Galesia 2
2
Jisas aposelma Pol bogl deno muduno swara yeigwa
1-2Ana bugla yugu podo 14-pela mere ede ogo, God na ede ikne Jerusalem po dugo, na yagl suo Barnabas ya Taitus agre idre, ede Jerusalem eiga. Ede Jerusalem pidre, pre mediglkwa yoba bitno meglkwa i, di bina edidre, Jisas kamo Jentail yoba beke teimere mere boglo kugl teiga. Kowai na kogon podo ere wiga i, u yoko pi dinabuka pre diga. 3Na yegl pre diga ba ye ka swara i keme dumniwe didre, Taitus na bogl wabuglka ikra, nagie puduo borabe ta dikrikwa. Ye Grik yagl ta moglkwa pre nagie puduo pai moglkwa ba ye boglo ta dikrikwa.
4Ka i ama ta dikramga ba yoba tau no makai sumnara teke konbo ede suna udre, ka kibi no ene agroma mune didre, nagie puduo borabe digwa pre dumga. Nono lo duglo boglkre, Krais Jisas yoko kaima sika sumga i, yoba i kide prisre, lo mina kane panaiglmedi konbo dokigwa. 5Ye yegl pre ede suna wigwa ba no ege swara ta ye kano prisre, ene kuno dimiwe di, yegl ta di tekrumga. I siragl pre Jisas kamo kaima paugwa i, pamere yegl panan, ene bogl aimadi yenabedi prumga.
6Te, na ka mabuno siragl mere di wan moglka i, yoba kade wagle i, Pra dine digwa. Ye yoba kade meglme diga i, ye ka kaima yegl meglkwa ba yoba kagno paugwa mo paikrukwa i, God yoba kagno kan yubu sikrukwa. Te, na ama yoba kagno taragl yoko yomedi prika. 7Ba yoba kade we diga i, Pita pi Israel yoba Jisas kamo di tenabedi kogon tomere yegl mere, na ama Jentail yoba di tenatnedi kogon narumedi kanigwa. 8I siragl pre God Pita yobuglo bogl tedre, Juda yoba meglmara dedumere mere yegl na ama yobuglo bogl narsre, Jentail yoba meglmara na dedumedi kanigwa.
9Ana Pita, Jems ya Jon meglkwa i, pre mediglkwa yoba ye kandre, no yobro meglmedi kanigwa. Te, Pita, Jems ya Jon na kandre, God na ama yobuglo bogl narumedi kanigwa. Yagl suota i, na Barnabas bogl ogono norsre, Nono God kogonmo yoba kuno muniwedi i nogugl edigwa. Ye Kuno muniwe didre, No Juda yoba meglmara kogon eun, ene yugobuno pere, Jentail meglmara kogon erabriwe di, yegl digwa. 10Taragl ta pre ama dikrikwa ba swara kaima ta erabre digwa i, Ene God kogonmo ere enabrara i, goduglme yoba ake ple di tenaiglmedi beke tebr, wakai panabiwe digwa. Ye yegl digwa i, nomane kor ta narekrikwa ba na nomana pamere digwa.
Pol Pita di tedre, Ene aglau etniwe dugwa
11Ana okuo Pita ede dumo Antiok ugwa igne, ye aglau podo ta erukwa pre na ye moglmara nogugl di tedre, Ene aglau etniwe diga. 12Ye aglaumo yegl paugwa. Pita ede dumo Antiok umere, ye Jentail pre mediglkwa yoba nagino puduo boglkrikwa i bogl akie kaya mokna neigwa. Neigwa ba okuo yagl Jems Jerusalem mogl, yoba dedugo, ede dumo Antiok wigwa igne, yoba nagino puduo beglmo mo boglkrimo mo kan yubu sigwa yoba ikra wimiwe di, Pita kuduglno goglsre, Jentail bogl wankrikwa. 13Igne i, Pita kamo u ta ogo, mabunomo u ta ogwa i, Juda pre mediglkwa yoba dumo Antiok meglkwa i, Pita erumere yegl eriko, Barnabas ye mudu erimedi kandre, ye ama yage sugwa.
14Ana na ye meglmara u kaniga igne, ye mabunono ya Jisas kamo kaima paugwa i bogl u kuno pikruko, na yoba mudu gumuglno mina Pita ka te, yegl diga, Ene Juda yoba motnga ba kamin kuade Jentail ebrie mabunono duglo boglnga i pre ene Jentail yoba Juda lono duglo boraiglmedi erekro! diga.
Jisas pre mediglsre, keme God gumuglo mina yoba du moramga
15No Juda yoba munga i, no yoba du muniwedi prisre, Jentail meglkwa i, tadaglme yoba meglmedi kamga. 16Ba erme nono pre pogl sumga i, yoba ta God lomo duglo boglsre, yoba du ta moglkrabuka ba Krais Jisas pre medrabara swara i mina yoba du morabedi prumga. Yegl pre nono okna yoba du moramnedi lo duglo bunga i kide kodo, erme Krais Jisas pre medunara swara i mina yoba du munedi prumga. I siragl pre yoba swara ta lo duglo boglsre, God gumuglo mina yoba du ta moglkrabuka.
17Na ka kira ta poraglka. Nono Krais pre medun, du moramgrawa we di prisre, lo mina yage sumun, i Krais nono tadaglme eraiglmedi erumo? Ka kaima ta manugwa! 18Na lo kide kodiga ba kor duglo boragledi eribo, ka kaima na tadaglme yoba moledi i nogugl ediga.
19Okna na lo duglo boglko, lo na si goglkwa. Lo na si goglkwa pre na erme God yoko duglo bogl moglka. 20Na Krais bogl akie ede prak mina guglka pre nana kor moglkrika ba Krais na moglmara suna moglko, no akie kor muglka. Te, erme na mogl pai erika i, God Wam swara pre medigl mogl pai erika. Jisas dem muduo podo narsre, na ere inagledi goglkwa.
21Na diga i, God lomo duglo boragledi eribo, God yoko kaima ere wakai ere narukwa i, ere i taragl yoko edenaglka. I siragl pre yoba ta God lomo duglo boglsre, du moraiglkwa i ta kuno eruma, Krais u goglkwa i, mem wakai ta paikruko.
Currently Selected:
Galesia 2: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission