1 Samuel 16
16
Samuel ye Devit king morabedi kugo nuglo bre mina toide edugwa
1 Ana Yawe ere mogl, Samuel yegl di togwa, Ene den mudn yubun dogo, Sol mirie goglnga i, kodo! Na ye Israel yoba kingno okuo ta moglkrabedi mane diga. Yegl pre ene sipsip kumugl bre yobuglo yenga i mina kugo nuglo koglsre, ede dumo Betlehem pi, yagl ta kagie Jesi we digwa i moglmara enatnga. Na ye wam ta na kogonana ersre, king morabedi kere ie di, yegl dugwa. 2Yegl dugo, Samuel di ikne ede, yegl dugwa, Na siragl mere enagle? Na kugo nuglo Jesi wam ta bre mina toide edenagledi ebo, Sol prisre, na na si gorabiwe dugwa. Dugo, Yawe ye di te, yegl dugwa, Ene kau abai ta idre, ede enatniwa. Ene pidre, yoba di te, Na Yawe tawa tenagledi ede wie di, yegl dinatnga. 3Te, ene tawa naratnara Jesi akie enabugledi di gagln, ye wama bogl ebi, na ye wam ta ene obuno di tenaglka. Na ene obuno di tebo, ene wam i king morabedi kugo nuglo bre mina toide edinatniwe di, yegl dugwa.
4Ana Yawe ka yegl dugo, Samuel ye dumere ere, ede dumo Betlehem ogwa. Ye ogo, yagl kade dumo i meglkwa kudugl goglsre, ogono nagino nuglo didre, ye umara tegigl yenamnedi pi, Samuel yegl di prikwa, Ene no kipamnara unga i we, no ere kide ere noragledi uno mo ere wakai ere noragledi une? di, yegl digwa. 5Yegl digo, Samuel di ikne ede, yegl dugwa, Na ene ere kide ere tenagledi ukrika. Yawe tawa tenagledi wiga. Enene ake kun ersre, na tawa tenaglmara ede wio! di, yegl dugwa. Yegl didre, ye ama Jesi wama bogl yene ake kun eraiglmedi di tedre, Na tawa tenaglmara ede wio! dugwa.
6Ana Jesi wama bogl ede pi Samuel tawa tenabara eigo, akie meglkwa. Akie meglko, Samuel Jesi wam ta kagie Eliap we digwa i kandre, Jesi wam Yawe gumuglo wagle adigl moglkwa i, Yawe kere yugwa pamiwe di, yegl di prukwa. 7Yegl di prukwa ba Yawe ere mogl, Samuel yegl di togwa, Yagl i yagl olto moglkwa i ya wakai moglmedi kanga i prikro! Na ye king morabuka mane diga. Ene yoba ere mogl, yoba siragl mere meglkwa i pre yubu simere yegl na ta erekrika. Ene kan ogono gagno keme edigwa ba na we, na kan ye nomano ya deno mudno ime edie dugwa. 8Yegl dugo, Jesi ye wam ta kagie Abinadap di togo, ye Samuel gumamugl wogwa. Wogo, Samuel yegl dugwa, Yawe ene wan i ama kere ikrume dugwa. 9Yegl dugo, Jesi ye wam ta kagie Sama di togo, ye Samuel gumamugl wogwa. Wogo, Samuel aglke kor dugwa, Yawe ene wan i ama kere ikrume dugwa. 10Dugo, Jesi wam 4-pela yoko meglkwa i swara swarade di togo, ye swara swarade Samuel gumamugl weigwa. Swara swarade weigo, Samuel ye Jesi di te, Yawe ene wanma i ama kere ikrume dugwa. 11Yegl didre, Samuel Jesi di pre, Ene wan ta ama moglmo? dugwa. Dugo, Jesi di ikne ede, yegl dugwa, Na wana okuo kaima ta ukrukwa. Ye sipsipna sugl moglmiwe di, yegl dugwa. Jesi yegl dugo, Samuel aglke kor dugwa, Ene yoba ta dedin, ye agre yunabiwa. Nono ye pre sugl moramga. Ye unan, nono ame di, kaya mokna nenamniwe di, yegl dugwa. 12Samuel yegl dugo, Jesi yoba ta dedugo, ye pi, agre i ede ugwa. Ana Jesi wam okuo i nagie gogl mere koglsre, ogo nagie ya guma dra wakai koglkwa pre yoba ye wakai kanigwa. Ye ugo, Samuel ye kanugo, Yawe ye di te, yegl dugwa, Kumugl i pre diga. Ene ye moglmara pi, kugo nuglo yunga i ye king morabedi bre mina toide edo! dugwa. 13Yegl dugo, Jesi wam Devit we digwa i agiglema bogl akie adigl meglko, Samuel kugo nuglo sipsip kumugl bre yogagle mina kogl yugwa i ye bre mina toide edugwa. Ye kugo nuglo toide edidre, aglke ede ikne dumo Rama ogwa. Ana Devit we, Samuel ye kugo nuglo bre mina edugwa igne i Yawe Murubuglomo ye moglmara udre, yobuglo togwa. Te, Yawe Murubuglomo ye Devit moglmara kide kodokre, aimadi ye moglmara moglkwa.
14Ana Sol we, Yawe Murubuglomo ye moglmara kide kodugo, Yawe ere mogl, murubuglo kide ta ye moglmara pi, ye nomanemo ere kide ere tenan, Sol kudugl podo gorabedi ere edugwa.
Currently Selected:
1 Samuel 16: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission