1 Pita 1
1
Pre mediglkwa yoba bage bage meglkwa i, Pita wakai we di togwa
1Na Pita, Jisas Krais dedugwa yagl ta moglka i, pepa i bogl, ene God yobama wan wan kua mere meglkwa i, teiga. Ene provins Pontus ya Galesia ya Kapadosia ya Esia ya Bitinia suna wan meglkwa i, bogl teiga. 2Neno Kade God taragl mudu plau dinabere pre kan ere kodidre, ene kere i pere edugwa. Te ye Murubuglomo ene du moraiglmedi eruko, ene Jisas Krais bormaimo mina nigl bugltre, Jisas duglo beglkwa.
Ana God ene ere wakai ere tedre, deno muduno wida di padigl togwa i, ege ege ede u podo enabedi prika.
Taragl wakai wakai okuo inamga paugwa
3Ana nono God kagie kade tenamga paugwa. I siragl pre ye nono mitno podo goglsre, Jisas Krais adigl u kor omara i mina nono ama u kor enaiglmedi ersre, te nono taragl wakai wakai inamga i, praiglmedi pre erukwa. God Nem nono Yaglno Kade Jisas Krais Godmo moglsre, ye Nem moglkwa. 4Taragl wakai wakai nono okuo inamga i, bugl kide ere, wau ta boglkrabuka. God yene taragl wakai wakai i, ene inaiglmedi heven ibo yei te kodugwa yogwa. 5Ene Jisas pre mediglkwa pre erme God yene yobuglomo mina ene kugl bogl te moglkwa. Te, God ene wakai kaima moraiglmedi ere yugwa i, ege okuo kaima ime i nogugl edenan, ene kanaiglkwa.
6Ana okuo God taragl wakai wakai nono noragle dugwa i, ene poglo di prisre, gun podo yeigwa. Erme ene ege sugunagle yubun kane kane idre, kide praiglkwa paugwa ba ene ama taragl tau okuo plau dinabuka i poglo di prisre, gun podo yei meglkwa. 7Gol wakai yenabedi doga mina gaglsre, pipia ere edigwa ba gol aimadi u kide pi pai morabuka keme paugwa pre gol taragl kebra yogo, ene pre mediglkwa taragl kade paugwa. Ene erme yubun kane kane imara i, God ene pre mediglkwa gigle dumo mo dikrumo mo di, ene ta eribi kanagledi erukwa ba ene pre mediglkwa i gigle dumedi i nogugl edibi, Krais unabuka igne, ye ene gun yei tedre, kagno kade te, debino sinabuka pre ene pre mediglkwa i, taragl podo paugwa.
8Jisas Krais moglkwa i, ene ye ta kankrikwa ba ene ye deno muduno teigwa. Kaima ene erme ye ta kankrikwa ba ene ye pre medigl moglsre, gun podo kide kaima yei meglkwa. Ene siragl mere gun podo yeimere i, mudu dinaiglkwa kuno ta erekrukwa. Podo pai moglkwa. Ba ene gun podo yeigwa i, gun mabuno mudu egre atne edugwa. 9I siragl pre ene Jisas pre mediglmara i pre God ene wakai moraiglmedi ene ere i moglkwa.
10Ana God ene erme yoko kaima ere wakai ere togwa i, God kamo kep yoba okna meglkwa i, yegl erabedi bogl atne edigwa ba God ene ere inabuka ka i, yene ama pre pogl sinamnedi kira poglsre, dokigwa. 11Krais Murubuglomo i, ye ka kep yoba okna meglkwa i, deno muduno suna moglsre, ye di te, Krais okuo giugl kane kane prisre, mokomugl i kagie kade inabiwe di, yegl di togwa. Ye yegl di togwa ba ka kep yoba i, ye mem siragl mere pre dugwa ya taragl i aunake plau dinabuka i pramnedi prikwa. 12Ye pramnedi prikwa ba God ye i nogugl ede togwa i, ye ka beglkwa i, yene pre pogl sinaiglkwa pre boglkrikwa ba ene erme meglkwa i pre pogl sinaiglkwa pre beglmedi, i nogugl ede togwa. God ye Mudu Murubuglo dedugo, ye heven ibo kide kodo, ede atne u, yoba tau yobuglo bogl togo, yoba i ere mogl, God ene siragl mere ere yugwa ka i, ene di teigwa. Te, God ene siragl mere ere yugwa ka i, angelo ama pre pogl sinamnedi prikwa.
God nono topo si ikne edugwa pre mabuno du eramga paugwa
13Yegl paugwa pre ene ye kogonmo eramnedi nomano mina ake kun ere moglsre, yomere pamere mogl pai erio. Te, Jisas Krais okuo plau didre, yoko kaima ere wakai ere norabukra we di, nomano mina pre gi di molo. 14Gak tau neno manoma kano prikwa meglmere yegl, ene moraiglkwa paugwa. Ene okna God moglkwa i pre pogl sikre, taragl kane kane deno muduno mina pogglau boglkwa i, duglo beglkwa ba ene erme yegl ta ere moglkraiglkwa paugwa. 15Ba God, ene agle di suna edugwa i, ye yagl du kaima moglkwa pre ene mabuno kane kane ta eraiglkwa i, mabuno du keme eraiglkwa paugwa. 16I siragl pre God kamo ta okna beglkwa i, yegl dugwa,
Na yagl du kaima moglka pre ene ama yoba du moraiglkwa pamiwe#1.16 Tawa Teigwa Yoba 11.44
di, yegl dugwa.
17Ana ene God agle di prisre, Neno we digwa God i, nono swara swarade kogon erumnere mere ye kan yubu sidre, mabuno kuno keme ere norukwa yagle moglkwa pre ene ege sugunagle makandigle wan moraiglmara i, ye kuduglmo goglsre, mabuno ta eraiglkwa kuno erabere mere yegl erio. 18Enene prikwa i, okna ene nenoma ene mabuno tau eraiglmedi beke teigo, erikwa i, mogo wakai ta koglkrukwa. Ana mabuno i mina ene atne mogl dinaiglmedi God ene topo si ikne edugwa i, ye taragl ta bugl kide erabuka, silva mo gol mo ki ta idre, ene topo si ikne edekrukwa 19ba Krais bormaimo, wakai kaima yogwa i mina ene topo si ikne edugwa. Krais ye sipsip wakai, kide ta sikruko, ogo nagie mina num ta dekrukwa mere yegl moglsre, bormaimo suru edugwa.
20Ana Krais ene topo si ikne edugwa i, God ye dumo makan ere yeikrukwa igne, kogon yegl erabedi pre kan ere kodugwa ba erme taragl mudu dudunabuka magigl erukwa igne, Krais ene ake ple dinagledi ede nogugl ugwa. 21Te, Krais erumara i mina ene God pre mediglkwa. Krais goglkwa ba God moglkwa i, Krais ere i kor edidre, kagie kade togwa. Yegl pre ene God pre medigl moglsre, ye okuo taragl wakai wakai norabedi sugl meglkwa.
Deno muduno te ikne ikne edinamga paugwa
22Ana ene God kamo kaima paugwa i duglo boglsre, agroma abaroma deno muduno kaima teimara i, ene enene nigl paigwa mere yegl paugwa. Yegl pre ene deno muduno ikne ikne podo te molo.
23Yoba kaya mokna ere yaiglko, pare wi sumere mere yegl, ene u kor pi kodigwa. Ba kaya mokna yubo ta bugl kide erabuka i mina ene u kor pikrikwa. Kaya mokna yubo ta kide erekrabuka i mina ene u kor eigwa. Kaya mokna yubo i, God kamo kor moglsre, aimadi kamin yei pai moglkwa i pre diga. 24Ana God kamo bage ta yegl dugwa,
Yoba meglkwa i, kugl kan tabre yaminudre, goglmere mere yegl, tabre geglkwa. Te, kugl kwie tabre yage sumere mere yegl, yoba kagno kade igwa i, tabre ede atne ogwa. Kugl yamunugo, kwiemo yage sugwa 25ba Yagl Kade kamo i, aimadi kamin yei pai moglmiwe#1.25 Aisaia 40.6-8
dugwa. Te, yoba ka wakai ene di teigwa igne, ye God kamo aimadi kamin yenabuka swara i, ene di teigwa.
Currently Selected:
1 Pita 1: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission