Oknayene Ibo 25
25
Abraham wama ya gawama kagno paugwa
1Ana Abraham abu pere ta yugwa, kagie Ketura we digwa. 2Ye yagl gak tau kuglkwa, kagno Simran ya Joksan ya Medan ya Midian ya Isbak ya Sua we digwa. 3Ana ye wam Joksan we, ye ere mogl, yagl gak suo kuglkwa, kagno Seba ya Dedan. Te, Dedan we, ye gawama Asur yoba ya Letus yoba ya Leum yoba meglkwa. 4Te, Ketura wam Midian we, ye yagl gak tau kuglkwa kagno Efa ya Efer ya Hanok ya Abida ya Elda. Yagl gak kagno magigl paugwa i, ye mudu Ketura wama ya gawama meglkwa.
5Ana Abraham ere mogl, Na goglbo, na wana Aisak taraglnana mudu inabiwe di, yegl mere di paduglkwa. 6Yegl di paduglkwa ba ye nigl kogonmo abu suo yugwa i wanoma we, Abraham kor moglkwa igne, ye taraglmo tau wama i tedre, ye wam Aisak moglmara eglke moraiglmedi dedugo, ye ede pi ade umara kra meglkwa.
Abraham goglko, kobuglo mur yeigwa
7-8Ana Abraham kidagl kaima yogo, dem muduo aragan eruko, ye bugla yugu 175 nedre, goglkwa. 9Ye goglko, ye wam suo Aisak ya Ismael dumo Makpela kobuglo mur yomara ikra yebrika. Kobuglo mur i okna Hit yoba Efron, Soar wam ikra makanmo mina yogwa. Makan i, dumo Mamre we dimara ama magigl yogwa. 10Makan i okna Hit yoba makano yogwa ba Abraham topo sugwa pre ye makanmo yogwa. Dumo i, Sara goglko, Abraham okna paduglmara Aisak ya Ismael ye neno Abraham goglko, padiurka. 11Abraham goglko, God ye Abraham wam Aisak ere wakai ere togwa. Aisak ye maugl nigl Bir Lahai Roi moglmara ikra kipai moglkwa.
12Ana ka magigl paugwa i, Abraham wam Ismael wama ya gawama kagno paugwa. Sara nigl kogonmo abu Hagar, Isip mam ikra ye Ismael kuglkwa. 13Ana Ismael ere mogl, yagl gak tau kuglkwa, kagno magigl i paugwa. Ye gak ta komono kuglkwa i, kagie komono paugo, gak tau okuo kuglkwa kagno okuo paugwa. Ye wam komono i, kagie Nebaiot we digwa. Te, okuo ye Kedar ya Atbel ya Mipsam kuglsre, 14Misma ya Duma ya Masa kuglsre, 15Hadat ya Tema ya Jetur ya Nafis ya Kedema kuglkwa. 16I Ismael wam 12-pela kagno paugwa. Wam 12-pela i okuo yagl kade moglsre, yugobuno pere pere sugl meglkwa. Te, ye yobanoma okuo meglkwa we, yene nenoma 12-pela i kagno idre, dumo tau ye yugu kipaimara ya sel yugu kipaimara kagno 12-pela i teigwa. 17Ismael ye bugla yugu 137 nedre, goglkwa. 18Te, ye gawama we, ye makano dumo ta Havila we dimara yei ede pi dumo Sur we dimara ogwa. Dumo Sur i, Isip yomara ade umara kra yogwa. Kantri ta Isip ya kantri Asiria we digwa i, dumo Sur i, suna yogwa. Ismael gawama dumo i kipai moglsre, kuda ikne ikne meglkwa.
Rebeka Iso ya Jekop kuglkwa
19Ana ka magigl paugwa i, Abraham wam Aisak ya ye gawama kano paugwa. Ana Abraham ye Aisak kuglkwa. 20Kuglko, Aisak ere mogl, bugla yugu 40 nedre, Rebeka yugwa. Rebeka ye Laban abauglo moglsre, Aram yagl Betuel dumo makan Mesopotemia suna kipai moglkwa ikra abuglo moglkwa. 21Aisak ye Rebeka yugo, Rebeka temne paugwa. Ye temne paugwa pre Aisak ye gak ta kurabedi Yawe kamage ere togwa. Ye kamage ere togo, Yawe ye kamo prisre, Rebeka ake ple di togo, Rebeka dane paugwa. 22Ye dane paugwa i, wam suo dane mina mogl, ake nu si ikne ikne edibrika. Yegl eribrika pre Rebeka ere mogl, I siragl pre na moglmara plau dumada di, yegl kina gudu prukwa. Yegl kina gudu prisre, siragl pre plau dugwa i pragledi pi, Yawe agle di prukwa. 23Agle di pruko, Yawe ye yegl di togwa, Ene gak suo kuratnga i, ye gawanoma yugobuno suo moraiglkwa. Ye ede pere pere pi, yugobuno pere pere meglbi, yugobuno swara ta yobuglo ere yugobuno ta tenaiglkwa. Te, gak ta komono kuratnga i, ye gawama ere mogl, gak ta okuo kuratnga gawama i, nigl kogono ere tenaiglmiwe dugwa.
24Ana Rebeka dane paugo, ye gak kurabuka egemo ugo, ye yagl gak suo kuglkwa. 25Ta komono kuglkwa i, gagie gogl kogl, gagie yugo mere kaima boglkwa. Yoba taragl are ere sidre, nagie kugl yaursre, gagie yugo pai moglko, i pi kugugl gagl erikwa yegl mere yoba yagl gak i gagie yugo yegl mere yomedi kanigwa. Yegl pre ye kagie Iso#25.25 Ka Hibru mina, kagie Iso mabuno paugwa, ogo gagie yugo mere boglkwa. we digwa. 26Te, Rebeka yagl gak ta ama kuglkwa we, ye Iso kagle beye ake moglko, mam ye kuglkwa. Yegl pre ye kagie Jekop#25.26 Ka Hibru mina, kagie Jekop mabuno suo paugwa. Ta, kagle beye akugwa. Ba ka i ama mabuno ta paugwa, yoba bakagl togwa. we digwa. Aisak ye bugla yugu 60 ne kodugwa igne, Rebeka yagl gak suo i kuglkwa.
Iso komono moglkwa ba agaimo kide kodugwa
27Ana yagl gak suo i yake kade miurka igne we, Iso taragl are ere si nedre, kugl waiwai yoba moglkrimara wan moglkwa yagle moglkwa. Ye yegl erukwa ba Jekop ye kiede moglsre, yoba sel yugu kipaimara yugomugl keme wanugwa. 28Ana Aisak ye taragl are si keigwa ne, wakai prukwa pre ye Iso wakai kanugwa. Te, Rebeka we, ye Jekop wakai kanugwa.
29 Ana aglke ta, Jekop sup ta gagl moglko, Iso kugl waiwai yoba moglkrimara wan moglsre, kidan podo kide gogl ede ikne ugwa. 30Ye ede ikne udre, ye Jekop yegl di togwa, Na kidan podo goglka. Ene bin gogl idre, sup gaglnga i tau yubu si naro! dugwa. Yegl pre ye kagie ta Idom#25.30 Ka Hibru mina, kagie Idom mabuno paugwa, gogl. we digwa. 31Ye agigle yegl di togo, Jekop di ikne ede, yegl dugwa, Ene komono motnga pre neno goran, ene yagl kade moglsre, taraglmo mere ene inatnga. Ene againen i ta natn, sup gaglka i nenatne dugwa. 32Yegl dugo, Iso aglke dugwa, Ene kano! Na gorarika. Na againana ake gi didre, na ta goglbo, againana wagle siragl eragle? dugwa. 33Iso yegl dugwa ba Jekop aglke kor yegl dugwa, Ene againen na naratnga pre ka giglede di nare padigln, sup tenagle dugwa. Dugo, Iso ye dumere ka giglede di te paduglkwa. Ana Iso yegl mere ye agaimo topo bogl nogo, Jekop yugwa. 34Iso ka giglede di te paduglko, Jekop ye bin sup ya bret tau yubu si togo, Iso taragl i nigl bogl ame di mogl nedre, adigl ede ogwa. Ye agaimo agigle okuo togwa i pre yubun dekre, ede ogwa.
Currently Selected:
Oknayene Ibo 25: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
