Matius 21
21
Smatna lal ta rtotoman fare rfamamagal Yesus oras ta I ncung mali Bendar Yerusalem
(Mrk. 11:1-11; Luk. 19:28-40; Yoh. 12:12-19)
1Oras ta Yesus I re ni muritna bo rdahle bendar Yerusaleme to, ga rlafo mali pnu Betfage ta mali popo Zaitun, Yesuse ncula ni murit silu, 2fare nfatnawe laitane, “Mewe ffan lali pnu ta en potao tina. Mana mew osta fem keledai maping isa rpitna i, ga mali lapona en ntu isa. Mew fsupate ni walaca bo ffut si mali Ya i. 3Gabe laisa smatna rfautno mew, mew fua si laitane, ‘Jouca bo npake keledai tae. Gabe laisa npake hola i to, tina to kfawe i.’ ”
4Farumi tina ndadi i, laisa re ta Jou Lahatalla nua nabina tantuba mali be laitane,
5“Fua si to smat ta rteteam mali bendar Yerusalem na,
ta smatna rfangahnyo si hawe Sion, fu laitane:
‘Co fem, nimew Kolanoca nlafo mali mewi,
I ncombong pa. I ndawil keledai isa, keledai cia poi sube.’ ”
6Rlonga fola tina, murit silu tasa rfane ga rpei laisa ta Yesuse nua sina. 7Si dut keledai maping cia fare ntuca lali Yesus i. Fare, si difa i re riri jubana puis keledai ciana fare Yesuse ma ndawil keledai cia. 8Oras Yesuse ndel mali lalingca, smatna lal riri jubana rcesa mali lalingca. En bena ta rkati ai ni magal ta nenenana ta wluna po sube, dising mali lalingca bo rtotoman Yesus. 9Smatna lal ta rfan mali Yesuse nbona fare ta rdel mali tao, rfamamagal I fare liorina mamagal, si du laitane,
“Hosana! Tfamamagal I, kolano Daute ni duri!
Tfamamagal I ta Jou Lahatalla ncula I nlafo mali!
Hosana! Tfamamagal Jou Lahatalla ta tigo molangca!”
10Oras ta Yesuse nlafo mali bendar Yerusalem, tina to bendar cia namlelang. Gabe smat ta mali bendar ciana rfautan, “Smat tae ise ga?”
11Gabe smat laloca ncanglo, “I cia Yesus, Nabi i mali Nasaret mali batang Galilea!”
Yesuse nfaungo smat ta rfawage fare rfagon mali Ebai Sombayang Mamagal cana
(Mrk. 11:15-19; Luk. 19:45-48; Yoh. 2:13-22)
12Fola tina, Yesuse ncung mali Ebai Sombayang Mamagalca ni kintalna. Manana smat ta rfawage fare rfagonna, ga Yesuse nfaungo ndumi si. I nfapalpalna smat ta jaga rfaiwna tiwina riri mejana fare smat ta jaga rwage mani pombona riri bangkona. 13Fare Yesuse nua si, “Mali Jou ni Kitabcana en rlefo laitane, ‘Ya nik Ebai tae osta ndadi Ebai ta smatna rlafo bo rfalafo riri mautingna nais Jou I.’ Ga mew fpei ndadi smat ta rmadarawana gagawori bo rgogan si!”
14Fola tina, smat ta dem pana fare smat ta rtempangna rlafo lali Yesus i mali Ebai Sombayang Mamagalca ni kintalna, fare I nfamafia si. 15Ga oras ta imamna riri ta rfaboboko fare guru agama Yahudi ta rto Musa ni Kitab silim tasa dem Yesuse nfamafia smat tina, si rtole. Fare si rtole bena oras ta si rlonga wai nenenana rgigam mali Ebai Sombayang Mamagalca ni kintalnana, “Hosana! Tfamamagal kolano Daute ni duri tae!”
16Gabe si dua Yesus, “Ya, ga Aw mlonga pa lae ta wai nenenana rfamamagal Awna?”
Yesuse nua si, “Ya ilonga. Mew rasa fbaca to ta Jou Lahatalla nu mali Kitab cana laitane, ‘Jouca nfafcule wai nenena ta ficorina kakala subena fare wai nenenana bo si rfamamagal I.’ ”
17Fola tina, Yesuse nfateam si. I nfan lali bendar Yerusalem potalil mali pnu Betania, taga namtuli doram pusa mana.
Yesuse ncasi ai ara ta piyo paca
(Mrk. 11:12-14, 20-24)
18Ni semaca dororam isube, Yesus I re ni muritna rlolai hawe lali bendar Yerusalem. Mali lalingca, Yesuse nbasamna nbibisil. 19Ga I nem en ai ara mali lalingca lapona. I dahle lali ai cia bo niyawa piyona, ga i nduk paisapa manana, ga wluna be. Gabe I nua ai cia, “Awe osta piyom panto denabe lali!” Oras cia to, ai araca namang.
20Oras ta Yesuse ni muritna dem tina, si rherangna gaole, gabe rfautno I, “Pesaga ai ara cia jampa be namangna?”
21Yesuse nua si, “Flonga famafia e, gabe mew fdela Jou fatutua molang, mew fafenana famang ai cia be pa, mewe ma bisa fparenta lolas tae, ‘Nlange i tigea i lalaw olati!’ Tina osta ndadi i. 22Fare, laisa mewe bo ffalafo nimew mauting nais Jou Lahatala I bo fdor okosesi, ahai be ta mewe bo fdorna, I osta npo, asal ta mew fdela fatutua.”
Smat ta rfaboboko agama Yahudi rfautno Yesus mduk kawasa manca mali
(Mrk. 11:27-33; Luk. 20:1-8)
23Laina rlafo mali Yerusalem, Yesuse ncung mali Ebai Sombayang Mamagalca ni kintalna. Oras Yesuse nfafcule smat ta pulinana, imamna riri ta rfaboboko fare simosimo Yahudina rlafo I ga rfautan laitane, “Farumi ta Aw mpei tane, Aw mduk kawasa manca mali? Fare kawasa tina ise ta npo Aw.”
24Gabe Yesuse nua si, “Ya ma bo ifautno mew. Fare mew bisa fsanglo ahai ta Ya iku tane, Ya ma osta ifabinga mew ise ta npo Ya kawasaca bo ipei farumi tanena. 25Co mew fua Ya, ise ta npo Yohanese kawasa ncisope smatnana? Jou Lahatalla pare smatna?”
Rlonga tina, si rfauwo si laitane, “Gabe laisa ite tu, ‘Jou Lahatalla’, I osta bo nua it, ‘Pesaga mew fdela Yohanes pana?’ 26Ga laisa ite tu, ‘Smatna rpo i kawasa,’ ite tamcait smat lalo tae osta ntole, ningalena si danggap, Yohanes tae nabi ta jaga nfalafo Jou Lahatalla ni fatnaw.” 27Gabe si dua Yesus, “Ame kto pa!”
Gabe Yesuse ma nua si, “Gabe laina, Ya ma ifabinga mew pa ise ta npo Ya kawasaca bo ipei farumi tane.”
Smat ta npei ahai ta Jou Lahatalla nculana, i cia to Jou Lahatalla ni smat i
28Yesuse nfautno smat ta rfaboboko agama Yahudi tina, “Flonga Ya bo ikafetang andeande tae su, fola taga Ya bo ifautno mew. En apa isa ntu manna smat silu. Bahngana, i nfan lali ntu ta abanica taga nu laitane, ‘Wol tae, awe mfane bo mkarajan mali bet anggurca.’
29Ga wai cia ncanglo, ‘Apa, ya ikalow pa bo ifanna.’ Morco napna, wai cia nmanyasal fare wlona niwan, gabe nfan lali bet anggurca.
30Fola tina, apa cia nfan lali ntu ta wawaica taga nua i laitane, ‘Awe mfane mkarajan mali bet anggurca.’
Waica ncanglo hma, ‘Ime apa.’ Naga i nfan pa.
31Gabe laisa mew, mali wai silu tasa, ise ta npei fmarica ni mauna?”
Ta rfaboboko agama Yahudina rcanglo, “Wai ta abanica.”
Gabe Yesuse nua si, “Gabe tina flonga ta Ya bo ikua mew tane, smat ta rbaradosa si riri karanjanna rfautno pajak fare maping mayaina, si ta rtuba mali mewi bo rdadi Jou Lahatalla ni smat ta I bo Nkawasa ndadi Kolano. 32Ga, oras ta Yohanes ta nfasisopca nlafo mewna, i nfafcule mfalaisa smatna bo rtub fatutua mali Jou Lahatalla nbona, ga mewe fdela pa ahai ta i nuna. Naga, oras ta smat ta rfautno pajak fare maping mayaina rlonga Yohanes, si rdela, ga mew failou pa bo fiwane wlomewnana, fare fdela pa ahai ta Yohanese nuna.”
Yesus npo andeande ga smat Yahudi ta dailow I pana
(Mrk. 12:1-12; Luk. 20:9-19)
33Yesuse nu hawe, “Co mew flonga andeande isa tae hawe. En tuan isa, npei bet anggur taga npei pagar nyel bet cia. Fare i n'gali lop bo ndadi gagaw ta bo nfo anggurna. Fare i npei hawe ebai bet isa tigo bo smat ta rjaga bet cia. Fare, i nfatator re smat ta rkarajan mali bet cia bo rjagana betca. Fola tina, i nfan lali batange nesa. 34Oras ta bo tkati anggurna nlafo i to, i ncula ni smat karajanna rfan lali smat ta rjaga bet cia bo rdore i na loatna. 35Ga rlafo pulina, smat ta rjaga bet tina rwagfo smat karajan cia. Si rpun isa, ga ta nesana si rpun famat, taga ta nesa benana rtigeo si re pat denabe rmat. 36Fola tina, tuan ta na bet cia ncula ni smat karajan ta nesana hawe rfanna dalal okoce mali ta ntubana. Ga smat karajan ta rcula si tina ma rdukna sama re smat karajan ta ntubana.
37Morco napna, tuan ta na betca ncula i ntuca to nfan lali smat ta rjaga bet cia. Smat ta na betca nu laitane, ‘Gabe ya ntukca ta i lali, si osta rcuba i.’
38Oras ta smat ta rjaga betca dem tuan ta na bet cia ntuca, si rfauwo si laitane, ‘I ta osta ndadi waris mali bet cia. Gabe mali to bo ite tpun famati, bo bet tae ndadi ite rar i.’ 39Gabe si rwagfo wai cia, taga rcapnga i mali betca potalil, taga rpun famat i.”
40Gabe, Yesuse nfautno ta rfaboboko agama Yahudi tina, “Gabe laisa bo mew, tuan ta na betca nlafo, i bo npeo si ahai re smat ta rjaga bet cia?”
41Si rcanglo Yesus, “I osta npun nfamat si smat ta wlorina mayai tina. Taga i bo nfatatur re smate nesa bo duruse na bet anggurca fare ta dailow rpo i na lowat gabe laisa ni oras ta tfakatina nlafo ito.”
42Gabe Yesuse nua si, “Mewe rasa fbaca to mali Jou Lahatalla ni Kitabcana? Laitane,
‘Pat ta basna rpake panto,
Jou Lahatalla bo npei ndadi fandasi ta cicoal.
Jou Lahatalla npei laina,
dena be ite temna mafiana gaole.’ ”
43Yesuse nua si hawe, “Gabe mew wlomewyaneto tane famafia, Jou Lahatalla bo nyale mew smate Yahudi nimew hakna bo ndadi Jou Lahatalla ni smat ta I bo Nkawasa ndadi Kolano. Ga I bo npo hak tina lali smate nesana, foloi mali smat ta rpei ta i ni mauna. Si tina fatailo laisa ai ta piyona mafia. [44Ise ta nmarapawil puis pat tina, i osta namjakam. Fare ise ta patca ntabi ica i osta namjakamna foloi. Tina osta ndadi i mali smat ta dailow Ya pana.]”
45Oras ta smat Yahudina riri imam ta rfabobokona fare smat ta rderera fatfato Farisi rlonga andeande tina, si rto, Yesuse nmautingna bo si le to. 46Gabe si dolna gaole bo rwagfo I, ga si damcait smat laloca, ningalena smat laloca nu Yesus cia nabi ta nfalafo Jou Lahatalla ni fatnaw.
Currently Selected:
Matius 21: BZQ
Highlight
Share
Compare
Copy
Want to have your highlights saved across all your devices? Sign up or sign in
2026 Indonesian Bible Society
