Oknayene Ibo 14
14
King kuda podo beglkwa
1-9Ana igne i, king 5-pela ta nigl Jordan umara meglkwa. King ta kagie Bera, ye dumo Sodom sugl moglko, te king ta kagie Birsa, ye dumo Gomora sugl moglko, king ta kagie Sinap ye dumo Atma sugl moglko, te king ta kagie Semeber ye dumo Seboim sugl moglkwa. Te, king ta ama dumo Bela sugl moglkwa. Dumo Bela i, erme Soar we dumga. Ana king 5-pela i, king swara ta ade umara kra moglkwa i, bitno moglko, ye king i moglmara atne kra meglkwa. King ta ye bitno moglkwa i, kagie Kedorlaomer we digo, ye kantri Elam sugl moglkwa. Ana king 5-pela nigl Jordan umara i ere mogl, bugla yugu 12-pela mere yegl, king Kedorlaomer ye bitno moglkwa ikra taks teigwa. Taks te ede pi bugla yugu 13 mina ye mogl pere ede, Kedorlaomer moglmara atne kra moglkramnedi taks tekrikwa. Taks tekrikwa pre bugla yugu namba 14 we, Kedorlaomer ere mogl, king suota ade umara kra akie meglkwa i amino bogl di makai sidre, kuda bogl, king 5-pela i tenagledi erukwa. King suota i, ta kagie Amrafel, ye kantri Babilonia sugl moglko, king ta kagie Ariok, ye kantri Elasar sugl moglko, te king ta kagie Tidal, ye Goim yoba kingno moglkwa. King suota i amino bogl wigo, Kedorlaomer bogl u swara pi mogl, king 5-pela nigl Jordan umara meglkwa i kuda bogl tenamnedi wigwa. Ye u yoba pere pere dumo suna mogl wigwa i kuda bogl tedre, yobuglo ere wigwa. Ye Refaim yoba dumo Asterot Karnaim we dimara meglkwa i kuda bogl tedre, Sus yoba dumo Ham we dimara meglkwa i kuda bogl tedre, Em yoba dumo Save Kiriataim we dimara meglkwa i kuda bogl teigwa. Yoba i kuda bogl tedre, ye ama Hor yoba we digwa, ye kamun muglo nem ta meglkwa, ye dumo makan Seir we dimara suna meglkwa i kuda bogl tedre, ye sika si ede pi dumo Elparan we dimara eigwa. Dumo Elparan i, dumo wau yomara bina yogwa. Ye yegl ersre, ede ikne u, dumo ta Enmispat we dimara wigwa. Dumo Enmispat i, erme Kades we dumga. Enmispat udre, ye Amalek yoba dumo tau meglmara i mudu kuda bogl tedre, yobuglo erikwa. Ersre, Amor yoba dumo Hasason Tamar meglkwa i ama kuda bogl tedre, yobuglo erikwa.
King 4-pela ikra yoba pere pere kuda bogl tedre, yobuglo ere wigo, king 5-pela nigl Jordan umara kipai meglkwa i, ye King 4-pela amino bogl i kuda bogl norarimedi prisre, amino bogl u, dumo auduno ta yogwa kagie Sidim we dimara kuda bogl tenamnedi makai sigwa. Dumo Sidim auduno yogwa i, erme mudi nigl Detsi we dumga i ake wai dugwa.
10Dumo Sidim i, nigl nubun mere yegl bage bage meglkwa. Meglkwa ba atne i, nigl yoko moglkrukwa. Nigl kama ta ede nuglo mere yegl moglkwa, kolta we digwa. King 4-pela i ya king 5-pela i amino bogl kuda beglko, king 4-pela amino yobuglo eriko, Sodom yoba ya Gomora yoba kingno bogl teke eigwa. Teke eigo, tau nigl kama i moglmara yage atne si, ede nigl kama i mina atne eigo, tau teke ede pi muglo paimara eigwa. 11Eigo, king 4-pela ikra amino bogl kaya mokna ya taragl mudu dumo Sodom ya Gomora yogwa idre, ede eigwa. 12Ye ama Abram agigle wam Lot taraglmo bogl i ede eigwa. Lot okna kana u, Sodom suna kipaugwa pre yegl erikwa.
13Ana Abram ye yagl Mamre edemo ok paimara kipaugwa. Mamre ye Amor yoba ta moglkwa, agigle suo ama miurka, kagno, Eskol ya Aner. Yagl suota i ye Abram bogl okna ka di padiglkwa, Nono munara kuda ta panan, nono nono ake ple di kuda eramne di, ka yegl di padiglkwa. Ana yagl ta kuda king wagle beglkwa ikra teke ogwa u, kuda siragl mere paugwa ye Hibru yagl Abram ikra di togwa. 14Di tedre, ye ama Kuda ikne yobuglo ere u, ene agitn wam Lot si kane sidre, i ede eimiwe di, Abram yegl di togwa. Abram prisre, ye nigl kogonmo yagl tau okna kuda boraiglmedi obuno di togwa i, i makai sidre, ye ede okna pi, king 4-pela ikra sika si ogwa. Ogo, ye nigl kogonmo yagl i akie eigwa. Ye sika si ede pi dumo Dan we dimara eigwa. Nigl kogonmo yagl i, 318-pela meglkwa. Ye mudu mano kugl yogwa igne ede u kade meglkwa igne, Abram nigl kogonmo yoba meglkwa. 15Dumo Dan pi, kuda ikne meglmara magigl eigo, Abram nigl kogonmo yagl yubu si, bage suo edugwa. Edugo, ye eduer king 4-pela ikra amino bogl kuda bogl tedre, yobuglo erikwa. Yobuglo ersre, kuda ikne sika si ede pi dumo ta Hoba we dimara eigwa. Dumo Hoba i, Dumo Damaskus we dimara nigl bre kra yogwa. 16Sika si pidre, ye Abram agigle wam Lot taraglmo bogl ya abu ya yoba tau si kane sigwa i ya taragl mudu king 4-pela i ede eigwa ikra mudu idre, ede ikne wigwa.
Melkisedek ye Abram di wakai yei togwa
17Ana Abram ye king Kedorlaomer ya king tau amino bogl akie meglkwa i kuda bogl tedre, yobuglo ersre, ede ikne ugwa. Ede ikne u moglko, Sodom king ikra ye Abram tegigl yenabugledi dumo auduno ta yogwa Save we dimara ogwa. Dumo Save i, erme King Dumo Auduno we dumga. 18Sodom king Abram tegigl yenabugledi ogo, dumo ta Salem king ama bret ya wain nuglo Abram tenagledi i ede ogwa. Salem king i, kagie Melkisedek we digwa. Ye dumo i king moglsre, ye ama yoba tawa tenamnedi erikwa i idre, ye tawa God Mogl Mitna Kaima Edugwa togwa yoba moglkwa. 19Ye Abram tegigl yedre, ogo ake mina ede, Abram yegl di wakai yei togwa, God Mogl Mitna Kaima Edugwa, ye kamun ibo nem moglsre, makan atne nem moglkwa. Ye ene ere wakai ere tenabiwa. 20God Mogl Mitna Kaima Edugwa i, ye ene ake ple di togo, ene kuda ikne kuda bogl tedre, yobuglo etnga. Ye sigie kagie wanabiwe di, yegl dugwa. Yegl dugo, Abram ere mogl, bonagana mudu ye king 4-pela kuda bogl tedre, ikne edugwa i, yubu si bage 10-pela edidre, bage swara ta Melkisedek togwa. 21Abram ye bonagana bage swara ta ikra Melkisedek togo, Sodom king ere mogl, yegl dugwa, Yoba si kane sigwa ene yunga i, narsre, enene bonagana inatniwe dugwa. 22-23Dugo, Abram di ikne ede, yegl dugwa, Na Yawe, God Mogl Mitna Kaima Edugwa, kamun mina ibo ya makan atne nem moglkwa i, ka giglede di te, taragl swara ta ikragle diga. Na ene taraglnen, kan kebra mo yoba kaglno towo kan mo taragl kebra yegl mere swara ta ikraglka. Ikribo, ene Abram na taraglnana idre, taragl mere kan nome di, yegl ta dikratnga. 24Ana na niglna kogona kumugl kaya mokna ta i teiga, ne kodigwa i, pra iga. Na taragl pere ta ikraglka. Ta ikraglka ba yagl suota Aner ya Eskol ya Mamre akie pi kuda bogl tomga pre ye taragl tau yubu si to! dugwa.
Currently Selected:
Oknayene Ibo 14: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
