Matius 5
5
Yesuse nfabinga Jou ni mauting puis popoca
(Luk. 6:20-23)
1Oras Yesuse nem smat ta rderera I na lal, I ndawil nais popo isa. Taga ntotolang, ni muritna si lali ga rdahle I. 2Fare, Yesuse nmulaine nfabinga si. I nu laitane,
3“Rcangnange to smat ta riri re rari pa mali Jou Lahatalla nbona,
ningalena si tina to ta rdadi Jou Lahatalla ni smat ta I bo nkawasa ndadi Kolano.
4Rcangnange to smat ta wlorina nmagogoru i,
ningalena Jou Lahatalla osta npei wlorina sangnang.
5Rcangnange to smat ta wlorina gagalum fare rfanenena si,
ningalena Jou Lahatalla osta npo dunia tae lali sili.
6Rcangnange to smat ta rlokolo rpei be okosesi ta mafia,
ningalena Jou Lahatalla osta nfasangnang si.
7Rcangnange to smat ta rfaeme riri masiena lali smate nesanana,
ningalena Jou Lahatalla osta nfaem I ni masiena lali sili.
8Rcangnange to smat ta wlorina mafia mali Jou Lahatalla nbona,
ningalena si osta dem Jou Lahatalla.
9Rcangnange to smat ta rfamafio smate nesa ta rfatotolena,
ningalena Jou Lahatalla osta nu tina I ntu si.
10Rcangnange to smat ta rduk kangelana ningalena rpei be okosesi ta mafia,
ga si tina to ta bo rdadi Jou Lahatalla ni smat ta I bo nkawasa ndadi Kolano.
11Fsangnange to ningalena mew fderera Ya,
smatna osta riri le mew,
rfakangela mew, fare en ta rfamayai ngahnyo mewna.
12Fsangnang fare fsenga to, ningalena Jou Lahatalla nfasiape namew sagige mulona mamagal mali soroga i.
Ningalena, nabi ta ntubanama rduk kangela laisa ta mewe fduk tane.”
Smat ta rdelana nane dute smate nesana mafia fatailo laisa gasi fare planganna
(Mrk. 9:50; Luk. 14:34-35)
13Yesuse nu hawe, “Mew tane fatailo laisa re gasi ta mali dunia tae nfamna an. Laina bena re nimew tubca mali dunia tae, mewe nane fpei smate nesana mafia. Gabe mew fpei smatna mayai, mewe laisa gasi ta mtuna fare bisa panto bo payasing hawena. Ta mafiana topa to bo smatna rfafilfila.
14Mew bena fatailo laisa plangan ta mali dunia tae bo nfaplangno smatna. Laina bena re nimew tub ta mali dunia tae, mew nane fute smatna famafia. Ga smatna osta dem okosesi ta mafia ta mew fpei, laisa re si dem bendar isa puis lolasca bisa pa bo tgogan i na. 15Enpa smat ta rtaping padamara taga rtabake plangnona. Ta molangna i osta nising padamaraca mali gagaona bo nfaplangno farumi smat ta en mali ebai ciana. 16Laina bena re mew. Mewe nane fpei be okosesi ta mafia bo smatna dem ahai ta mew fpei tina bo si rcuba re rfamamagal Jou Lahatalla, mew nimew Apa ta mali soroga i ca.”
Yesuse nlafo bo farumi ta nabina rlefo mali Jou ni Kitab ciana bisa ndadi i
17Yesuse nu, “Mati mew fbafikire fu, Ya ilafo mali dunia tae bo ifayangis fatfato ta en mali Musa ni kitab silim tasa fare mali nabi nesana riri kitabna. Ga, Ya ilafo bo ahai ta rlefo tina bisa ndadi i. 18Mewe flonga famafia e! Langit fare bumi tae osta mjakam, ga fatfato ta mali Musa ni kitab silim tasa fare nabi nesana riri kitabna tina osta mnyangis pa, biarega hurup isa. Farumi tina en denabe ta Jou Lahatalla nu ntuba to tina ndadi ndumi i to. 19Gabe tina, ise ta ncapial fatfato isa be, biarega nenena molang, taga nfafcule smate nesana rderera laisa i, i cia bo ndadi smat ta riri ngale pa mali Jou Lahatalla ni smat ta I bo nkawasa ndadi Kolano. Ga ise ta nderera ndumi fatfato tina taga nfafcule smate nesana bo smatna rderera laisa i, i cia bo ndadi smat ta ningalena mamagal mali Jou Lahatalla ni smat ta I bo nkawasa ndadi Kolano. 20Gabe, flonga famafia ta Ya bo iku tane. Guru agama Yahudi ta rto Musa ni kitab silim tasa fare smat Yahudi ta rderera fatfato Farisi, si du rderera Jou Lahatalla ni fatfatona, naga si rpei pa ta mafia mali Jou Lahatalla nbona. Ga mew tane nane fpei ta mafia mali Jou Lahatalla nbona gabe laisa failow fdadi Jou Lahatalla ni smate mew ta I bo nkawasa ndadi Kolano mali nimew tubca.”
Mati ffatotolena
(Luk. 12:57-59)
21Yesuse nu hawe, “Mewe ftoto fatfato ta ite hma re bbur tantuba rdukna, laitane ‘Mati fpune smatna. Ise ga npune smat osta rfasal i.’ 22Gabe Ya bo ikuwa mew e, ise gabe ntolea be ni delca, i nane rfasal i. Gabe ise nfapopta be ni delca, nane durus i mali agama Yahudina riri smat mamagal ta tigo molangca ta ngahnyo Mahkama Agama. Fare ise ta nu ni delca nto paisa pa, i nane rfasal ina mali narakaca. 23Gabe laisa mew fute nimew aiwani bo fpo sadaka lali Jou Lahatalla I, mali gagaw ta rtapngo i sadakaca, ga oras ciana mew wlomew yaneto en smat ta wlorina mayai mali mewi, 24mewe fateam su nimew sadaka aiwani tina mali gagaw cia nbona. Taga ffan lali smatca bo famafio mew su re i, taga flolai fpo nimew sadakana lali Jou Lahatalla i.
25Okosesi nesa hawe, laisa en smatna du mew fsal, gabe bo dute mew lali hakimna, mew nane fatoale famafio mew su oras ta mali lalingca fapaluan. Ningalena gabe laisa famafio mew pa, ta molangna osta rfabo mew lali hakimna. Taga hakimna rpo mew lali smat ta njaga buica, taga smat cia nfasunga mew bui. 26Flolam famafia, mew osta fsapang pa mali buica gabe laisa fpalase ndumi paube ahai ta hakimca ncula fpalasna.
Mati fyal salna
27Mewe fto to fatfato tae, ‘Mati flokolo smate ni uatna fare smate ni ngolona.’ 28Ga Ya bo ikuwa mew, gabe laisa en manna dem maping ga mali wlona nlokolo i fare bo namtuli re i, tina laisa re nyal sale to. 29Poko be mta mew welana denabe mew fderera Ya panto, ffablelate to bo ftopa mta mew tina! Ta mafiana mta mew pao mnyangis ga Jouca nfasale mew pa, biare ga mta mewna ntotim ga nimew badanca farumi i rtopa i lali narakaca. 30Gabe laisa kakamo mew welana npei denabe mew ndadi fbaradosa, fkati to bo ftopa kakamo mew tina! Ga ta mafiana kakamo mew paona mnyangis, biarega kakamo mewna ntotim ga nimew badanca farumi i ncung naraka.”
Mati ffatalakna
(Mat. 19:9; Mrk. 10:11-12; Luk. 16:18)
31Yesuse nu hawe, “En fatfato nesa hawe laitane, ‘Ise ga ntalake ni ngolota, i nane npo surat talakca lali ni ngolota i.’ 32Ga Ya bo ikua mew e, manca bisa ntalake ni ngolota gabe laisa ni ngolota nyal cal mali mane nesa. Gabe enpa, ga man cia ntalake ni ngolota, tina i npei ni ngolo cia ndadi ncal mali Jou Lahatalla nbona. Ningalena, gabe maping ta ntalak i to ca nfasaw hawe re mane nesa, tina laisa re maping cia nlokolo mane nesa ta i ni uat i pa, gabe man ta nfasawa ica ncal bena mali Jou Lahatalla nbona, ningalena man cia ma nlokolo mapinge nesa ta i ni ngolo i pa.”
Mati fsasina
33Yesuse nu hawe, “Mew flonga to fatfato isa hawe ta ite hma re bbur tantubana rduk i, laitane, ‘Mati fcapial sasina. Gabe laisa mew fsasi fu Jou Lahatalla, mew nane fpei sasi cia.’ 34Ga Ya bo ikuwa mew, mdel pa ta bo fsasi! Mati fsasi fu ‘langit cana’, ningalena langit cia Jou Lahatalla ni karapesa i bo nkawasana. 35Mewe ma mati fsasi fu bumi cana, ningalena bumi cia Jou Lahatalla ni gagaw i bo nfatige ficona. Mewe ma mati fsasi fu bendar Yerusalemna, ningalena bendar cia Jou Lahatalla ni i, I cia Kolano ta nmamagal. 36Mewe ma mati fsasi fu boboko mew nana, ningalena mew nimew kawasa pa, bo fpei fa bubulang pene pa fa gogo nimew utana biarega cicapo isa.
37Gabe laisa fatutua, fu, fatutua, gabe enpa fu enpa, ningalena gabe laisa mew funa foloi mali tina, tina mali setanna riri kolanoca mali.”
Fbalco si ta mafia smat ta wlorina mayai lali mewina
(Luk. 6:29-30)
38Yesuse nu hawe, “Mewe ma flonga to sogaro ta nu laitane, ‘Gabe en smat ta rfamayai mtamewna, mewe ma fbalco i ffamayai mtana. Gabe en smat ta rwogale fmomewna, mewe ma fbalco i fwogale fmona.’ 39Ga tane Ya bo ikua mewe, gabe laisa smatna rpeo mew okosesi ta mayai, mew mati fbalco si ta mayaina. Gabe laisa ise naspakale ngengeo mew welana fpo hawe ngengeo mew balitna. 40Fare en smatna rtuntute mew mali pengadilanna bo i nuntunge mew nduke nimew kabayaca, mew fpo hawe nimew jubaca lali. 41Gabe laisa en smatna rpaksa mew fpapa riri ginana laona kilo pusa, mew fpapa to bo fan fbang kilo fapusa hawe bo ndadi kilo pilu. 42Gabe laisa en smatna rdoro mew okosesi, mewe fpo si to ahai ta si rdorna. Gabe laisa smatna rbawi okosesi mali mewi, mewe fbawo si to.
Fgogoru nimew musuna
(Luk. 6:27-28, 32-36)
43Mewe flonga to fatfato ta nu laitane, ‘Mew nane fgogoru nimew del delona, fare nimew le musuna.’ 44Ga tane Ya bo ikua mew e, mewe nane fgogoru nimew musuna, fare fsombayang si smat ta jaga rfakangela mewna. 45Gabe mewe fpei laina, tina mew ffaem ga mew Apa ta mali sorogaica ntuna. I ta npei wolca bo nfaplangno smat ta wlorina mafia fare ta wlorina mayai. I bena ta nfadurea ulan mali smat ta rpei okosesi ta molang fare smat ta rpei okosesina molang pa. 46Gabe laisa mewe fgogoru be smat ta rgogoru mewna, ahai ta mewe bo fdukna? Mati fmaulango fu Jou Lahatalla bo nbalase nimew mafianana. Smat ta nfayalo pajakca nbaradosa ga si ma rgogoru smat ta rgogoru sina. 47Gabe laisa mew fu tabeana lali nimew del-delona be, mati fmaulango Jou Lahatalla ntaile mewna. Ningalena, smat ta rfayala Jou Lahatalla pana bere rbalco tabea lali smat ta du tabea lali silina. 48Ga mewe nane fgogoru farumi smatna re tutuo, laisa mewe nimew Apa ta mali sorogaica ta n'gogoru farumi smatna re tutuo.”
Currently Selected:
Matius 5: BZQ
Highlight
Share
Compare
Copy
Want to have your highlights saved across all your devices? Sign up or sign in
2026 Indonesian Bible Society
