2 Korin 11
11
Pol ya ka mabuno kibi digwa yoba i mabunono pai pere pere edugwa
1Na ka tau diga, ene wakai ere pre meglmere yegl, pre molo. Na prika, na nana kogona pre dikraglkedi prika ba erme ka ta dikraglka mere yegl tau dibo, ene pre moraiglmedi prika.
2Ana na erme ka tau dibo, ene prisre, nomane inaiglmedi prika i, siragl pre God prukwa i, ene ye moglmara swara mogl atne edinaiglmedi prumere yegl, na ama yegl prika. Yoba ere mogl, abai ta yagl swara ta moglmara enabedi di padiglsre, okuo ye i pi yagl i teimere mere yegl, ene mabuno kide erekre, du kaima meglbi, na ene i pi Krais tenagledi prika. 3Na yegl prika ba na tau kudugl goglka i, okna toki Ewa kina sidre, bakagl tomere mere yegl, yoba tau ene bakagl tebi, ene mabuno du ere mogl, Krais swara duglo bogl moramnedi prikwa i, kide kodo dinaiglmedi prika. 4Na yegl diga i, siragl pre na prika, yoba tau ene meglmara u ka kane kane digo, ene mogl atne edidre, kaima dimedi prikwa mere yegl pamedi prika. Ye Jisas kamo dumne didre, Jisas kamo pere ta no okna ene ta di tekunga i pre digwa mo Mudu Murubuglo, ene igwa i pre dikre, murubuglo pere ta pre digwa mo ka pere ta didre, ene Krais kamo wakai primere yegl ta dikrikwa i, ene mogl atne edidre, kaima dimedi prikwa mere yegl pamedi prika.
5Ba ene prio. Yoba tau ye Krais kogonmo yoba wakai kaima mune digwa i, ye mogl mitna edigo, na mogl atne ediedi ta prikrika. 6Yoba tau ka kaugo wakai kaima simere mere yegl, Pol ta si kankrume digwa i, kaima digwa ba na God kamo dimara i, na du erekre, pre pogl sidre, ene di teiga. Ene kaima kanimedi prika i, no ene meglmara u mabuno kane kane erumnara i mina God kamo siragl mere pre pogl sumga i, i nogugl ede tomgo, ene kanimedi prika.
Kaima no tau God kamo pre pogl sumniwe di, ene meglmara i nogugl ede te kodumga pre ene ama kanimedi prika.
7Te, ene siragl we di prime? Na ene meglmara wiga igne, na nana ake atne edidre, ene ake mitna ediga i, na aglau erumedi primo? Na diga i, yoba tau ene meglmara u ene ka beke tedre, ene migeno igwa ba na yegl ta erekrika pre diga. Na ene migeno ikre, God kamo wakai i, ene yoko kaima beke teiga. 8Jisas yugobunomo bage tau meglkwa i, mige nariko, na idre, ene wakai moraiglmedi kogon erika pre na yoba i, kunoglno neiga mere yegl paugwa. 9Te, na ene bogl akie mungo, taragl tau na moglmara yeikrukwa igne, na ene ake ple di nario dibo, ene yubun tenaglka mere yegl paugwa pre na yegl ta dikrika. Agroma tau provins Masedonia mogl wigwa i, na taragl ta inaglka pamere mere narikwa pre na kaima ene yubun ta tekrika. Te, erme ama, na ene yubun yegl ta tekraglka. 10Na Krais kamo kaima ake moglka pre na ene ka kaima di teiga, ene dumo Korin provins Akaia suna i migeno ikrika i, wakai eriedi prika pre yoba swara ta ene meglmara, no migeno inga motne ta dikraiglkwa. 11Ba na ene migeno ikrika i, ene siragl we di prime? Pol no wakai kankrukwa pre no migeno ta ikrumedi primo? Ta manugwa. Na dena muduna siragl mere ene teiga i, God pre kan ere kodugwa.
12Ana na ene migeno ikre, God kamo ene yoko beke teimere yegl, beke te moraglka. I siragl pre yoba tau Krais kogonmo yoba mune digwa i, no munere yegl mere ye mune digwa ba na ene migeno ikre, mogl pai moglbo, ene kanaiglkwa, ye mabunono ya na mabunona pere pere pamedi kanaiglkwa. 13Yagl wagle i, ye Krais dedugwa yoba mune digwa ba ye ta moglkrikwa. Ye kogon yoba kibi moglsre, ene bakagl teigwa. 14Ba ye yegl erikwa i, nono nagino ta koglkramga. I siragl pre Satan moglkwa i, yoba bakagl tedre, ye angelo wakai ta, abuglage sugwa mere yegl, na yegl moglmedi kanaiglmedi erukwa. 15Yegl pre ye kogonmo yoba meglkwa i, ye erumere yegl ersre, yoba no kogon yoba wakai mogl, mabuno du erimedi kanaiglmedi eraiglkwa i, nagino ta koglkramga. Ba yoba i mabuno kide ere meglkwa i, God okuo ye erimere kuno yegl mere ere te ikne edenabuka.
Pol ye yubun mere idre, Jisas kogonmo erukwa
16Na aglke kor dagl dinaglka i, na ka kaima du erumedi prikrio. Ba ene yegl ta pribi, pra, na du ka tau didre, kagna ake i mitna edenaglka i, kanige erio. 17Dinaglka i, Yagl Kade dra idre, ta dikraglka ba yoba ta du ere, yene kagie ake mitna edumere mere yegl na dinaglka. 18Yoba tau mere yene deno muduno goglo paugwa i duglo boglsre, yene kagno ake mitna edigwa pre na ama nana pre ka tau dibo, praiglkwa.
19I siragl pre ene enene nomano podo pamedi prikwa ba ka kibi digwa yobamo i u yene kagno ake mitna edigwa igne, ene ye kaima dimedi prisre, kano prikwa. 20Yoba i ene bakagl tedre, taraglno mudu idre, ene si kane sigwa ba ene ye meglmara mogl atne edidre, ye kano pre pai meglkwa. Te, ye yene mogl mitna edidre, ene gumano drano mina agl dage sigwa mere yegl paugwa ba ene ye kano pre pai meglkwa. 21Yoba i mogl mitna edigo, no mogl atne edumgo, erukwa i, aglau ta pamo? Mo, na i pre agai goraglo? Enene pre yubu sio!
Ana yoba tau kudugl goglkre, yene kagno ake mitna edigwa i pre pra, na ama yegl eribo, kuno erabuka. Na ka yegl diga i, du mere yegl diga ba ene prio. 22Yoba i, Hibru yoba mune didre, dumo Israel mogl, umne digwa i, na ama Hibru yoba ta moglsre, dumo Israel mogl wiga. Ye Abraham gawama mune digwa i, na ama Abraham gawamo ta moglka. 23Na Krais kogonmo podo ersre, ege tau mere kane yugu moglsre, yoba i egre atne ede kodiedi prika ba na aglau ere prikana. Ye Krais kogonmo yoba mune digwa i, na ama ta moglkriada. Yoba ege siramna ta na ere sigwa i, na kerinaglka kuno ta erekrukwa. Te, na ege mere goglka baka dugwa. 24Juda yoba ye yoba ege 39-pela taim duglnai sigwa mabuno i, na moglmara ege 5-pela plau dugwa. 25Ege suota yoba kuba mina na sidre, ege swara ta kobuglo mina na sigwa. Te, na sip mina waniga igne, ege suota sip ede nigl atne ogwa. Ege ta mudu etne ya eduer akie, mudi nigl tebe nigl kuba si moglka. 26Ege mere na konbo ede eglke eglke eiga. Te, ege tau na nigl baiga igne, nigl na si kake i ede ogwa baka dugwa. Kunogl gogl yoba ama na sinamnedi eriko, nana yobanama, Juda yoba meglkwa i ama na sinamnedi eriko, te, yoba yugobuno pere pere meglkwa i ama na sinamnedi erikwa. Na dumo kade ta moglka igne mo dumo wau yomara moglka igne, na goglka baka dugo, mudi nigl mina waniga igne ama ege tau mere goglka baka dugwa. Yoba tau na agrama mere yegl muniwe didre, na ere sinamnedi eriko, 27na ama kogon podo ersre, yubun podo iga. Na ege mere eduer ugl paikre, kidan goglsre, nigl goglsre, erika. Te, na ege mere kaya mokna mawagl ersre, ege tau mere ama ir podo goglka igne, ir gagl mo ki ta edenaglka i ta yeikrukwa. 28Na ogona nagna mina ibun kane kane iga ba na Krais kogonmo erimara i, dena muduna mina ama yubun podo dogwa. I siragl pre Jisas yugobunomo bage bage makai si meglmara i, wakai meglmo mo moglkrimo mo di, dena muduna yubun keme dogwa. 29Krais yobama yobuglno ede atne ogwa igne i na dena mudna ama ibun dogwa. Te, yoba ta tadaglme mina yage sigwa igne, na ama nomane sidre, kide kaima pre moglka.
30Yegl pre na ene gumuglno mina kagna ake i mitna edenaglka ta panan, na ere kide ere narikwa igne, na yobra kogl paikrumere keme dibo, praiglkwa. 31God, ye nono Yaglno Kade Jisas Nem moglsre, nono aimadi kamin ye kagie kade tenamga moglkwa i, na kan moglkwa pre na ka diga i, ka kibi dikre, kaima dinedi na kanugwa. 32Okna, na dumo Damaskus moglka igne, King Aretas ye gavana ta dumo i sugl morabedi togwa i, ere mogl, Pol si kane sio dugo, yoba tau kobuglo togl ere winabo dimara togl dra yomara i, na pre sugl kan meglko, 33yoba tau na degigl gagl podo mina ede atne edidre, kan kogl padigl, kobuglo togl mina windo ta yomara i, na ake i atne edigo, na teke ede eiga pre yoba i na si kane sikrikwa.
Currently Selected:
2 Korin 11: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission