Isip Kide Kodigwa 12
12
God Israel yoba kanige eragle dugwa
1Ana Moses ya Aron ye dumo Isip mogl pai miurko, Yawe ye yegl di togwa, 2Ene Israel yoba di tebr, ba erme gere yogwa i, ene i 1 mun edinaiglmiwe dugwa. 3Te, ene Israel yoba mudu di tebr, ba namba 1 mun edinaiglmara magigl i de namba 10 mina yagl swara swarade ye pre ya, ebie gagiglma pre sipsip nagigle mo meme nagigle ta i pere edenabuka. 4Te, yagl ta ebie gagiglma bogl mere ta moglkribi, ye mudu yene mogl, sipsip nagigle mo meme nagigle mudu ne kodinaiglkwa kuno erekran, yagl ta magigl kipanabuka i, ye ebie gagiglma bogl wibi, akie nenaiglkwa. Ye yoba swara swarade nenaiglmere yubu si tebi, mudu ne kodinaiglkwa. 5Ene Israel yoba sipsip nagigle mo meme nagigle i pere edenaiglkwa i, kumugl keme bugla yugu swara moglkwa i pere edenaiglkwa. Te, i ama ogo gagie wagle num dekre, kide ta paikrabuka. 6Ene de namba 10 sipsip mo meme i pere edidre, sugl moglsre, de namba 14 min panan, ene Israel yoba mudu sipsip ya meme i pere edenaiglkwa i, si goraiglkwa. 7Ana yoba sipsip mo meme i pere edenaiglkwa i, si goglsre, ye bormai tau kogl i pi yugu ta ye yugugl mogl, sipsip mo meme ere nenaiglmara i, yugu dua yomara guglo koglo koglo kra i egrisre, te dua mina ede prak mitna pamara i ama egrisre, eraiglkwa. 8Yegl ersre, eduer swara i ye mie kodo garaiglkwa idre, bret yis edekre garaiglkwa idre, mokna ku erukwa garaiglkwa bogl akie nenaiglkwa. 9Ene mie i kor nekre, nigl bogl gaglkrio! Ene mie mudu, bre ya ogo kagle ya dem muduo pra, kodo gaglsre, neo! 10Te, mie tau tagna kana nenamnedi mokade yekrio! Ene eduer i keme nebi, tau yoko yenan, gagl tege erio! 11Ana ene eduer ne moraiglkwa igne i ene tabre Isip kide kodidre, ede enaiglkwa pre kuguglno gaglno ya kaglno towo edidre, muglbono ake moglsre, tabre nenaiglkwa. Eduer i, na ene Israel yoba kanige ersre, Isip yoba si goraglka igne yenabuka pre diga. 12Na eduer i, ede dumo Isip suna u, u ikne ikne pi, Isip yoba wano komono ya ye aglno buglano gagro komono kiglkwa i mudu si goraglka. Na yegl ere, Isip yoba godno mudu ere sinaglka. Na Yawe moglka. 13Na Isip yoba yegl ere sinaglka ba ene kipai meglmara we, na ene bormai egraiglkwa i kandre, ene si, ere kide ere tekre, kanige eraglka.
14Ana okuo bugla yugu swara swarade yenabuka igne, ene ege i, na siragl mere erika i pre moraiglkwa pre wakan mogl, kagna kade naraiglmiwa. Te, gawanoma okuo moraiglkwa i ama bugla yugu swara swarade aimadi yegl ere moraiglmiwe dugwa.
*************************
Israel yoba God no kanige erabedi sipsip ya meme nagro si geglkwa
21Ana Moses ere mogl, Israel yagl kade mudu di makai sidre, ye yegl di togwa, Ene swara swarade ede pi sipsip nagigle mo meme nagigle idre, ebino gagroma bogl akie nenaiglkwa pre si goraiglkwa. God ye Isip yoba si goglsre, nono kanige erabuka egemo erme yogwa pre diga. 22Ene sipsip mo meme i si goglsre, bormai tau dis mina kogl yenaiglkwa. Kogl yedre, ene ede kebra hisop we digwa i, yogagle tau buko di yudre, ede hisop yogagle wagle bormai tau si bai, yugu dua yomara guglo koglo koglo kra i egrisre, te dua mina ede prak mitna pamara i ama egrisre, eraiglkwa. Yegl ersre, ene eduer meda pikre, yugugl keme mogl ebi, kamun tagenabiwe dugwa.
*************************
Isip yoba wanoma komono geglkwa
28Ana Israel yoba we, Yawe ye Moses ya Aron di tomere Moses ye di togo, erikwa. 29Yegl eriko, Yawe eduer suna Isip yoba wano komono mudu si goglkwa. Ye king wam komono sidre, yoba mudu wano komono sidre, ede pi yoba kane yugu paigwa ama wano komono si goglkwa. Te, agl bugla mudu gagro komono kiglkwa i ama si goglkwa. 30Si goglko, Isip king ya ye yobamo kade ya Isip yoba mudu eduer suna adiglsre, kai podo kaima erikwa. Yoba yugu swara swarade meglkwa i, ye wano komono mudu geglkwa pre yegl erikwa. 31Kai podo eriko, king ere mogl, Moses ya Aron eduer suna agle dugo, ubrika. Ye ubriko, ye yegl di togwa, Ene we, ene Israel yoba mudu na yobanama meglmara kide kodidre, ede pio! Ene okna dibrere ede pi Yawe kamage ere tedre, kagie kade tenaiglmiwa. 32Ene sipsip ya meme ya kau kiglkwa i ama okna dibrere idre, ede enaiglkwa. Te, na ama ene di wakai yei nariro! di, king yegl dugwa.
33Ana king ka yegl dugo, Isip yoba ama ere mogl, yegl digwa, Israel yoba dumo Isip kide kodokre, tabre pikribi, nono mudu goramniwe digwa. Yegl didre, ye Israel yoba di te, Tabre ede pio! digwa. 34Yegl digwa pre Israel yoba ere mogl, plaua tagna nenamnedi yis edekre, dis mina yeigwa i, lap mina tu sidre, kine idre, ede enamnedi erikwa. 35Ana okna Israel yoba Moses ye di tomere Isip yoba taragl gol ya silva ya kugugl gagl noraiglmedi di prikwa. 36Di priko, Yawe Isip yoba ye Israel yoba wakai kanaiglmedi ere edugo, ye di primere teigwa. Israel yoba yegl ersre, ye Isip yoba taraglno mudu idre, ede eigwa.
*************************
46Ene sipsip nagigle mo meme nagigle si gagl nenaiglkwa i, mie tau i meda pikre, yugu ta nenaiglmara swara i yugugl mogl, nenaiglmiwa. Te, sipsip mo meme i yobuglo swara ta si buko dikraiglmiwa.
*************************
51Ana ege swara i Yawe ye Israel yoba mudu dumo Isip kide kodinaiglmedi agre i ede meda ogo, ye yugobuno meglmere meglmere ede eigwa.
Currently Selected:
Isip Kide Kodigwa 12: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
