Valumi 7
7
Muhwano gwa vanu wo vitweye
1Nyee, vang'olotsangu, ntsin'tsela kuta ntsinlongana na vala wo vagatsele malajitso ga Musa. Mbe, simun'tsela kuta malajitso ga Musa gamutavalaga munu hala ho ang'acha mumi? 2Kota hila mudala yo atoliche si afuluche atoleche na mulume yunji manyi mulume vake ang'acha mumi, lechelelo manyi mulume afwe, mudala yula akuva adindulwe na gala malajitso ga noleka. 3Ihyo mudala uyo manyi atoleche na mulume yunji, na kuno mulume vake ang'acha mumi, mudala uyo akuchemwa mwaafu. Lechelelo manyi mulume vake afwe, malajitso ga noleka gakuva gamulechye mudala uyo, nayo afuluche atoleche na mulume yunji na si akuchemwa mwaafu. 4Hihyo na henye vang'olotsangu, muveye hulu kwa malajitso ga Musa hala wunu wenyu wa katali ho wafweye hamwe na Chilisito, kukolela muvili gwa Chilisito na muveye mali ya munu yunji yo atsilipulwe, ili tudite ndongwa nofu kwajili ya Mulungu. 5Kwasawuli hala hotwavaga tungikala kota vanu fyo vikalaga, malagitso ga Musa gatwambutsaga mbwiniwo tsa ndonwa tsibi tsatutifyaga mufilungo fyetu, na hetwe tweka tukakudujila muchifo. 6Iho katali twavaga tuwopitwe na malajitso ga Musa lechelelo sambi tufweye hamwe na Chilisito, ihyo tudinduliwe kuhuma mu malagitso ga Musa. Lelo sinambe tumutumichile Mulungu kota katali kwa kufwata malajitso go gandikwe. Ila tungumutumichila Mulungu kwa kulongotswa na Muhe vake.
Malajitso ga Musa na ndongwa ntsibi
7Tulonje chichi lelo, kuta malajitso ga Musa go ndongwa ntsibi? Ndaya bee! Lechelelo si ntsika kutsela kuta ndongwa ntsibi cho chinu chachi bila kugatsela malajitso ga Musa. Kwasawuli si ntsika kutsela kiwiniwa kuta kuli fibi manyi malajitso ga Musa gaka gave sigalontsile, “Walahogola kiwiniwa.” 8Lechelelo fyo ntsavaga kutsela ndongwa ntsibi, tsikavetsaje kulamusa chila ayina ya mbwiniwo ntsibi mugati mwangu. Kwasawuli manyi kuve kuduhu malajitso, ndongwa ntsibi tsinguva tsilihela ludali. 9Luvala lutunga hontsavaga kutali na malajitso ga Musa ntsikalaga kota fyo ntsin'gana heni, lechelelo hogavaga kutsa malajitso, ndongwa ntsibi natso tsikalamukaje, 10na ngafwaje. Iho ngatselaje kuta lilajitso lyo lyaganaga kuleta wumi, likatsambutsaje nyingwe chifo. 11Ihyo Ndongwa ntsibi tsikapataje nyafwasi ya kundeteletsa tsikatsambutsaje nyingwe chifo. 12Wukweli kuta malajitso ga Musa gahumye kwa Mulungu, majitso igo galifinofu na kaha galihela wubi. 13Mbe, lulongwa luno lunlajila kuta chila chinu chinofu chambutse nyigwe chifo? Ndaya bee! Ila ndongwa ntsibi ili tsiwoneche nachene kuta tso ndongwa ntsibi, tsatumye chila chinu chinofu kwambutsa nyigwe chifo. Ihyo ndongwa ntsibi, kukolela malajitso gala yinlajila nachene kuta ndongwa ntsibi tsiwoneche kuva ntsibi ndalahela.
Wusumwano mugati mwa munu
14Tun'tsela kuta malajitso ga Mulungu go apelitwe Musa galetitwe kwasawuli ya ndongwa tsa chi muhe, lechelelo heni ntsili munu yo ntsinlongotswa na muvili, kuno ntsili mu wupogotsi wa ndongwa ntsibi. 15Heni sinambe ntsichelewe chila cho ntsinguchidita, kwasawuli chila cho ntsin'gana kudita, ntsinlemwa kudita, lechelelo chila chosinambe ntsichigane cho ntsinguchidita. 16Lechelelo manyi ntsinguludita lula lulongwa lo sinambe ntsilugane, ntsingugadikitsa kuta malajitso kuta go manofu. 17Ihyo lelo siyo heni yo ntsin'gana kudita ndongwa tso sinambe ntsitsigane, ila lula ludali lwa ndongwa ntsibi loluli mugati mwa heni. 18Kwasawuli ntsin'tsela kuta mugati mwangu ntsilihela lulongwa lunofu lulove, kwakuva ntsin'gana kudita lulongwa lunofu, lechelelo ntsinlemwa kuludita. 19Lula lulongwa lunofu lo ntsingulugana, sintsinguludita, ila lula lubi losinambe ntsilugane lo ntsinguludita. 20Lelo manyi losinambe ntsilugane lo ntsinguludita, siyo heni yo ntsin'gana kuludita, ila tsila ndongwa ntsibi tsotsili mugati mwa heni. 21Ihyo ntseliwe chinu chino kuta ho ntsin'gana kudita lulongwa lunofu, ntsinkwegwa kuludita lula lubi lo sinambentsilugane. 22Munumbula yangu ntsingugasangalila malajitso ga Mulungu. 23Lechelelo ntseliwe kuta kuna malajitso ganji go gankola katsi mu muvili gwangu, malajitso go gankuva tebe na malajitso na gala mahotso gangu manofu. Ihyo malajitso igo gan'dita ntsive mupogotsi va malajitso ga ndongwa ntsibi tsotsinkola katsi mu muvili gwangu. 24Nyee, ntsinalyo ntsimuyenyu! Nani yo akung'ulusa na muvili guno go gun'sindika ku chifo? 25Ntsingumulumba Mulungu kwa wukuluso wake kukolela kwa Yesu Chilisito Mutwa vetu!
Ihyo duve, fyotsili heni kwa nyala tsangu ntsingugafwata malajitso ga Mulungu, ila kwa muvili gwangu ntsinkwegwa kudita ndongwa ntsibi.
Currently Selected:
Valumi 7: SBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Sagala Language @The Word for The World International and Sagala Language translation. All rights reserved.
