2 Tesalonaika 2
2
Krais kudamo ikne yagl unabuka
1Agroma abaroma wagle, nono Yaglno Kade Jisas Krais ede ikne unan, nono ye bogl makai sinamga i pre no ene ka tau di tomun, ene pre pogl sinaiglmedi prumga. 2Yoba tau ene di tedre, Yagl Kade yoba ka tage tenabuka igne i u kodumiwe di, yegl ta dibi, ene nomane sidre, kide prikrio. I siragl pre ye ka kibi digwa. Yoba God Murubuglomo ka yegl di norume dinaiglkwa mo Jisas dedugwa yoba no yegl di norime dinaiglkwa mo ye pepa ta bogl norime dinaiglkwa i, ene ye ka kaima dimedi prikrio. Ye ka kibi digwa.
3Yoba ene bakagl te dinaiglmiwa, ene kan kun erio. I siragl pre okna kana taragl tau plau dinan, mokomugl i Yaglno Kade yoba ka tage tenabuka ege i unabuka. Taragl ta komono kana plau dinabuka i, yoba mere kide God kamo sedidre, ye mokono tenaiglkwa. Tebi, yagl ta mabuno kide mina ede okna enabuka i, ede u nogugl enabuka. Yagl i, God ye ere kide ere tenabuka keme paugwa. 4Yagl kide i, yoba taragl kane kane ta god meglmiwe didre, kagno kade teigwa i, ye mane didre, na swara kagna kade nario dinabuka. Ye yegl didre, God yugumo yenabara ede yugugl pi, ame di moglsre, Na nana God moluwe dinabuka. 5Nono akie munga igne, na taragl yegl mere plau dinabe digra i, ene pre meglmo mo pre moglkrime?
6Na yagl kide ta ede nogugl unabe diga i ede nogugl unabuka ba erme yoba ira ta ye konbomo si kegl di moglkwa i, enene prikwa. Ye konbomo erme si kegl dugwa i, God ye egemo ta padigl togwa i unan keme ye ede u nogugl enabuka pre si kegl dugwa. 7Erme ye unabuka ege i yeikrukwa pre Satan atne, teke konbo u ikne ikne pidre, yoba God kamo sedidre, mokono tenaiglmedi kogon erukwa. Erme yegl erukwa ba yoba ta ye konbomo si kegl dugwa ikra mogl eglke edenabuka igne, 8yagl ta mabuno kide mina ede okna pidre, yoba God lomo kide kodinaiglmedi erabuka yagl ikra, ede nogugl unan, yoba kanaiglkwa. Yagl i unabuka ba okuo nono Yaglno Kade Jisas abuglagemo podo sinan, Jisas nogugl ede ikne unabuka igne i ye ka dinabara yagl kide i si goglsre, ye kogonmo mudu si dudu kodinabuka.
9Yagl kide ta okuo unabuka i, Satan ye yobuglo tenan, ye kimagl kane kane erabuka. Ye kimagl kane kane erabara yoba bakagl tenan, ye nagino kogl, ye God yobuglomo idre, kogon erumedi kanaiglkwa. 10Yagl kide i mabuno kide kane kane ersre, yoba tau mere bakagl tenabuka. Ye yoba bakagl tenabuka i, doga kade denaiglkwa meglkwa i, bakagl tenabuka. Ye yoba yegl bakagl tenabuka i, kuno erabuka. I siragl pre yoba i ye God kamo kaima paugwa i wakai prisre, pre mediglma, God ye ere yugo, ba ye God kamo prikre, mokono teigwa. 11Yoba i ye God kamo kaima paugwa i prakiurkwa i pre God ere mogl, ye bitno kinano si gi dinan, ye Satan kamo kibi i, kaima pamiwedi praiglkwa. 12God ye bitno kinano si gi di tenabuka i, yoba ta ye kamo kaima paugwa i pre mediglkre, mabuno kide pamara gun yei teigwa i, ka tage inaiglmedi pre yegl erabuka.
Pre mediglkwa yoba ye adigl gigledi moraiglkwa paugwa
13Yoba ta God kamo pre mediglkrikwa i, God ka tage tenabuka ba agroma abaroma wagle, ene meglkwa i, God dem muduo ene togwa meglkwa. No ene pre ege ege God di wakai yei tenamga paugwa. I siragl pre God ene ere yugwa, meglkwa. God okna kaima ibo ka ta di paduglkwa i, ene ye kamo kaima i pre mediglbi, ye Murubuglomo ene God yobama moraiglmedi i pere edenan, ye ene ere inagledi, ka yegl mere di padigl kodugwa. 14Ye okna ibo ka yegl mere di padiglsre, okuo no Jisas kamo wakai ene di tomnara i mina ene ede suna unaiglmedi agle dugwa. Ye ene agle dugwa i, ene Yaglno Kade Jisas Krais abuglagemo sumara moglsre, wakai kaima moraiglmedi pre agle dugo, ene ede suna wigwa.
15Yegl pre agroma abaroma wagle, no God kamo ene okna beke tomgo, ene prikwa i, ene ake gi di moglsre, adigl gigledi molo! No ene bogl akie munga igne drano mina ene ka beke tomga i ya te, pepa boglsre, ene beke tomga i, ene ka mudu i ake gi di moraiglkwa pre diga.
16Nono Neno Kade God i, ye dem muduo norsre, yoko kaima ere wakai ere noro, nono deno muduno mina aimadi kamin wakai praiglmedi ere noruko, nono taragl wakai okuo plau dinabedi prisre, sugl munga. Yegl pre no erme ene pre kamage erumga i, Neno Kade God ya nono Yaglno Kade Jisas Krais yene 17ene deno muduno si gigle di tedre, ene ake ple di tebr, ene ka dinaiglmara ya mabuno eraiglmara i mina ene wakai ersre, adigl gigledi moraiglmedi, no kamage erumga.
Currently Selected:
2 Tesalonaika 2: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission