1 Korin 11
11
1Na Krais mabuno siragl mere erukwa i kandre, duglo boglka pre ene ama na mabuno erika i kandre, duglo bolo.
Pol ye abu bitno tu sinaiglkwa pre dugwa
2Na okna ene meglmara kogon siragl mere ersre, ka siragl mere ene beke teiga i, ene pre gi di mogl, duglo bune digwa pre na ene di wakai yei teiga. 3Ana erme na ka kor ta ama ene beke tebo, praiglmedi prika i, yegl paugwa, God ye Krais bre moglko, Krais ye no yagl munga i bitno moglkwa. Te, yagl ama ye ebinoma meglkwa i bitno meglkwa. 4Yegl paugwa pre yagl ta ere mogl, abu bitno tu simere yegl mere, ye bre tu sidre, kamage erabuka mo God kamo ta kep ere dinan, agai panabuka. Yagl ta yegl eran, Krais, ye bre moglkwa i, agai gorabedi erukwa mere yegl paugwa. 5-6Te, abu ama ere mogl, yagl bitno tu sikrimere mere yegl, bre tu sikre, yoko yenan, kamage erabuka mo God kamo kep ere dinabuka i, ye wie agai gorabedi erukwa. Abu ta bre tu sinabuka i mane di pran, ye yagl bitno yugu guko edimere yegl, guko edo do! Ba abu ye bitno yugu bagl sugunagle edenabuka mo guko edenabuka i agai panabuka pre ye bre tu sidre keme kamage erabo mo God kamo kep ere dinabuka kuno erukwa.
7-9Ana God okna ibo yoba ye moglmere mere yegl moraiglmedi beke yogwa i, ye abu komono kana beke yedre, abu i dagigle yobuglo idre, yagl beke yei, abu ake ple di tenabedi beke yeikrukwa. Ye yagl komono kana beke yei, yagl dagigle yobuglo idre, abu ye yagl ake ple di tenabedi beke yogwa. Yegl pre yagl ta ere mogl, ye God siragl mere moglkwa i, i nogugl edidre, kagie kade tenabuka i, ye bre tu sikre keme kamage ere, God kamo kep ere dinabuka i wakai paugwa. Abu ama ye wie kagie ere kide erekre, ake mitna edenagledi pran, ye bre tu sinabuka paugwa. 10Mabuno yegl paugo, te angelo ama nono kan meglkwa pre abu ere mogl, ye winoma meglmara mogl atne edumnedi i nogugl ede, bitno tu sinaiglkwa paugwa.
11Na yagl ye ebinoma bitno meglkwa pre ebinoma mogl atne edenaiglkwa pame diga ba nono ama pre pogl sinamga. Nono yagl ya abu munga i, Yagl Kade gumuglo mina kuno munga. Yagl yene swara meglbi, kuno erekrabuka. Te, abu yene swara moraiglkwa ama kuno erekrabuka. 12God nono yoba mudu beke yogwa i, ye yagl komono kana bekidre, okuo dagigle yobuglo ta idre, abu beke yogwa pre abu ye yagl mina pare meda ugwa mere yegl paugwa. Yegl paugwa ba erme yagl mudu munga i, abu nono no kiglko, munga pre nono yoba mudu abu mina pare umga mere yegl paugwa. Yegl pre nono kuno keme munedi pramga.
13Ana ene siragl we di prime? Abu ta bre tu sikre, kamage erabuka i, kuno erumedi primo? 14No yagl mogl pere edumgo, abu mogl pere edigwa i, nogugl pamedi prika. Yagl ta ye bre yugu kanige eran, abu bitno yugu umere yegl olto ta unan, yagl i agai gorabuka mere yegl paugwa pre ye bre yugu bagl sugunagle edidre, bre tu sikrabuka i kuno erukwa. 15Ba abu bre yugu olto panan, yoba wakai kanaiglkwa. God ye abu bre yugu olto sinabedi togwa pre ye bre yoko yekran, ama tu sinabuka i kuno erukwa. 16Na abu bitno tu sinaiglkwa pre diga i, ene tau mane di pribi, na ene yegl di tenaglka, no Jisas dedugwa yoba munga i ya te, God yobama bage bage makai sigwa i, no mudu yegl prumga, abu ye bitno tu sidre keme kamage eraiglkwa i kuno erumedi, no mudu yegl prumga.
Jisas goglkwa i poglo di pramnedi bret buko di neigwa i pre dugwa
17Ana erme ene siragl mere makai sinaiglmere i pre ka tau ene beke tenaglka. Ene siragl mere makai sigwa i, na prika pre ene wakai erime dikraglka. I siragl pre ene akie makai sigwa i, enene ikne ikne ere wakai eramnedi makai sikre, enene ikne ikne ere kide eramnedi makai sigwa. 18Yoba ka swara ta digo, prika i, ene makai simara i, ene deno muduno swara yeikre, pere pere yogo, yugobuno pere pere mere yegl meglme digwa. Yegl digwa i, ene mabuno tau erimere mere kuno dimedi prika. 19Ene yugobuno pere pere mere yegl meglkwa i wakai ta paikrumedi prika ba mabuno yegl ene meglmara plau dugwa i, kuno erukwa. I siragl pre ene yugobuno pere pere mere yegl meglbi, yoba ira God ye eraiglmedi prumere erikwa i, okuo u nogugl enan, kanaiglkwa.
20Ana ene makai sigwa i, Yagl Kade nono pre goglkwa i poglo di pramnedi bret ya wain nenaiglkwa i pre makai sumnedi prikwa ba na prika i, ene i pre makai sikrimedi prika. 21Ene kaya mokna akie neigwa igne, ene tau kaya mokna yubu si, agroma abarama tau tekre, enene tabre ne kodigo, ye tau kidan gogl meglkwa. Te, ene tau wain kunabe nekre, mere kide ne, spak ere, agroma abaroma tau kidan gogl meglkwa i tekrikwa. 22Ene mabuno i, kide kaima erikwa. Ene enene pere mogl, kaya mokna ya wain nenamnedi pribi, enene kipaimara yugugl mogl, nenaiglkwa i kuno erabuka. Ba ene agroma abaroma ye God yobama meglmara i, ene ye kan yage, ye goduglme meglmiwa, agai goraiglmedi erikwa. Ene tau yegl erikwa pre ene mabuno erikwa i wakai erime dikraglka. Ene kide erikwa pre kide kodio!
23Nono siragl mere bret ya wain i nenamga i, nono Yaglno Kade di naruko, na ene di te kodiga. Yoba ta nono Yaglno Kade Jisas kudamo ikne ogono mina yenabuka eduer swara i, Jisas ye duglo beglkwa yagl bogl kaya mokna ne meglko, Jisas bret ta idre, 24God di wakai yei te, ake buko dugwa. Ye bret ake buko di, duglo beglkwa yagl tedre, yegl dugwa, Bret i, na nagna mere yegl yogwa. Na nagna ene pre bogl bagla dinabuka. Ene erme bret tebo, nenaiglmere mere yegl, okuo ama na poglo di pramnedi ne pai molo dugwa. 25Jisas yegl dugo, ye duglo beglkwa yagl bogl kaya mokna akie ne kodigo, ye ama kap swara ta wain nuglo atne moglkwa idre, yegl dugwa, Wain nuglo i, na bormaina mere yegl moglkwa. Na bormaina i mina God ka kor ta ene meglmara plau dinabedi ka kaima ene di te paduglkwa i, kaima plau dinabiwe dugwa. Ene okuo kap yegl idre, wain nuglo akie nenaiglkwa igne i na poglo di pramnedi neo di, yegl dugwa. 26Ana ene akie bret ake buko di nedre, wain nuglo nedre, erikwa i, ene nono Yaglno Kade nono pre goglmiwe di, i nogugl edigwa. Ene aimadi yegl ere meglbi, Jisas okuo ede ikne unabuka.
27Ana mabuno yegl paugwa pre ene bret ya wain nuglo nono Yaglno Kade na poglo di pre moraiglmedi, Neo dugwa i gua gua nedre, agroma abaroma ere kide ere teigwa i, ene Jisas bormaimo suru edugwa i, ya ogo nagie bagla dugwa i taragl kebra mere yegl yomedi i nogugl edigwa pre ene Yaglno Kade ere kide ere teigwa. 28Yegl pre ene komono kana nomano siragl mere paugwa i, ya agroma abaroma mabuno ere teigwa i ake kun ersre, bret ya wain i nenaiglkwa paugwa. 29Yoba tau ye agro abaro bogl Yaglno Kade yugobunomo swara kaima munedi prikre, bret ya wain i gua gua nebi, ye God no sinabedi erikwa. 30Ka kaima ene tau erme kide ene sugo, yobuglno paikrukwa ya te, yoba tau ene meglmara geglkwa i, ene mabuno yegl erikwa pre plau dugwa.
31Ene agroma abaroma ere kide ere tedre, gua gua erikwa pre God ene ere sugwa ba ene nomano ya mabunono na dimere yegl ake kun ersre, bret ya wain i nebi, taragl yegl ta plau dikrabuka. 32Nono mabuno kide erumga igne, Yaglno Kade ere mogl, nono ere si di inagledi erukwa i, kuno erukwa. I siragl pre ye erme nono ere sinan, nomane kor inamga pre erukwa ba ye okuo yoba meda meglkwa i ka tage tenabuka igne, nono akie ta ka tage norokrabuka.
33Yegl paugwa pre agrama abarama wagle ene akie makai sidre, kaya mokna nenaiglkwa i, okna okuo nekrio. Ene sugl mogl, kaya mokna yubu sidre, akie neo. 34Ene kidan geglbi, enene kipaimara yugugl mogl, kaya mokna nedre, okuo u makai sinaiglkwa. Ene yegl erekre, mabunono okna pamere pai moran, ene God no ere sinabedi makai sigwa mere yegl panabuka.
Te, ene kira tau ama pame digwa i, na okuo ene meglmara udre, ene di tebo, praiglkwa.
Currently Selected:
1 Korin 11: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission