Matius 10
10
Yesuse nololaw ni murit smat yafasa re silu tasa
(Mrk. 3:13-19; Luk. 6:12-16)
1Yesuse nololaw ni murit yafasa re silu tasa, taga npo si kawasa bo rfaungo setan fare smat ta rduk panyaketna rupa lalo i fare smat ta rcacatna. 2Murit yafasa re silu tasa, bo rdadi I ni susula si, ta smatna du rasul. Tane si ngahnyorina: Simon (i ngahnyo nesana Petrus), Andreas (Simone teno tutuwo i), Yakobus fare Yohanes (Zebedeuse ntu si), 3Filipus, Bartolomeus, Tomas, Tadeus, Matius (ta ni karanjanna nfautno pajak), fare Yakobus (Alfeuse ntu i). 4En bena Simon (ta i re ni del delona diyawa smat Roma ta rkawasa mali Israelna bo rfaungo si), fare Yudas Iskariot (ta fola bo nwage Jouca).
Yesuse ncula ni murit yafasa re silu tasa
(Mrk. 6:7-13; Luk. 9:1-6)
5Yesuse ncula ni murit yafasa re silu tasa rfanye ni karajanna, fare nfatnawe si, “Mewe mati ffan lali smat ta Yahudi sipana, fare mati fsung mali smat Samariana riri bendarnana. 6Ga mew ffan lali ite tenor fare ramar smat Israelna, ningalena si rderera Jou Lahatalla panto, laisa domba ta rdelencal laling. 7Gabe mew fane fabinga si laitane, ‘Mnu panto, Jou Lahatalla osta Nkawasa ndadi Kolano mali smat ta rdela Ina’. 8Mewe famafia si to smat ta dowilna, fapaling si to smat ta rmatna, famafia smat ta rpanyaket padona, fare faungo setan ta rcunge smatnana. Mewe fduk kawasa tina re ni paisapa, gabe mewe ma nane fpake kawasa tina bo fgali smate nesana re ni paisapa bena. 9Oras mewe fan, mdel pa ta bo fut tiwi, biarega tiwina mas, tiwi perak, ma tiwi tambaga. 10Mewe ma mati fut tas ta tafrao anna, pake afianna, nal fare titialna. Ga smat ta rfabinga Abar Mafia mali Jou i, i osta nduk ahai ta i nparluna bo i ni tubca.
11Gabe laisa mew fsung mali bendar isa penepa pnu isa, mewe fiyawa smat ta dailowe mewna, fare fteteam mana to denabe mewe fsapang mali batang tina. 12Oras ta mew ffsung mali smatna riri ebaina, mewe nane fu, ‘Tabea’, kdor Jou nbarakati farumi smat ta rteteam mali ebai taena. 13Gabe laisa dute mewna mafia, barakat ta mewe fdorna osta en mali sili. Gabe laisa dute mewna mayai, barakat ta mew fdorna osta en mali sili pa. 14Gabe laisa en smat mali ebai isa penepa bendar isa dailowe mew pa fare rlonga nimew sogaro napa, fsapang mali ebai cia fare bendar cia. Pepesa ta en mali ficomewna fatibtibe mana, bo fawloyaneto si, ningalena si rcal mali Jou Lahatalla I. 15Flolam famafia e, lomanta mali wol kiamatca, oras ta Jou bo nadili farumi smatna, smat ta dailowe mew pa tina osta rduk salna tebtebna foli mali sal ta smat mali bendar Sodom fare bendar Gomora rdukna.”
Yesuse nfacicoale ni muritna wlori oras ta ncula sina
(Mrk. 13:9-13; Luk. 21:12-17)
16Yesuse nua ni muritna hawe, “Flonga e! Ya isula mew ffan lali smat ta rmayaina fapaluan, tina fatailo laisa domba ntu isa nfan lali fun ailolona fapaluan. Gabe mewe nane fpei famafia, fare wlomewna nane molang. 17Mewe nane fpei famafia lali farumi smat! Ningalena, en smat ta bo rpo mew lali agama Yahudina riri ta rfabobokona bo dadili mew. Mewe ma bo fduk punpun mali ebai sombayang agama Yahudina, rpake wala ga mali cicapona en ni okosesi ta mdalim. 18Ningalena mewe fderera Ya, lomanta si dute mew fbo gubernurna fare kolanona. Tina me nimew oras bo fabinga ga Ya lali sili fare lali smat ta rfayala Jou Lahatalla pana. 19Gabe laisa dute mew taga rpo mew bo dadili mew, mati famcaitna ahai ta mew bo funa. Lomanta mali oras cia to, Jou Lahatalla osta npo mew ahai ta mew bo fua sina. 20Ningalena, mew nimew mauting pa ta ncapangna, ga nimew Apa ni Rohca, I ta bo npo mauting tina lali mewi.
21Lomanta en ni orasnan, smatna osta rpo tenori fare ramarina rpun famat si. Laina bena re apana, si osta rpeo nturina laina. Fare en bena wawaina osta rfakotale re hma re hnyerina, gabe si osta rpo hma re hnyerina bo rpun famat si. 22Fare farumi smatna osta riri le mew ningalena mew fderera Ya. Ga smat ta rdela Ya turusna riri tubca denabe lali cicapo, si tina ta Jou Lahatalla bo nfasalamat si. 23Gabe laisa smatna rfakangela mew mali bendar isa, mewe fpiya to lali bendar ta nesana. Flolam famafia e, mew fabinga Abar Mafiana farumi paube lali bendar ta puli Israelna, Smat ta mali sorogaica nlafo to.
24Enpa murit ta foloi mali ni gurucana, fare enpa smat karajanna foloi mali ni tuancana. 25Nlafoi to gabe laisa murit isa ndadi laisa ni guruca, fare nlafo i to bena gabe smat karajan isa nkaranjanna foloi mali ni tuanca. Ya tane laisa me nimew tuanca, gabe mew tane Ya nike smat. Gabe laisa smatna du Ya tane setanna riri kolanoca,#10:25 Beelzebul, setana riri kolanoca. ta mayai foloina mew ta fderera Yana, Gabe mew nane fpei famafia!”
26Yesuse nu hawe, “Gabe mew mati famcait sina smat ta bo rfakangela mewna. Ningalena ahai ta si rgoganna, ga smatna osta rto, fare farumi ta ttopana fare ta tlonga pana osta ncapang. 27Ahai ta Ya ikuwa mewna ta smate nesana rlonga pa, mewe nane fabinga smatna fatutua mati fgoganna. Fare ahai ta Ya imu mumo mewna, mew nane fabinga lali smat laloca nbona fatailo laisa re mew fmauting puis ebaica popo. 28Mew bena mati famcaite smatnana. Ningale smatna dafena rpun famat be nimew badanca, ga enpa kawasana bo rpune famat nimew jiwacana. Famcait be Jou Lahatalla ta ni kawasa bo npune nimew badanca taga nfasale nimew jiwaca mali narakaca. 29Co mew fikir famafia, mani budubadang silu, smatna rwage si mulorina okocebe. Ga biarega laina, isa pa ta bo nmarapawilna gabe laisa nimew Apa nailow pa 30Laina bena re mew, Jou Lahatalla nto ndumi mew, denabe nimew uta ta mali boboko mewna I netange ndumi gabe nto lalona. 31Gabe mew mati famcaite, ningalena mew mulo mewna mamagalna, foloi mali mani budubadang tina.
32Ise ta nfatuwo ndela Ya mali smat laloca nbona, Ya ma osta ifatuwo Ya ifayala i mali Ya nik Apa ta mali sorogaica nbona. 33Ga ise ga nu nfayala Ya pa mali smat laloca nbona, Ya ma iku ifayala i pa mali nik Apa ta mali sorogaica nbona.”
Smat ta rdela Yesus pana rfakotale re smat ta rdela Yesusna
(Luk. 12:51-53, 14:26-27)
34Yesuse nu hawe, “Mati mew fu, Ya ilafo mali dunia tae bo smatna rfamafio ndumi si. Ga Ya ilafo tane, smatna lal osta rfakotale, denabe en ta rfapunpuna ga rmat. 35Ningalena, re Ya ilafo, smat ta rdela pana rfakotale re smat ta rdela Yana: Wai manna rfakotale re hmarica, wai mapingna rfakotale re hnyerica, malafaca nfakotale re ohmo ta mapingica. 36Morco napna si ebaica lolona diranca rfasangnang pa. 37Ise ta n'gogoru hma fare hnyena mamagal foloi mali ta n'gogoru Yana, i cia pantas pa bo nderera Yana. Fare ise ta n'gogoru ntu man fare ntu maping mamagal foloi mali ta n'gogoru Yana, i cia ma pantas pa bo nderera Yana. 38Ise ta npapa i ni salip capa, tina ni ngalena inciap pa bo nkangela denabe nmatna nderera Ya, i cia pantas bo nderera Ya. 39Gabe ise ntub bo i ni dirica tutuling, i cia osta nmatna i re Jou Lahatalla pa denabe lali. Ga ise ta npo ni tubca ningalena nderera Ya, i cia osta nduk tub re Jou Lahatalla denabe lali.”
Smat ta dailow Jouna bo rduk ta mafia
(Mrk. 9:41)
40Yesuse nu hawe, “Ise ta nailowe mew fare ndela Ya, tina ningalena i nailow Ya. Fare isa nailow Ya, i ma nailow Jou Lahatalla ta ncula Ya. 41Ise ta nailow nabina isa, ningalena i cia nabi i, smat ta, nailow nabi cia bo nduk sagige mulo mali Jou Lahatalla i, laisa re sagige mulo ta nabina rdukna. Ga ise ta nailow smat ta jaga npei ta molang mali Jou Lahatalla nbona, smat ta nailow cia bo nduk sagige mulo mali Jou Lahatalla i laisa re sagige mulo ta smatna jaga npei ta molang rdukna. 42Smat ise ta n'gali smat ta biasa be ningalena smat cia nderera Ya to, biarega npo i waya galas pusa be, Ya ikua mew e, smat ta n'gali i cia osta nduk sagige mulo mali Jouca.”
Currently Selected:
Matius 10: BZQ
Highlight
Share
Compare
Copy
Want to have your highlights saved across all your devices? Sign up or sign in
2026 Indonesian Bible Society
