Markus 3
3
Yesuse nfamafia smatna neta wol Sabat
1Fola tina, Yesuse nlolai hawe lali ebai sombayang agama Yahudina. Mana en smat isa kakamo paona nmat. 2Fare en bena smat Yahudi ta rderera fatfato farisi. Si rningningo be Yesus. Gabe laisa Yesuse bo nfamafia smat cia mali wol sabat, wol ta smat agama Yahudina rkarajan pa tina, si rduk lalinge bo rfasala I. 3Yesuse nua smat ta kakamo pao nmatca laitane, “Mosal mali ta Ya i bo tane.”
4Gabe Yesuse nfautno smat ta en manana, “Gabe laisa tderera fatfato ta en mali Musa ni kitab silim tasa, manca ta ite bo tpeina mali wol sabatca? Tpei okosesi ta mayai pare tpei okosesi ta mafia? Tfasalamate smat pare tpune smat?” Ga si liori pa.
5Yesuse wloyancusa ningalena si wlorina cicoal. I natngalo ndumi si fare nbasamna ntole, gabe I nua smat ta kakamo pao nmat cia, “Mpo mali kakamomna.” Fare smatca npo kakamona, tina to kakamona mafia. 6Oras tina to, smat Yahudi ta rderera fatfato Farisina rcapang mali Ebai sombayang cia tina to si rfator re kolano Herodes ni smatna bo rpun Yesus rfamati.
Smatna lal rderera Yesus
7Yesuse I re ni muritna rdirak si mali smat laloca, taga rfan lali talaga Galilea. Ga smat mali batang Galileana lal rderera I. En bena smat mali batang Yudea, 8bendar Yerusalem, batang Idumea, fare mali batang waya Yordan pulipao, fare mali bendar ta en mali Tirus fare bendar Sidon. Si tina rderera Yesus sube, ningalena si rlonga to ahai ta I npeina. 9Smat ta rlafona lal, denabe Yesuse ncula ni muritna rfasadia pelang asa, bo I ncapil, bo mati I nfakoskoso I re smat lalo cana. 10Ningalena, I nfamafia smatna lale to, gabe smat ta dowilna lal hawe rlafo rfakoskoso si lali ningalena bo dice I. 11Laina bena smat ta setane ncung sina laisa dem Yesus, tina to si rlu nap Yesuse nbona, taga rgigam, “Awe to Jou Lahatalla Ntu Aw.”
12Ga Yesuse nfabinga si, “Mdel pa ta bo ffabinga smatna, Ya ise.”
Yesuse nololaw ni murit yafasa re silu tasa bo rderera I
13Fola tina, Yesuse ndawil nais lolas isa. Mana, I nololaw si ta I nfisang si tona, gabe si rlafo lali. 14I nfisang smat yafasa re silu bo rfarerer re I, fare I bo ncula rfane bo rfabinga smaatna Jou Lahatalla ni Abar Mafia. 15I ma npo si kawasa bo silema rfaungo setan.
16Smat yafasa re silu ta Yesuse nfisang si tasa ngahnyorina tane: Simon (ta Yesuse nfanganyo i Petrus), 17Yakobus i re tenoca Yohanes (Zebedeuse ntu si), Yesuse nfanganyo smat silu tasa, ‘Boanerges’, ta ni ngalena liorina mamagal laisa dubna, 18Andreas, Filipus, Bartolomeus, Matius, Tomas, Yakobus (Alfeuse ntu i), Tadeus, Simon (ta bo nfaungo smat Roma ta rkawasa mali riri batang Israelna), 19fare Yudas Iskariot (ta bo nwage Yesusca).
Smatna du Yesuse nfaungo setanna npake Beelzebul
20Fola tina, Yesuse ncung mali ebai isa. Mana, smatna lal ta rlafo rfayalo si hawe, denabe I re ni muritna bisa rceli pa. 21Oras ta Yesuse teno re ramana rlonga tina, si rlafo bo jal Yesus, ningalena smatna du Yesuse wlona tengtengan pa.
22Guru agama ta rto Musa ni kitab silim tasa rlafo mali Yerusalem, taga du laitane, “Smat tae Beelzebule setanna riri kolanoca, tina ta npei denabe I nfaungo setanna!”
23Yesuse nololaw guru agama Yahudi tina, taga nmauting re si npake andeande laitane, “Mfalaisa ga setanna bo rfaungo setannana? 24Gabe mali kerajaan isa rfakotale be ga rfasaksake si, ta molangna kerajaan cia osta namjakam. 25Gabe laisa man re maping ese rfakotale ga rfasaksake si, ta molangna riri fasawca osta nmayai. 26Laina bena re setanna riri kolanoca. Gabe laisa setanna riri kolanoca nfakotale re ni wawai setanna, si osta rfasaksake si. Fare setanna riri kolanoca ni karajanna bo mjakam fare mnyei.
27Andeande laitane, smatna isa pa ta bo ncung mali smat ta ncicoalca ni ebaica taga nloise ni aratana. I nane npitane smat ta ncicoalca su taga nloise ni aratana.#3:27 Smat ta ncicoalca tina, setanna riri kolanoca. Yesuse nu laina, ningale I be ta nfoloi mali setanna riri kolano cia, I be ta nafena npitan ina. Laina bena, Yesus ta bisa nfaungo setanna ta ncungo smatna.
28Mewe flonga famafia e, farumi dosa ta smatna rpeina nduk ampung sube, laina bena fare ta du mauting ta mayai lali smatnana rduk ampun sube. 29Gabe smatna du mauting ta mayai lali Jou Lahatala ni Rohca, i osta nduk ampung pa denabe lali, ningalena i npei dosa ta bisa nduk ampung pa.” 30Yesuse nu laitane, ningalena si du, I setane ncungi.
Smat ta npei Jouca ni karajanna, cia Yesuse ni smat i
31Oras ta Yesuse nfafcule, I hma re tenona rlafo. Oras ciana si dosal po talil, si rcula smatna dololaw Yesus. 32Mali ebai ciana, smatna lal rtotolang jel Yesus. Gabe si dua Yesus “Apa, hma re tenomna si po talil, bo rfaduduk re Apa.”
33Ga Yesuse nua si, “Ya hmak re tenokna ise i ga?”
34Yesuse natngalo si smat ta rtotolange jelina, fare nu laitane, “Farumi mew tane Ya hmake re tenoke mew! 35Ningalena, ise npei ta Jou Lahatalla nfasulana, i cia to Ya, hmake re tenok si.”
Currently Selected:
Markus 3: BZQ
Highlight
Copy
Compare
Share
Want to have your highlights saved across all your devices? Sign up or sign in
2026 Indonesian Bible Society
