Galesia 4
4
Erme God gagiglma mogl kodumga
1Ene i kodime diga i, na ka ebrie mina yegl dinaglka. Yagl ta goran, ye wam taraglmo inabuka paugwa ba ye gak kebra mogl pai moglkwa pre ye nem niglmo kogonmo yoba meglmere mere kuno yegl moglkwa. 2Te, ye nem yoba tau dede, gak i suglmo molo dumere yegl, gak i meglmara atne moglsre, kano pre morabuka. 3Kuno yegl mere nono Jisas pre mediglkrumga igne, nono gak i mere moglsre, yoba lo kane kane pre mediglmere nono ama pre medigl, kane pamga.
4Kane pamga ba God yene ege ta paduglkwa i plau dugo, ye Wam dedugo, abu ta kugl yogo, ye lo mina atne mogl yakugwa. 5Lo atne mogl yakugwa pre nono lo mina kane pamga i, nono topo si ikne edidre, God gagiglma moraiglmedi erabuka kuno erukwa.
6Ye gagiglma mungo, God ye Wam Murubuglomo i, nono deno muduno mina suna morabedi dedugwa. Dedugo, ye u suna mogl, God Nem di tedre, Nina yo! dugwa. 7Yegl dugwa pre ene erme kane yoba moglkre, God gagiglma meglkwa. Meglkwa pre ye gagiglma taragl kane kane inaiglme dugwa i, ene inaiglkwa keme paugwa.
Pol Galesia yoba pre nomane sugwa
8Prio! Ene okna God pre kan erekrikwa igne, ene taragl kane kane kagno dagl, niglno kogono ere teigwa ba taragl kane kane i, ka kaima moglkrikwa. 9Moglkrikwa ba erme God kaima ira moglkwa i, ene pre kan erikwa pre ene aglke kor ede ikne pi, makadigle yoba pre mediglmere mere pre medigl, kane panamnedi erikwa i, siragl pre erime? Yoba lono i, ene ake ple di tekrabuka. Taragl yoko kaima yogwa. Te, enene yobuglno wagle God pre kan erikwa pre dikrika ba God komono kana ene pre kan ere kodugwa pre diga. 10Na kide ta prika i, ene God no wakai kanabedi wakan kade ya, ba gere yogwa ya, bugla yugu kor yogwa i, ege kade yomedi prisre, makai sigwa. 11Ene yegl ere meglbi, ene meglmara kogon erika ikra, u yoko enabo mo kudugl goglka.
12Agrama abarama wagle, siragl swara ta eraiglmedi prika i, na erimere kuno yegl eraiglmedi prika. Na ene Jentail meglmere moragledi Juda yoba lono kide kodimere yegl, ene ama yegl erio.
Ene prio! Na okna ene meglmara wiga igne, ene na kide kan, ere kide ere narekrikwa. 13Kide podo na sugwa pre na ene meglmara keme moglsre, Jisas kamo wakai ene beke te moglka. 14Igne i, kide podo na sugwa pre ene yubun teiga ba na kide kandre, mokono narekrikwa. God angelomo mo Krais Jisas yene ene meglmara ta wibi, ene di inaiglmere mere na di igwa.
15Okna ene gun yei narikwa ba erme siragl erume? Okna kide na sugo, gumuglna kide erukwa igne, ene gumuglno pogl yu padigl naraiglkwa kuno eruma, kaima pogl yu padigl nariko. 16Ba erme we, na ka kaima pamere ene di teiga pre ene na kide kandre, kudano ikne mere yegl na moglmedi kanigwa paugwa.
17Yoba ka mabuno kibi digwa i, ye ene ake ple di tebi, wakai moraiglkwa i pre ta erekrikwa. Ye prikwa i, ene na mokono narsre, ye bogl si dakagl mun, ye kano keme praiglmedi ene bakagl te meglkwa. 18Ye deno muduno inamnedi mabuno wakai bogl teigwa i, wakai. Ba nono akie moramga igne keme erekraiglkwa. Aimadi ere pai moraiglkwa paugwa.
19Na gagrama wagle, abu ta gagie giugl pre, sugl moglmere yegl, na ama ene pre giugl pre, Krais ebrie mabunomo ene meglmara kau sinabedi sugl moglka. 20Ka kaima nono akie moglsre, ka kiede di pramnedi prika ba na eglke moglka pre kinana podo yogo, na ka giglede di teiga.
Hagar ya Sara pre ka ebrie dugwa
21Ana ene lo mina atne moramne digwa ba God lomo siragl mere dugwa i, ene primo mo prikrime? 22I siragl pre God kamo ta dugwa i, Abraham wam suo meglbre dugwa. Ta nigl kogon abu Hagar bogl kiurko, ta ebie kaima Sara bogl kiure dugwa. 23Te, nigl kogon abu bogl gak ta kiurka i, yagl abu gak kiglmere yegl kiurka ba ebie kaima bogl gak ta kiurka i, God yene promismo pai inabedi kimagl eruko, ye wam kuglkwa.
24Ana God lo ya promis di paduglkwa i, abu suo i, i nogugl edibrika. Nigl kogon abu Hagar i, Muglo Sainai i nogugl edugwa. Hagar nigl kogon yoba moglmere yegl, yoba Muglo Sainai mogl, God lomo idre, ama kane paigwa. 25Te, Muglo Sainai, kantri Arebia suna yogwa, Hagar i nogugl edugwa i, Jerusalem bogl kuno kaima yogwa. I siragl pre yoba Jerusalem kipaigwa i, ye ama lo mina atne kane paigwa. 26Ba Abraham ebie kaima Sara i, ye nono mano mere yegl moglsre, dumo Jerusalem pere ta heven ibo yogwa i, i nogugl edugwa. I siragl pre ye kane yoba moglkrumere mere yegl nono lo mina atne kane paikrumga.
27God kamo suna i, ka swara ta yegl beglkwa paugwa,
Ene abu ta gak kuglkre, temne ta motnga i, ene gun yedre, aglage kaglkane ero!
I siragl pre wina na kide kodumedi pratnga ba God ene ake ple di tenan,
Ene gak mere kide kuglsre, abu ta wie bogl meglbrika i, egre i atne edinatniwe#4.27 Aisaia 54.1
dugwa.
28Na agrama abarama kaima meglkwa i, God promis eruko, Aisak moglmere yegl, ene ama God promis mina ye gagiglma meglkwa pre Aisak bogl kuno meglkwa. 29Meglkwa ba Abraham wam suo pre dinaglka. Okna ye wam yoko ta kuglkwa ikra, ere mogl, wam ta God Murubuglo eruko, kuglkwa i, kiam si, ere sugwa. Ere sumere yegl, yoba lo mina kane paigwa i, erme ene ama ere sigwa. 30Ba God kamo siragl we di tome? God kamo yegl dugwa,
Ene nigl kogon abu i, wam bogl si meda edo!
I siragl pre ye wam i, nem taraglmo ikne ta ikrabuka.
Ye wam ta ebie kaima kuglkwa i keme inabiwe#4.30 Oknayene Ibo 21.10
dugwa. 31Agrama abarama wagle, kuno yegl mere nono kane abu gagiglma mere moglkre, Abraham ebie kaima kane abu moglkrukwa i, gagiglma mere yegl munga pre nono lo mina kane paikrumga.
Currently Selected:
Galesia 4: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission