaga amulonje Helodi kuta, “Siyo finofu kusukula mudala va mung'olotso.” 19Helodiya avaga na ng'alatsi ndalahela mu numbula yake kwasawuli ya lulongwa ulo, na akaganaje kumukopola Yohana, lechelelo alemwaga, 20kwasawuli Helode amwamilaga. Kaha Helode avaga na muloto kwa Yohana kwasawuli Yohana ali munu muwuya na muhagulwa kwa Mulungu. Helode aganaga kumuhulikitsa Yohana, na yivaje hoavaga kumuhulikitsa akodekaga mu numbula yake.
21Siku yimwe yoyavaga siku ya wiwuko wa kuleleka kwake Helode. Mutsajila Helode akavaditilaje liwungo vavina va wutavala wake, na vavina va vimilitsi, na filongontsi va inyi yeka ya Galilaya. Ihyo ho Helodiya akapataje nyafwasi ya kumukopola Yohana. 22Ihyo muhintsa va Helodiya akinjilaje mu liwungo na kwantsa kuwunga, Helode hamwe na vajentsi vake veka vakahechelelaje ndalahela hila fyo awungaga. Muntsajila Helodi akamulonjelaje muhintsa vake, “Usuche chinu chochive choun'gana na heni ngukupela.” 23Kaha akamulonjelaje kwa kumulahila kuta, “Chinu chochive cho ukuchigana heni ngukupela, na yivaje nusu ya wuntsajila wangu ngukupela.” 24Ihyo muhintsa yula akahumaje kivala na kumuputsa yuve, “Ngasuche chinu chachi?”
Nayo yuve akamulonjelaje, “Kasuche mutwi gwa Yohana Mubatitsi.” 25Muhintsa yula akawuyaje luvilo kwa muntsajila na kumusuka, “Ntsin'gana umele sambi mu luhelo luno mutwi gwa Yohana Mubatitsi.” 26Muntsajila Helode akakalalaje ndalahela. Lechelelo kwasawuli ya kwilaha koali ilahite na vajentsi vake yovavaga hala ha liwungo, akalemwaje kumukanila muhintsa yula. 27Luvala lulo muntsajila Helode akalajitsaje mwamitsi akagulete mutwi gwa Yohana. Mwamitsi uyo akabitaje mula mu nyumba ya vawopwa akamudumulaje mutwi Yohana Mubatitsi, 28akaguletaje mutwi gula mu luhelo na kumupela muhintsa yula, nayo muhintsa akamusindichilaje yuve. 29Vadahitswa va Yohana vaveye kuhulika ndongwa itso, vakabitaje na kugutegula muvili gwa Yohana na vakagutsikaje kwa kuguvika mukabuli.
Yesu anguvapela chilyo vanu elufu tsihanu
Matayo 14:13-21; Lukasi 9:10-17; Yohana 6:1-14
30Vala vatumi vakawuyaje kula koali avatumile, na kukong'asika hoali Yesu na kumulonjela ndongwa tseka tso vadisile uko na hila fyo vadahitse. 31Yesu akavalonjelaje, “Tubite tukikale hono ha wiyeka ili mwesele chidogo.” Alontsile ihyo kwasawuli vanu wolofu vatsaga iho na kuwuka, mbaka Yesu hamwe na vadahitswa vake vatindajilaga kulya. 32Ihyo vakakwinaje mutumbwi mukomi na kubita hono ha wiyeka. 33Lechelelo vanu wolofu vavaga kuvawona ho vawukaga na kutsela kovam'bita. Ihyo vanu kuhuma miji jeka vakabitaje luvilo kwa magulu kula kovam'bita Yesu na vadahitswa vake, na vanu vala vakavalongolaje kufika. 34Yesu hoavaga kwika mu mutumbwi gula, akavawonaje vanu wolofu, akavawonelaje lusungu kwasawuli vavaga kota ng'olo tsotsilihela mudimi. Ihyo akantsaje kuvadahitsa ndongwa tsolofu. 35Hoyavaga mumihe, vadahitswa vakabitaje kwa Yesu na kumulonjela, “Hono hano ha mbuga, na litsuva lin'nyelejeta. 36Chiba uvalaje vanu iva, ili vabite ku miji na mu fijiji fya habehi vakagule filyo!” 37Lechelelo Yesu akavalonjelaje, “Muvapele henye filyo.” Nawo vadahitswa vakamulonjelaje Yesu, “Mbe, tutegule dinali miya mbili tubite tukagule mabumunda ili tuvapele vanu iva valye?”#6:37 Dinali miya mbili kwa tsihwana na mahombo ga mukolakatsi ga myetsi nane 38Yesu akavaputsaje, “Muna mabumunda galinga? Mubite mukalole.” Hovavaga kulola vakamulonjelaje, “Hogali mabumunda gahanu na somba tsivili.” 39Ihyo Yesu akavalajitsaje vadahitswa vake kuta, “Muvalonjele vanu vikalise mu misoli filundo filundo. 40Nawo vanu vakikalisaje mu misoli filundo filundo fya vanu miya moja na mu filundo fya vanu hamusini.” 41Kahi Yesu akategulaje gala mabumunda gahanu na somba tsivili, akagalamilaje kilanga na kumulumba Mulungu na kugamegasa hamwe na tsila somba tsivili, akavapelaje vala vadahitswa vake vavagavasile vanu vala veka. 42Nawo vanu veka vakalyaje na kiguta. 43Vadahitswa va Yesu vakakong'asaje filyo fyo fisije, vakapataje fitangula fikomi kumi na fivili. 44Vanu wovalyeye mabumunda na somba tsila valume ng'ani vavaga kota elufu tsihanu.
Yesu an'jenda muchanya mwa malenga
Matayo 14:22-33; Yohana 6:15-21
45Luvala lulo Yesu akavalonjelaje vadahitswa vake vinjile mu mutumbwi valowoche kumwambu gwa lilamba valongole kubita ku Betitsayida, na mwene akasigalaje kuvalaga vanu. 46Yesu ho avaga kuvalaga vanu vala, akabitaje aliyena ku chidunda kusala. 47Hoyavaga kufika hachilo, mutumbwi mukomi gwavaga hagatinagati mwa lilamba, na Yesu avaga aliyena ku inyi ngafu. 48Yesu akavawonaje vadahitswa vake vankodeka kukwega mutela gwa mutumbwi kwasawuli ya ng'ala ngomi yavasumaga. Kwavaga kufika habehi na kwela, Yesu akabitaje kovali vadahitswa vake kuno an'jenda muchanya mwa malenga na akaganaje kuvalutila. 49Hovavaga kumuwona an'jenda muchanya mwa malenga, vakakolaje kwasawuli vatijilaga kuta likuva lilayika. 50Veka vakamuwonaje na vakavaje na muloto ndalahela. Luvala lulo Yesu akavalonjelaje, “Mwikangatse, muleche kutinuka, yo heni!” 51Kahi Yesu akakwinaje mu mutumbwi mukomi govali vadahitswa vake, na ng'ala yikadugaje. Vadahitswa vakapomokaje ndalahela, 52kwasawuli vavaga vang'ali kutsitsela ndongwa tsa mitinuso ja gala mabumunda. Numbula tsawo tsavaga tsing'acha nalamu.
Yesu anguvaponetsa vatamwa ku Genetsaleti
Matayo 14:34-36
53Vakalowokaje lilamba na kufika inyi ya Genetsaleti, vakaguwopaje mutumbwi ku luhanga. 54Luvala lulo vavaga kwika mu mutumbwi mukomi, vanu vakamutselaje Yesu. 55Vanu vala vakabitaje luvilo luvilo mu inyi yila yeka, vakavapikaje vatamwa mu saga tsawo, na kuvasindika kokuve kovahulikaga kuta Yesu ali kuko. 56Chila hono ho abitaga Yesu, na yive kumiji, awu kufijiji, awu hono hohave, vanu vavavikaga vatamwa vawo mu ntsuga tsa hono ha kugutsila finu, na kumusuka Yesu idichile vatamwa iwo vibate na yive lupembo lwa mwenda gwake hela. Na chila yo amudomitse Yesu akaponaje.
Currently Selected:
Maliko 6: SBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Sagala Language @The Word for The World International and Sagala Language translation. All rights reserved.
