Aposel 21
21
Pol ede Jerusalem enagledi ogwa
1Ana Efesus suglno yoba ikra no agre i pi sip mina edigo, no ede enamnedi ere, ye di wakai yei tedre, no sip mina ede omga. Ana no sip mina ake dudi ede pi dumo kebra ta mudi nigl suna yogwa, kagie Kos we dimara i, omga. Pidre, tagna ta dumo kebra i kide kodo, aglke ede pi dumo kebra ta mudi nigl suna yogwa, kagie Rodes we dimara omga. Pidre, aglke dumo i kide kodo, sip mina ede pi taun ta Patara we dimara omga. 2No pi dumo Patara moglsre, no kamga i, sip pere ta ede distrik Fonisia enagledi eruko, kandre, no ede sip ta i mina bolamugl pidre, sip i mina ede omga. 3No sip i mina ede mudi nigl suna pidre, kamga i, ailan ta Saiprus we digwa i ogono koda kra yogo kandre, no ake dudi ede provins Siria omga. Pi provins Siria suna, taun kade ta Tair we dimara i omgo, sip mina bonagana tau yuigwa i, i atne edinamnedi erikwa pre no ede makandigle pi makandigle sugl munga.
4Ana no ede makandigle pi sugl mogl pai moglsre, ana Jisas nagiglema dumo Tair meglkwa i wan doko kamga. Wan doko kan imgo, no yoba i bogl ege 7-pela de akie pai munga. Ege 7-pela de pai mungo, Jisas nagiglema dumo Tair meglkwa i, God Murubuglo ye meglmara kogon ere, yubun ta okuo Pol moglmara plau dinabuka i, i nogugl ede togo, pre kan ersre, ye Pol di te, Ene ede pi Jerusalem pikratne! di, tau ege mere yegl di teigwa. 5Yegl di teigwa ba Pol ye kano prikrukwa pre okuo sip i aglke kor ede enabuka magigl erukwa igne, no aglke ede sip mina enamnedi erumga. No ede sip mina enamnedi eungo, Jisas nagiglema dumo Tair meglkwa i ebino gagroma bogl mudu no agre i pi taun meda pidre, sip mina ede enamnedi no agre yeigwa. No agre i pi mudi nigl bina eigo, no mudu mudi nigle bina wesan moglmara i goglkono bodugl, kamage erumga. Ere kodidre, no ikne ikne di wakai yedre, 6no ede sip bolamugl omgo, ye aglke ede ikne taun suna eigwa.
Pol ede Sisaria ogo, ka kep yagl ta ye ka di togwa
7Ana no dumo Tair kide kodo, sip mina ede pi taun ta Tolemes we dimara omga. Ede Tolemes pidre, pre mediglkwa yoba Tolemes meglkwa i, pi kandre, di wakai yei te, ege swara ta ye bogl pamga. 8Ege swara keme taun Tolemes i pre mediglkwa yoba bogl padre, tagna ta i adigl, sip mina ede pi taun Sisaria we dimara omga. Pidre, ede pi yagl ta kagie Filip we digwa i kipamara pi, pamga. Ana yagl Filip i, okna Jisas dedugwa yagl ye yagl 7-pela kaya mokna yubu si, yoba tenaiglmedi kere imara ikra, ye swarano ta moglkwa. Te, ye ama Jisas kamo yoba di togwa yagl moglkwa. 9Yegl eruko, te ye abugloma 4-pela meglkwa i, ede yagl pikre, yoko mogl, God kamo kep ere digwa abai meglkwa.
10Ana no dumo Sisaria ege tau pai mungo, God kamo kep yagl ta kagie Agabus we digwa ye distrik Judia mogl, u no munara plau dugwa. 11Ye u no munara udre, ye Pol kumaglmo idre, Agabus yene ogo kagle kan sugwa. Kan sidre, ye no di noro, yegl dugwa, Mudu Murubuglo ene yegl di tomiwe dugwa, Yagl ta kumagl i nem yagl morabuka yaglmo i, Juda yoba Jerusalem meglkwa i ye yegl mere si kane sidre, i pi Rom yoba tenaiglmiwe dugwa. 12Ana yagl Agabus i ka yegl dugo, no prisre, Sisaria pre mediglkwa yoba tau meglkwa i bogl ka giglede di te, Pol ede Jerusalem pikratniwe di, mane dumga. 13Yegl dumga ba Pol di ikne ede noro, yegl dugwa, Ene siragl pre kai ere, na dena muduna yubun denabedi erime? di, yegl dugwa. Na ede Jerusalem ebo, Juda yoba na Yaglno Kade Jisas kogonmo erika i pre na si kane sinaiglmo mo na si goraiglkwa i, na pra wakai priwe di, yegl dugwa. 14Yegl dugo, no ye kanumga i, nomane kor ta ikrabuka mere kamga. Yegl kandre, no mane dumga i kodo, Yagl Kade yene pre kan erumere erabiwe di, ye yegl di tomga.
Pol ede Jerusalem ogwa
15Ana no ege tau Sisaria pai moglsre, no ede Jerusalem enamnedi bona ganano ki ake kun ere, ede enamnedi erumga. 16Ede enamnedi omgo, Jisas nagiglema tau Sisaria meglkwa i no agre i ede eigwa. No agre i ede pi Jerusalem pidre, yagl ta kagie Nason we digwa kipamara i edigo, pamga. Yagl Nason i, ye dumo Saiprus nem ta moglsre, okna kaima Jisas pre meduglkwa yagl ta moglkwa. 17Ana no ede Jerusalem omga i, Jisas pre mediglkwa yoba no wimedi prisre, gun yei, no kogl kare di, no di igwa.
18Ana yoba tau no agre i pi Jerusalem edigo, no padre, tagugo i, no Pol bogl ede pi yagl Jems kanamnedi ye moglmara omga. Omgo, Jems yogo, pre mediglkwa yoba Jerusalem meglkwa i suglno yoba mudu meglko, no pi, ye kamga. 19Kamgo, Pol ye mudu di wakai yei tedre, ye ka tau boglo si togwa. Pol ye yugobuno pere pere, Juda yoba moglkrikwa i meglmara pi Jisas kamo di te wan moglko, God ye meglmara kogon podo erukwa i, ye mudu boglo si togwa.
Jerusalem suglno yoba Pol ede tawa teigwa yugu enatne digwa
20Ana Pol ye Jerusalem pre mediglkwa yoba suglno yoba meglkwa ya yagl Jems i ka tau yegl di togo, ye gun yei, God kagie kade teigwa. God kagie kade tedre, aglke Pol di te, yegl digwa, Agro Pol, ene pro! Juda yoba tausand mere kide ye Jisas pre mediglkwa i, enene kaniwe digwa. Ye Jisas pre mediglsre, te, ye ama yobuglo ere, Moses lo norukwa i duglo boramnedi ere meglkwa. 21Yegl erikwa ba ene bage bage wan moglsre, Juda yoba tau ye yugobuno pere pere meglmara suna kipaigwa ene ka di tenga i, yoba tau ye ene di te, Moses lo norukwa i kide kodio didre, te ye gak kebra kiglkwa i Gagno puduo gagie boglkrio didre, nono kowano awano mabunono i, ene ye kide kodio di, yegl diniwe digo, pre mediglkwa yoba magigl i mudu prisre, kide primiwe digwa. 22Ene erme ede Jerusalem unga i, yoba dibi, ye mudu praiglkwa. Yegl pre siragl eramne? digwa. No punga i, ene ka yegl ta dikitnga ba nono siragl ta eun, pre mediglkwa yoba nomane idre, Pol ka yegl ta kaima di wan moglkrukwa pamedi pribi, wakai panabuka. Yegl pre siragl eramne? di, yagl wagle i yegl digwa.
23Yegl didre, Pol di te, yegl digwa, No ene yegl eratnedi prumniwe digwa. No munara yagl 4-pela ta yene God kogonmo eramnedi God ka giglede di te padiglkwa meglkwa. 24Yegl pre ene ye bogl akie tawa teigwa yugu pi nono Juda yoba mabunono pamere God gumuglo mina deglbi yekramnedi taragl tau eraiglkwa i, ene bogl akie erio digwa. Ene yegl ersre, yagl 4-pela i tawa tenaiglkwa i, ene ta topo si ten, ye komono kana tawa tedre, okuo ye bitno yugo guko edenaiglkwa. Ene yegl etn, Juda yoba pre kan pogl sidre, yoba tau ene ka yegl diniwe digwa i ka kibi dimiwedi prisre, Pol ye ama nono lono duglo boglkwa pamiwe di, yegl kanaiglmiwe digwa.
25Yagl wagle i ka yegl didre, ama yegl digwa, Ana yoba yugobuno pere Jisas pre mediglkwa i pre no okna ka di koglsre, ye pepa bogl tomga ikra, pai moglmiwe digwa. Yoba taragl mie god kibi tawa tenaiglkwa i nekrio didre, bormai nekrio didre, te mie bormai pai morabuka i ama nekrio dumga. Yegl didre, te, yagl abu ye yagl abu ta bogl kunogl nekrio, di, yegl di tomgra we digwa.
26Ana Jerusalem pre mediglkwa yoba suglno yoba meglkwa i yeigo, Jems yogo, ye Pol yegl ero digwa pre Pol ye tagna mogl adigl, yagl 4-pela ikra bogl ye Juda yoba mabunono pamere ere, God gumuglo mina deglbi yekramnedi taragl tau erikwa. Ere kodigo, Pol ye ede pi tawa teigwa yugu yomara togl suna ogo, tawa teigwa yoba ta moglko, Pol ye di tedre, yegl dugwa, Yagl 4-pela i taragl tau God gumuglo mina deglbi yekramnedi ere kodigwa pre ye ege 7-pela de sugl moglsre, u tawa gagl tenaiglmiwe di, Pol ye yegl di togwa.
Juda yoba Pol si goramnedi erikwa
27Ana yagl 4-pela i ye ege 7-pela de sugl moglsre, tawa tenaiglkwa ege i, ede magigl ugo, Pol ede togl suna ogwa. Pi togl suna moglko, Juda yoba tau provins Esia meglkwa u ye Pol tawa teigwa yugu togl suna moglko, kanigwa. Kandre, ye Juda yoba togl suna u meglkwa mudu i Pol deno kubro tenaiglmedi kinano sidre, Pol ake gi di mogl, 28yoba di te, yegl digwa, Ene Israel yoba ta moratnga i, u no ake ple di noro! digwa. Yagl ta magigl ake munga i, ye ede uglo koglo koglo pi, yoba ka kane kane di togwa. Ye nono Juda yoba munga i kagno ere kide ersre, te God lomo ya yugumo magigl i, di kide yei tomiwe digwa. Yagl i yegl ersre, yoba pere, Juda yoba moglkrikwa i, agre i ede tawa yugu togl suna udre, nono tawa tomga yugu, God i pere edugwa i, si deglbi yei, ere kide erumiwe digwa. 29Ye yegl digwa i siragl pre ye okna kanigwa, Pol ye yagl ta dumo Efesus nem ta moglkwa, kagie Trofimus we digwa i, ye Juda yoba ta moglkrukwa ba ye Jerusalem suna Pol bogl okna wanibriko, kanigwa pre ye prikwa i, Pol yagl i bogl akie ede togl suna ubre di, sugun pre, ka yegl digwa. 30Yegl digo, Jerusalem yoba magigl meglkwa i mudu prisre, deno kubro Pol teigwa. Deno kubro Pol tedre, muku di pi Pol sinamnedi ake gudu i pi tawa teigwa yugu yomara togl meda edigo, yoba tau togl dra yogugl kegl digwa.
Rom soldia Pol akigwa
31Ana Jerusalem yoba i Pol agre i ede togl meda pi, ye si goramnedi ere sigwa. Ere sigo, yoba tau kandre, ye muku di ede pi yagl ta Rom soldia bitno moglmara i pidre, ye di te, yegl digwa, Jerusalem yoba mudu ka podo didre, kuda boramnedi erime digwa. 32Digo, Rom soldia bitno moglkwa i oglade pi, soldia yoba kade tau meglkwa i di togo, ye pi soldiano tau igo, ye akie muku di ede atne u, yoba Pol ere simara i wigwa. Wigwa pre yoba ye soldia wigwa i kandre, Pol ere sigwa i kide kodigwa. 33Yegl eriko, soldia bitno moglkwa yagl i ede u Pol ake gi di mogl, ye soldiamo di te, Yagl i sen suo idre, ogo koglo koglo kane sio dugo, ye kane sigwa. Kane sigo, soldia bitno yagl i yoba meglkwa i kira pogl pre, Pol ye ira moglkwa ya te aglau siragl mere erukwa i, dibi pragledi kira pogl prukwa. 34Kira pogl prukwa ba yoba mere kide meglkwa i, tau ka podo di, Pol aglau tau yegl mere erume digo, yoba tau ka podo didre, di pere ta edigwa pre soldia bitno moglkwa i ye aglau siragl mere erukwa doko inabuka i, kuno erekrukwa. Kuno erekrukwa pre ye soldiamo di tedre, Pol agre i ede pi soldia yugu ta paimara enaiglmedi di togo, ye Pol agre i ede eigwa. 35-36Ye agre i ede pi yugu ta paimara i lada mina eigo, yoba mere kide ye eimara sika si pi, ka podo di, Yagl i si golo didre, Pol si, si goramnedi erikwa pre soldia i ere mogl, Pol boglo ere kobano mina padigl, lada mina boglo ere i ede kuglo pi, yugu ta paimara i ede yugugl enamnedi eigwa.
Pol Juda yoba ka di togwa
37Ana soldia i ye Pol agre i ede pi ye yugu ta paimara ede yugugl enamnedi eriko, Pol ye soldia bitno moglkwa yagl i di pre, yegl dugwa, Ene pra we din, na ene ka ta di tenagledi priwe dugwa. Yegl dugo, yagl i, Aya, ene ka Grik dinga pamiwe dugwa. 38Ene Isip yagl ta okna kuda kogl, yagl 4,000 naif mina yoba si geglkwa i, agre i ede dumo wau yomara ogwa i, ene motnedi priwe dugwa. 39Rom soldia bitno yagl i ka yegl dugo, Pol ye di ikne ede te, I na ta mane dugwa. Na Juda yagl ta mogl, taun Tarsus nem moliwe dugwa. Taun Tarsus i, provins Silisia suna i yogwa. Taun i kagie paugwa yomiwe dugwa. Yegl didre, Ene pra we din, na yoba mudu i ka ta di tenagledi priwe dugo, 40soldia bitno yagl i pra we dugo, Pol lada mina adigl moglsre, yoba ka dikraiglmedi ogo wermane erukwa. Eruko, yoba i pra pra ka dikre, kiede meglko, Pol ka tau yene kano Aram ka mina ye di togwa.
Currently Selected:
Aposel 21: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
