Isip Kide Kodigwa 14

Israel yoba mudi nigl Retsi ede koglo ibo eigwa

1 Ana Yawe ere mogl, Moses yegl di togwa, 2Ene Israel yoba di ten, ene akie ede ikne pi dumo Pihahirot we dimara pidre, dumo i magigl mudi nigl bina sel yugu kipainaiglmiwa. Dumo Pihahirot we digwa i, mudi nigl moglmara ya dumo Migdol yomara suna yogwa. Te, dumo ta ama magigl i yogwa, Balsefon we digwa i, ene dumo i yomara prak iro sel yugu kipanaiglkwa pre diga. 3Ene ede pi dumo i sel yugu kipaibi, yoba tau Isip king di tebi, ye prisre, yegl prabuka, Israel yoba we, ye konbauna kankre, dumo wau yomara wan meglkwa. Wau yomara suna meglkwa pre ede enaiglkwa kuno erekrabiwe di, yegl prabuka. 4Na ere mogl, king nomanemo kobuglo mere gigle dinabedi eribo, ye ere mogl, Israel yoba enaiglkwa kuno erekrabedi pran, ye amimo idre, ene sika sinabuka. Yegl erabuka ba na yobuglo ere Isip king ya ye amimo mudu tebo, na kagna wanabuka. Na kagna wanan, na Yawe moglka i, Isip yoba ama pre kan eraiglmiwe di, yegl dugwa. Yegl dugo, Israel yoba ye dumere erikwa.

5Ana yoba tau ere mogl, Israel yoba teke ede eigwa i, ye king di teigo, king ya ye yobamo kade okna Israel yoba ede enaiglme digwa i aglke nomane kor igwa. Ye nomane kor idre, yegl digwa, Nono we, nono siragl pre Israel yoba ede enaiglme dumne? Ye erme nono nigl kogono ta erekraiglmiwe di, yegl digwa. 6Yegl digo, king ye karismo idre, soldia ama idre, 7karis 600 wakai kaima yeigwa i, ya karis yoko yeigwa mudu idre, ede ogwa. Karis swara swarade i, sugl moglkwa yagle ta moglkwa. 8Ana Israel yoba we, ye kudugl goglkre, ede eigwa. Ede eigo, Yawe ere mogl, Isip king nomanemo kobuglo mere gigle dinabedi erukwa pre ye Israel yoba sika sugwa. 9King ye Israel yoba sika sugwa i, ye soldia tau karis mina enaiglkwa idre, tau hos au sidre enaiglkwa idre, tau makandigle enaiglkwa idre, ede ogwa. Ye amimo bogl ede pi Israel yoba dumo Pihahirot magigl i, dumo Balsefon yomara prak iro ye mudi nigl bina sel yugu kipai meglmara magigl eigwa.

10Isip king amimo bogl magigl wigo, Israel yoba kan iro ede, Isip ami ye moknomugl wigwa i, kanigwa. Ye kandre, kudugl podo gogl, Yawe no ere inabedi agle di prikwa. 11Ye Yawe agle di prisre, ye ama Moses yegl di prikwa, Siragl eruko, ene mabuno kide ere norsre, dumo Isip kide kodo, no agre i ede meda une? Dumo Isip suna i gigl pene mere yekrukwa pre no dumo wau yomara magigl i goraiglmedi prisre, no agre i ede uno? 12No dumo Isip munga igne, no ene di te, Ene no kanige etn, Isip yoba nigl kogono ere te moramniwe di, yegl di tomga. No dumo Isip mogl, nigl kogono ere te muna, wakai mungo ba no erme dumo wau yomara i goramga i kide puniwe di, yegl digwa.

13 Ana Israel yoba ka yegl digwa ba Moses ere mogl, ye yegl di togwa, Ene kudugl goglkrio! Kan molo! Ene kan meglbi, Yawe ene ere inan, kanaiglkwa. Isip yoba magigl wigo, ene kanigwa i, ene okuo ege swara kaima ta ye kankraiglkwa. 14Ene yoko kan meglbi, Yawe ene kudano erabiwe di, yegl dugwa.

15Moses ka yegl di kodugo, Yawe ye Moses yegl di prukwa, Ene siragl pre na agle di motne? Ene Israel yoba yegl di te, Ene ede pio! do. 16Didre, ene muglbonen ake duglo si, mudi nigl buglo sin, mudi nigl biglke didre, ede u koglo koglo enabuka. Ede u koglo koglo enan, ene Israel yoba suna i, konbauna ede enaiglmiwa. Ene enaiglmara i, makan kugla dinabiwa. 17Te, na we, na Isip yoba mudu nomano kobuglo mere gigle dinabedi eribo, ye ama ede mudi nigl suna pi, ene sika sinaiglkwa. Yegl eraiglkwa ba na ere mogl, king ya ye amimo mudu ye soldiamo karis mina wigwa ya hos au sidre wigwa i, na ere sibo, na kagna wanabiwa. 18Na king ya ye soldiamo karis mina wigwa ya hos au sidre wigwa i, yobuglo ere tebo, kagna wanan, na Yawe moglka i, Isip yoba ama pre kan eraiglmiwe di, yegl dugwa.

19Ana God angelomo okna Israel yoba eimara ede okna ogwa i, kide kodidre, aglke ede u mokonomugl ogwa. Te, kamun kua olto ta sugwa ikra aglke ede u mokonomugl pi, si bodugl pai moglkwa. 20Kamun kua i, Isip yoba meglmara ya Israel yoba meglmara suna si bodugl pai moglkwa. Ye ikne ikne meglko, suna i sugwa. Eduer yogo, kamun kua Isip yoba meglmara i, mim podo erabedi ersre, Israel yoba meglmara abuglage sinabedi erukwa. Yegl eruko, eduer i, Isip yoba ede pi Israel yoba meglmara pikrikwa.

21Ana Moses ere mogl, ogo ake duglo si, mudi nigl buglo sugwa. Buglo sugo, Yawe ir podo dedugo, ir ade umara kra moglkwa udre, eduer mage ede pi kamun tagugwa igne pra magugwa. Ir mage u mudi nigl si pere pere edugo, makan suna i kugla dugwa. 22Makan suna i kugla dugo, Israel yoba mudi nigl okna mogl, ake wai dumara i, konbauna ede eigwa. Ye eimara i, mudi nigl koglo koglo kobuglo togl podo mere yegl bogl paugwa. 23Israel yoba mudi nigl okna mogl, ake wai dumara konbauna ede eigo, Isip yoba sika si eigwa. Isip king soldiamo karis mina eigwa ya hos au sidre eigwa i, mudu ede pi Israel yoba konbauna mudi nigl okna ede eimara i, sika si eigwa. 24Sika si eigo, kamun tagenagledi eruko, Yawe kamun kua ikra ya doga ikra mina i swara ede, atne mogl, kan atne ede, Isip soldia ede eigo, kanugwa. Ye kan atne edidre, Isip soldia mudu bitno kinano si gi dugwa. 25Si gi didre, ye ama Isip yoba karisno wil ake prak arak ede enaiglmedi erukwa. Yegl eruko, karis mina enaiglkwa kuno erekrukwa. Kuno erekruko, Isip yoba yegl digwa, Yawe ye Israel yoba ake ple di tedre, kuda bogl norukwa. Yegl pre nono Israel yoba sika sikre, teke ede ikne omno! digwa.

26 Ana Isip yoba yegl digo, Yawe ere mogl, Moses yegl di togwa, Ene mudi nigl okna ake wai di moglmara aglke kor pi morabedi ogon aglke kor ake duglo si, mudi nigl buglo suo! Mudi nigl aglke kor moglmara u moran, Isip yoba ye karisno bogl ya soldia hos au sidre wigwa i akie si atne edenabiwe di, yegl dugwa. 27Yawe yegl dugo, kamun tagugo, Moses ogo ake duglo si, mudi nigl buglo sugo, mudi nigl moglmara aglke kor ede ikne pi ake wai dugwa. Ede ikne pi ake wai dugo, Isip yoba teke ede enamnedi erikwa, kuno erekrukwa. Yawe ye mudi nigl ne goraiglmedi ere, ye mudu si goglkwa. 28Mudi nigl moglmara ede ikne pidre, king soldiamo karis mina eigwa i ya hos au sidre eigwa i, ye soldiamo mudu Israel yoba sika si ede mudi nigl suna eigwa i, si atne edugwa. Si atne edugo, ye mudu geglkwa. Swara kaima ta kor moglkrikwa. 29Isip yoba yegl ere, mudu geglkwa ba Israel yoba we, ye ede koglo ibo eigwa igne, mudi nigl koglo koglo kobuglo togl mere yegl bogl paugo, makan kugla dugwa.

30Ana igne i Yawe yegl ere, Israel yoba ere yugo, Isip yoba ye si ede ikne pikrikwa. Yawe ye ere yugo, Israel yoba nigl koglo mogl, Isip yoba ogono gagno nigl si kake i ede u nigle bina edugo, kanigwa. 31Ana Yawe yobuglo podo ersre, Isip yoba si goglkwa i, Israel yoba kandre, Yawe kuduglmo goglsre, ye kamo pre mediglkwa. Te, Yawe nigl kogonmo yagl Moses ikra kamo ama pre mediglkwa.

Currently Selected:

Isip Kide Kodigwa 14: KB

Highlight

Compare

Copy