Lukas 5
5
Yesuse nololaw ni murit-murit ta ntubana
(Mat. 4:18-22; Mrk. 1:16-20)
1Bahnga na, Yesuse nosal mali talaga Genesarete mtopo, gabe smatna lal rfakoskoso si bo rlonga Jou Lahatalla ni mautingna. 2Oras cia, Yesuse nem pelang salu mali talagaca mtopo. Smat ta rfalabang mali pelang tasana rfalabange hola to. Si rduri mali pelangna to gabe rfaberesi si riri labangna. 3Gabe Yesuse ncaplo pelang asa mana. Pelang tasa Simone ni pelang si. I ndor Simone nturka pelang tasa lalaw faokoce. Taga I ntotolang mali pelang tasa, taga nmulaine nfafcule smat lalo ta si mali talagaca mtopona.
4Nfafcule hola, Yesuse nua Simon, “Simon, msali lalaw ta mlamanna, fare mdurea nim labangca mana bo duk iyan.”
5Simone nu, “Guru, ga doram pusa to, amame kningo iyanna, ga amame kduk paisa pa. Ga tane, ningalena Guru ta mfasula, ya osta idurea i hawe labang tae.”
6Gabe si rpei hola ahai ta Yesuse nculana, si rduk iyanna lal denabe riri labangca bo nmarasekan. 7Gabe si dololaw riri del-delo ta en mali pelange nesana rlafo mali bo rgali si. Gabe, si riri del-delo ta pelange nesana rlafo gabe farerer si dafrao iyan mali pelang salu tasa denabe pelang saluna bo mduri. 8Oras ta Simone nem Yesuse ni kawasa tina, i naftiba pupuo tasa nap Yesuse nbona, fare nu laitane, “Jou, mfateam ya to, ningalena ya tane smat ta ibaradosa!” 9Simone nu laina, ningalena i re ni del-delo ta pelang asa tina rherang re iyan ta lal ta si rduk tina. 10Laina hawe re Simone ni del-delona: Yakobus i re Yohanes, Zebedeuse ntuna. Si rherang dem iyan ta lal tina.
Gabe Yesuse nua Simon, “Simon, mati mamcaitna! Aw jaga miyawa iyan, ga mulain oras tae aw miyawa smat bo si rderera Ya”.
11Fola tina, Simon i re ni delna rdu riri pelangna mali talagaca mtopo. Si rfateam farumi riri okosesi tina taga rderera Yesus.
Yesuse nfamafia smat isa npado
(Mat. 8:1-4; Mrk. 1:40-45)
12Bahnga na, Yesuse nfan lali bendar isa, ga mana en smat isa npado. Smat tae ni padona badanca farumi i. Oras ta smat tae nem Yesus, i naftiba pupuo tasa nap nyinyenca fare ndor laitane, “Apa, gabe Apa mailow, mfamafia ya!”
13Gabe, Yesuse nfatila smat cia fare nu, “Ya ikalow, aw mmafia. Gabe tane aw mafia to!” Oras tina to, smat cia ni padona mnyangis. 14Gabe Yesuse nlarang smat cia mdel pa ta bo nafetngo smatna, I ta nfamafia aw. Yesuse nu, “Aw mfan lali imamca bo i nem aw mmafia to, fare aw mpo nim aiwani faisa bo mpo i sadaka lali Jou Lahatalla i, laisa ta nabi Musa nfasulana. Aw mpei laina bo ndadi fafayal lali smatna, aw fatutua ta mafia to.”
15Ga makse Yesuse nu matina, i osta nafetang be ga Yesuse ni kawasa nfayangis panyaket tina. Gabe abar tina, ncapang manca-manca. Gabe nbang i ga lal smat ta rlafo rlonga Yesuse nfafcule fare rdore bo I nfayangis si riri panyaketna. 16Ga Yesuse jaga nfan lali gagaw ta mlileina bo ncombayang.
Yesuse nfamafia smat isa ta nfanfan pa
(Mat. 9:1-8; Mrk. 2:1-12)
17Bahnga na, Yesuse nfafcule smat mali ebai isa. Oras ciana en smat Yahudi diranca ta rderera fatfato Farisi fare en bena guru agama Yahudi ta rto Musa ni kitab silim tasa. Si tina rtotolang rlonga I nfafculena. Si rlafo mali farumi pnu ta mali batang Galilea fare Yudea, fare mali bendar Yerusalem bena. Jou Lahatalla ni kawasana en mali Yesus i denabe I bisa nfamafia smat ta dowilna. 18Garayanna, en smat diranca dute smat isa nfanfan pa, ga si rfatuli i puis musalaca. Si rmario bo rcunga smat ta nfanfan pa cia bo rfatigi mali ta Yesuse nbona. 19Ga smatna lalna gaole, si bisa rcunga i pa smat ta nfanfan paca. Gabe si rdawil nais ebaica rcalawe ni yatafna, taga rdurea smat ta nfanfan pa cia bahnga be re gagaw ta namtulo ica nap mali smat laloca fapaluan neta mali Yesuse nbona.
20Oras ta Yesuse nem smat ta nfanfan paca ni delna rpei lainana, Yesuse nto, si rdela I. Gabe Yesuse nua smat ta nfanfan paca, “Apa, apa nim dosana Ya ikampunge to.”
21Rlonga ta Yesuse nu lainana, guru agama Yahudi ta rto Musa ni kitab silim tasa fare smat Yahudi ta rderera fatfato Farisina rmauting mali wlori laitane, “I ise ga tae, denabe I npei ni dirica laisa Jou Lahatalla? Ningalena, isa pa ta bo nampunge smatna riri dosa, ta bisana Jou Lahatalla be.”
22Ga Yesuse nto si wlorina. Gabe I nu laitane, “Pesaga mew ffikir lainana? 23Oras ta Ya ikuwa smat ta nfanfan pa tae, ‘Apa nim dosana nduk ampunge to’, Mew laisa fdela pana ga smat cia ni dosana nduk ampunge to. Gabe laisa Ya iku, ‘Mpalinge bo mfane to’, mew osta fto Ya en nik kawasa ningalena mew fem i nfan. 24Gabe tane Ya bo ifamafia i, bo mew fto, mali dunia tae Smate ntu ta nlafo mali sorogaica, en nkawasa bo nampung smatna riri dosa.”
Gabe Yesuse nua smat ta nfanfan pa cia, “Ya ikuwa aw apa, mpalinge to, mlange ni musalaca, fare muwe to lali nim ebai i!”
25Oras tina to, smat ta nfanfan pa cia nosal mali smat lalo tina uhngorina. Fare, i nlange ni musalaca taga nuwe lali i ni ebai i. Oras ta nuwena, i nfamamagal be Jou Lahatalla. 26Dem ahai ta ndadi i tina, farumi smatna rherang gabe rfamamagal fare rcuba Jou Lahatalla. Fare rbasamna damcait si du laitane, “Wol tae ite teme to Jou npei okosesi ta mafia.”
Yesuse nololaw Lewi bo nderera I
(Mat. 9:9-13; Mrk. 2:13-17)
27Fola tina, Yesuse ncapang mali ebai cia, gabe I neme smat isa ta jaga nfayalo pajakca, ntotolang mali gagaw ta biasa rfayalo pajakna. Ta jaga nfayalo pajak cia ngahnyo Lewi. Yesuse nua i, “Mali bo mderera Ya!” 28Nlonga tina, Lewi nosal, nfateam farumi okosesina, taga nderera Yesus.
29Fola tina, Lewi npei an mali ni ebaica taga nololaw Yesuse bo nceli mana. I nololaw bena, ni del-delo ta i re si rfayalo pajakna fare smate nesa ta manana bo rceli farerer. 30Manana en bena smat Yahudi ta rderera fatfato Farisi, fare guru agama Yahudi ta rto Musa ni kitab silim tasa. Oras ta si dem Yesuse nceli farerer re smat ta du si rbaradosa tina, si rtole, gabe duwa Yesuse ni muritna, “E, pesaga mew re nimew Guruca fseli fare fdomna farerer re smat ta rfayalo pajakna fare smat ta rbaradosa nesa nana?”
31Yesuse nlonga neta si du tina, gabe I nua si laitane, “Ga smat ta rcehatna pa ta rparlu mamana, ga smat ta dowilna. 32Ya ilafo bo ikololaw smat ta rbasam riri dirica damolangna pa, ga Ya ilafo bo ikololaw smat ta rbaradosana bo si diwane wlorina rderera Ya.”
Yesuse ni muritna rpuasa pa oras ta i re si rfarererna
(Mat. 9:14-17; Mrk. 2:18-22)
33Smat Yahudi ta rderera fatfato Farisina, si rfautno Yesus, “Animam muritna jaga rpuasa fare rcombayang. Yohanese ni muritna ma laina bena. Pesaga Apa nim muritna rpuasa pa, taga rceli fare rdomna?”
34Gabe Yesuse ncanglo si npake andeande tae, “Laisa man ta nfasawca i mali rameca sube? Ncung akal pa, bo i ncula ni del-delona rceli re rdom pana, laisa I nfarerer re si mana sube. 35Ga lomane ni orasna nlafo i, smatna rlafo bo jal manca mali ni del-delona, taga ni del-delona rceli re rdom pa.”
Yesuse ni fafculena mdel pa bo ffabanga re agamaca ni fatfato ta smatna rpeina
(Mat. 9:14-17; Mrk. 2:18-22)
36Gabe Yesuse nua smat farisi tina npake andeande laitane, “Enpa smat ta bo dailow rcekane riri kabaya ta pona, taga rdilpe lali kabaya ta agonana. Ningalena kabaya ta poi cia bo nmayai, fare kabaya po cia pantas pa re kabaya ta ago i cia ni kaingna. 37Laina bena, osta enpa smat ta dafrai anggur ta po subena nap anggur gagaw ta agona. Ningalena gabe laisa anggur gagao ta mali aiwani gico tina ago to ni gicoca ncicoale to. Gabe, smatna dafrai anggur po mali anggur gagao ta agona, osta anggur po tina ndawil, fare nfarapes anggur gagao ta agona, fare anggurna maraepa. 38Gabe, anggur ta pona nane tisin mali gagao ta pona bena. 39Smat ta biasa rndom anggur ta agona, i osta nailow panto bo ndom anggur ta ponana, ningalena anggur ta agona ni jame.”
Currently Selected:
Lukas 5: BZQ
Highlight
Copy
Compare
Share
Want to have your highlights saved across all your devices? Sign up or sign in
2026 Indonesian Bible Society
