Isip Kide Kodigwa 25

Israel yoba God sel yugumo kenamnedi taragl tau teigwa

1Ana Yawe ere mogl, Moses yegl di togwa, 2Ene Israel yoba di ten, ye taragl tau naraiglkwa. Yoba ta yene nomane mina taragl tau naragledi prabuka i, ene tenan, inatniwa. 3Israel yoba taragl tau naraiglkwa i, gol ya silva ya taragl ain mere yegl ta yogwa kagie bras we digwa i naraiglkwa. 4Te, kan morodugwa ya gogl ya gogl kaima narsre, lap kruo wakai yogwa i, narsre, meme yugo narsre, 5sipsip kumugl nagino kugl yauro, ere i gogl edigwa i ya nigle taragl dolpin we digwa i nagino naraiglmiwa. Te, ede akas we digwa i edemo narsre, 6oliv nuglo ken garaiglkwa narsre, ede nuglo tau demene wakai erukwa ye oliv nuglo bogl i swara ede, taragl tau na taraglnana yomedi praiglkwa pre akenaiglkwa i, narsre, ede nuglo ya ki gagl tege eribi, inge demene wakai erabedi naraiglmiwa. 7Te, kobuglo ta kanilian we digwa i ya kobuglo tau ama mige podo boglkwa i naribi, ene in, yagl ta tawa narikwa yoba ye bitno morabuka i, kobuglo i yoba ye gaglmo suna wagle padiglsre, te lap ta gagl suna mina i tebe ede padraiglkwa i mina kobuglo tau ama padraiglmiwe dugwa.

8Te, ene di ten, Israel yoba sel yugu ta na yuguna yenabedi kei padiglbi, na ye meglmara suna moraglka. 9Ana ene sel yugu kei padiglsre, taragl tau yugugl padraiglkwa ama mudu bekenaiglkwa i, na ene obuno di tenaglmere yegl keme sel yugu kei padiglsre, bekenaiglmiwe dugwa.

Boks ta lo kobuglo paglkane mina boglkwa ikra atne yenamnedi bekenaiglkwa

10Te, Israel yoba ede akas we digwa i wagle na boks ta ama ere naraiglmiwa. Boks ere naraiglkwa i, olto 110 sentimita yenan, prak 66 sentimita yenan, ede mitna enabuka ama 66 sentimita yenabuka. 11Ye boks ere naribi, ene gol wakai, deglbi ta yekrukwa idre, boks yugugl kra ya meda i, suo akie gol ede bolamugl si dage padraiglmiwa. Te, boks dra wagle, gol tau dra meda kra padigl winabo dinaiglmiwe dugwa.

*************************

17Ana Yawe ka ta ama Moses yegl di togwa, Ene gol wakai, deglbi ta yekrukwa idre, boks pre bekenaiglmiwa. Boks pre i sie olto 110 setimita yenan, sie prak 66 sentimita yenabuka. Boks pre i mina na ene tadaglmeno si bi dinaglka agaimo yenabuka. 18Te, ene hama idre, gol mina angelo giglede suo koglo koglo boks pre mina beke padraiglmiwa. 19Angelo ta ogono wo kra beke padigl, angelo ta ogono koda kra beke padraiglkwa. Yegl beke padraiglkwa ba ene boks pre ya angelo suo i pere pere ta bekenaiglkwa pre dikrika. Ene gol idre, boks pre ya angelo suo i swara bekenaiglmiwa. 20Angelo suo i gumano drano, na ene tadaglmeno si bi dinaglka agai i kan miurka mere yegl bekenaiglmiwa. Te, ye koyeno ake pigla di, boks pre si bi di miuredi, yegl bekenaiglmiwe dugwa.

21Ana na kobuglo paglkane suo lo boglka ikra we, na ene tebo, ene kobuglo i boks bekenaiglmara i mina atne yedre, boks pre yograiglmiwa. 22Na lona boksmo i mina na ene ka di tenaglka agaimo yenabuka. Na boks pre ene tadaglmeno si bi dinaglka agai i mina kuglo mogl, angelo suo bekenaiglmara suna i moglsre, ene ka di tenaglka pre diga. Na agai suna i moglsre, Israel yoba na kana duglo boraiglkwa mudu i ene di tebo, ene kana i pi Israel yoba di tenatniwe dugwa.

Bogl ta bret tebe yenabedi kuraiglkwa

23Te, ene ede akas we digwa i idre, bogl ta kuraiglmiwa. Bogl i, olto 88 sentimita yenan, prak 44 sentimita yenan, bogl pika 66 sentimita yenabiwe dugwa.

*************************

30Ene ege ege bret tau na moglmara yenabedi bogl i mina yenaiglkwa. Yebi, na gumanamugl yenabiwe di, Yawe yegl dugwa.

Lam beye ta bekenaiglkwa

31Te, Yawe ka ta ama Moses yegl di togwa, Ene gol wakai, deglbi ta yekrukwa idre, lam beye ede ta mere yegl bekenaiglmiwa. Ene hama idre, lam beye yei ede mitna enabuka i, pere pere ta beke yu, si gi dikre, beye bekenaiglkwa swara i mina beke ede mitna enaiglkwa. Bekidre, ene hama idre, taragl i mina muno gane si, lam tebe padraiglmara i ede kie sumere mere yegl beke padiglsre, bage tau nubun moglkwa mere yegl beke padraiglmiwa. 32Lam beye yei, beke ede mitna enaiglmara bage i mina yogagle 6-pela bekenaiglkwa. Ogono wo kra yogagle suota bekidre, ogono koda kra yogagle suota bekenaiglmiwe dugwa.

Currently Selected:

Isip Kide Kodigwa 25: KB

Highlight

Compare

Copy