2 Korin 6
6
1Ana no God kogonmo yoba mungo, God bogl akie kogon erumga pre no erme ene ka gigledi di tenamga i, yegl paugwa, God ene yoko kaima ere idre, ene ere wakai ere togwa i, u yoko pi dinabedi erio! 2Ene prio! God kamo mina okna ibo yegl beglkwa,
Nana ege wakai ta padiglka igne i,
Ene na agle digwa i, na prisre, ene ere iwe#6.2 Aisaia 49.8
dugwa. Ana God ye ege wakai ta we dugwa i, erme pre dugwa. Te, ye yoba ere iwe dugwa i, yoba erme ere yugwa pre dugwa. God ene meglmara yegl ere kodugwa pre ye ene ere wakai ere togwa i, u yoko pi dinabedi erio dumga.
Jisas dedugwa yoba yubun igwa i pre aglke kor dugwa
3Ana no God kogonmo yoba munga i, no mabuno eramnara i, yoba swara ta yage sidre, God kogonmo di kide yei te dinaiglmedi prisre, mabuno kide ta erekrumga. 4No mabuno kide ta erekrumga ba kogon kane kane ta erumnara i, yoba no mabunono kandre, Yoba i God kogonmo yoba kaima meglmiwedi no kanaiglkwa pre erumga.
No God kogonmo yoba munga i, yubun mere idre, giugl prumgo, ege mere no munara wagamage paugwa ba no yage sikre, adigl gigledi munga. 5Yoba no ere sidre, no si kane si, kuda bogl noramnedi erikwa. Te, no kogon erumga i, kogon podo ersre, ugl wakai paikre, kidan ege mere gunga. 6Yegl paugwa ba no mabuno deglbi yogwa i ta erekre, God kamo paugwa i, no pre kan erumnere yegl, yoba di nogugl ede tedre, yubun ugwa igne tabre yage sikrumga. Te, Mudu Murubuglo yobuglo bogl noruko, no yoba ere wakai ere tedre, deno muduno kaima tomga. 7No God yobuglomo mina tege te mogl, ye kamo kaima paugwa i yoba di tedre, God pre kuda erumga. Soldia ye kuda taragl ogono koglo koglo ake moglsre, kuda erimere mere yegl, no mabuno du ogono koglo koglo ake moglsre, kuda erumga pre diga.
8Yoba tau no debino sigo, tau no kenaglno sigwa. Te, tau no kogon wakai erime digo, tau no kogon kide erime digwa ba no God kogonmo ere pai munga. Yoba tau digwa i, no yoba bakagl teimiwe digwa ba no yegl ta erekrumga. Ka kaima keme dumga. 9Yoba tau no kanigwa i, no taragl yoko mere yegl meglmedi no kanigwa ba tau no God kogonmo yoba meglmedi no kan pogl sigwa. No ege ege gunga baka dugwa mere yegl paugwa ba goglkrumga. Yoba no ere sigwa ba no ta si goglkrikwa. 10No deno muduno yubun dogwa ba no ama ege ege gun yomga. Yoba goduglme ta meglmere yegl, no ama goduglme yegl munga ba no taragl wakai kane kane yoba pere tomga. Te, no taragl swara ta kan nekrumga ba no ama taragl kane kane kan nomga mere yegl paugwa.
11Agrama abarama wagle, ene Korin yoba meglkwa i, ene prio. No nomano siragl mere paugwa i, ene nogugl di tedre, deno muduno ene tomga. 12Ene ere mogl, Pol yobama bogl no deno muduno ta norokrimedi yegl ta prikrio. No deno muduno ene tomga ba ene deno muduno no norokrikwa. 13Yegl pre yoba ta ye gagiglma ka di tenabere mere yegl, na ene yegl di tenaglka, No ene deno muduno tomnere yegl mere ene ama deno muduno norio!
Nono God yugumo mere yegl munga
14Ana ene yoba ta pre mediglkrikwa i bogl tap sidre, akie si dakagl moglkrio. I siragl pre mabuno du ya mabuno kide u swara enabrika i, kuno ta erekrukwa. Te, abuglage ya mim ama si dakagl moglkrabrika. 15Krais ye yagl kide bogl deno muduno swara ta yenabro? Ta manabuka. Te, pre meduglkwa yoba ta morabuka i ya yoba ta pre mediglkrukwa i, ye bogl akie tap sinabrika i kuno erabo? Ta erekrabuka. 16Mo, God yugumo yogwa i ya god kibi yuguno yogwa i, i swara edinamno? Ta manabuka. Na God yugumo we diga i, siragl pre God kor aimadi moglkwa i, nono ye yugumo mere yegl munga. God okna mabuno i pre ka ta dugo, yoba ye kamo mina bogl atne edigwa i, yegl beglkwa, Na ye meglmara suna moglsre, wan moraiglmara mogl tenaglka. Na ye Godno moglbo, ye na yobanama moraiglmiwe#6.16 Isip Kide Kodigwa 29.45, Tawa Teigwa Yoba 26.12 dugwa. 17Yegl pre Yagl Kade ama yegl dugwa, Ene yoba i meglmara suna meglkwa i, kide kodidre, mogl pere edio! Te, taragl deglbi ta yenabuka i, akekrio!#6.17 Aisaia 52.11 Ene mogl pere edibi, na ene di inaluwe dugwa.#6.17 Esekiel 20.41 18Na ene Neno moglbo, ene na wanama abrama moraiglmiwe#6.18 2 Samuel 7.8, 7.14 di, Yagl Kade God, mogl mitna kaima edugwa i, okna ibo yegl dugwa.
Currently Selected:
2 Korin 6: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission