Aposel 27
27
Pol sip mina edidre, ede dumo Rom enabedi dedigwa
1Ana okuo Gavana Festus ere mogl, na Luk yeigo, Pol ya kane yoba tau ye sip mina ede kantri Itali, Rom King moglmara enaiglmedi di paduglkwa. Yegl di paduglko, Pol yogo, kane yoba tau yoba ye i pi soldia ta kagie Julius we digwa i ogo mina yeigwa. Yagl Julius i, ye Rom soldia 1,000 mere ye kagno Rom King Soldiama we digwa i meglmara suna moglkwa ba ye soldia 100 mere yegl ama bitno moglkwa. 2Ana yoba tau ye kane yoba i pi yagl Julius i ogo mina yeigo, sip ta dumo Adramitium padre, ugwa sip i mina no ede kuglo omga. Sip i, ede pi provins Esia pidre, taun nigle bina bage bage yeimara i enabuka pre no sip i mina ede kuglo pidre, ede omga. Ana no yagl ta kagie Aristarkus we digwa i bogl akie ede omga. Ye taun Tesalonaika, provins Masedonia suna i nem ta moglkwa.
3Ana no sip mina pi mungo, tagugwa. Tagugo i, no ede pi taun ta Saidon we dimara plau dumga. No pi taun Saidon i plau dumgo, yagl Julius i ye mabuno wakai ere, Pol tedre, Pol ede pi kabaglema meglmara enan, ye ake ple di tenaiglmedi pra we dugo, Pol ye ede makandigle pidre, kabaglema meglmara ogwa. 4Pol pi kabaglema meglmara wan kandre, ede ikne ugo, no aglke kor sip mina ede omga. No sip mina nigle ede omgo, ir podo magugwa pre sip i aglke ede u ailan ta Saiprus we dimara i mokomugl kra pidre, ede omga. 5Ana no sip i mina ede pi provins suo Silisia ya Pamfilia bina pidre, ede pi provins Lisia suna i taun ta Maira we dimara omga. 6Sip i no i pi taun Maira edugo, soldia bitno yagl i kanugwa, sip ta Aleksandria padre, ede Itali enagledi ugo, kandre, soldia bitno yagl i no i pi sip i mina edugo, sip i mina ede omga.
7Ana no sip ta i mina ede omgo, ir podo mage, sip guma ake nu si ikne edugwa pre yoba sip mina kogon erikwa i kogon podo eriko, no ege tau mere nigle kie kiede wan ede omga. No wan ede pi taun ta Nidus we dimara enamnedi ede magigl omga ba ir podo kaima mage, sip guma ake nu si ikne ede pai moglkwa pre no taun Nidus i enamga kuno erekrukwa. Kuno erekrukwa pre no ede pi dumo ta nigle suna yogwa Krit we dimara i ede u mokomugl pi, dumo kamun ta Salmone we digwa i yade, ede omga. 8Sip mina kogon erikwa yoba i kogon podo ere pai meglko, no ailan Krit nigle bina wan ede pi dumo ta kagie Sip Panaiglkwa Dumo Wakai we dimara pi pamga. Dumo i, taun ta Lasea yomara magigl yogwa.
9Ana no sip mina ede dumo igle omga ba no ege tau mere nigle suna kie kiede omga pre Juda yoba egeno kade ta kaya mokna mawagl erikwa ege i dudugwa. Ege i dudugo, ir podo magenabuka ege magigl erukwa pre sip mina wanamga kuno erekrabuka paugwa. Yegl paugwa pre Pol ye ka giglede di, no yoba sip mina akie omga i, di te, yegl dugwa, 10Yagl wagle, na prika, nono erme sip mina ede nigle suna omun, sip ake yake tenan, bonagana wau boran, te nono yoba mudu goramniwe dugwa. Yegl pre nono pikre, dumo igle mogl pai moramniwe dugwa. 11Pol yegl dugwa ba soldia bitno yagl ta no sugl moglkwa i, ye Pol ka dugwa prikrukwa. Ye sip kan nogwa yagl ya sip akugwa yagl ye taragl yegl ta plau dikrabe dibrika pre soldia bitno yagl i, ye ka dibrika prukwa.
12Ana no sip mina pi dumo ta pamnara i, Pol moramniwe dugwa ba yoba kanigwa i, ir podo unabuka ege dumo i moramga, wakai paikrabuka. Yegl pre yoba mere sip mina meglkwa i ka di kogl, kuno eran, no dumo pamnara i kide kodo, ede pi taun ta Finiks we dimara i pidre, ir podo unabuka ege i dumo Finiks moramnedi ka di keglkwa. Dumo Finiks i, ailan Krit suna i yogo, sip pi pai, pai erikwa dumo ama yogwa. Dumo i sip ede suna enaiglkwa i, ye ede pi nigl beye kra pidre, kuri ta ede ida u ade beimara kra pidre, ede suna unaiglkwa yogo, te ye ede nigl bre kra pidre, ama kuri ta ede ime u ade beimara kra udre, ede suna unaiglkwa yogo, erukwa.
Ir waga podo ta ugwa
13Ana no dumo ta kagie Sip Panaiglkwa Dumo Wakai we dimara ikra pai mungo, ir kuri ta nigl beye kra mage ede ida ugo, yoba prikwa i, ede dumo Finiks enamga kuno erumedi prisre, anka gudu yu sip bolamugl edigo, no ailan Krit nigle bina wan ede dumo Finiks enamnedi omga. 14Wan ede omga ba ede eglke pikungo, ir waga podo ta ailan Krit yomara mogl ugwa. Ir waga i, kagie Nigl Bre ya Ade Umara Ir Waga we digwa. 15Ir waga podo ugwa pre yoba sip guma akenaiglkwa kuno erekrukwa. Kuno erekrukwa pre ir u sip ake nu si, i ede aglo mere enabuka i, i ede enabedi kanige eriko, no ede omga.
16Ir waga podo i no ake nu si ede pi ailan kebra ta kagie Kauda we dimara i, aket kra edugo, ake ede omga. Ailan i ede aket omgo, ir kuri ta ede atne ogwa. Ir kuri ta ede atne ogo, yoba sip mina kogon erikwa i kogon podo kaima ersre, ye baglkugl kebra ta sip mina kan kogl padiglkwa i aglke gudu yu magigl edidre, 17yu sip bolamugl edigwa. Yegl ersre, te ye ama nigl si pepigl di, sip si buko di dinabedi sip atne kra i, kan kogl winabo di, si ake gigledi padiglkwa. Yegl ersre, ama ir u sip ake nu si pi, wesan tau dumo Sirtis we dimara mudi nigl suna moglmara i edenan, sip wesan mina pai moran, nigl si pepigl di, sip si buko di dinabedi kudugl gogl, sel kogl padiglkwa i ama i atne edigo, no yoko nigle yaudomugl ir aglo mere no ake nu si i ede ogwa i, ede omga.
18Ana tagugo i, nigl podo kide si pepigl di, sip mina sugwa pre yoba sip mina kogon erikwa i ere mogl, sip yubun de dinabedi bonagana tau yuigwa i pia si nigle edigwa. 19Yegl erikwa ba tagna ta i, nigl podo ama si pepigl di, sip mina si pai moglkwa pre kogon erikwa taragl sip mina yogwa i ama pia si nigle edigwa. 20Ana igne i no ere mogl, sip mina i, kor moglkramga mere prumga. Siragl pre no ege olto kaima ade mo kugl kuri ta kankrumgo, te, ir waga podo ikra aimadi u pai moglkwa pre no prumga i, sip mina i wau bogl, goramga keme pamedi prumga.
21Ana ir waga podo ugwa ikra ege mere kide aimadi kamin u moglko, yoba sip mina kogon erikwa ikra, kogon podo ere meglkwa. Ye ege ta yenan, kaya mokna ne, yoko moraiglkwa i ta manga pre ye ege tau mere kaya mokna nekre, kogon keme ere meglkwa. Ye kogon podo yegl ere meglko, ege swara ta Pol ye melgmara suna adigl mogl, ye yegl di togwa, Yagl wagle, na ene ka okna di teiga ikra pre meglmo? dugwa. Na ene di tei, nono ailan Krit dumo ta moramne diga ikra muna, kuno eruko ba ene na ka diga sedigwa pre nono umga. Erme taragl kane kane kide eruko, bonagana mere nigle wau boglkwa i, ene kanimiwe di, Pol yegl dugwa.
22Ana Pol ka yegl di tedre, ama yegl dugwa, Ene na ka diga sedigwa pre aglau erikwa ba erme ene kudugl goglkrio! dugwa. Nono erme umga i, sip kide erabuka ba ene swara ta goglkraiglmiwe dugwa. 23Siragl pre na Godna, ye na bitna moglko, na ye kogonmo ere teiga i, ye angelomo swara ta eduer u na gumanamugl adigl mogl, yegl di narumiwe dugwa. 24Pol yo, ene kudugl goglkro! Ene nigle i ta wau bogl, goglkratniwe di, yegl di narukwa. Siragl pre God ene suglnen moran, ene ede pi Rom King gumamugl adigl, kot eratnga paugwa pre God ene suglnen morabiwe di, yegl di narukwa. Ene suglnen morabara i ama yoba mudu ene sip mina akie wigwa i ama ta goglkraiglmiwe di, angelo i yegl di narumiwe dugwa. 25Yegl di narukwa pre ene erme kudugl goglkrio! God kamo angelo u di narukwa i, na kaima pai inabedi pre mediluwe dugwa. 26Nono kaima ta goglkramga ba sip pi, ailan dumo makan ta yenabara pi, bina kide ere panabiwe di, Pol yegl dugwa.
27Ana ir waga podo ikra ege 14-pela de mere yegl u pai mogl, no ake nu sugo, no mudi nigl Mediterenian we dimara suna i ede pi munga. No pi mungo, ege 13-pela de yogo, ana ege 14 mina i, eduer suna yoba sip mina kogon erikwa i prikwa, dumo makan ta yomara ede nigle bina u dumnedi prisre, 28ye ain ta kane kogl, pia si nigle ede, aglke kor gudu i meda ede, kanigwa i, nigl mur yogwa i, 37 mita mere yegl yogo, kanigwa. Ye kandre, kuri ta mogl, ede ido pidre, ain ikra aglke kor ede atne ede kanigwa i, 27 mita mere yegl, nigl mur yogo, 29kandre, ye prikwa i, Ede magigl u kodumga pre kobuglo kade kade ta nigle bina panan, sip pi kobuglo mina ake pai dinabedi pre, kudugl gogl, anka 4-pela sip mokomugl ede nigl atne ede padigl, ye kamun tagenabedi kamage ere meglkwa.
30Ana okuo, yoba sip mina kogon erikwa i, sip kide kodo, baglkugl mina teke ede enamnedi baglkugl sip bolamugl yogwa i, kane kogl, pia si nigle edigwa. Yegl ersre, ye yoba tau sip mina meglkwa i ka kibi di te, No anka tau baglkugl mina i pi sip gumamugl korauniwe di, yegl digwa. 31Yegl digwa ba Pol ye erikwa i pre kan ersre, yagl ta soldia bitno moglkwa i ya soldia mudu sip mina meglkwa i di te, yegl dugwa, Yoba i ye sip ta kide kodo, ede ebi, nono mudu kor moramne diga ikra, na prika, kuno erekrabiwe dugwa. Ene tau ama goraiglkwa pamiwe dugwa. 32Yegl dugwa pre soldia ere mogl, sip kogon erikwa yoba ikra ede pikraiglmedi mane di tedre, baglkugl ede atne edigwa kan i mudu si bugl di edigo, baglkugl nigl tebe ede ogwa.
33Ana ege i kamun tagenagledi eruko, Pol ye yoba sip mina akie umga i kaya mokna nenaiglmedi di te, yegl dugwa, Ene ege 14-pela de nomane sidre, kaya mokna nekrikwa 34pre na erme ene ka giglede di teiga i, Ene kaya mokna neo! di, yegl dugwa. Siragl pre nono kaya mokna nedre, keme kor moramga paugwa. Ene nomane sidre, kaya mokna nekrikwa i, kide kodo, neo! Nono mudi nigl suna i, swara ta wau bogl, goglkramga. Mudu kor moramniwe di, Pol yegl dugwa. 35Yegl didre, ye yoba mudu sip mina munga i gumuglnomugl bret ta idre, God di wakai yei tedre, buko di nogwa. 36-37Buko di nogo, yoba mudu 276 mere sip mina munga i kandre, nomane sikre, kaya mokna i nomga. 38Ana yoba kaya mokna neigwa, dano eruko, ye sip yubun dekre, u dinabedi wit mogo tau sip mina yuigwa i, pia si mudi nigl edigwa.
Sip wesan mina ake padre, buko dugwa
39Kamun tagugo, yoba sip mina kogon erikwa i dumo makan ta yogo, kanigwa ba ye dumo makan aglo mere wigwa i kan pogl sikrikwa. Ye kan pogl sikrikwa ba ye kanigwa i, nigl tau pa si ede dumo makan yomara suna ogwa mere kandre, ye prikwa i, kuno eran, sip ake i pi, nigl pa si ede suna omara, wesan wakai yomara i padramniwe di, ka di keglkwa. 40Ka yegl di koglsre, ye sip mokomugl anka edigwa i mudu si bugl di nigle edidre, ye sip guma akenamnedi sip guma akigwa taragl suo okna i mitna ede kan kogl padiglkwa i, kan poko ede, taragl suo i ede nigle ede padiglko, yoba tau ama sel ta ake mina ede, sip gumamugl keglkwa. Yegl ere, ede wesan yomara enamnedi ere eigwa 41ba nigl i mur yeikrukwa. Nigl tebe yogwa pre sip ogwa, wesan mina ake gi di paugo, sip ede enagledi erukwa kuno erekruko, sip mokomugl nigl podo si, kuri kuri di, si buko di moglkwa.
42Ana sip mokomugl i, nigl si pepigl di, sip kuri kuri di, si buko di moglko, soldia wagle prikwa i, kane yoba ta nigl kuba si, teke ede ebi we di pre, ye ka di kogl, Kane yoba mudu si goramniwe digwa. 43Yegl digwa ba soldia bitno moglkwa yagl i ye Pol si goglkraiglmedi pre, Kane yoba swara ta si goglkrio! di, mane dugwa. Yegl didre, ye yoba sip mina meglkwa i di te, tau nigl kuba sinaiglkwa kuno erabuka mere i, okna kana puglo di ede nigle pidre, kuba si ede meda enaiglmedi di tedre, 44Te, yoba nigl kuba si kankrikwa i, ede paglkane mo sip bage ta, nigl si buko di ede enabuka i idre, nigl yaudomugl wan ede meda enaiglmedi di togo, no pra pra yegl ere, swara ta goglkunga. Mudu ede meda pi, kor munga.
Currently Selected:
Aposel 27: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
