Aposel 11
11
Pita ede Jerusalem pidre, Kornilius kamo boglo si togwa
1Ana yagl Kornilius i, ye nem agiglema bogl Juda yoba moglkrikwa, ye Rom yoba meglkwa. Kornilius ye nem agiglema bogl yugobuno pere meglkwa ba God kamo pre mediglkwa i, Juda yoba tau prisre, nagino kogl, yoba tau di teigo, ka i wai dugwa. Ka wai dugo, Jisas dedugwa yoba ya Juda yoba tau Jisas pre mediglkwa ye distrik Judia suna bage bage meglkwa i ama prikwa. 2Ye prisre, Pita okuo ede Jerusalem ugo, pre mediglkwa yoba tau u Pita ka teigwa. Yoba Pita ka teigwa i, ye prikwa, yoba mudu Juda yoba erumnere mere yegl ere, gagno puduo gagie boraiglkwa keme pamedi prikwa. 3Yegl prikwa pre ye Pita ka te, yegl digwa, Ene yoba gagno puduo gagie boglkrikwa i kipaimara ede yugugl engo, kaya mokna akie neigwa i, aglau pamiwe di, yegl di, ka teigwa.
4Ana yoba tau ye Pita erukwa i, aglau erumiwe digwa pre Pita ye siragl mere erukwa i kamo mabuno boglmara ede pi dudumara i boglo si te, yegl dugwa, 5Na aglke ta dumo Jopa we dimara moglsre, kamage ere moglka. Kamage ere moglmara i gumuglnamugl eruko, kaniga, lap podo ta yoba ta kamun mina ibo mogl, puduo 4-pela i mudu kan kogl, ake mogl, lap i ede atne na moglmara edugwa mere yegl kaniwe dugwa. 6Na taragl i kandre, kan atne ede, toro kan moglka i, taragl kane kane atne meglko, kaniga. Agl bugla kane kane meglko, dua kabu kane kane meglko, te gur toki ya kua kane kane ki ama meglko, kaniga. 7Kanigo, God ka ta na di naruko, na pre moglka i, yegl dugwa, Pita yo, ene adigl, taragl i si kei no dugwa. 8Yegl dugwa ba na ere mogl, di ikne ede te, yegl diga, Yagl Kade yo, na ka kaima yegl ta erekraglka. Siragl pre na ege swara ta taragl ta nenaglka mawagl pamara i, ta ne kankrie diga. 9Yegl digo, ye aglke kor heven ibo mogl, ka di atne ede, yegl dugwa, Na taragl ta erme mawagl paikrume diga i, ene mawagl pame dikro! dugwa. 10Ana na God bogl ka di ikne ikne edubuglka i, ege suota na dimere di pai moglko, God ama dumere di pai moglko, yegl mere dubuglka. Ege suota ka yegl di kodubuglko, lap podo ikra ya taragl kane kane atne meglkwa i, aglke ede ikne kamun mitna ibo ogo, kaniwe di, Pita yegl dugwa.
11Ana Pita ka yegl didre, ama yegl dugwa, Lap ikra aglke ede ikne kamun mitna ibo ogo, kan moglko, yagl suota na doko u yugu ta na paimara i plau digwa. Yagl ta ye na moglmara unaiglmedi dedugo, ye dumo Sisaria kide kodidre, ede u na moglmara wigwa. 12U na moglmara wigo, God Murubuglo na di nare, yegl dugwa, Ene kinan suo yekre, yagl suota i bogl akie ede pio dugwa. Yegl dugwa pre na agrama 6-pela nono erme akie munga i bogl akie ede pi yagl ta ye yoba suota dedugo, pi no agre yeigwa i kipamara ede yugugl omniwe dugwa.
13Ana Pita yegl didre, ama yegl dugwa, No ede yugugl omgo, yugu nem ye yagl suota i dedugo, no agre yuigwa i no di noro, yegl dugwa, angelo ta ye kipamara plau didre, ka ta di tomere i, no di norukwa. Angelo ye ka yegl di narume dugwa, Ene yoba tau dedin, ye ede pi dumo Jopa pidre, yagl ta kagie Saimon Pita we digwa i agre yu ene motnga unaiglmiwe dume dugwa. 14Agre yuibi, yagl Pita i ere mogl, God ene ya ene nen agiglnma siragl mere ere inabuka i, kamo i ene di tenan, praiglmiwe di, angelo yegl dumiwe di, yugu nem no yegl di norume di, Pita yegl dugwa.
15Ana Pita ka yegl didre, ama yegl dugwa, Yugu nem yagl i ka yegl di kodugo, na ere mogl, God kamo tau ye di teiga. Tau di teiga ba na ka tau di ede suna eigo, God Murubuglo okna ibo nono munara umere mere kuno yegl, ede atne u ye meglmara umiwe dugwa. 16Ugo, na kandre, Yagl Kade Jisas ka ta okna dugwa i poglo di prika. Ye yegl dugwa, Jon yoba ake nigl atne ede, nigl bugl togwa, ba God kogon pere ta erabuka i, ye Murubuglomo ene tenabiwe di, ka yegl dugwa. 17Ana nono okna Yagl Kade Jisas, God Kere Yugwa Yagl i pre medungo, God Murubuglo yoko kaima nono norumere kuno yegl mere, ye ere mogl, yoba i ama togwa. Yegl pre na yoba i yugobuno pere meglmedi God mane di tenaglka ta kuno erekrumiwe di, Pita yegl dugwa. 18Pita ka yegl di kodugo, yoba okna Pita ka teigwa ikra prisre, ye ka i kide kodo, God kagie kade te, yegl digwa, God ye yoba Juda yoba moglkrikwa ba yugobuno pere ta meglkwa i ama nomane kor idre, aimadi kamin kor moraiglmedi prukwa pamiwe di, yegl digwa.
Dumo Antiok yoba tau mere Jisas pre mediglkwa
19Ana okna yoba ere mogl, yagl Stiven i si goglsre, te Jisas pre mediglkwa yoba mudu ere kide ere teigwa pre ye teke ede bage bage eigwa. Tau ede pi distrik Fonisia eigo, tau dumo ta mudi nigl suna yogwa, Saiprus we dimara i eigo, tau ama ede taun ta Antiok we dimara i eigwa. Ye ede bage bage yegl pidre, Juda yoba ta bage bage meglkwa i keme Jisas kamo di te wan meglkwa. 20Yegl erikwa ba Jisas pre mediglkwa yoba tau dumo Saiprus ya Sairini nem meglkwa i ede pi taun Antiok ikra pidre, Juda yoba meglkwa i keme Jisas kamo di tekrikwa ba yoba yugobuno pere meglkwa i ama Yagl Kade Jisas kamo i di teigwa. 21Di teigo, Yagl Kade yobuglo podo ere, yoba Jisas kamo di teigwa i ake ple di togo, yoba tau mere nomane kor idre, Yagl Kade Jisas pre mediglkwa.
22Ana yoba tau mere dumo Antiok meglkwa i ye Jisas pre mediglkwa. Ye Jisas pre mediglkwa i, ka wai dugo, Jisas yugobunomo Jerusalem meglkwa i ama prikwa. Prisre, ye yagl ta Barnabas we digwa ikra ede Antiok pi kanabedi dedigo, ogwa. 23Ye ede pi dumo Antiok pidre, kanugwa i, God ye Jisas pre mediglkwa yoba dumo i meglkwa i ake ple di te, ye ere wakai ere togwa. Ye ere wakai ere togo, yagl Barnabas ikra kandre, gun yei, yoba i deno muduno mina si gigle di tedre, te ye ege ege deno muduno bogl Yagl Kade pre medigl pai moraiglmedi di togwa. 24Yagl Barnabas i, ye yagl wakai ta moglko, God Murubuglo ye moglmara kau si moglkwa. Te, ye pre meduglkwa ama gigle dugwa. Yegl eruko, ye dumo Antiok suna i yoba kor tau ama Jisas kamo di togo, yoba mere kide ka dugwa i prisre, Yagl Kade Jisas pre mediglkwa.
25Ana Barnabas ere mogl, ye dumo Antiok i kide kodo, yagl Sol ikra dokinagledi ede Tarsus ogwa. 26Ye pi Tarsus pidre, yagl Sol ikra doko kan yugwa. Ye doko kan yugo, ye akie ede ikne u dumo Antiok ubrika. Yagl suo Barnabas ya Sol ede Antiok udre, ye Jisas yugobunomo dumo Antiok meglkwa i bogl ege ege makai si meglko, yagl suo i bugla yugu swara mere yegl yoba mere ka mabuno di tebrika. Yegl eribriko, yoba tau ere mogl, Jisas nagiglema i kagno Kristen we digwa.#11.26 Kagno Kristen we digwa mem paugwa i, Krais Yobama mere yegl digwa. Te, Krais we digwa i, nono ka yoko mina God Kere Yugwa Yagl we dumga. Kagno Kristen we di yeigwa i, dumo Antiok i mabuno bogl yeigwa.
27Ana igne i God kamo kep yoba tau dumo Jerusalem kide kodo, ede u dumo Antiok wigwa. 28Ana ka kep yagl swara ta kagie Agabus we digwa i, ye ere mogl, yoba makai si meglmara suna i adigl moglsre, God Murubuglo ye ka di tomere i ka kep ere di, Kidan podo ta ka kaima dumo mudu uglo koglo koglo yenabiwe dugwa. Ye ka kep ere dugwa i, Rom yoba ta kagie Klodius we digwa i king moglkwa igne, ka dugwa i, plau dugwa. 29Ana Agabus ka kep ere, yegl dugwa pre Jisas nagiglema dumo Antiok meglkwa i prisre, ye agroma abaroma pre mediglkwa yoba tau distrik Judia meglkwa i kidan pai dinaiglmedi pre, ye swara swarade yoba ake ple dinaiglkwa kuno erabere mige i makai sidre, ye tenamnedi ka di padiglkwa. 30Ka yegl di padiglsre, ye dimere ere, mige yu makai sidre, Barnabas ya Sol tedre, i pi tenabredi dedigo, ye i pi Jisas pre mediglkwa yoba distrik Judia suna meglmara i yoba tau ye suglno meglkwa i tebrika.
Currently Selected:
Aposel 11: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
Aposel 11
11
Pita ede Jerusalem pidre, Kornilius kamo boglo si togwa
1Ana yagl Kornilius i, ye nem agiglema bogl Juda yoba moglkrikwa, ye Rom yoba meglkwa. Kornilius ye nem agiglema bogl yugobuno pere meglkwa ba God kamo pre mediglkwa i, Juda yoba tau prisre, nagino kogl, yoba tau di teigo, ka i wai dugwa. Ka wai dugo, Jisas dedugwa yoba ya Juda yoba tau Jisas pre mediglkwa ye distrik Judia suna bage bage meglkwa i ama prikwa. 2Ye prisre, Pita okuo ede Jerusalem ugo, pre mediglkwa yoba tau u Pita ka teigwa. Yoba Pita ka teigwa i, ye prikwa, yoba mudu Juda yoba erumnere mere yegl ere, gagno puduo gagie boraiglkwa keme pamedi prikwa. 3Yegl prikwa pre ye Pita ka te, yegl digwa, Ene yoba gagno puduo gagie boglkrikwa i kipaimara ede yugugl engo, kaya mokna akie neigwa i, aglau pamiwe di, yegl di, ka teigwa.
4Ana yoba tau ye Pita erukwa i, aglau erumiwe digwa pre Pita ye siragl mere erukwa i kamo mabuno boglmara ede pi dudumara i boglo si te, yegl dugwa, 5Na aglke ta dumo Jopa we dimara moglsre, kamage ere moglka. Kamage ere moglmara i gumuglnamugl eruko, kaniga, lap podo ta yoba ta kamun mina ibo mogl, puduo 4-pela i mudu kan kogl, ake mogl, lap i ede atne na moglmara edugwa mere yegl kaniwe dugwa. 6Na taragl i kandre, kan atne ede, toro kan moglka i, taragl kane kane atne meglko, kaniga. Agl bugla kane kane meglko, dua kabu kane kane meglko, te gur toki ya kua kane kane ki ama meglko, kaniga. 7Kanigo, God ka ta na di naruko, na pre moglka i, yegl dugwa, Pita yo, ene adigl, taragl i si kei no dugwa. 8Yegl dugwa ba na ere mogl, di ikne ede te, yegl diga, Yagl Kade yo, na ka kaima yegl ta erekraglka. Siragl pre na ege swara ta taragl ta nenaglka mawagl pamara i, ta ne kankrie diga. 9Yegl digo, ye aglke kor heven ibo mogl, ka di atne ede, yegl dugwa, Na taragl ta erme mawagl paikrume diga i, ene mawagl pame dikro! dugwa. 10Ana na God bogl ka di ikne ikne edubuglka i, ege suota na dimere di pai moglko, God ama dumere di pai moglko, yegl mere dubuglka. Ege suota ka yegl di kodubuglko, lap podo ikra ya taragl kane kane atne meglkwa i, aglke ede ikne kamun mitna ibo ogo, kaniwe di, Pita yegl dugwa.
11Ana Pita ka yegl didre, ama yegl dugwa, Lap ikra aglke ede ikne kamun mitna ibo ogo, kan moglko, yagl suota na doko u yugu ta na paimara i plau digwa. Yagl ta ye na moglmara unaiglmedi dedugo, ye dumo Sisaria kide kodidre, ede u na moglmara wigwa. 12U na moglmara wigo, God Murubuglo na di nare, yegl dugwa, Ene kinan suo yekre, yagl suota i bogl akie ede pio dugwa. Yegl dugwa pre na agrama 6-pela nono erme akie munga i bogl akie ede pi yagl ta ye yoba suota dedugo, pi no agre yeigwa i kipamara ede yugugl omniwe dugwa.
13Ana Pita yegl didre, ama yegl dugwa, No ede yugugl omgo, yugu nem ye yagl suota i dedugo, no agre yuigwa i no di noro, yegl dugwa, angelo ta ye kipamara plau didre, ka ta di tomere i, no di norukwa. Angelo ye ka yegl di narume dugwa, Ene yoba tau dedin, ye ede pi dumo Jopa pidre, yagl ta kagie Saimon Pita we digwa i agre yu ene motnga unaiglmiwe dume dugwa. 14Agre yuibi, yagl Pita i ere mogl, God ene ya ene nen agiglnma siragl mere ere inabuka i, kamo i ene di tenan, praiglmiwe di, angelo yegl dumiwe di, yugu nem no yegl di norume di, Pita yegl dugwa.
15Ana Pita ka yegl didre, ama yegl dugwa, Yugu nem yagl i ka yegl di kodugo, na ere mogl, God kamo tau ye di teiga. Tau di teiga ba na ka tau di ede suna eigo, God Murubuglo okna ibo nono munara umere mere kuno yegl, ede atne u ye meglmara umiwe dugwa. 16Ugo, na kandre, Yagl Kade Jisas ka ta okna dugwa i poglo di prika. Ye yegl dugwa, Jon yoba ake nigl atne ede, nigl bugl togwa, ba God kogon pere ta erabuka i, ye Murubuglomo ene tenabiwe di, ka yegl dugwa. 17Ana nono okna Yagl Kade Jisas, God Kere Yugwa Yagl i pre medungo, God Murubuglo yoko kaima nono norumere kuno yegl mere, ye ere mogl, yoba i ama togwa. Yegl pre na yoba i yugobuno pere meglmedi God mane di tenaglka ta kuno erekrumiwe di, Pita yegl dugwa. 18Pita ka yegl di kodugo, yoba okna Pita ka teigwa ikra prisre, ye ka i kide kodo, God kagie kade te, yegl digwa, God ye yoba Juda yoba moglkrikwa ba yugobuno pere ta meglkwa i ama nomane kor idre, aimadi kamin kor moraiglmedi prukwa pamiwe di, yegl digwa.
Dumo Antiok yoba tau mere Jisas pre mediglkwa
19Ana okna yoba ere mogl, yagl Stiven i si goglsre, te Jisas pre mediglkwa yoba mudu ere kide ere teigwa pre ye teke ede bage bage eigwa. Tau ede pi distrik Fonisia eigo, tau dumo ta mudi nigl suna yogwa, Saiprus we dimara i eigo, tau ama ede taun ta Antiok we dimara i eigwa. Ye ede bage bage yegl pidre, Juda yoba ta bage bage meglkwa i keme Jisas kamo di te wan meglkwa. 20Yegl erikwa ba Jisas pre mediglkwa yoba tau dumo Saiprus ya Sairini nem meglkwa i ede pi taun Antiok ikra pidre, Juda yoba meglkwa i keme Jisas kamo di tekrikwa ba yoba yugobuno pere meglkwa i ama Yagl Kade Jisas kamo i di teigwa. 21Di teigo, Yagl Kade yobuglo podo ere, yoba Jisas kamo di teigwa i ake ple di togo, yoba tau mere nomane kor idre, Yagl Kade Jisas pre mediglkwa.
22Ana yoba tau mere dumo Antiok meglkwa i ye Jisas pre mediglkwa. Ye Jisas pre mediglkwa i, ka wai dugo, Jisas yugobunomo Jerusalem meglkwa i ama prikwa. Prisre, ye yagl ta Barnabas we digwa ikra ede Antiok pi kanabedi dedigo, ogwa. 23Ye ede pi dumo Antiok pidre, kanugwa i, God ye Jisas pre mediglkwa yoba dumo i meglkwa i ake ple di te, ye ere wakai ere togwa. Ye ere wakai ere togo, yagl Barnabas ikra kandre, gun yei, yoba i deno muduno mina si gigle di tedre, te ye ege ege deno muduno bogl Yagl Kade pre medigl pai moraiglmedi di togwa. 24Yagl Barnabas i, ye yagl wakai ta moglko, God Murubuglo ye moglmara kau si moglkwa. Te, ye pre meduglkwa ama gigle dugwa. Yegl eruko, ye dumo Antiok suna i yoba kor tau ama Jisas kamo di togo, yoba mere kide ka dugwa i prisre, Yagl Kade Jisas pre mediglkwa.
25Ana Barnabas ere mogl, ye dumo Antiok i kide kodo, yagl Sol ikra dokinagledi ede Tarsus ogwa. 26Ye pi Tarsus pidre, yagl Sol ikra doko kan yugwa. Ye doko kan yugo, ye akie ede ikne u dumo Antiok ubrika. Yagl suo Barnabas ya Sol ede Antiok udre, ye Jisas yugobunomo dumo Antiok meglkwa i bogl ege ege makai si meglko, yagl suo i bugla yugu swara mere yegl yoba mere ka mabuno di tebrika. Yegl eribriko, yoba tau ere mogl, Jisas nagiglema i kagno Kristen we digwa.#11.26 Kagno Kristen we digwa mem paugwa i, Krais Yobama mere yegl digwa. Te, Krais we digwa i, nono ka yoko mina God Kere Yugwa Yagl we dumga. Kagno Kristen we di yeigwa i, dumo Antiok i mabuno bogl yeigwa.
27Ana igne i God kamo kep yoba tau dumo Jerusalem kide kodo, ede u dumo Antiok wigwa. 28Ana ka kep yagl swara ta kagie Agabus we digwa i, ye ere mogl, yoba makai si meglmara suna i adigl moglsre, God Murubuglo ye ka di tomere i ka kep ere di, Kidan podo ta ka kaima dumo mudu uglo koglo koglo yenabiwe dugwa. Ye ka kep ere dugwa i, Rom yoba ta kagie Klodius we digwa i king moglkwa igne, ka dugwa i, plau dugwa. 29Ana Agabus ka kep ere, yegl dugwa pre Jisas nagiglema dumo Antiok meglkwa i prisre, ye agroma abaroma pre mediglkwa yoba tau distrik Judia meglkwa i kidan pai dinaiglmedi pre, ye swara swarade yoba ake ple dinaiglkwa kuno erabere mige i makai sidre, ye tenamnedi ka di padiglkwa. 30Ka yegl di padiglsre, ye dimere ere, mige yu makai sidre, Barnabas ya Sol tedre, i pi tenabredi dedigo, ye i pi Jisas pre mediglkwa yoba distrik Judia suna meglmara i yoba tau ye suglno meglkwa i tebrika.
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission