Isip Kide Kodigwa 19
19
Israel yoba ede dumo Sainai eigwa
1-2Ana Israel yoba ere mogl, dumo Refidim kide kodidre, ede pi dumo ta wau yomara, yoba Sainai we dimara pi, plau digwa. Ye okna dumo Isip kide kodigwa igne i ba 1 mun we digwa. Ana ye wan ede pi dumo Sainai i plau digo, ba 3 mun, de namba 1 yogwa. Ye dumo Sainai pi, plau didre, muglo meglbi Sainai we digwa yomara magigl i sel yugu kipaigwa.
3Ana Israel yoba dumo Sainai i kipaigo, Moses ere mogl, God bogl ka ta dinabugledi ede muglo ibo ogwa. Ye ede muglo ibo ogo, Yawe muglo ibo moglsre, Moses agle didre, ye yegl di togwa, Ene Israel yoba, Jekop gawama meglkwa i, di te, Yawe yegl dumiwe dinatniwa. 4Ene we, na Isip yoba ere kide ere teiga i, ene kanigwa. Te, ka padum ta dinaglka i, na kua kigla mam gagigle au si padigl, pru dumere mere yegl ene sugl moglsre, ene agre i ede magigl u na moglmara ediga i, ene pre kan erikwa. 5-6Ana erme we, na lona ene tenaglka i, ake gi didre, kana duglo beglbi, ene na yobanama moraiglkwa. Na dumo makan mudu nem yagl moglsre, yoba yugobuno pere pere uglo koglo koglo meglkwa i ama nem yagl moglka ba ene swara na yugobunona kaima moraiglkwa. Moglsre, ama tawa gagl narikwa yoba mere yegl na kogona eraiglmiwe di, Yawe yegl dumiwe do dugwa.
7Ana God ka yegl di te kodugo, Moses ede atne u, Israel yagl kade di makai sidre, Yawe ye ka di tenabedi dumere ikra ye di togwa. 8Ye di togo, Israel yoba mudu di ikne ede, yegl digwa, Yawe ka siragl mere dugwa i, no ye dumere eramniwe digwa. Yegl digo, Moses ye kano idre, ede ikne muglo ibo pi Yawe di tenagledi ogwa. 9Di tenagledi ogo, Yawe ere mogl, Moses yegl di togwa, Ene pro! Na ene ka di tenaglka i, Israel yoba ama praiglkwa ba na kan dinaiglmedi na kamun kua kama mina atne mogl, ene moratnara u, ka di tenaglka. Israel yoba prisre, ene kanen ama aimadi kamin pre medraiglmiwe di, yegl dugwa. Yawe yegl dugo, Moses Israel yoba kano ikra Yawe di togwa.
10Moses Israel yoba kano Yawe di togo, Yawe ere mogl, Moses ka ta ama di te, yegl dugwa, Ene ede ikne pi, Israel yoba di ten, ye erme ya tagna Yawe no munara unabe di prisre, nomano ake kun ere, kuguglno gaglno nigl edinaiglmiwa. 11Na erme mogl, tagna mogl, barma na Israel yoba kan meglbi, gumuglno wagle ede atne u muglo meglbi Sainai unaglka. Yegl pre Israel yoba erme ya tagna Yawe no munara unabukra we di prisre, na dimere yegl eraiglmiwa. 12Ana ene yoba muglo ibo u dinaiglmedi buglo bogl winabo didre, yoba yegl di tenatniwa, Ene kan kun erio! Ene buglo boglka i ta oglo si, muglo ibo ta pikre, muglo bage swara ta ama akekraiglkwa. Yoba ta ere mogl, buglo i ta oglo sinan, nono yoba i si goramniwa. 13Yoba mo agl bugla ta ere mogl, buglo i ta oglo sinan, nono ye si goramga ba ye ta akekramga. Yoba kobuglo si, si goraiglmo mo ta manan, yer si, si goraiglmiwe di, yegl di tenatniwa. Ana biugel ege olto boran, igne i yoba ede muglo pamara magigl unaiglmiwe di, Yawe yegl dugwa.
14Ana Yawe ka yegl di kodugo, Moses muglo ibo ede atne u yoba Yawe unabedi nomaneno ya ki ake kun eraiglkwa i di togo, ye dumere ersre, kuguglno gaglno nigl edigwa. 15Yoba yegl eriko, Moses ere mogl, yoba ka ta ama di te, yegl dugwa, Yawe erme mogl, tagna mogl, barma unabuka. Yegl pre enene ake kun ersre, yagl abu erme ede pi ye unabuka igne i bogl swara pakrio! di, yegl dugwa.
16Ana Moses ka yegl di kodugo, kamun ege suo tagugo, ege ta i kamun tai sidre, gur gagla dugo, kamun kua ta ede atne u, muglo meglbi ake kegl dugwa. Yegl eruko, biugel podo boglko, yoba mudu ye sel yugu kipaimara mogl, kudugl podo goglsre, ogono nagino nuglo digwa. 17Yegl eriko, Moses ye yoba sel yugu kipaimara kide kodidre, God tegigl yenaiglmedi ye agre i ede pi muglo meglbi mabunomugl edugo, adigl meglkwa. 18Adigl meglko, Yawe doga mina atne mogl, ede atne u muglo meglbi Sainai moglkwa pre ede inge muglo meglbi i ake kegl dugwa. Inge i, yoba makan koglwa brik ya sin gaiglkwa, inge podo ede mitna omere mere yegl ogo, imem podo kide ta muglo meglbi ugo, muglo meglbi piga dugwa. 19Piga dugo, biugel podo boglkwa ikra u podo kide pidre, u podo kide kaima ogwa. U podo kide kaima ogo, Moses ka ta God di togo, kamun gur dumere yegl God ka di ikne ede Moses togwa. 20Yawe ka di Moses tedre, ede atne u muglo meglbi Sainai muglo ibo udre, Moses ede muglo ibo Wo! dugo, Moses ede ogwa. 21Moses ede ogo, Yawe ere mogl, Moses yegl di togwa, Ene aglke ede atne pi, yoba na kanamnedi buglo oglo sikraiglkwa pre ka giglede di tenatniwa. Yoba mere gogl dinaiglmiwa. 22Te, tawa teigwa yagle na moglmara ege ege wigwa i, ye ama na moglmara unaiglkwa i, nomano ake kun ersre, unaiglmiwa. Ta manan, na ye sinaluwe di, Yawe yegl dugwa.
23Ana Yawe ka yegl di kodugo, Moses ye di ikne ede te, yegl dugwa, Israel yoba muglo i ta ukraiglmiwa. Enene no ka giglede di noro, Muglo meglbi i dumo mawagl yomiwa, buglo bogl winabo dio! diniwe di, Moses yegl dugwa. 24Moses yegl dugo, Yawe ye di te, yegl dugwa, Ene ede atne pi, Aron idre, ede ikne unatniwa. Ba tawa teigwa yagle ya yoba yoko meglkwa we, ye na muglo magigl i moglmara unamnedi buglo oglo sikraiglmiwa. Ye oglo ta sibi, na ye sinaluwe di, Yawe yegl dugwa. 25Yawe yegl dugo, Moses ede atne pi yoba meglmara pidre, Yawe ka dumere i di togwa.
Currently Selected:
Isip Kide Kodigwa 19: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
